FILIPI 4:14 - KITTA' MATANGKASA'

¹⁴ Mingka le'ba'ma' nutulung ilalang ri kasusaangku; na memang bajiki anjo apa nugaukanga mae ri nakke.

FILIPI 4:14 Iomraidhean Croise

1 KARAENG-KARAENG 8:18

Mingka Nakana Batara ri ia, ‘Bajiki anjo pattujunnu.

2 PATTOTTORANG 6:8

Mingka Nakana Batara ri ia, ‘Anjo pattujunnu bajiki.

MATIUS 25:21

Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako nakisiagang assannang-sannang!’

ROMA 15:27

Kammami anjo le'baka natappuki ke'nanga siagang te'ne pa'mai'. Nasaba' sikontutojenna siratang memang tongi ke'nanga antulungi sikamma sari'battang kasi-asi niaka ri Yerusalem; nasaba' battu anjoremmi ri bansa Yahudia anggappa bansa-bansa maraenga sikamma barakka'Na Allata'ala. Jari, siratang tongi anjo bansa-bansa maraenga antulungi bansa Yahudia siagang barakka' pa'barang-barangang.

GALATIA 6:6

Tau annarimaya pangngajarang battu ri Almasi, parallui nabage siagang gurunna apa-apa niaka ri ia.

FILIPI 1:7

Tuli nia'nu ngaseng lalang ri atingku. Memang siratangi punna kammai anjo nyawaku mae ri kau ngaseng. Nasaba' le'ba' ngaseng tommako annarima siagang inakke iamintu passare malammoro' Napassareanga Allata'ala mae ri nakke; baji' na ri kamma-kammaya anne, iamintu ri wattungku nia' lalang ri tarungkua, kammayatompa pole ri wattungku nia' pantara' untu' angngalleangangi siagang ampamentengangi anjo Kabara' Bajika.

FILIPI 4:18

Inakke le'ba'mi kutarima ngaseng – ba'lalo la'bimi ri gannaka! Sikamma anjo passare le'baka nukiring mae ri nakke, kutarima ngasemmi battu ri Epafroditus. Kamma-kamma anne nia' ngasemmi ri nakke apa kukaparalluanga. Anjo passarenu ngaseng, sanrapangi passare mabauka rasanna, battu ri koro'bang nipassareanga mae ri Allata'ala iamintu koro'bang nitarimaya siagang Nakarannuanga pa'mai'Na Allata'ala.

1 TIMOTIUS 6:18

Pakaingaki ke'nanga nanapa'nyata kabajikanga, namasarro anggaukangi apa-apa bajika, lammoro' pa'maiki siagang nangai assare-sarea apa-apa.

IBRANI 10:33

Nia' wattunna nunihina siagang nigau' takamma-kamma ri dallekanna tau jaia. Nia' todong wattunna numminawang todong ampisa'ringi sessana tau nigau' kammaya.

IBRANI 10:34

Siagang amminawang tongko ampisa'ringi si'nana tau nitarungkua. Siagang ri wattunna nialle passa apa-apannu, nupassareangi siagang sannang pa'mai'. Nasaba' nuassengi angkanaya nia' ijapa ri kau apa la'bi bajikanganga, akkullea attahang sa'genna satunggu-tungguna.

IBRANI 13:16

Teako takkaluppai a'gau' baji' siagang situlung-tulung, nasaba' iaminne kammaya koro'bang-koro'bang ampakasannangai atinNa Allata'ala.

PAPPICINI' 1:9

Inakke Yohanes, sari'battannu ngaseng, nuaganga' a'julu sessa sangkamma nakasiaka sikontu tau amminawanga ri Almasi. Sa'barakki' angkasiaki kasessanga, lanri ikatte anne umma'Naki'. Nipelakka' mange ri Pulo Patmos passabakkang kupa'la'bangi pappasang battua ri Allata'ala, Napakajarreka Isa lalang ri kasa'bianNa.