LUKAS 21:1 - KITTA' MATANGKASA'

¹ Ri Balla'Na Batara, Naciniki Isa tu kalumanynyanga appantama' doe' passidakka ri pammoneang passidakkaya.

LUKAS 21:1 Iomraidhean Croise

1 KARAENG-KARAENG 14:26

Narampasaki sikontu barang-barang tinggia anggaranna ia niaka lalang ri Balla'Na Batara siagang ri balla' kakaraenganga, kammayatompa pakkakasa'-pakkakasa' bulaeng nasuro pareka Salomo.

2 KARAENG-KARAENG 12:9

Jari angngallemi Yoyada se're patti-patti pammantangngang nampa naso'bolo' irate ri pattongko'na, nampa napadongko' ri ampi'na tampa' pakkoro'bangnganga ri sa'ri kananna pakke'bu' antamaya ri Balla'Na Batara. Sikontu doe' nipassareanga ri Balla'Na Batara nipantamaki ri anjo pattia ri imang-imang tugasaka ri pakke'bu' antamaya.

2 KARAENG-KARAENG 24:13

Sikontu pakkakasa' bulaeng napareka Karaeng Salomo untu' Balla'Na Batara, nipanraki ri Nebukadnezar. Nampa sikontu barang-barang niaka anggaranna lalang ri anjo Balla'Na Batara siagang ri balla' karaenga naengkaki mange ri Babel. Sikontu anjo passalaka kajariangi situru' apa le'baka Napau riolo Batara.

2 PATTOTTORANG 36:18

Sikamma pakkakasa' niaka ri Balla'Na Batara, barang-barang lompoa anggaranna, kammayatompa barang-baranna karaenga siagang pagawe-pagawena nirampasa' kabusuki ri karaeng Babel nampa nierang mange ri Babel.

NEHEMIA 13:13

Kusuromi siapa are tau untu' anjannangngi anjo kamara'-kamara' parsadiaanga. Ia ke'nanga iamintu: Imang Selemya, Zadok iamintu tu panritaya ri Hukkunga, siagang Pedaya se're tu Lewi. Hanan ana'na Zakur siagang cucunna Matanya, kusarei tugasa' untu' ambantui ke'nanga. Kuassengi angkana sikamma anjo taua akkullei nipatappa' siagang lanaurusuki pambageanna anjo bahang-bahanga mae ri sipanjamanna ngaseng siagang lambusu'.

MATIUS 27:6

Mangemi imang-imang kapalaya anrappungi anjo doeka. Na nakana ke'nanga, “Anne doeka, doe' cera'. Situru' atoranga ri agamaya, anne doe' kammaya takkulleai nipantama' ri pammoneang passidakkanga lalang ri Balla'Na Batara.”

LUKAS 20:47

Nangai ke'nanga antipui siagang angngalle passai balla'na janda-jandaya. Kammayatompa nangai ke'nanga alla'bu-la'bui sambayanna, sollanna akkulle nacokko kaja'dallanna ke'nanga! Iaminjo nateai sipato' battala'na hukkunganna ke'nanga sallang!”

YOHANES 8:20

Niaki lalang ri Balla'Na Batara angngajara' wattunna Napau ngaseng anne bicaraya. Anjorengi ri ampi'na patti-patti doe' pakkoro'bangnganga anjo wattua. Mingka tenanniakka manna sitau anjakkalaki Isa, lanri tenapa nanarapiki wattunna.

YOSUA 6:19

Sikontu barang-barang pera', bulaeng, tambaga, siagang bassia musti nisa'laki untu' Batara, nampa niboli' ilalang ri tampa' pammolikang barang-baranNa Batara.”

YOSUA 6:24

Nampa natunu tantara Israel sikontu anjo kotaya siagang sikontu apa-apa niaka lalang, pantaranganna barang-barang bulaenga, peraka, tambagaya siagang bassia. Anjo barang-barang kammaya naallei ke'nanga siagang naerangi mange ri tampa' pammolikang barang-baranNa Batara.