HOSEA 7:1 - KITTA' MATANGKASA'

¹ Nakana Batara, “Sampang eroki Kupammolle ummakKu Israel siagang Kupakabaji' ammotere' pattallassanna ke'nanga ia tuli Kucinika iamintu kaja'dallanna siagang dosana bawang ke'nanga. Assitipui para ia ke'nanga, antamaki ri balla'na taua a'lukka', siagang angngellaki ke'nanga ri aganga.

HOSEA 7:1 Iomraidhean Croise

YESAYA 28:1

Cilakai kota nakalompoang pa'maika sikamma painunna Israel! La'jari toami kaga'ganna, rapang bunga kalumeng niaka ri simbolenna ke'nanga. Cilakai kota tinggia nai' battu ri tangngana ka'bung copponga, nakalompoanga pa'mai' sikamma tau sitangnga matea nasa'ring.

YESAYA 59:12

Tamaka jaina kaja'dallanna ikambe mae ri Katte; dosa-dosana ikambe ampassalai ikambe. Napahang tojemmi ikambe kaja'dallanna ikambe, siagang naassemmi sikamma dosa-dosana ikambe.

YESAYA 59:13

Le'baki assassala' siagang angngewa ikambe mae ri Batara, siagang taeroka mannuruki ri Allata'ala ikambe. Le'baki ikambe anjallakkangi paranna tau siagang sala oloang; lingui pikkiranna ikambe, siagang a'balle-ballei bicaranna ikambe.

YESAYA 59:14

Nipakabellami hukkung adeleka, siagang nipalilimi kaadelanga. Nibawang-bawangngammi kalambusanga ri tampa'-tampa' tujaia, siagang nipasa'rimi pa'mai' maci'nonga.

YEREMIA 51:9

Tau annompanga ammantang anjoreng massing nakanamo para ia, ‘Niusahaimi antulungi Babel, mingka tala'mi! Bajikangngang nibokoimi anne pa'rasanganga nakimassing ammotere' mange ri pa'rasanganta. Nahukkummi Batara Babel siagang hukkungang lompo, naancuru' taba sikalimi.’ ”

YEHEZKIEL 16:46

Daennu iamintu Samaria ri bageang wara' siagang sikontu desana. Siagang andi'nu iamintu kota Sodom ri bageang timboro' siagang sikontu desana.

YEHEZKIEL 23:4

Ia toaya niarengi Ohola; iami pangngebaranna Samaria. Andi'na niarengi Oholiba; iami pangngebaranna Yerusalem. A'buntingA' siagang ke'nanga, siagang para anggappa' ana' battu ri ke'nanga.

YEHEZKIEL 24:13

He Yerusalem, anjo panggaukang-panggaukang kodinu nara'massimi kalennu. Kucobami antangkasiko, mingka tena matu-matunna, lanri tuli ra'masa'nu. Tena nulatangkasa' ammotere' sa'genna ammari pangngalarroingKu mae ri kau.

HOSEA 10:5

Pandudu'na Samaria lamallaki; ke'nanga siagang imang-imanna ke'nanga allayania ri anjo sapi bulaenga ri Betel lasi'nai siagang langngarruki lanri lanynya'mi sikontu kalompoanna anjo barhalana ke'nanga.

HOSEA 11:8

Nakana Batara, “He Israel, tena olonu laKubalang parekang yareka Kubokoi. Maka akkulleko Kuputta sangkamma Adma? Yareka Kupakamma Zeboim? Tena naero' pa'maikKu anggaukangi anjo kammaya, lanri lompo duduna pangngaingKu mae ri kau!

HOSEA 12:1

Nakana Batara, “NakulilingiA' bansa Israel siagang bicara balle-ballena na gau' annipuna; bansa Yehuda tulusu' angngewana ri Nakke, Allata'ala Matangkasaka siagang majarreka.

HOSEA 12:2

Sikontu apa-apa nagaukanga bansa Israel battu ri bari'basa' sa'genna bangngi tena ngaseng matu-matunna siagang poro angngerangi kapanrakang, sanrapang anging battu iraya. Kajekkonganna siagang kapallakkanna ke'nanga pila' katambangi. Appareki ke'nanga parjanjiang-parjanjiang siagang Asyur, kammayatompa angngerangi minynya' mange ri Mesir salaku tanra passari'battangang.”

