IBRANI 4:15 - KITTA' MATANGKASA'

¹⁵ Anjo Imang Malompota teai imang tenaya nakkulle amminawang angkasiaki kapa'risanta. Passangalinna, le'ba' tommi Nataba paccoba lalang a'rupa-rupa passala', sangkamma todong massing-massing ikatte; iaji bawang tena Nagaukangi dosaya!

IBRANI 4:15 Iomraidhean Croise

KALAPPASSANG 23:9

Teako paero'-eroki panggaukannu mae ri bansa maraenga; nuassemmi kasia'na nikanaya a'jari bansa maraeng, saba' riolo ikau a'jari bansa maraeng tongko ri wattunnu ri Mesir.”

YESAYA 53:9

Nipasitarawangi siagang tau ja'dalaka; jera'na niaki ri tangnga-tangngana tau kalumanynyanga, manna natale'bakka a'gau' ja'dala', siagang tale'bakai annipu.”

HOSEA 11:8

Nakana Batara, “He Israel, tena olonu laKubalang parekang yareka Kubokoi. Maka akkulleko Kuputta sangkamma Adma? Yareka Kupakamma Zeboim? Tena naero' pa'maikKu anggaukangi anjo kammaya, lanri lompo duduna pangngaingKu mae ri kau!

MATIUS 12:20

TalaNata'bangai bulo ta'dundua TalaNabunoai kanjoli ca'dia rinrana. Lappattujuangi sa'genna a'rupa kaadelanga;

MATIUS 4:1

Le'baki anjo, nierammi Isa ri RohNa Allata'ala mange ri parang lompoa, sollanna niso'ri ri billisika.

LUKAS 22:28

Nuagang ngasemMa' ilalang sikontu kasusaangKu.

LUKAS 4:2

Ammantammi anjoreng patampulo allo sallona, niso'ri ri Billisika. Patampulo alloi tamangnganrea apa-apa. Sa'genna cipuru'mi Nakasia'.

YOHANES 8:46

Inai ri kau akkulle ampa'butti angkanaya nia' dosa ri KalengKu? Punna katojengang Kupau, apa saba'na nutatappaka ri Nakke?

ROMA 8:3

Apa tenaya nakkulle nagaukang hukkung-hukkung agamaya, lanri lammana batangkalenta ikatte rupataua, iaminjo le'ba' Nagaukang Allata'ala. Le'ba'mi Nabeta Allata'ala koasana dosaya lalang ri sipa'na rupataua; iamintu lalang Nasurona battu Ana' KalenNa, le'bakamo battu sanrapang rupatau dorakaya, sollanna Natangkasi dosa-dosata.

2 KORINTUS 5:21

Tena dosaNa Almasi, mingka nipipisangiangi ri Allata'ala sikontu dosata mae ri Ia, sollanta akkulle assibajiki siagang KalenNa, lanri asse'retamo mae ri KalenNa Almasi.

IBRANI 4:14

Iaminjo saba'na kimusti anna'gala' jarre' mae ri pangakuang katappakkanta. Nasaba' nia' Imang Malompota, le'bakamo antama' sa'genna ri dallekanNa Allata'ala – iamintu Isa, Ana'Na Allata'ala.

IBRANI 5:2

Kalenna anjo imang lompoa jai tongi kakurangnganna; mingka lanri kammanami anjo nakkullemo a'jari tuna pa'mai' mae ri tau tenaya apa-apa naasseng siagang tau sala oloanga ri jappana.

IBRANI 7:26

Jari, Ia minjo Isa Imang Malompo niparalluanga. Iami Imang matangkasa'; tena sikali kasalang yareka dosa ri KalenNa. Nisa'la'mi battu ri tau dorakaya, na nipanai' ri tampa' tinggianganga na sikontu langika.

IBRANI 9:28

Kammatommi anjo Almasi. Sikaliji bawang nipassareang a'jari koro'bang, najai tau Natangkasi dosana. Labattu poleangi makapinruanna. Mingka teaimi untu' antanggongi dosaya; passangalinna untu' ampasalamaki sikamma tau antayangai kabattuanNa.

1 PETRUS 2:22

Tena nale'ba' a'gau' dosa, siagang tale'bakai nia' tau allangngereki a'balle-balle.

1 YOHANES 3:5

Nuassengi angkanaya battui Almasi untu' antangkasi dosa-dosana rupataua, siagang angkanaya tena dosa lalang ri KalenNa.