HOSEA 7:7 - KITTA' MATANGKASA'

⁷ Lalang allumpana larrona, nabunomi pamimping-pamimpinna ke'nanga. A'le'basa'mi nabuno ke'nanga sikontu karaenga. Mingka manna pole na'jari kammamo anjo kodina kaadanga, tena sikali manna sitau appala' doang mae ri Nakke untu' nitulung.”

HOSEA 7:7 Iomraidhean Croise

1 KARAENG-KARAENG 15:28

Ri makatallung taunna a'jari Karaeng Asa ri Yehuda nakajariang anjo passalaka. Kammaminjo na'jari karaemmo Baesa ri Israel ansambeangi Nadab.

1 KARAENG-KARAENG 16:18

Ri wattu nacini'na Zimri angkanaya niempoimi ri musu anjo kotaya, antama'mi ri balla' kakaraenganga nampa natunu anjo ballaka napasitunu kalenna, sa'genna matemo.

1 KARAENG-KARAENG 16:22

Kale'bakkanna tau ammenteng mangea ri Omri ammeta. Matei Tibni siagang Omri a'jari karaeng.

2 KARAENG-KARAENG 10:14

Naparentakammi Yehu angkana, “Jakkala' attallasaki ke'nanga!” Jari nijakkala' kabusu' anjo ke'nanga, nampa nibuno ri ampi'na se'reang bungung kalotoro'; kabusu'na niaki patampulo anrua tau jaina. Tena manna sitau nilappassang attallasa'.

2 KARAENG-KARAENG 10:7

Le'baki natarima ke'nanga anjo sura'na Yehu, nibunomi ri tutoa-toana tau jaia ri kota Samaria anjo tujupuloa ana' cucunna Ahab, nampa nipantama' ulunna ke'nanga ri karanjenga, nampa nikiring mange ri Yehu ri Yizreel.

2 KARAENG-KARAENG 15:10

Salum ana'na Yabesh assikongkoloki angngewai Karaeng Zakharia, nampa nabuno Karaeng Zakharia ri Yibleam, nampa nasambeang a'jari karaeng.

2 KARAENG-KARAENG 15:14

lanri niaki Menahem ana'na Gadi battu ri Tirza mange ri Samaria ambunoi Salum, nampa Menahem ansambeangi a'jari karaeng.

2 KARAENG-KARAENG 15:25

Kalase'renna tau battua ri sikamma perwira tantarana, iamintu niarenga Pekah ana'na Remalya, assikongkoloki siagang 50 tau battu ri Gilead. Nampa nabuno ke'nanga anjo Karaeng Pekahya siagang rua tau maraengang niarenga Argob siagang Arye. Lalangi ri se'reang tembo' pattahangngang ri balla' karaenga ri Samaria nibuno Karaeng Pekahya. Nampa Pekah a'jari karaeng ansambeangi Pekahya.

2 KARAENG-KARAENG 15:30

Ri taung makaruampulo ammarentana Karaeng Yotam ana'na Uzia ri Yehuda, assikongkoloki Hosea ana'na Ela untu' angngewai Karaeng Pekah siagang nabunomi Karaeng Pekah, nampa ia ansambeangi a'jari karaeng.

2 KARAENG-KARAENG 9:24

Napabantammi otere' panana Yehu sipagassing-gassinna nampa nalio-lio napana anjo Yoram, na nataba dongko'na sitarrusu' mae ri atenna. Anra'bami Yoram, nampa mate lalang ri karetana.

2 KARAENG-KARAENG 9:33

Nakanamo Yehu mae ri ke'nanga, “Pasambilai naung mae antu bainea!” Na nipasambilamo Izebel ri ke'nanga naung battu ri tontonganga, nampa nilissarrang ri kareta sa'genna ta'racci' cera'na mae ri temboka siagang mae ri sikamma jaranna anjo karetaya.

AYUB 36:13

Tau tenaya nale'ba' nia' Batarana, lammoliki larro; manna nihukkung ri Batara, taerokai ke'nanga appala' bantuang.

PAMMUJI 14:4

Nakana Batara, “Tenaka nangngu'rangi anjo sikamma tu ja'dalaka? Lalang tallasa'na narampasaki ummakKu siagang tena le'bakai appala' doang mae ri Nakke.”

