LUKAS 16:15 - KITTA' MATANGKASA'

¹⁵ Mingka Nakanamo Isa ri ke'nanga, “Ikau ngaseng mintu bajika ngaseng nicini' ri dallekanna tau maraenga, mingka Naassengi Allata'ala bonena atinnu. Nasaba' apa nacini' tinggia rupataua iami Nacini' tuna Allata'ala.

LUKAS 16:15 Iomraidhean Croise

1 PATTOTTORANG 29:17

Kuassengi angkanaya Kiso'ri massing-massing atinna taua, siagang Kingai tau tangkasaka atinna. Lalang ati matulusu' siagang sannang nakupassareang yangasenna anne mae ri Katte. Kusa'bimi antekamma batena a'rappungang ummatTa anrinni angngerang passare mae ri Katte situlusu' atinna.

2 PATTOTTORANG 6:30

poro Kipilangngeri battu ri pammantanganTa ri suruga siagang Kipamopporangi ke'nanga. IKatteji bawang angngassengi atinna rupataua. Lanri kammana anjo Kibalasa'mi mae ri tunggala' taua situru' massing panggaukang-panggaukanna,

PAMMUJI 10:3

A'bicara borroi tu ja'dalaka untu' kaerokang ja'dala'na, tau angngoaya natunrai siagang natollaki Batara.

PAMMUJI 49:13

Takkulleai rupataua tulusu' lattallasa' assannang-sannang; sanrapang olo'-olo', laposso' tongi.

PAMMUJI 49:18

Saba' ri wattunna mate takkulleai angngerang apa-apa, talanaerang tongi pa'barang-baranganna naung ri kiburuka.

PAMMUJI 7:9

IKatte angngadeli umma' rupataua; Kisarea' kaadelang, o Batara, saba' tena kusala.

PANGNGEBARANG 16:5

Sikontu tau borroa nikabirisi ri Batara; tena Nakellai ke'nanga ta'lappasa' battu ri hukkunganga.

PANGNGEBARANG 20:6

Jai tau nakana kalenna agang, mingka tau tenaya tojeng pamminrana, sukkaraki nigappa.

PANGNGEBARANG 21:2

Tunggala' panggaukanna taua nakanai baji' ri paccini' kalenna, mingka Batara angngassengi nakaerokia pa'mai'na.

YEREMIA 17:10

INakke, Batara, ansalidiki atia, Kuso'ri pa'mai'na rupataua. Tunggala' taua laKubalasaki situru' panggaukanna siagang Kugauki situru' panggaukanna.”

MALEAKHI 3:15

Mata kalenta anciniki antekamma mate'nena tau tampoa. Tena napila' salewangang bawang tau ja'dalaka, mingka punna naso'ri kasa'baranNa Allata'ala lalang kaja'dallanna ke'nanga, tena tonja namangngapa-apa.’ ”

MATIUS 23:5

Sikontu anjo apa nagaukanga ke'nanga poro ero'naja napappicini'-cinikang ri taua. Napakkunjung-kunjungiammi ke'nanga ammake soro'bang siagang juba turunga!

MATIUS 6:16

“Punna appuasako, teako pinra-pinrai tanja'nu a'jari susa, kamma tau munapeka. Anjo tau munapeka nangai napinra-pinra tanja'na a'jari kamma tau susa punna appuasai, lanri ero'na niasseng ri taua angkanaya appuasai. U'rangi angkanaya ia tommi anjo pahalana ke'nanga punna niassemmo ri taua angkanaya appuasai. Pantaranganna anjo tenamo nalanggappa pahala maraeng ke'nanga.

MATIUS 6:2

Jari, punna assareko passidakka mange ri tau kasi-asia, teako pau-paui mange ri tau maraenga, sangkamma sarroa nagaukang tau munapeka ri balla' sambayanga yareka ri tangngana aganga, lanri eroki nipalece ri taua. U'rangi angkanaya ia tommi anjo pappalecea a'jari pahalana ke'nanga. Pantaranganna anjo pappalecea tenamo pahala maraeng lanagappa.

MATIUS 6:5

“Punna assambayangko, teako sangkammai tau munapeka. Anjo ke'nanga nangai ammenteng assambayang lalang ri balla' sambayanga, yareka ri panyingkulu'na aganga, lanri eroki nicini' ri tau jaia. U'rangi angkanaya iatommi anjo pahalana ke'nanga punna nicini'mo ri tau jaia assambayang. Pantaranganna anjo, tenamo pahala maraeng lanagappa ke'nanga.

LUKAS 10:29

Mingka ero'mi napattojeng kalenna anjo guru agamaya. Jari akkuta'nammi pole nakana, “Inai anjo parangku tau?”

LUKAS 11:39

Lanri kammana, Nakanamo Isa ri anjo tu Farisia, “Memang ikau tu Farisia, biasana nutangkasi bageang pantaranganna mangkoka siagang piringa; mingka bageang lalanganna sanna' ra'masa'na lanri tena nutangkasi. Kamma tomminjo sanrapanna bageang lalanganna kalennu, teai sipato' ra'masa'na napakamma sekke' siagang kaja'dallang.

LUKAS 18:11

Anjo tu Farisia akkale-kalemi ammenteng nampa appala' doang lalang ri atinna nakana, ‘O, Allata'ala, appala' sukkurukka' mae ri Katte, lanri tena kusangkamma tau maraenga; tena kusangkamma tau angngoaya, tau jekkonga, yareka tau a'gau' bawanga. Appala' sukkurukka', lanri tena kusangkamma anjo pasingara' simaya.

