DANIEL 2:47 - KITTA' MATANGKASA'

⁴⁷ Nakana karaenga ri ia, “Tojeng, Daniel, anjo Allata'alanu kaminang malompo ri alla'na sikontu rewataya. Iami makoasa mae ri sikontu karaenga, siagang assungkeai sikontu rahasiaya. Kuassengi anjo passalaka nasaba' ikau akkulleko ampakasingaraki anne rahasiaya.”

DANIEL 2:47 Iomraidhean Croise

PA'JARIANG 41:39

Jari nakanamo karaenga ri Yusuf, “Allata'alami le'ba' ampauang ngasengko yangasenna anne. Jari a'nyatami angkanaya ikaumi la'bi cara'de' siagang la'bi baji' battu ri yangasenna maraenganga.

2 KARAENG-KARAENG 5:15

Nampa ammotere'mo siagang sikontu paeranna mange ri Elisa. Nakanamo Naaman ri Elisa, “Kamma-kamma anne kuassemmi angkanaya ri sikontu anne linoa se'reji bawang Allata'ala, iamintu Allata'ala nisombaya ri tu Israel. Lanri kammana anjo kuminasai nakiero' antarimai anne passareku.”

AYUB 12:19

Napakatunai imang-imanga siagang sikamma pamimpinga.

PAMMUJI 136:2

Sukkurukko mae ri Allata'ala Kaminang Tenaya Ruanna; pangngamaseanNa sa'genna satunggu-tungguna.

PAMMUJI 136:3

Sukkurukko mae ri Batara Kaminang Tinggia; pangngamaseanNa sa'genna satunggu-tungguna.

PAMMUJI 72:11

Sikontu karaenga lasu'juki ri dallekanna, sikontu bansaya a'jari ata-atanna.

PAMMUJI 82:1

Pammujina Asaf. Allata'ala ampimpingi sidang kakaraenganga ri suruga, nampa assare kaputusang angkana,

PAMMUJI 96:4

Saba' malompoi Batara, siagang sanna' nipujiNa, musti nikamallakkangi la'biangngang nasikontu rewataya.

YEHEZKIEL 26:7

Nakana Batara Kaminang Tinggia, “LaKuerangi Karaeng Nebukadnezar battu ri Babel, untu' ambundukiko, he Tirus. Anjo karaeng kaminang kassaka laniaki battu wara' siagang tantara lompo, siagang jai jarang, kareta-kareta pa'bundukang, kammayatompa pasukang a'jarang.

DANIEL 11:36

Karaeng pa'rasangang waraka lappaero'-eroki appanggaukang. Tampoi ke'nanga nangkana angkanaya la'bi lompoangngangi kalenna namanna pole rewata battu kemae, ba'lalo la'bi lompoangngangi na Allata'ala Kaminang Tinggia. Lakkullei appanggaukang kamma anjo sa'genna kala'busang pangngalarroinNa Allata'ala. Nasaba' anjo apa le'baka Napattantu Allata'ala musti a'rupai la'bi riolo.

DANIEL 2:19

Anjo memang bangngia Napaumi Allata'ala rahasiana anjo so'naya mae ri Daniel lalang se're paccini'. Jari mammujimi Daniel mae ri Allata'ala niaka ri suruga,

DANIEL 2:22

Ia assungkei rahasia kaminang lantanga. Naassengi sikontu apa kajarianga lalang ri sassanga. Nikalimbuki ri caya singaraka.

DANIEL 2:28

Mingka ri suruga, nia' Allata'ala akkulle ansungkei sikontu rahasiaya, siagang Iami le'ba' ampauangki' karaeng apa lakajarianga ri allo ri boko. Kamma-kamma anne, boli'mi kamma nanapakasingara' atanta angkana apa so'nata siagang kicini' ilalang tinrota karaeng.

DANIEL 2:29

Ri wattunta attinro karaeng, asso'naki' ri passala'na jammang labattua sallang. Nasungkei Allata'ala mae ri katte karaeng, iamintu sikontu rahasiana apa lakajarianga.

DANIEL 2:30

Anne rahasiaya le'ba'mi nipakasingara' mae ri atanta mingka teai lanri anne atanta la'bi cara'dekangngangi natau maraenga, passangalinna akkulle kiasseng battuanna anjo so'nata karaeng, siagang niasseng todong bone atinta karaeng.

DANIEL 2:37

Karaengku mala'birika, iami karaenna sikamma karaenga; ikattemi karaeng kaminang makoasaya. Allata'ala ri suruga le'ba' assareki anne kakaraenganga, kakoasanga, kagassinganga siagang kalompoanga.

DANIEL 3:15

Jari, kamma-kamma anne apaka sadia jako su'ju' siagang anynyomba mae ri anjo patunga punna assa'ra musika? Punna taerokako, lakupasambila silalonnako antama' ri pepe' a'rinra-rinraya. Siagang rewata battu kemae lakkulle ampasalamakko battu ri kakoasangku?”

DANIEL 3:28

Nampa nakanamo karaenga, “Pujimi Allata'ala nasombaya Sadrakh, Mesakh siagang Abednego. Iami le'ba' assuroi malaeka'Na untu' ampasalamaki tallua atanNa matappaka mae ri Ia. Le'baki nadakkai ke'nanga parentaku siagang erokangngangi matea ke'nanga kala anynyombaya yareka appakalompo ri rewata maraeng, pantaranganna Allata'alana todong ke'nanga.

