ESTER 4:16 - KITTA' MATANGKASA'

¹⁶ “Passe'rei sikontu tu Yahudi niaka ri kota Susan untu' ampappala' doanganga'. Teako angnganrei siagang teako angnginungi lalang tallungallo tallumbangngi. Inakke kalengku siagang sikamma tulolo palayangku lappuasa ngaseng tonga'. Le'baki anjo, erokka' mange andallekang ri karaenga, manna nakudakkai undang-undanga. Punna padeng musti matea' passabakkang anjo, boli'mi kamma nakumate!”

ESTER 4:16 Iomraidhean Croise

PA'JARIANG 18:19

Ia le'ba'mi Kupile sollanna naparentakang mae ri sikamma ana'-ana'na siagang turunganna untu' amminawang turu' ri Nakke kammayatompa nagaukang panggaukang bajika siagang adeleka. Punna nagaukangi ke'nanga anjo passalaka, sikontu janjingKu mae ri Abraham laKurupai ngasengi.”

PA'JARIANG 43:14

Poro Allata'ala Kaminang Koasaya ampagioki atinna anjo guburnurka, natu'guru' mangngamaseang mae ri kau ngaseng, sa'genna napoterang Benyamin siagang Simeon mae ri kau ngaseng. Ia inakke anne, punna paleng musti tappelaki ana'-anakku, tanjeng mama' ri Allata'ala.”

2 SAMUEL 10:12

Pakajarreki nyawanu. Umba kibarjuang siagang barani untu' bansata siagang untu' kota-kotaNa Allata'alata. Dasi-dasi naNagaukang Batara apa Nakaerokia.”

2 KARAENG-KARAENG 7:4

Punna antamakki' ri kotaya, lamate naalleki' cipuru'; na punna ammantangki' anrinni lamate tonjaki'. Umba baji' ki'lampa mange ri pakkemaanna tu Siria. Kaminang bellana nanabunoki' ke'nanga. Mingka akkulle tongi tenaja naapa-apaiki'.”

2 PATTOTTORANG 20:3

A'jari malla'mi Yosafat nampa appala' doang untu' appala' pangngunju' battu ri Batara. Nampa naparentakang sollanna appuasa kabusu' sikontu ra'yaka.

EZRA 8:21

Nampa kupa'la'bammo kupau anjoreng ri biring Binanga Ahawa angkana sikontu taua musti appuasai siagang napakatunai kalenna ri dallekanNa Allata'ala. Appala' doammi ikambe sollanna nipimping ikambe ri Allata'ala lalang ri anjo pa'jappanga, siagang Najagai ikambe, ana'-ana'na ikambe, siagang sikontu barang-baranna ikambe.

ESTER 4:15

Jari akkirimmi kabara' Ester mae ri Mordekhai angkana,

ESTER 4:17

Nampa a'lampamo Mordekhai anggaukangi anjo apa napappasangnganga Ester ri ia.

ESTER 4:3

Kammayatompa ri sikontu daera propinsia, appiraung ngasemmi nalangngere'na nipa'la'bang parentana karaenga. Appuasami ke'nanga, angngarru' siagang akkunrareng, siagang jaimi ri ke'nanga ammake kaeng karung siagang attinro rate ri aua.

ESTER 5:1

Ri makatalluna allo puasana, napakemi Ester pakeang ratuna, nampa a'lampa mange ri paranglakkeng lalanna balla' karaenga. Ammentengi ri dallekang pakke'bu'na balla' luara' passe'reang taua ri dallekanna karaenga. Anjo wattua sitabangi ammempo karaenga irate ri empoang kala'biranna, a'dalle' mange ri anjo pakke'buka.

ESTER 9:31

Lalang ri anjo suraka nikellai tongi ke'nanga sollanna ia ke'nanga kammayatompa turunganna ke'nanga, nau'rangi bajiki anjo allo-allo Purim siagang napakalompoi punna narapi' wattunna, sangkamma todong napakalompona wattu puasaya siagang wattu kasusaanga. Iaminjo bonena sura'na Mordekhai siagang Ratu Ester.

YESAYA 22:12

Anjo wattua laNasuro ngasengko Batara Kaminang Tinggia siagang Kaminang Makoasaya angngarru' siagang appiraung, ancukkuruki uu'nu siagang ammake kaeng karung.