HOSEA 4:17

Umma' Israel niallemi pa'mai'na ri barhalaya. Lanri kammana anjo lappassammi ke'nanga kamma.

HOSEA 4:2

Assumpai ke'nanga mingka tena narupai; paballe-ballei ke'nanga, ammunoi, a'lukkaki siagang a'gau' bawangi. Katambangi ka'ja'dallanga, siagang sitampe-tampei kajariang pammunoanga.

HOSEA 5:1

Nakanana Batara, “Pilangngeri, he sikamma imanga! Parhatikangi, he tu Israel! Pilangngeri, he jari-jarina karaenga! Le'ba'mi nipattantu hukkunganga mae ri kau. Nasaba', mustina adelekko angngadeli, mingka kabalekanna a'jari mako rapang tado' ri Mizpa, rapang sikko' nitannanga ri Bulu' Tabor,

HOSEA 6:4

Mingka Nakana Batara, “He tu Israel siagang tu Yehuda! Apa musti Kugaukang mae ri kau ngaseng? Pangngainnu mae ri Nakke poro sinampe'ji natenamo, rapang saliuka ri wattu bari'basa'.

HOSEA 7:13

Cilakai ke'nanga, lanri nabokoiMa' ke'nanga. Laancuruki ke'nanga lanri angngewana mae ri Nakke. ErokKa' ampasalamaki ke'nanga, mingka ibadana ke'nanga mae ri Nakke anu tena nakontutojeng.

HOSEA 8:5

BirisikKa' ri sapi bulaeng nisombaya ri pandudu'na kota Samaria. Larro duduA' mae ri ke'nanga. Kemaepi sa'genna ke'nanga latulusu' nara'massi kalenna anynyomba ri barhalaya?

HOSEA 8:9

Rapang keledai liara' tenaya namannuruki, kammami anjo tu Israel sangnging ero' kalenna naturukiang. A'boyai ke'nanga bantuang battu ri Asyur, siagang ammalli ke'nanga passari'battangang battu ri bansa-bansa maraenga.

AMOS 3:10

Nakana Batara, “Sikamma anjo taua nabonei balla'-balla' karaenna ke'nanga siagang barang-barang nagappaya battu ri gau' ammacco' siagang gau' palla'. Ba'lalo tena sikali nangngasseng ke'nanga anggaukangi gau' lambusuka.

AMOS 3:9

Pa'la'bangi pabattu mae ri tau ammantanga ri balla' karaenga ri Mesir siagang Asdod angkana, “A'rappung ngasengko ri moncong-moncong tammulilina Samaria, siagang parhatikangi karicuang lompoa kammayatompa pammaccokang nigaukanga anjoreng.”

AMOS 8:14

Sikamma tau assumpaya lanri barhala Samaria angkana, ‘Lanri rewatana bansa Dan’ yareka ‘Lanri rewatana Bersyeba’ – latu'guru' kabusuki siagang tambangungami pole.”

MIKHA 6:16

Yangasenna anjo kammaya kajariangi lanri nuturukinna panggaukang-panggaukang ja'dala'na Karaeng Omri siagang ana'na, iamintu Karaeng Ahab. Nupinawangi cara-carana ke'nanga. Lanri kammana anjo laKuancuru' ngasengko, siagang lanicau-cauko kammayatompa lanihinako ri sikontu bansaya.”

MATIUS 23:37

“O Yerusalem, O Yerusalem! Kau ambunoi na'bi-na'bia. Nusambilai batu sikamma tunisuroNa Allata'ala sa'genna mate. A'mole-moleMa' ero' anraka' ngasengko sanrapang anrong janganga ancokkoi ana'-ana'na irawangang ka'nyi'na. Mingka tena ngaseng nuero'!

LUKAS 13:34

O, tuniaka ri Yerusalem, tuniaka ri Yerusalem! Nubunomi na'bi-na'bia! Nusambilami batu sa'genna mate sikamma tu Nasuroa Allata'ala! Pissiapa are mako ero' Kukalimbuki, sanrapang anrong janganga angkalimbuki ana'-ana'na irawanganna ka'nyi'na, mingka taeroka ngasengko!

LUKAS 19:42

Lalang angngarru'Na Nakana, “O kodong, baji'na mamo ka'de' nuassemmo anne alloa apa lakkullea angngerang passiamakkang! Mingka kamma-kamma anne takkulleai nucini'.