FILIPI 1:13 - KITTA' MATANGKASA'

¹³ Passabakkang kammaminjo nanaasseng ngasemmo pangawala'na balla' karaenga siagang tau maraengannaya anrinni ri kotaya, angkanaya passabakkang a'jari palayangku mae ri Almasi nanitarungkua'.

FILIPI 1:13 Iomraidhean Croise

LAMPA-LAMPANA 26:29

Appialimi Paulus nakana, “Ri wattu silalonna yareka lalang wattu salloa, appala' doanga' mae ri Allata'ala sollanna ikatte siagang sikamma tau hadereka appilangngeri anne alloa, akkulle ngasengki' ajari sangkamma inakke – pantaranganna anne rante assikkoka'!”

LAMPA-LAMPANA 26:31

Battui ke'nanga assulukang, massing nakanamo para ia ke'nanga, “Anjo taua tena sikali panggaukang sala nagaukang ampassiratangai nihukkung mate yareka nitarungku.”

LAMPA-LAMPANA 28:17

Narapiki tallungallo nia' ri Roma, nasuro kio'mi Paulus pamimping-pamimpinna tu Yahudia anjoreng. A'rappunganna ngasemmo ke'nanga, nakanamo Paulus mae ri ke'nanga, “Sikamma sari'battangku! Tena apa-apa kasalangku mae ri bansata, yareka mae ri ada'-ada' nitarimaya battu ri boe-boeta. Mingka manna natena salaku nijakkala' tonja' ri Yerusalem, nampa nipassareanga' mae ri tu Romaya.

LAMPA-LAMPANA 28:20

Jari iaminjo saba'na nakuero' angngagang ngasengko assibuntulu' siagang angngagang ngasengko a'bicara. Nasaba' iaji nanisikkoka' kapassabakkang Karaeng Mappasalama' salloamo naminasai bansa Israel.”

LAMPA-LAMPANA 28:30

Ruan taungi sallona ammantang Paulus ri Roma, ri balla' nasewaya kalenna. Sannang sikali nyawana antarimai sikamma tau niaka battu angkunjungi.

EFESUS 3:1

Iaminjo saba'na, na inakke anne, Paulus, nitarungkuma' lanri Isa Almasi untu' ikau ngaseng bansa-bansa maraenga.

EFESUS 4:1

Iaminjo saba'na nainakke anne tu nitarungkua lanri kulayanina Batara, kupala' dudui ri kau ngaseng: bajikimi empoang tallasa'nu situru' empoannu salaku tu le'bakamo nikio' ri Allata'ala.

EFESUS 6:20

Passala' iaminjo Kabara' Bajika nakua'jarimo se're tunisuro, niaka kamma-kamma anne lalang ri tarungkua. Pappala' doanganga', sollangku barani ambicarai anjo Kabara' Bajika, situru' apa siratanga lakubicara.

FILIPI 1:30

Kamma-kamma anne amminawang ngaseng tongko siagang inakke lalang anne se'rea jama-jamang; iamintu jama-jamang le'baka nucini' kugaukang riolo, siagang kugaukanga ija sa'genna ri kamma-kammaya anne, kamma nulangngereka kamma-kamma anne.

FILIPI 1:7

Tuli nia'nu ngaseng lalang ri atingku. Memang siratangi punna kammai anjo nyawaku mae ri kau ngaseng. Nasaba' le'ba' ngaseng tommako annarima siagang inakke iamintu passare malammoro' Napassareanga Allata'ala mae ri nakke; baji' na ri kamma-kammaya anne, iamintu ri wattungku nia' lalang ri tarungkua, kammayatompa pole ri wattungku nia' pantara' untu' angngalleangangi siagang ampamentengangi anjo Kabara' Bajika.

FILIPI 4:22

Sikamma Umma'Na Allata'ala niaka anrinni ri kotaya, la'biangampa niaka anrinni ri balla' lompona karaenga akkiring ngaseng tongi sallang mae ri kau.

2 TIMOTIUS 2:9

Lanri kubirittakannamo Kabara' Bajika, nakukasia'mo kasessanga; ba'lalo nirantema' sangkamma tau sannaka ja'dala'na. Mingka anjo kana-kananNa Allata'ala takkulleai nirante.