FILIPI 3:15 - KITTA' MATANGKASA'

¹⁵ Ikatte, tau toayamo ri katallassang rohania, musti nigaukangi kammaya anjo. Mingka punna nia' ri kau maraeng panggappana, KalenNa Allata'ala lampakasingaraki pole mae ri kau.

FILIPI 3:15 Iomraidhean Croise

YESAYA 35:8

Anjoreng lania' agang lompo, “Oloang mangea ri kasalamakkang” arenna. Tau dorakaya talammaloai anjoreng, tau toloa talanapa'linguai tau angngoloa anjoreng.

MATIUS 5:48

Ia Allata'ala Manggenu ri suruga sukku' Nakamaseangi sikontu rupataua. Jari parallui nukamaseang todong parannu tau.”

LUKAS 11:13

Manna pole ja'dala' ngasengko, mingka angngasseng tonjako assare apa-apa baji' mae ri ana'nu. La'biangampa Manggea ri suruga! LaNapassareangi RohNa mae ri tau appalaka ri Ia!”

YOHANES 6:45

Nia' tattulisi' lalang ri Kitta'-kitta'na Na'bi-na'bia angkanaya, ‘Sikontu rupataua laniajaraki ri Allata'ala.’ Jari sikontu tau ampilangngeri Manggea siagang appilajara' ri Ia, battu ngasengi mae ri Nakke.

YOHANES 7:17

Inai-nai ero' anturuki ero'Na Allata'ala, lanaassengi angkanaya pangngajarang battu kemae anjo Kupangngajaranga. Apaka pangngajarang battu ri Allata'ala yareka pangngajarang battu ri KalengKu.

ROMA 15:1

Ikatte tau tappa' tojeng-tojenga ri apa nipatappaka musti sa'barakki' punna akkabaratangi tau lammaya tappa'na mae ri katte. Takkulleaki' kasannangang kalenta bawang niboya.

1 KORINTUS 14:20

Sikamma sari'battangku! Teako appikkiri' kammai ana'-ana'. Ri passala' nikanaya panggaukang sala, paralluko a'jari tuli kamma ana' ca'di. Mingka ri passala'na nikanaya pikkirang, paralluko a'jari tau toamo.

1 KORINTUS 2:6

Mingka manna nakamma, kupake tonji pangngassenganga ampabattui anjo birittaya mae ri tau rapang ti'nokamo katallassang rohanina. Mingka anjo pangngassenganga teai pangngassengang battu ri lino, yareka pangngassengang battu ri sikamma tau anna'galaka koasa ri anne jammanga, ia lalanynyaka sallang kakoasanna.

GALATIA 5:10

Mingka manna nakamma, tappa' ija' angkanaya tena nulamminawang mae ri oloang maraenga, lanri asse'remi tallasatta siagang Almasi. Siagang tappa' tonga' angkanaya manna inai, punna nakacoi pikkirannu lanihukkungi ri Allata'ala.

EFESUS 1:17

Kupalaki mae ri Allata'ala, Batarata Isa Almasi, Mangge mala'birika, sollannu Nasare RohNa. Iaminjo RohNa lampa'jari cara'dekko, siagang lampappiassengangi sa'genna nuasseng Allata'ala.

KOLOSE 1:28

Iaminjo Almasi nabirittakanga ikambe mae ri sikontu rupataua. Kipakainga'mi siagang kiajara' ngasemmi ke'nanga siagang baji'-baji'. Pattujunna ikambe iamintu sollanna akkulle ngaseng nierang rupataua mae ri Allata'ala, salaku tau baji'mo katallassang rohanina, lanri asse'renamo siagang Almasi.

KOLOSE 4:12

Sallang battu ri Epafras. Anne Epafras tau battu antureng tonji. Pajama-jamaNa tongi Isa Almasi, tenaya lanrena tuli ampappala' doangangko. Sanna' napala'na mae ri Allata'ala, sollanna pila' jarre' tappa'nu siagang a'jari toa tojeng pikkirang rohaninu; sollannu a'jari sukku' mannurukinnu mae ri ero'Na Allata'ala.

1 TESALONIKA 4:9

Tenamo naparallu ikambe antulisiki mae ri kau ri passala' antekamma batenu musti angkamaseangi sikamma sari'battang julu tappa'nu. Le'ba' mako niajara' ri Allata'ala sollannu massing sikamaseang.

2 TIMOTIUS 3:17

Iami anjo Kittaka nipake ampipakei bajiki tau eroka allayani Allata'ala untu' a'rupa-rupa jama-jamang baji'.

IBRANI 5:14

Anjo kanre terasaka untu' tau toaya; nasaba' lanri nia'namo pangalamanna akkullemi naasseng angkana kereanga baji' siagang kereanga kodi.

1 YOHANES 2:5

Mingka inai-nai mappilangngeri ri kananNa Allata'ala, iaminjo taua sukku' batena angkamaseangi Allata'ala. Iaminjo a'jari pammatei angkanaya asse're maki' siagang Allata'ala lalang ri katallassanta.