YEREMIA 36:9

Ri bulang salapang taung makalima pamarentahanna Yoyakim karaeng Yehuda, appuasai ra'yaka untu' ampalaki pangngamaseanNa Batara. Pandudu'na Yerusalem siagang sikamma tau battua ri kota-kota Yehuda, appuasa ngasengi.

DANIEL 2:18

Nasuromi ke'nanga appala' doang mae ri Allata'ala ri suruga sollanna mangngamaseang mae ri ke'nanga na Nasungke rahasiana anjo so'naya. Lanri kammana anjo tenamo nanihukkung matei ke'nanga siagang kabusu' sikamma tau cara'de' maraenganga.

MATIUS 12:40

Tallungalloi le'ba' ammantang Na'bi Yunus lalang ri battanna juku' lompoa. Kamma tomminjo sallang Ana' Ma'rupataua, latallungalloi ammantang lalang ri battanna buttaya.

LUKAS 9:24

Nasaba' inai-nai ero' angkatutui nyawana, iami latappela' nyawana. Mingka inai-nai angkoro'bangkangi katallassanna untu' kaparalluangKu, iami lanipasalama' katallassanna.

YOHANES 19:22

Mingka appialimi Pilatus nakana, “Apa le'baka kutulisi', boli'mi kamma anjo tattulisi'.”

LAMPA-LAMPANA 10:7

A'lampanamo anjo malaeka' a'bicaraya mae ri Kornelius, nakio'mi Kornelius rua palayanna ri balla', siagang sitau tantara pangawala' baji'na.

LAMPA-LAMPANA 20:24

Mingka takujampangiai anne tallasakku, assala' akkulle mamo kupa'le'ba' anjo tugasa' Napassareanga Batara Isa mae ri nakke; kammayatompa assala' akkullea' jarre' sa'genna kala'busang tallasakku ampa'la'bangi Kabara' Bajika, iamintu ri passala'na pangngamaseanNa Allata'ala.

LAMPA-LAMPANA 21:13

Mingka appialimi Paulus angkana, “Apa matu-matunnu angngarru' kamma ngaseng, sa'genna a'jari ancuru' kusa'ring atingku? Kamma-kamma anne sadiama'; teako angkana nijakkala' bawang, mingka sadiama' ba'lalo mate lanri Batara Isa.”

LAMPA-LAMPANA 27:33

Ri wattunna a'birimmo ammumbamo alloa, nasuromi Paulus angnganre ngaseng taua. Nakana Paulus, “Sampulomi anggappa' allonna tuli attayang jako bawang lalang malla'nu, nanutangnganrea apa-apa.

LAMPA-LAMPANA 9:9

Tallungalloi takkullea accini', na anjo wattua tena sikalimo nangnganre siagang angnginung.

ROMA 16:4

Le'baki ke'nanga sike'de' mate lanri ero'na ke'nanga ampalilia' ri balaya. Appala' sukkurukka' mae ri ke'nanga; ba'lalo teai inakke bawang, mingka sikontu jamaah bansa-bansa maraenga appala' tarima kasi' ngasengi mae ri ke'nanga.

FILIPI 2:30

Sike'deki mate lanri kaparalluang jama-jamanNa Almasi; nabotorimi nyawana lanri ero'na antulunga' lalang arennu ngaseng.

YOSUA 24:15

Ebara' angkana taerokako anynyomba mae ri Batara, pilei memammi anne alloa, angkana inai lanusomba: rewata-rewata nasombaya boe-boenu riolo ri Mesopotamia yareka rewata-rewatana tu Amori nupammantangngia pa'rasanganna kamma-kamma anne. Mingka ikambe, iamintu inakke siagang sikontu kaluargaku, Batara bawang lakusomba.”

1 SAMUEL 19:5

Le'ba'mi nasaung nyawana wattunna nabuno Goliat, na nisaremo pammetang lompo tu Israel tete ri ia. Kalenta anciniki anjo apa le'baka kajariang, siagang rannumi pa'maitta anjo wattua. Jari angngapa nakiero' kamma-kamma anne ansessai tau tenaya kasalanna siagang ambunoi anjo Daud natena apa-apa saba'na?”