LUKAS 2:4 - KITTA' MATANGKASA'

⁴ A'lampa tommi Yusuf ambokoi Nazaret ri Galilea. Mangemi ri Betlehem ri Yudea, kampong kalassukanna Karaeng Daud; nasaba' anjo Yusuf sossoranna tongi Karaeng Daud.

LUKAS 2:4 Iomraidhean Croise

PA'JARIANG 35:19

Matenamo Rahel, nitarawammi ri biring agang mangea ri Efrata, ia niarenga kamma-kamma anne Betlehem.

PA'JARIANG 48:7

Anne kugaukangi kammaya, untu' Rahel amma'nu. Lalang ri pa'jappangku ammotere' battu ri Mesopotamia, matemi amma'nu ri butta Kanaan, tena nabella battu ri Efrata, nasanna' si'nana pa'maikku. Kutarawangi anjoreng, ri biring agang mangea ri Efrata.” (Kamma-kamma anne Efrata niaremmi Betlehem.)

MIKHA 5:2

Jari, laNalappassangi Batara nikoasai umma'Na ri musu-musunna ke'nanga, sa'genna baine le'baka nipattantu untu' a'jari anrong ri anjo tumakoasaya, nalassukammi anjo Anaka. Le'baki anjo, sikamma julu bansana niaka ri pammelakkanga lanipakase'rei ammotere' siagang bansana ke'nanga.

MATIUS 1:20

Mingka lalang nanawa-nawana Yusuf eroka a'lampa, asso'nami ri wattunna tinro. Lalang asso'nana, nia'mo nacini' sitau malaeka'Na Batara battu mae ri ia angkana, “E, Yusuf, sossoranna Daud, teako mallakki a'nikka siagang Maria; nasaba' anjo ana' natiananganga, pa'jari battu ri gau' makoasaNa RohNa Allata'ala.

MATIUS 2:23

Anjoremmi ammantang ke'nanga, ri se'reang kota nikanaya Nazaret. Lanri kammana, a'rupami apa le'baka napau na'bi-na'bia ri passala'na anjo Anaka angkanaya, “Lanigallaraki Tu Nazaret.”

LUKAS 2:3

Jari massing ammotere' ngasemmi taua ri kamponna, assuro bilangi kalenna.

LUKAS 2:5

A'lampa tongi siagang Maria, assuro bilangi kalenna. Battuna mange ri Betlehem, tenamo nanggappa ke'nanga balla' pa'bangngiang, napakamma jaina tau battu mange anjoreng. Lanri kammana, mange mami ke'nanga ri se'reang bara sapi a'bangngi. Na anjo wattua tianammi Maria, siagang narapi'mi wattunna lammana'. Nalassu'mo anjo ana' bungasa'na, sitau ana' bura'ne. Nakalimbukimi care-care anjo anaka, nampa napatinro lalang ri tampa' pangnganreang olo'-oloka.

LUKAS 4:16

A'lampa tommi Isa mange ri Nazaret, kampong le'baka Napammantangi sa'genna lompo. Kamma kabiasanNa, a'lampami mange ri balla' sambayanga ri wattunna allo Pammari-marianga. Ammentemmi ero' ammaca Kitta'.

YOHANES 1:46

Mingka appialimi Natanael nakana, “Maka akkulle tongi apa-apa bajika labattu ri Nazaret?” Appialimi Filipus nakana, “Mae mako nakalennu anciniki.”

YOHANES 7:42

Kania' tattulisi' lalang ri Kittaka angkanaya anjo Karaeng Mappasalamaka sossoranna Daud siagang labattu anjorengi mae ri Betlehem, iamintu kamponna Daud.”

RUT 1:19

Jari napatulusu'mi lampana ke'nanga, sa'genna anrapi' mange ri Betlehem. Kamma battuna ke'nanga mange anjoreng, gegere'mi taua ri sikontu anjo kotaya. Nakana ngasemmo tubai'-bainea anjoreng, “Maka Naomi tojengka anjo?”

RUT 2:4

Tena nasallo battumi Boas battu ri Betlehem na'barisallang mae ri sikamma pakattoa. Nakana, “Poro Narurungang ngasengko Batara.” Appialimi sikamma pakattoa angkana, “Poro Nabarakkakiki' Batara”.

RUT 4:11

Sikamma tutoa-toana masarakaka siagang tumaraengannaya ia hadereka anjoreng massing angkanami, “Iyo, ikambemi sa'bina. Tapporo nipa'jari anjo bainennu ri Batara sangkamma Rakhel siagang Lea, allassukanga jai ana' untu' Yakub. Tapporo kalumanynyangko ri tangnga-tangngana tau battua ri bijanna Efrata, siagang tapporo alla'bangko niasseng ri Betlehem.

RUT 4:17

Sikamma bai'-baine siampi'-ampi' balla'na ke'nanga assarei areng anjo anaka nikana Obed. Mae ri sikamma taua nakana ke'nanga, “Nia'mo ana'na Naomi sitau bura'ne!” Iaminne Obed sallang a'jari manggena Isai, nampa Isai iami manggena Daud.

1 SAMUEL 16:1

Siapa are wattu ribokoanganna, Nakanamo Batara mae ri Samuel, “Siapapi sallonu lasi'na pa'mai' passabakkang Saul? Sai ia tenamo naniakui salaku karaeng Israel? Kamma-kamma anne angngalleko minynya' zaitun, siagang a'lampako mange ri Betlehem, mange ri se'reang tau niarenga Isai, nasaba' kalase'renna ana'na Kupilei a'jari karaeng.”

1 SAMUEL 16:4

Nagaukammi Samuel situru' anjo Napaua Batara. Ri wattunna battu mange ri Betlehem, niruppaimi ri sikamma pamimpinga ri anjo kotaya. Nata'bangka ke'nanga siagang akkuta'nang angkana, “Maka kabara' kasalamakkang anne naerang kabattuanna bapa'?”

1 SAMUEL 17:12

Daud iamintu ana'na Isai tu Efrata, battu ri Betlehem ri Yehuda. Isai nia' sagantuju ana'na bura'ne. Na ri wattu pamarentahanna Saul, toa sikalimi Isai.

1 SAMUEL 17:58

Akkuta'nammi Saul ri ia angkana, “E turungka, inaiko antu?” Appialimi Daud angkana, “Anne atanta ana'nai Isai battu ri Betlehem.”

1 SAMUEL 20:6

Punna akkuta'nang manggenu angkanaya angngapa nakutena hadere', pauammi angkana, le'ba'ma' appala' ising battu ri kau untu' ammotere' linta' mange ri Betlehem, lanri anjoreng nia' pa'gaukang koro'bang taung-taung nagaukanga sikontu kaluargaku.