DANIEL 2:29 - KITTA' MATANGKASA'

²⁹ Ri wattunta attinro karaeng, asso'naki' ri passala'na jammang labattua sallang. Nasungkei Allata'ala mae ri katte karaeng, iamintu sikontu rahasiana apa lakajarianga.

DANIEL 2:29 Iomraidhean Croise

PA'JARIANG 41:25

Nakanamo Yusuf ri karaenga, “Anjo ruaya so'na sangkammai battuanna. Napabattuang maki' Allata'ala apa eroka Nagaukang.

YEHEZKIEL 38:10

Nakana Batara Kaminang Tinggia ri Gog, “Anjo wattua lapparekko rancana ja'dala'.

DANIEL 2:22

Ia assungkei rahasia kaminang lantanga. Naassengi sikontu apa kajarianga lalang ri sassanga. Nikalimbuki ri caya singaraka.

DANIEL 2:23

O, Allata'ala napakalompoa boe-boeku, iKattemi kupuji siagang kupakala'biri'. Nasaba' Kisarea' kacara'dekang siagang kagassingang. Kiturukianga' pappalakku. Siagang Kipicinikiamma' pappialia mae ri karaenga.”

DANIEL 2:28

Mingka ri suruga, nia' Allata'ala akkulle ansungkei sikontu rahasiaya, siagang Iami le'ba' ampauangki' karaeng apa lakajarianga ri allo ri boko. Kamma-kamma anne, boli'mi kamma nanapakasingara' atanta angkana apa so'nata siagang kicini' ilalang tinrota karaeng.

DANIEL 2:45

Sai kiciniki karaeng, angkanaya tena sikali tau amberoi, nania' se're batu ta'lappasa' battu ri ta'binga nampa natuju siagang naancuru' anjo patung nipareka battu ri bassi, tambaga, butta pi', pera' siagang bulaeng? Allata'ala malompoa ampa'nyatai mae ri karaengku apa lakajarianga sallang. Anjo so'naya akkullei nipatappa' siagang anne napakasingaraka atanta sanna' sikali kamma tojenna.”

DANIEL 2:47

Nakana karaenga ri ia, “Tojeng, Daniel, anjo Allata'alanu kaminang malompo ri alla'na sikontu rewataya. Iami makoasa mae ri sikontu karaenga, siagang assungkeai sikontu rahasiaya. Kuassengi anjo passalaka nasaba' ikau akkulleko ampakasingaraki anne rahasiaya.”

AMOS 4:13

Moncong siagang anging, Batara ampareki; rancanaNa Napa'nyatai mae ri rupataua. Napareki alloa siagang bangngia; iratei ri coppo'-coppo' buttaya a'jappa. Karaeng Allata'ala Kaminang Koasaya, iaminjo arenNa.