IBRANI 9:4 - KITTA' MATANGKASA'

⁴ Lalang ri anjo kamaraka, nia' pattunuang dupa bulaenga nipare', siagang nia' todong Patti Passijanjiang nilapisika bulaeng. Lalang ri anjo Pattia nia' uring bulaeng pammoneang roti, takkanna Harun accu'lakamo, siagang ruang lawara' batu pannulisang niaka tattulisi' irateanganna sampuloa paratorang Napassuroanga Allata'ala.

IBRANI 9:4 Iomraidhean Croise

1 KARAENG-KARAENG 8:21

Lalang ri anjo Balla'Na Batara kupasadiami tampa' untu' Patti Parjanjiang niaka bonena batu parjanjianNa Batara siagang boe-boeta, ri wattu Naeranna ke'nanga assulu' battu ri Mesir.”

1 KARAENG-KARAENG 8:9

Tena sikali apa-apa bonena lalang anjo Patti Parjanjianga pantaranganna ruaya batu. Anjo batu-batua napantamaki anjoreng Musa ri Moncong Sinai, ri wattunna appare' parjanjiang Batara siagang bansa Israel, ri wattunna lalang pa'jappang ke'nanga battu ri Mesir mange ri pa'rasangang Kanaan.

2 PATTOTTORANG 5:10

Tena sikali apa-apa lalang ri anjo Patti Parjanjianga pantaranganna ruang la'ba' batu. Anjo batu-batua napantamaki Musa ri Moncong Sinai, ri wattunna appare' parjanjiang Batara siagang bansa Israel ri wattunna lalang pa'jappang ke'nanga battu ri Mesir mange ri pa'rasangang Kanaan.

KALAPPASSANG 26:33

Boliki anjo kaenga irawa ri jijiri'na pakkaika ri pattongko'na Kemaya. Ri bokona anjo kaenga musti nipadongkoki anjo Patti Parjanjiang niaka bonena lalang anjo ruaya batu. Anjo kaenga ansimbangi Kamara' Matangkasaka battu ri Kamara' Kaminang Matangkasaka.

KALAPPASSANG 31:18

Le'baki a'bicara siagang Musa irate ri Moncong Sinai, Napassareammi Allata'ala anjo ruaya batu le'baka Napannulisi Allata'ala siagang sikamma parentaNa.

KALAPPASSANG 32:15

Naummi ammotere' Musa battu ri anjo monconga na naerang anjo ruaya batu niaka tattulisi' lalang sikamma parentaNa Allata'ala.

KALAPPASSANG 34:29

Ri wattunna naung Musa battu ri Moncong Sinai angngerangi anjo Sampuloa Parenta, accayai rupanna lanri le'ba'na a'bicara siagang Batara; mingka tanaassengai kalenna Musa angkana accayai rupanna.

KALAPPASSANG 37:25

Appareki Bezaleel se're tampa' pattunuang dupa battu ri kayu akasia. Anjo pattunuang dupaya appasagi pare'na; la'buna siagang sangkara'na massing-massing 45 sentimetere' na tinggina 90 sentimetere'. Ri appa' panyingkulu' bageang ratena nipareki tanru', ia assiallea siagang anjo pattunuang dupaya.

KALAPPASSANG 39:35

Patti Parjanjiang pammantanganna ruaya batu nipannulisi Sampulo ParentaNa Allata'ala siagang kayu pa'bule' kammayatompa pa'rangka'na,

KALAPPASSANG 40:3

Pantamaki anjo Patti Parjanjiang napammantangia anjo Sampuloa Parenta nampa nusarei kaeng passimbang ri dallekanna.

KAIMANGNGANG 16:12

musti naallei tampa' pepe'ka battu ri tampa' pakkoro'bangnganga nampa nabonei bara pepe' sa'genna rassi siagang ruang kangkang dupa alusuka, nampa naerang mange ri Kamara' Kaminang Matangkasaka.

PAMMILANGNGANG 17:10

Nampa Nakanamo Batara mae ri Musa, “Padongkoki ammotere' takkanna Harun ri dallekanna Patti Parjanjianga. Anjo takkanga musti niboliki salaku pappiu'rangi mae ri tu Israel nangaia angngewa, sollanna mate ke'nanga punna tena nammari a'moro-moro.”

PAMMILANGNGANG 17:5

Anjo takkanna tau Kupilea laccu'laki. Kammaminjo caraKu lampamari kunrarenna sikamma tau tulusu' a'moro-moroa mae ri kau.”

PAMMILANGNGANG 17:8

Ammukona bari'basa', ri wattunna antama' Musa ri KemaNa Batara, nacini'ni angkanaya anjo takkanna Harun, iamintu takkanna tu Lewia, accu'la'mi. A'bungami anjo takkanga, siagang a'rappo toami!

PAOLE 9:11

Ri allalonamo patampulo allo siagang patampulo bangngi, Napassareammi Batara anjo ruaya batu parjanjiang mae ri nakke.

PAOLE 9:9

Angngambikka' nai' ri anjo buluka untu' annarima batu parjanjiang Napareka Batara siagang ikau. Patampulo allo siagang patampulo bangngia' ammantang irate ri anjo monconga tangnganre tangnginung.

PAPPICINI' 11:19

Nampa tassungkemo Balla'Na Allata'ala ri suruga, na kacinikammo Patti Parjanjianga ilalang. Nampa nia'mo kila' assisambung-sambung siagang sa'ra gunturu' a'gamarrung siagang a'garumbang, kammayatompa ta'ge'goso'mi buttaya nabosi sannaka sarrona, angngerang es.

PAPPICINI' 8:3

Nia'mo sitau malaeka' maraengang, battu ammenteng ri dallekanna tampa' pakkoro'banganga; angngerangi se're pa'dupang bulaeng. Sanna' jaina kamanynyang nisareangi untu' lanapanaung ri pappala' doanganna sikontu umma'Na Allata'ala, siagang untu' lanipassareanga ri tampa' pakkoro'bangngang bulaenga nipare' ri dallekanna empoang kala'biranga.