LUKAS 18:14

Nakanamo Isa, “Patappa'mi angkanaya, ri wattunna ammotere' mange ri balla', iaminjo pasingara' simaya nitarima pappala'na ri Allata'ala. Jari teai pappala'na anjo tu Farisia. Nasaba' inai-nai ampakatinggi kalenna iami lanipakatuna. Na inai-nai ampakatunai kalenna, iami lanipakatinggi.”

LUKAS 18:21

Appialimi anjo taua nakana, “Sikamma anjo parenta kammaya kuturukimi appakkaramula ri rungkaku.”

LUKAS 18:9

Nacarita tommi Isa anne pangngebarang tattujua mange ri tau ancini' tunayai paranna tau, na nakana kalennaji bawang baji'.

LUKAS 20:20

Jari a'boyami ke'nanga kasampatang baji'. Nia'mo se're tau nagaji ke'nanga sollanna assara-sarai a'jari tau lambusu' pa'mai', nampa nasuro anjo taua mange akkuta'nang siagang ampa'boyangi kasalang Isa. Napa'boyangi kasalang Isa, sollanna akkulle ke'nanga a'jamma' mae ri kakoasanna guburnurka, nanijakkala' Isa.

LUKAS 20:47

Nangai ke'nanga antipui siagang angngalle passai balla'na janda-jandaya. Kammayatompa nangai ke'nanga alla'bu-la'bui sambayanna, sollanna akkulle nacokko kaja'dallanna ke'nanga! Iaminjo nateai sipato' battala'na hukkunganna ke'nanga sallang!”

YOHANES 2:25

Tena naparallu nipauang ri passala'na massing rupataua, lanri Naassenna ngaseng apa niaka lalang ri atinna rupataua.

YOHANES 21:17

Akkuta'nammi pole Isa makapintallunna ri ia, Nakana, “Simon, ana'na Yona, maka nukamaseangA'?” A'jari si'nami atinna Petrus, lanri pintallummi akkuta'nang Isa ri ia. Jari appialimi pole Petrus nakana, “O Batara, sikamma apa-apaya Kiasseng ngasengi Batara. Kiassengi angkanaya kukamaseangKi' Batara!” Nakanamo pole Isa ri ia, “Parakaimi gimbalakKu ngaseng.

LAMPA-LAMPANA 1:18

Anne lapung Yudas anggappami butta untu' jera'na, a'jari sawala'na ri gau' kaja'dallanna ampasikongkolangi Isa. Tu'guru'mi naung ri buttaya namate, pue battanna, sa'genna assulu' ngaseng parru'na.

LAMPA-LAMPANA 1:24

Nampa appala' doang ke'nanga. Nakana ke'nanga, “O Batara, iKatte angngasseng ngasengi atinna sikontu rupataua. Tu'guru'mi Yudas battu ri empoanna salaku tunisuroTa, siagang matemi. Jari Kijo'jokang sai ikambe, kereanga ri anne tau ruaya Kipile antarimai anne jama-jamanga, ansambeangai Yudas.”

LAMPA-LAMPANA 15:8

Na Allata'ala angngassengi atinna rupataua. Iami ampappicinikangi angkanaya Natarimami ke'nanga. Jari Napassareang tommi RohNa Allata'ala mae ri ke'nanga, sangkamma le'baka Napassareang todong mae ri katte.

ROMA 3:20

Nasaba' tena manna sitau akkulle assibajiki siagang Allata'ala lanri nagaukanna apa-apa niaka tattulisi' lalang ri hukkung-hukkung agamaya. Ba'lalo anjo hukkung-hukkunga poro napappiassenganji bawang mae ri rupataua angkanaya ma'nassa dorakai rupataua.

ROMA 8:27

Allata'alaji angngassengi atinna rupataua; jari Iami angngassengi anjo apa Napalaka Roh. Nasaba' anjo Roh ampappalakkangi ri Allata'ala apa naparalluanga umma'Na Allata'ala; siagang situruki ero'Na Allata'ala anjo apa napalaka.

1 KORINTUS 4:5

Lanri kammana, nasaba' tenapa narapiki wattunna, teako akkaro-karo dudui ampattantui angkanaya salai yareka tena nasala se'rea tau. Tayangi sa'genna battu sallang Batara. Iami lassungke ngasengi sikontu rahasia taccokkoa lalang ri sassanga. Iami lampakacinikang ngasengi sikontu apa le'baka narancana lalang ri massing atinna taua. Iapi anjo wattua nampa massing lannarima taua pujiang siratannaya battu ri Allata'ala.

1 PETRUS 3:4

Mingka, anjo kaga'gannu parallui battu lalang ri ati mailalannu, battu ri panggaukang baji'nu, siagang tunanu ri pa'mai'; yangasemmi anjo kaga'gang satunggu-tunggua, sannaka lompona anggaranna ri paccini'Na Allata'ala.

1 PETRUS 5:5

Kammayatompa ikau sikamma tau rungkaya. Mappilangngeriko mae ri tau toaya. Musti nupakatunai kalennu; siagang musti silayaniko siagang tuna pa'mai'nu. Nasaba' nia' tattulisi' lalang ri Kittaka angkanaya, “Nabaliangi Allata'ala tau tampoa, mingka Nakamaseangi tau tunaya pa'mai'na.”

PAPPICINI' 2:23

Sikamma ana' gurunna laKubuno ngaseng tongi, sollanna nasadari ngaseng jama'aka angkanaya iNakkemi anne angngasseng ngasengi pikkiranna siagang nawa-nawanna rupataua. LaKubalasa' ngasengko situru' massing-massing panggaukannu.

1 SAMUEL 16:7

Mingka Nakana Batara ri Samuel, “Teako lanri ga'gana tanja'na siagang tinggina pakkaleanna nupacciniki. Teai anjo Kukaerokia. Tena Kusangkamma rupataua angnganggara'. Rupataua accini' tanjaki, mingka iNakke atinna Kuciniki.”