IBRANI 11:9 - KITTA' MATANGKASA'

⁹ Lalang tappa'na ammantammi Abraham ri anjo pa'rasangang Napa'janjianga Allata'ala, a'jari kamma tu battu-battu. Ammantangi Abraham anjoreng, lalang ri kema napareka. Kamma tomminjo Ishak siagang Yakub, le'baka todong antarimai anjo janji kammaya battu ri Allata'ala.

IBRANI 11:9 Iomraidhean Croise

PA'JARIANG 12:8

Le'baki anjo napatulusu'mi jappana a'lampa timboro', ri daera a'bontoa irayanganna kota Betel nampa akkema ri alla'na kota Betel siagang kota Ai. Betel ilaukang siagang Ai irayangngang. Ambangung tommi anjoreng tampa' pakkoro'bangngang nampa anynyomba ri Batara.

PA'JARIANG 13:18

Le'baki anjo napalette'mi kema pa'ballakkanna Abram, nampa mange ammantang ri ampi'na poko'-poko' kayu karamaka, iamintu tampa' passambayangang ri Mamre ri ampi'na Hebron. Nampa ambangummo anjoreng tampa' pakkoro'bangngang untu' Batara.

PA'JARIANG 13:3

A'lampami mange-mange, battu ri se'reang tampa' mange ri tampa' maraengannaya, sa'genna mange ri Betel. Battu mange ri daera niaka ri alla'na Betel siagang Ai, ri tampa' karama', iamintu tampa' le'baka napakkemai pirangalloang,

PA'JARIANG 17:8

LaKupassareangi mae ri kau siagang mae ri turungannu, anne butta nupammantangia kamma-kamma anne salaku tubattu-battu. Sikontu butta Kanaan lanapatangi ana' cucunna sa'genna satunggu-tungguna, siagang iNakke la'jari Allata'alana ke'nanga.”

PA'JARIANG 18:6

Akkaro-karomi Abraham antama' ri kemana nampa nakana ri Sara, “Akkaro-karoko angngalle labu' kaminang bajika, nunampa appare' linta' roti a'bundala'.”

PA'JARIANG 18:9

Nampa akkuta'nammi ke'nanga angkana, “Kemae bainennu Sara?” Appialimi Abraham angkana, “Anjorengi, lalangi ri kemaya.”

PA'JARIANG 21:34

Le'baki anjo ammantammi sallo-sallo sike'de' Abraham ri pa'rasanganna tu Filistin.

PA'JARIANG 23:4

“Inakke anne tubattu-battuja' ammantang ri tangnga-tangngata ngaseng; kisarea' pangngellai untu' ammalli siapa are luara'na butta sollanna akkulle kutarawang bainengku.”

PA'JARIANG 25:27

Pila' katambammi lompona anjo ruaya ana'. Esau a'jarimi pasoso' sannaka cara'de'na, nanangai ammantanga ri parang. Mingka Yakub sannangi sipa'na siagang nangai ammantanga ri balla'.

PA'JARIANG 28:4

Poro Nabarakkakiko Batara siagang turungannu, sangkamma le'ba'na Nabarakkaki Abraham. Kammayatompa poro nukammai anne butta nupammantangngia, le'baka Napassareang Allata'ala mae ri Abraham!”

PA'JARIANG 31:25

Anjo wattua le'ba'mi nabangung kemana Yakub ri se'reang bulu'. Nampa ri se'reang bulu' maraeng ri anjo todong daeraya nabangung tommi kemana Laban siagang taunna.

PA'JARIANG 35:27

Nampa battumi Yakub mange ri manggena, iamintu Ishak, ri tampa' pammantanganna ri Mamre ri ampi'na Hebron. (Toana, iamintu Abraham, anjoreng tongi riolo ammantang.)

PA'JARIANG 36:7

Assibokoimi Esau siagang Yakub lanri jai duduna barang-baranna ke'nanga, siagang takkulleai ke'nanga attallasa' sirurungang. Nampa pole anjo pa'rasangang napammantangngia ke'nanga tanggannakai ruku' lanakanrea olo'-olo'na ke'nanga lanri jai duduna.

PA'JARIANG 47:9

Appialimi Yakub angkana, “Sibilangngammi antallumpulo taung attallasa' atanta, a'jari tupalampa mange-mange. Punna nipasinrapangi siagang umuru'na boe-boena atanta a'jaria tupalampa mange-mange, anne katallassanna atanta jai kasukkarranna siagang bodoji umuru'na.”

PAMMUJI 105:12

Riolo sangkamma tubattu-battu umma'Na Allata'ala anjoreng tena nasiapa jaina ke'nanga.

YEREMIA 35:7

Takkulleai ikambe a'lamung, takkulleai ikambe appare' yareka ammallaki koko anggoro'. Lalang sikontu tallasa'na ikambe, tena todong nakkulle ambangung balla'. Musti anjorengi ri kemaya ikambe ammantang, sollanna akkulle ammantang tuli anrinni ri tampaka salaku tau annompang.

IBRANI 6:17

Eroki Napakajarre' janjinNa Allata'ala mae ri sikamma tau Najanjia angkanaya talaNapinrayai janjinNa. Iaminjo saba'na naNapirurungi sumpa anjo janjinNa.