LUKAS 18:11 - KITTA' MATANGKASA'

¹¹ Anjo tu Farisia akkale-kalemi ammenteng nampa appala' doang lalang ri atinna nakana, ‘O, Allata'ala, appala' sukkurukka' mae ri Katte, lanri tena kusangkamma tau maraenga; tena kusangkamma tau angngoaya, tau jekkonga, yareka tau a'gau' bawanga. Appala' sukkurukka', lanri tena kusangkamma anjo pasingara' simaya.

LUKAS 18:11 Iomraidhean Croise

PAMMUJI 134:1

Kelong siara. Umba, pujimi Batara, he sikontu atanNa Batara, sikontu a'gau' ibadaya ri Balla'Na Batara ri wattu bangngi.

PAMMUJI 135:2

a'gau' ibadaya ri Balla'Na Batara ri pammantanganNa Allata'alata.

PANGNGEBARANG 20:6

Jai tau nakana kalenna agang, mingka tau tenaya tojeng pamminrana, sukkaraki nigappa.

PANGNGEBARANG 30:12

Nia' tau nakanai kalenna tangkasa' na sitojenna sanna' rantasa'na.

YESAYA 1:15

Punna nupatara limannu appala' doang, tena Kuero' amparhatikangi. TaKujampangiai angkana siapa jaina pappala' doannu, taerokA' ampilangngeri, nasaba' iaminjo limannu jai sikali tau nabuno.

YESAYA 58:2

Tunggala' alloi anynyomba ke'nanga mae ri Nakke, siagang eroki naasseng erokKu, kamma nicini' angkana bajiki apa nagaukanga ke'nanga, siagang majarreki mae ri hukkungKu. Nakana ke'nanga angkana sannangi nyawana anynyomba ri Nakke siagang nakellai adele' hukkungKu.”

YESAYA 65:5

Nakana ke'nanga, ‘Bellako, teako seroi ikambe, saba' ikambe anne tangkasakki' siagang tassa'lakki' battu ri kau ngaseng!’ Tena Kuparrangngi anciniki panggaukanna ke'nanga! A'rinrai larroKu mae ri ke'nanga rapang pepe' tenaya nakkulle mate.

YEREMIA 2:28

Kemae ngaseng anjo barhala-barhala nupareka? Punna nia' kasukkarang, suromi anjo sikamma barhalaya ampasalamakko' punna akkullei! He Yehuda, anjo rewata-rewatanu sangkammai jaina kota-kotanu!

YEREMIA 2:35

nukana ija kalennu tena nusala, angkanaya tena Kularro mae ri kau. Mingka iNakke, Batara, laKuhukkungko lanri tenana nuero' mangaku angkanaya salako.

YEHEZKIEL 33:31

Battui ke'nanga a'gapullung siagang salaku ummakKu ammempoi ke'nanga ampilangngeri kana-kanannu, mingka anjo apa nuparentakanga tena naturuki ke'nanga. Muncenna ke'nanga appasuluki kana-kana mangngai mingka atinna ke'nanga sangnging passawallanji nanawa-nawa.

MIKHA 3:11

Pamarenta-pamarenta kotaya ammarentai untu' anggappa doe' pacoco', imang-imanga angngajaraki hukkunNa Batara untu' anggappa gaji, siagang na'bi-na'bia appalaki pangngunju' battu ri Allata'ala untu' anggappa doe' – nampa nakapang ngasengi ke'nanga angkanaya Niagangngangi ke'nanga ri Batara. Nakana ke'nanga, “Niaki Batara ri tangnga-tangngata; tena nalanatujuki' bala.”

MATIUS 10:3

Nampa Filipus siagang Bartolomeus, Tomas siagang Matius pasingara' simaya; kammayatompa Yakobus ana'na Alfeus, siagang Tadeus;

MATIUS 5:20

Jari u'rangi anne: Takkulleako a'jari umma'Na Allata'ala, punna tena nabajikangang batenu anggaukangi ero'Na Allata'ala naanjo guru-guru agamaya siagang tu Farisia!”

MATIUS 6:5

“Punna assambayangko, teako sangkammai tau munapeka. Anjo ke'nanga nangai ammenteng assambayang lalang ri balla' sambayanga, yareka ri panyingkulu'na aganga, lanri eroki nicini' ri tau jaia. U'rangi angkanaya iatommi anjo pahalana ke'nanga punna nicini'mo ri tau jaia assambayang. Pantaranganna anjo, tenamo pahala maraeng lanagappa ke'nanga.

MARKUS 11:25

Siagang punna appala' doangko, mingka tena nasannang nyawanu ri se'reang tau, pammopporangi rolong anjo taua, sollanna Napammopporang tongi Manggenu ri suruga dosa-dosanu. [

LUKAS 20:47

Nangai ke'nanga antipui siagang angngalle passai balla'na janda-jandaya. Kammayatompa nangai ke'nanga alla'bu-la'bui sambayanna, sollanna akkulle nacokko kaja'dallanna ke'nanga! Iaminjo nateai sipato' battala'na hukkunganna ke'nanga sallang!”

LUKAS 22:41

Nampa a'lampa Kale-kalenNa kira-kira nia' sipasambila batu bellana battu ri ke'nanga.

GALATIA 3:10

Sikamma tau tanjenga mae ri hukkung-hukkung agamaya, laniparawa ngasengi ri pangngalarroiNa Allata'ala. Nasaba' nia' tattulisi' lalang ri Kittaka angkanaya, “Inai-nai tena najarre' anggaukangi apa-apa tattulisika lalang ri Kitta' Hukkung Agamaya, langgappai pangngalarroi battu ri Allata'ala!”

FILIPI 3:6

Ba'lalo, lanri lompona sumangakku, sa'genna kusessamo anggota jama'aka. Punna niciniki battu ri passala' hukkung-hukkung agama Yahudia, inakkemi tau baji' siagang tena callangku.

PAPPICINI' 3:17

Nukana ngaseng: Akkalumanynyangko siagang ganna' mako ri katallassannu; tenamo apa-apa kakurangannu. Mingka tanuassengai kalennu angkanaya teai sipato' kasi-asinu, siagang teai sipato' appakasi'nana katallassannu. Kasi-asiko, assolarakko, siagang butako.