DANIEL 3:29

Lanri kammana anjo kuparentakangi angkanaya sikamma tau battua ri bansa-bansaya, ri suku bansaya yareka bahasaya, ia le'baka appasulu' kana-kana anghinai Allata'ala nasombaya Sadrakh, Mesakh siagang Abednego, lanikere'-kereki siagang lanirumbangi balla'na a'jari tambungang loro. Nasaba' tena rewata akkulle anggaukangi anjo apa le'baka Nagaukang Allata'ala.”

DANIEL 4:17

Iaminjo kaputusanna ikambe malaeka'-malaeka' tutua siagang jaga-jagaya. Ero'na ikambe iamintu sollanna sikontu taua ri kere-keremae naani angkanaya Allata'ala Kaminang Tinggia makoasa mae ri kakaraengang rupataua siagang anjo kakaraenganga Napassareangi manna pole ri nai Napilea, ba'lalo tau kaminang tenaya pole anggaranna!’

DANIEL 4:25

Lanibongkai karaengku battu ri pa'rappunganna rupataua nampa attallasa' ri alla'na olo'-olo' niaka ri paranga. Lalang tuju taung langnganreki' ruku' kamma sapi karaeng, siagang attinroki' ri parang tassungkea, sa'genta lanibasai ri allung. Le'baki anjo lakianimi karaeng, angkanaya Allata'ala Kaminang Tinggia makoasa mae ri kakaraenganna rupataua, siagang anjo kakaraenganga Napassareangi mae ri nai-nai Napilea.

DANIEL 4:32

Lanibongkako battu ri pa'rappunganna rupataua, nampa attallasakko siagang olo'-oloka ri paranga. Lalang tuju taung langnganreko ruku' sangkamma sapi. Le'baki anjo lanumangakuimi angkanaya Allata'ala Kaminang Tinggia makoasa mae ri kakaraenganna rupataua siagang anjo kakaraenganga nipassareangi mae ri nai-nai Napilea.”

DANIEL 5:11

Nasaba' lalang ri kakaraenganna karaengku nia' sitau bura'ne nikoasai ri roh rewata-rewata matangkasaka. Ri wattu pamarentahanna manggena karaengku, anjo taua a'buttimi angkanaya nia' kacara'dekanna, pammahanna siagang pangngassenganna, sangkamma pangngassenganna sikamma rewataya. Manggena karaengku, iamintu Karaeng Nebukadnezar, le'baki naangka' anjo taua a'jari pamimping mae ri pacinika siagang tau cara'deka accini' bintoeng.

AMOS 3:7

Tena le'bakai Batara Kaminang Tinggia anggaukang apa-apa punna tena Napa'nyatai rancanaNa mae ri sikamma na'bia, ata-atanNa.

1 KORINTUS 14:25

La'jari singara'mi sikamma apa taccokkoa lalang ri atinna, sa'genna napakatuna kalenna, nampa anynyomba mae ri Allata'ala. Lamangakumi angkanaya ma'nassa nia' tojengi Allata'ala ri tangnga-tangnganu.

PAOLE 10:17

Karaeng Allata'alanu ri tompo'na sikontu rewataya siagang irateanganna sikontu kakoasanga. Iami Allata'ala mala'biri' siagang makoasaya, mustia nituruki ero'Na. TaNangaiyai angngalle sialia siagang tena todong Naero' annarima passare nipacoco'.

1 TIMOTIUS 6:15

KalenNa Allata'ala lampattantui wattu mattantuna kabattuanNa. Iami Makoasaya tenaya ruanna; Iami mala'biri', Karaenna sikontu karaenga, Batarana sikontu rewataya.

YOSUA 22:22

“Kaminang Makoasaya iamintu Batara! Kaminang Makoasaya iamintu Batara! Naassengi angkanaya apa saba'na nanagaukang ikambe anne passalaka, siagang ero' tongi ikambe sollanna nuasseng tongi anne passalaka. Ebara' angkana nagaukangi ikambe anne kammaya lanri ero'na ikambe angngewai Batara, yareka lanri tenanamo natappa' ikambe mae ri Ia, boli'mi kamma namate memang ikambe kamma-kamma anne!

PAPPICINI' 1:5

siagang battu ri Isa Almasi, sa'bi tamamminraya. Iami uru-uru nipattallasa' poleanga ammotere' battu ri kamateanga siagang Iami makoasaya irateanganna sikamma karaeng niaka ri lino. Nakamaseangki' Isa, siagang lanri kamateanNa naNapata'lappasa' maki' battu ri dosa-dosata ngaseng.

PAPPICINI' 17:14

La'bunduki ke'nanga angngewai anjo Ana' Gimbalaka. Mingka lanibetai anjo sikamma karaenga ri anjo Ana' Gimbalaka siagang sikamma taunNa tamamminraya le'baka Nakio' siagang Napile; nasaba' Ia minjo Ana' Gimbalaka Batarana sikamma tumalompoa, siagang Karaenna sikamma karaenga.”

PAPPICINI' 19:16

Ri jubaNa siagang ri bongganNa nia' tattulisi' areng kammaya anne, “Karaenna sikamma karaenga, siagang Batarana sikamma tumalompoa.”