DANIEL 5:23 - KITTA' MATANGKASA'

²³ Kipakatinggi kalenta mae ri Batara niaka ri suruga siagang baraniki' ansuro erangi antama' mangko'-mangko' le'baka nirampasa' battu ri Balla'Na Batara. Nampa ikatte siagang sikamma tumalompota, sikamma bainenta siagang baine piarata angnginungi battu ri anjo mangko'-mangkoka. Ammuji-mujiki' mae ri rewata-rewata nipareka battu ri bulaeng, pera', tambaga, bassi, kayu siagang batu, iamintu rewata-rewata tenaya nakkulle accini' yareka allangngere' yareka ammahang apa-apa. Tena kipakalompoi Allata'ala ampattantuai tallasatta siagang mateta siagang ampattantuai oloang katallassanta.

DANIEL 5:23 Iomraidhean Croise

PA'JARIANG 14:19

nampa nabarakkaki Abram nakana, “Poro Allata'ala Kaminang Tinggia, ampa'jariai langika siagang buttaya, ambarakkakiko Abram!

PA'JARIANG 2:7

Nampa angngalle Karaeng Allata'ala sike'de' butta, naNapare' a'jari se're tau, nampa natui' so'bolo' ka'murunna siagang nappasa' assarea katallassang; nattallasa'mo anjo taua.

2 KARAENG-KARAENG 14:10

Ikau Amazia, a'jari tampomako, lanri le'ba'namo nubeta tu Edom. Jari, sai jaimi anjo pammetannu? Bajikangngang boli'mi ri balla' anjo pammetannu! Apa matu-matunnu a'boya pa'bettesang lanri ero'nu bawang ancilakai kalennu siagang ra'ya'nu?”

AYUB 12:10

Ia angngatoroki tallasa'na sikontu niaka attallasa'; Ia Makoasa mae ri nyawana tunggala' rupataua.

AYUB 31:4

Mattantu Naassengi Allata'ala sikontu panggaukangku; Nacini' ngasengi sikamma dakkaku.

PAMMUJI 104:29

Punna a'gilingKi', mallaki ke'nanga; punna Kialle nappasa'na ke'nanga, possoki, nampa ammotere' a'jari limbu'bu' butta sangkamma riolo.

PAMMUJI 115:16

Langika iamintu Bataraji bawang pata, mingka buttaya Napassareangi mae ri rupataua.

PAMMUJI 139:3

IKatte ancinikka', baji' ri wattungku anjama yareka wattungku ammari-mari, iKatte angngassengi sikontu apa kugaukanga.

PAMMUJI 146:4

Punna mate ke'nanga, ammotereki ke'nanga mae ri buttaya; anjo memang alloa nalanynya' ngasemmo rancanana ke'nanga.

PANGNGEBARANG 20:24

Le'ba' Napattantumi Batara oloang tallasa'na rupataua ri anne linoa; lanri kammana minjo natakkullea napahang oloang katallassang kalenna rupataua.

YESAYA 13:11

Nakana Batara, “LaKuhukkungi linoa lanri kaja'dallanna, siagang tau ja'dalaka lanri dosa-dosana ke'nanga. Tunggala' tau tampoa laKupakatunai, siagang laKuhukkungi tau borroa siagang pallaka.

YESAYA 14:13

Appattujuangko nai' ri langika siagang nupadongko' empoang kala'birannu irate ri bintoeng kaminang tinggia! Nupikkiriki angkana akkulleko ammempo salaku karaeng irate ri moncong bageang wara', tampa'na sikamma rewataya a'rappungang.

YESAYA 2:12

Ri anjo alloa laNapakatunai Batara Kaminang Koasaya sikamma tau ampakatinggiai kalenna, na nahukkung tau borroa siagang tau tampoa.

YESAYA 33:10

Nakana Batara ri anjo bansaya, “Kamma-kamma anne lambangungA' siagang langngalleA' tindakang untu' ampappicinikangi kakoasangKu.

YESAYA 37:19

Sikamma rewatana ke'nanga natunu tommi siagang naancuru' tommi, lanri sikamma anjo rewataya tena sikali koasana. Anjo rewataya poro patung kayuji siagang patung batuji, bate pare' rupatau.

YESAYA 37:23

Nuassenji angkana inai anjo nupakka-pakkanaia siagang nuhinaya? INakke, Allata'alana Israel, Allata'ala matangkasaka.

YESAYA 42:5

Karaeng Allata'ala ampa'jari siagang angka'rangi langika; Ia ampareki buttaya siagang sikamma attimboa rateanna. Nasarei rupataua nappasa' katallassang siagang nyawa. Napabattui pasang kammaya anne mae ri atanNa,

YEREMIA 10:23

Batara, kuassengi angkanaya tena manna sitau makoasa ampattantui sarenna yareka allewai oloang tallasa'na.

YEREMIA 48:26

Nakana Batara, “Pareki Moab nasa'ring, lanri napattampoangi kalenna mae ri Nakke. Langgulung-gulungi lalang ri langngena, siagang lanikakkali ri taua.

YEREMIA 50:28

Sikamma tau laria mange ri Yerusalem battu ri Babel nacaritai antekamma batena Karaeng Allata'alata ambalasaki panggaukanna tu Babel mae ri Balla'Na Batara.)