YESAYA 43:22

Nakana Batara, “Mingka ikau Israel, tena nunynyomba ri Nakke, tenamo nugaukangi ibadaya mae ri Nakke.

YESAYA 64:4

Tale'bakai nia' allangngere', siagang tale'bakai nia' accini' angkanaya pantaranganna iKatte nia' ija allata'ala maraeng, angngallea tindakang mae ri tau manrannuanga ri ia.

YESAYA 64:6

Ikambe tau rantasa' ngasengi, ba'lalo manna gau' baji'na ikambe rantasa' ngasengi na ra'masa'. Lanynyaki ikambe lanri kaja'dallanna ikambe rapang leko' kayu kalumeng niri'bakang ri anging.

YESAYA 64:7

Tenanniakka appala' doang mae ri Katte, yareka appala' pannulung battu ri Katte, saba' Kicokkoi rupanTa battu ri kambe, na Kilappassang ikambe nipanraki ri dosana ikambe.

YESAYA 9:13

Lanri kammana anjo lalang sialloji bawang Nahukkung Batara sikamma pamimpinna siagang ra'ya'na Israel. Napolongi ulunna nampa Napela' ulunna siagang ingkonna.

YEHEZKIEL 22:30

Ri alla'na anjo tu Israel, a'boyA' tau akkullea ambangung tembo', yareka ammenteng ri tampa'-tampa' runtunga tembo'na untu' ampartahangkangi anjo pa'rasanganga punna erokKa' angngancuruki lalang a'bettese'na larroKu; mingka manna sitau tania' Kubuntulu'.

DANIEL 9:13

Sikontu anjo bala niaka tattulisi' lalang ri Hukkung napabattua Musa le'ba'mi Kipitujui ikambe. Mingka manna nakamma mamo, o Karaeng Allata'alana ikambe, tuli teana ija ikambe ampakasannangi atinTa. Tuli tenana naero' ikambe ambokoi dosa-dosana ikambe siagang taerokai ikambe amparhatikangi ajarang-ajaranTa.

HOSEA 13:10

Appalakko karaeng siagang pamimping, mingka kemaemi ke'nanga kamma-kamma anne? Maka akkullei ke'nanga ampasalamaki ra'ya'nu?

HOSEA 5:15

LaKubokoi ummakKu sa'genna sukku'mo pa'risi'na ke'nanga lanri dosa-dosana, nampa battu ke'nanga amboyA'. Nakulle kapang lalang ri kapa'risanna ke'nanga nalappattujuammo amboyA'.”

HOSEA 7:10

A'nassai nicini' katampoanna tu Israel siagang iaminjo a'jari butti mae ri kasalanna ke'nanga. Manna pole nakajariang ngasemmo anjo sikammaya, tena tongijapa naboyA' ke'nanga yareka ammotere' mae ri Nakke, Karaeng Allata'alana ke'nanga.

HOSEA 7:14

Tena nattojeng-tojeng ke'nanga appala' doang mae ri Nakke. Punna appala' doangi ke'nanga, napatappasaki kalenna naung ri katinroanga, siagang appiraungi ke'nanga sangkamma nagaukanga tau tenaya natappa' mae ri Nakke. Punna appala' doang ke'nanga untu' appala' gandung siagang anggoro', naloko'-lokoki kalenna ke'nanga sangkamma nagaukanga tu anynyombaya mae ri rewataya. Ma'nassa angngewa tojeng-tojengi ke'nanga ri Nakke!

HOSEA 8:4

Ammilei ke'nanga karaeng natena nappitangara' mae ri Nakke. Angngangkaki pamimping natena napalaki passitujuangKu. Naallei bulaenna siagang pera'na ke'nanga nampa appare' patung barhala angngeranga kaancurang mae ri kalenna ke'nanga.

MIKHA 2:1

Cilakai tau a'rancanaya kaja'dallang lalang attinrona ri katinroanga ri wattu bangngia, nampa nagaukang anjo rancanana ammukona bari'basa' lanri nia'na pakkullena untu' anggaukangi.