LUKAS 1:15 - KITTA' MATANGKASA'

¹⁵ La'jari tu nipakalompoi ri dallekanNa Allata'ala. Talangnginungai anggoro' siagang inungang terasa'. Pakkaramula battu ri nilassukanna lanirurungangi ri RohNa Allata'ala.

LUKAS 1:15 Iomraidhean Croise

PA'JARIANG 12:2

LaKusareko bija majai, siagang laKupa'jari ke'nanga bansa lompo ri lino. LaKubarakkakiko siagang laKupa'jari masahoroki arennu, sa'gennu la'jari barakka'.

PA'JARIANG 48:19

Mingka taerokai manggena, na nakana, “Kuassenji ana', kuassenji. Manasye lalompoi koasana, siagang turunganna la'jari tongi bansa lompo. Mingka andi'na lalompoangngangi koasana naia, kammayatompa turunganna andi'na la'jari bansa-bansa lompo.”

1 PATTOTTORANG 17:8

Le'ba' mako Kutulung manna kemae lampanu, siagang sikontu musunnu Kutumpasa' ngasemmi ri wattunnu a'bundu'. LaKupa'jari masahoroki arennu sangkamma pamimping-pamimping kaminang lompoa ri lino.

1 PATTOTTORANG 29:12

Sikontu kakalumanynyanganga siagang kasalewanganga iKatte ngaseng nakabattui; sikontu-kontuna iKatte ngaseng angkoasai lalang kagassinganTa siagang kakoasanTa; iKatte makoasa ampa'jari manna inai-nai a'jari tau lompo siagang magassing.

PAMMUJI 22:9

Nakana ke'nanga, “Lappassammi napattoang Bataraya, sollanna nipasalama' ri Batara, punna sannang Batara mae ri ia!”

YEREMIA 1:5

“Ri wattu tenanapa Kupa'jariko lalang ri battanna amma'nu, siagang ri wattu tenanapa nanilassukangko, le'ba' memang mako Kupile siagang Kuangka' untu' a'jari na'bi mae ri bansa-bansaya.”

YEREMIA 35:6

Mingka appiali ke'nanga angkana, “Tena nangnginung anggoro' ikambe. Boena ikambe iamintu Yonadab ana'na Rekhab, napisangkai ikambe kammayatompa jari-jarina ikambe angnginung anggoro'. Anjo pappisangkaya tappakei sa'genna satunggu-tungguna.

KAIMANGNGANG 10:9

“Punna le'bakko angnginung je'ne' anggoro' yareka inungang terasa', ikau siagang ana'-ana'nu takkulleako antama' ri KemaKu. Punna nudakkai anjo paratoranga, lamateko. Anjo parentaya musti naturuki sikontu jari-jarinu.

ZAKHARIA 9:15

Umma'Na mattantu laNasarei pa'la'langngang, sa'genna akkulle nabeta ke'nanga sikontu musua. Sanrapang pakkio'na tau nasa'ringa lanri angnginung, kammaminjo pakkio'na ke'nanga lalang pa'bundukang. Sanrapang cera' nitumpaya irate ri tampa' pakkoro'bangnganga, kammaminjo tattumpana cera'na musunna ke'nanga.

LUKAS 1:14

Lasanna' rannunu, siagang jai tau la'jari rannu punna lassu' sallang anjo anaka!

LUKAS 7:28

Nakana pole Isa, “U'rangi angkanaya tenale'bakapi nia' tau lompoangang na Yohanes Paje'ne' ri anne linoa. Mingka inai-nai kaminang ca'di ri umma'Na Allata'ala, iami lompoangang na Yohanes Paje'ne'.”

LUKAS 7:33

Niaki battu Yohanes Paje'ne' – nappuasa siagang tangnginungai anggoro' – na nupakkanai, ‘Napantamakki setang!’

YOHANES 5:35

Anjo Yohanes, sanrapangi lampu a'rinraya siagang tassioroka cayana. Untu' sinampekang, nungai antarimai anjo cayana.

LAMPA-LAMPANA 2:4

Nikoasai ngasemmi ke'nanga ri RohNa Allata'ala, sa'genna appakkaramulamo akkulle a'bicara lalang a'rupa-rupa bicara. Akkullemi a'bicara ke'nanga situru' apa nisareangai ri RohNa Allata'ala untu' lanapau.

GALATIA 1:15

Mingka lanri baji' atiNa Allata'ala, Napile memamma' ri wattu tenanapa nakunilassukang. Siagang Nakio'ma' untu' a'jari palayang mae ri Ia.

EFESUS 5:18

Teako nabengoi anggoro', nasaba' anjo anggoroka akkulleko napanraki. Passangalinna paralluko nikoasai ri RohNa Allata'ala.

YOSUA 3:7

Nakana Batara mae ri Yosua, “Appakkaramula anne alloa laKupa'jariko tau malompo sa'genna sikontu umma' Israel lanapakalompoko siagang nasadari angkanaya iNakke anrurungangko sangkamma Kururunganna Musa.

YOSUA 4:14

Anjo alloa Nagaukangi Batara sikamma gau' malompoa sa'genna anjo bansa Israel napakalompomi Yosua salaku tau malompo. Nipakalompomi Yosua ri ke'nanga lalang sikontu tallasa'na, sangkamma nipakalompona Musa ri ke'nanga.