EZRA 1:2 - KITTA' MATANGKASA'

² “Anne parentana Kores, karaeng Persia. Batara, Allata'ala makoasaya ri suruga, le'ba' angngangkaka' a'jari karaeng ri sikontu linoa, siagang nasarea' tugasa' untu' ambangung Balla' untu' KalenNa ri Yerusalem, ri daera Yehuda.

EZRA 1:2 Iomraidhean Croise

1 KARAENG-KARAENG 8:27

Mingka, o Allata'ala, maka attojeng-tojengKi' larella ammantang ri anne buttaya? Manna sikontu langika taganna' luara'na untu' iKatte, la'biangampa naanne balla' kubangunga!

2 PATTOTTORANG 2:12

Poro nipuji arenNa Karaeng Allata'alana Israel, Papare' langika siagang buttaya! Nasarei Daud sitau ana' bura'ne sannaka cara'de'na ri kabajikang, siagang niaka pangngassenganna, niaka kamma-kamma anne angngusaha ambangung se're balla' untu' Batara siagang sibatu balla' karaeng untu' kalenna.

EZRA 1:5

Nampa sikamma imang kapalaya battu ri golongang suku Yehuda siagang Benyamin, sikamma imanga siagang tu Lewia, kammayatompa sikamma tau nipagioka nyawana ri Allata'ala, apparuru ngasemmi untu' ammotere' mange ri Yerusalem, ambangungi Balla'Na Batara ammotere'.

EZRA 3:7

Anynyumbang tommi doe' ra'yaka untu' anggaji tukang batua siagang tukang kayua. Akkiring tommi ke'nanga kanre, inungang siagang minynya' zaitun mange ri kota-kota Tirus siagang Sidon untu' nipassambe siagang kayu camara Libanon battu ri anjo kota-kotaya. Anjo kayu-kayua nierangi mange ri Yafo ammalo tamparang. Yangasenna anjo nagaukangi ra'yaka situru' ising napassareanga Kores, karaeng Persia.

EZRA 4:3

Mingka appialimi Zerubabel, Yesua, siagang sikamma anjo kapala golonganga angkana, “Tenaja naparallu ikambe ri bantuannu untu' ambangungi Balla'Na Batarana ikambe. Kalenna tonji ikambe lambangungi situru' parentana Kores, karaeng Persia, mae ri kambe.”

EZRA 5:15

Nisuroi ri karaenga angngallei anjo sikamma pakkakasaka nampa napoterang mange ri Balla'Na Batara ri Yerusalem, kammayatompa na nabangung ammotere' anjo Balla'Na Batara.

EZRA 6:10

Gaukang ngasengi anjo kammaya sollanna akkulle ke'nanga assare koro'bang ampakate'neai nyawaNa Allata'ala makoasaya ri suruga, kammayatompa sollanna napappalakkanga' ke'nanga barakka' siagang untu' ana'-ana' bura'neku.

EZRA 6:3

“Ri taung makase're ri wattu pamarentahanna Karaeng Kores, appasuluki sura' parenta sollanna nibangung ammotere' Balla'Na Batara ri Yerusalem, a'jari tampa' untu' angngerang passare siagang attunu koro'bang. Tinggina anjo Ballaka musti 27 metere' nampa sangkara'na 27 todong metere'.

EZRA 7:12

“Battu ri Karaeng Artahsasta mae ri Imang Ezra, panrita HukkunNa Allata'ala makoasaya ri suruga.

NEHEMIA 1:4

Kulangngere'na anjo kabaraka, ammempoma' naung nampa angngarru'. Pirangallo arei tuli si'na kusa'ring pa'maikku. Tulusu' appuasama' siagang appala' doang ri Allata'ala,

NEHEMIA 1:5

kukana, “O, Karaeng Allata'ala makoasaya ri suruga. IKattemi Allata'ala Malompoa, na mandallekammo ikambe ri Katte lalang malla'. TamamminrayaKi' ri janjinTa mae ri tau mangngaia ri Katte siagang mannurukia ri parentaTa.

PAMMUJI 136:26

Sukkurukko mae ri Allata'ala makoasaya ri langika; pangngamaseanNa sa'genna satunggu-tungguna.

PAMMUJI 85:2

MangngellaiKi' mae ri buttaTa, o, Batara, lampa-lampana Israel le'ba'mi Kipakabaji'.

PANGNGEBARANG 21:1

Sanrapang batena Naatoro' Batara je'ne' binangaya sollanna a'lo'loro' situru' ero'Na, kammatommi anjo napimpingi pikkiranna karaenga.

YESAYA 41:2

Inai ampagioki tukoasaya battu raya, siagang tulusu' assarei pammetang? Inai assarei pakkulle untu' ambetai sikamma bansa-bansaya, siagang napatundu' sikamma karaenga? Pa'danna ampassimbungi ke'nanga rapang limbu'bu', panana ampatassiaraki ke'nanga rapang rarame nairikang anging.