YEREMIA 50:29

Nakana Batara, “Suroi sikamma tantara angngeranga pana ambunduki Babel. Pagio' ngasengi sikamma tau cara'deka ammake sanjata pana. Kurungi anjo kotaya siagang teako lappassangngi manna sitau ta'lappasa'. Balasaki sikontu panggaukanna siagang gaukammi ri ke'nanga sangkamma le'baka panggaukanna, lanri le'baki a'gau' kurangajara' mae ri Nakke, Kaminang Matangkasaka, iamintu Allata'alana Israel.

YEHEZKIEL 28:17

Tanja'nu gammaraka angngerangko mae ri tampoa siagang anjo masahoro'nu a'jari saba' nuppanggaukang tolo. Lanri kammana anjo, Kupatappasakko naung ri buttaya siagang Kupa'jariko pappakainga' mae ri karaeng-karaeng maraenga.’ ”

YEHEZKIEL 28:2

“He tau, pabattui mae ri karaeng Tirus apa Kupaua, iNakke, Batara Kaminang Tinggia, mae ri ia, angkana, ‘Tampoko ampaui kalennu angkana rewatako ammarentaya ri tangnga-tangngana tamparanga. Akkulleko nukana kalennu rewata, mingka u'rangi, angkanaya ikau poro tau biasajako bawang.

YEHEZKIEL 28:5

Memang, ikau cara'dekko a'danggang siagang kamma-kamma anne kalumanynyang kalupepeang mako; nampa anjo kakalumanynyangngannu napa'jari tampo mako!’ ”

YEHEZKIEL 31:10

Lanri kammana anjo, iNakke, Batara Kaminang Tinggia, Kupauangko apa lakajarianga mae ri anjo poko' kayu anrapika coppo'na nai' ri rammanga. Nasaba' pila' tinggi pila' tampoi.

DANIEL 11:12

Nampa la'jari tampomo lanri ammetana siagang lanri jaina musu nabuno; mingka tena natulusu' lakoasa.

DANIEL 4:37

Jari kamma-kamma anne, inakke Nebukadnezar, kupuji, kupakatinggi siagang kupakala'biriki Karaenga ri Suruga. Sikontu Nagaukanga annabai siagang adeleki, siagang akkullei Napakatuna tau tampoa panggaukanna.

DANIEL 8:11

Ba'lalo napa'ngarai panglimana tantara suruga, napammari koro'bang passare allo-alloa mae ri anjo panglimaya, siagang narumbangi balla' ibadaya mae ri ia.

HABAKUK 2:4

Siagang u'rangi: Tau ja'dalaka tena nalalasalama', mingka tau anggaukangai ero'Na Allata'ala lattallasaki lanri majarre'na mae ri Allata'ala.”

LAMPA-LAMPANA 17:25

Tena todong Naparallu ri pannulunna rupataua, nasaba' Iami assarei katallassang siagang nyawa, kammayatompa assarei sikontu apa-apa rupataua!

1 KORINTUS 8:4

Ri passala'na nikanaya angnganre kanre le'bakamo nipassareang mae ri barhalaya sikontutojenna anjo barhalaya apa tena nanikana nia'. Iaji niasseng angkanaya se'reji Allata'ala; tena ruanna.

1 TIMOTIUS 3:6

Se'rea pamimping jama'ah takkulleai tau beru antamaya Karisteng, nasaba' gassingka a'jari tampoi nanggappa pangngalarroi sangkamma Billisika riolo.

IBRANI 4:13

Tenanniakka manna sirupa apa-apa attallasa' lakacokkoang ri paccini'Na Allata'ala. Sikontu-kontuna lakacinikang ngasengi siagang latassungke ngasengi ri dallekanNa. Siagang musti latanggong-jawa' ngaseng maki' mae ri Ia.

PAPPICINI' 9:20

Mingka anjo tau ammantanga, tenaya nanibunoi ri anjo balaya, tena tompa natoba' battu ri dosa-dosa nagaukanga ke'nanga. Tenapa nammari ke'nanga anynyomba mae ri setang-setanga, siagang mae ri barhala-barhala bulaenga, peraka, tambagaya, batua siagang kayu tenaya nakkulle accini' yareka allangngere', yareka a'jappa.

HAKING-HAKING 16:23

Ri se'reang wattu a'rappungammi sikamma tukoasana tu Filistin. Eroki ke'nanga assua'-suara' siagang assare koro'bang mae ri Dagon, iamintu rewata nasombaya ke'nanga. Akkelong-kelommi ke'nanga angkana, “Nasaremaki' pammetang mae ri Simson, musunta!”

1 SAMUEL 17:26

Nakanamo Daud, “Barani tojengi anjo tu Filistin kapereka ampa'ngarai tantaraNa Allata'ala attallasaka!” Nampa akkuta'nang mae ri kalase'renna tantaraya angkana, “Apa lanisareangi tau akkullea ambunoi anjo tu Filistin siagang antongkokai siri'na tu Israel?”

1 SAMUEL 17:36

Le'ba'mi atanta ammuno singa siagang beruang. Na anjo tu Filistin kapereka lasangkamma tommi sarenna anjo sikamma olo'-olo' kubunoa, nasaba' barani anghinai tantaraNa Allata'ala attallasaka.