IBRANI 5:1 - KITTA' MATANGKASA'

¹ Massing-massing imang lompoa nipilei battu ri tangnga-tangngana ummaka, na niangka' a'jari wakkele'na ke'nanga untu' allayani mae ri Allata'ala. Jama-jamanna iamintu angngerangangi Allata'ala sikamma passare lanipabattua siagang sikamma koro'banga sollanna nipammopporang dosa-dosaya.

IBRANI 5:1 Iomraidhean Croise

KAIMANGNGANG 8:2

“Kioki Harun siagang sikamma ana'na siagang erangi pakeang imanga, minynya' upacaraya, sikayu sapi laki rungka untu' koro'bang pammopporang dosa, ruang kayu gimbala' laki siagang sibaku' roti tenaya nammake pa'gambang.

KAIMANGNGANG 9:7

Le'baki anjo nakanamo ri Harun, “A'lampako mange ri tampa' pakkoro'bangnganga siagang pasadiai koro'bang pammopporang dosaya kammayatompa koro'bang nitunua, sollanna Napammopporang Batara dosanu siagang dosana ummaka. Gaukangi anjo kammaya situru' Naparentakanga Batara.”

ROMA 15:17

Jari, lanri assileo'mi katallassangku siagang Isa Almasi, akkullemi kukalompoang pa'mai' jama-jamangku untu' Allata'ala.

1 KORINTUS 15:3

Anjo apa kupabattua mae ri kau, apa le'baka tonji kutarima. Ia kaminang parallua, kamma tattulisika lalang ri Kittaka, iamintu kupabattumi mae ri kau ngaseng angkanaya matemi Almasi lanri dosa-dosata ngaseng;

IBRANI 10:11

Sikamma imang Yahudia massing nagaukangi jama-jamang allo-allona; siagang a'mole-molei assare koro'bang natuli sangkammanaja anjo koro'bang napassareanga. Mingka sikamma anjo koro'banga tena sikali nakkulle natangkasi dosaya.

IBRANI 10:12

Na Almasi, poro se'reji bawang koro'bang Napassareang untu' ampammopporangi dosa-dosata; anjo koro'banga a'matu-matumi sa'genna satunggu-tungguna. Le'baki Napassareang Almasi anjo koro'banga ammempomi ri sa'ri kananNa Allata'ala, ammarenta siagang Allata'ala.

IBRANI 11:4

Lanri tappa'na, nanapassareang Habel koro'banga mae ri Allata'ala, iamintu koro'bang bajikanganga na koro'bang napassareanga Kain. Lanri ia anjo tappa'na, nanitarimamo Habel ri Allata'ala a'jari tau baji'; nasaba' ma'nassami angkana nitarimai ri Allata'ala koro'banna. Matemi Habel, mingka lanri anjo tappa'na, tuli a'bicarana ija sa'genna kamma-kamma anne.

IBRANI 2:17

Jari battuanna, angkanaya Iami musti a'jari sangkamma sari'battanNa ngaseng lalang ri sikontu-kontuna. Siagang lanri kammanami anjo nakkullemo a'jari Imang Malompo, Ia tamalanrea siagang lompo pangngamaseanga. Battu ri iaminjo palayananNa nakkullemo nipammopporang dosana rupataua.

IBRANI 7:27

Tasangkammayai imang-imang lompo maraenganga, allo-alloa angngerang koro'bang lanri dosa-dosa kalenna rolong, nampa koro'bang lanri dosa-dosana ummaka. Isa, sikaliji bawang angngerang koro'bang untu' satunggu-tungguna, iamintu ri wattunna Napassareang KalenNa a'jari koro'bang.

IBRANI 8:3

Sikontu imang lompoa niangkaki untu' angngerang koro'bang yareka passare mae ri Allata'ala. Kammatommi anjo Imang Lompota; musti nia' apa-apa ri Ia untu' laNapassareang.

IBRANI 8:4

Ebara' angkana niaki ri anne linoa, tena Nala'jari Imang, nasaba' nia'mo imang langngerangai anjo koro'bang nituntuka lalang ri hukkung agama Yahudia.

IBRANI 9:9

Iaminne pangngebarranna jammang kamma-kammaya anne; battuanna angkanaya sikamma apa-apa nipassareanga siagang koro'bang olo'-olo' nipassareanga mae ri Allata'ala, takkulleapi napa'jari sukku' baji'na ati mailalanna tau angngeranga passare.