YESAYA 44:26

INakke ampakajarreki kananna atangKu, siagang anggaukangi rancana napa'nyataya tunisuroKu, iNakke angkana lanipammantangngi poleammi Yerusalem, siagang kota-kota Yehuda laKubangung poleangi ammotere'; laKupakabajiki sikamma rumbanganna.

YESAYA 44:28

INakke angkana mae ri Kores, ‘Ikau lammarenta untu' iNakke, siagang langgaukangi sikontu erokKu. Parentakangi sollanna nibangung ammotere' Yerusalem, siagang na nipadongko' batu pundasina Balla'Na Batara.’ ”

YESAYA 45:1

Batara le'ba' angngangkaki Kores a'jari karaeng; ia nisuro ambetai sikamma bansa-bansaya siagang antepoki kakoasanna sikamma karaenga. Batara lassungkeangi sikamma pakke'bu' lompona kotaya, tena manna se're lammantang tattongko'. Nakana Batara ri ia,

YESAYA 66:1

Nakana Batara, “Langika empoang kala'birangKu, na buttaya pattuppuang bangkengKu. Jari balla' antekammaya ero' nubangungangA' siagang tampa' apaya lanupa'jariangA' pammantangangKu?

YEREMIA 10:11

Ikau ngaseng, he ummaka, musti nupauangi ke'nanga angkanaya lanipanraki anjo sikamma rewata-rewata tenaya napa'jari langika siagang buttaya. Lanipa'lanynyaki ke'nanga battu ri tompo'na buttaya.)

YEREMIA 27:5

“Lanri koasa malompoKu siagang lanri kagassingangKu nale'ba' Kupa'jari linoa siagang rupataua kammayatompa sikontu olo'-oloka, nampa akkulle Kupassareang mae ri inai-nai mamo Kukaerokia.

YEREMIA 29:10

Nakana Batara, ‘Punna ganna'mo wattua tujupulo taung untu' Babel, laKuparhatikangko pole ammotere', siagang laKurupai janjingKu untu' angngerangko ammotere' mae ri anne tampaka.

DANIEL 1:21

Tulusu' tugasa'na Daniel ri balla' karaenga sa'genna battu Karaeng Koresy battu ri Persia ambetai tu Babel.

DANIEL 2:21

Iami ampattantui wattua siagang jammanga, Ia antu'gurangi siagang allantiki pamarentaya. Ia todong assarei kacara'dekang, siagang assarei pammahang.

DANIEL 2:28

Mingka ri suruga, nia' Allata'ala akkulle ansungkei sikontu rahasiaya, siagang Iami le'ba' ampauangki' karaeng apa lakajarianga ri allo ri boko. Kamma-kamma anne, boli'mi kamma nanapakasingara' atanta angkana apa so'nata siagang kicini' ilalang tinrota karaeng.

DANIEL 4:25

Lanibongkai karaengku battu ri pa'rappunganna rupataua nampa attallasa' ri alla'na olo'-olo' niaka ri paranga. Lalang tuju taung langnganreki' ruku' kamma sapi karaeng, siagang attinroki' ri parang tassungkea, sa'genta lanibasai ri allung. Le'baki anjo lakianimi karaeng, angkanaya Allata'ala Kaminang Tinggia makoasa mae ri kakaraenganna rupataua, siagang anjo kakaraenganga Napassareangi mae ri nai-nai Napilea.

DANIEL 4:32

Lanibongkako battu ri pa'rappunganna rupataua, nampa attallasakko siagang olo'-oloka ri paranga. Lalang tuju taung langnganreko ruku' sangkamma sapi. Le'baki anjo lanumangakuimi angkanaya Allata'ala Kaminang Tinggia makoasa mae ri kakaraenganna rupataua siagang anjo kakaraenganga nipassareangi mae ri nai-nai Napilea.”

DANIEL 5:23

Kipakatinggi kalenta mae ri Batara niaka ri suruga siagang baraniki' ansuro erangi antama' mangko'-mangko' le'baka nirampasa' battu ri Balla'Na Batara. Nampa ikatte siagang sikamma tumalompota, sikamma bainenta siagang baine piarata angnginungi battu ri anjo mangko'-mangkoka. Ammuji-mujiki' mae ri rewata-rewata nipareka battu ri bulaeng, pera', tambaga, bassi, kayu siagang batu, iamintu rewata-rewata tenaya nakkulle accini' yareka allangngere' yareka ammahang apa-apa. Tena kipakalompoi Allata'ala ampattantuai tallasatta siagang mateta siagang ampattantuai oloang katallassanta.

DANIEL 6:25

Nampa naparentakang karaenga sollanna nijakkala' kabusu' anjo sikamma tau antuduai Daniel. Nampa ke'nanga siagang ana'-ana'na, bainenna, kabusu'na nipasambila ngasengi antama' ri leanna singaya. Tenapa nabattu ke'nanga naung ri dapara' anjo leanga, na nibakkaimo nikokko' ke'nanga ri singa-singaya siagang nilica' sa'genna buku-bukunna ke'nanga.

YUNUS 1:9

Appialimi Yunus angkana, “Inakke tu Ibrani. Anynyomba' ri Batara, Allata'ala ri suruga, ampa'jariai tamparanga siagang bontoa.”