AYUB 42:8 - KITTA' MATANGKASA'

⁸ Jari, angngalleko kamma-kamma anne tuju kayunna sapi laki siagang tuju kayunna bembe laki, nampa a'lampako mange ri Ayub. Passareang ngasengi anjo sikammaya, a'jari koro'bang untu' kalennu. Lappala' doangi Ayub untu' ikau ngaseng, nampa laKupilangngeri pappala' doanna. Tena nalaKupakasirikko, manna nusiratang annarima hukkungang. Teai kammatojenga nupau ri passala'na KalengKu, mingka Ayub napaui kammatojenga.”

AYUB 42:8 Iomraidhean Croise

PA'JARIANG 20:17

Nipa'jari tamanang ngasemmi ri Batara sikontu baine niaka ri balla' kakaraenganna Abimelekh passabakkang Sara, bainenna anjo Abraham. Nampa appala' doammo Abraham ri Allata'ala, sa'genna nipa'jari baji' ammotere' Abimelekh. Bainenna siagang sikamma atanna bainea, nipa'jari baji' ngaseng tommi ammotere' sa'genna akkulle ngasemmi ammana' poleang.

PA'JARIANG 20:7

Mingka kamma-kamma anne poterangi mae ri bura'nenna. Na'bi bura'nenna antu bainea, na lanapappala' doangangko sollanna tena numate. Mingka punna tena nanupoterangi, u'rangi angkanaya ikau siagang sikontu ra'ya'nu lamate ngasengko!”

1 PATTOTTORANG 15:26

Nia' tuju kayunna sapi laki siagang tuju gimbala' nikoro'bangkang mae ri Allata'ala lanri Natulunna tu Lewi angngangkaki anjo Patti Parjanjianga.

2 PATTOTTORANG 29:21

Angngerangi ke'nanga untu' koro'bang pammopporang dosana kaluargana karaenga siagang ra'ya' Yehuda siagang untu' antangkasi Balla'Na Batara, iamintu 7 kayu sapi laki, 7 kayu gimbala' laki, 7 kayu ana' gimbala', siagang 7 kayu bembe. Nasuroi karaenga sikamma imang-imang jari-jarina Harun ampassareangi anjo olo'-oloka irate ri tampa' pakkoro'bangnganga untu' a'jari koro'bang nitunu.

AYUB 1:5

Punna le'ba' anjo massing pa'gaukanga, tuli ambangung bari'basaki Ayub nampa assare koro'bang untu' tungga'-tunggala' ana'na sollanna nipammopporang ke'nanga ri Batara. Saba' nakana pikkiranna Ayub, gassingka dorakami anjo ana'-ana'na siagang nahinai Allata'ala natanaassenga kalenna.

AYUB 1:8

Nakanamo Batara, “Apaka nuparhatikangi atangKu Ayub? Ri sikontu linoa, tena tau sangkammanna baji' pa'mai' siagang majarre'na tappa'na. Anynyombai mae ri Nakke, siagang tena sikali na'gau' kodi.”

AYUB 22:30

LaNatulungko Allata'ala punna tena nusala, siagang punna nugaukang ero'Na.”

AYUB 35:8

Parannuji bawang tau nipakarugi ri dosa-dosanu. Iatommi upa' lanri kabajikannu.

AYUB 42:9

Nagaukammi Elifas, Bildad siagang Zofar, anjo apa Napassuroanga Batara, siagang Natarimami Batara pappala' doanna Ayub.

PAMMUJI 103:10

Tena Nahukkungki' simbattala'na dosata, yareka Nabalasakki' simbattala'na kasalanta.

KALAPPASSANG 18:12

Nampa angngerang Yitro siapa are koro'bang nitunu siagang koro'bang nipolong, a'jari passare mae ri Allata'ala. Battumi Harun siagang sikontu pamimpinna bansa Israel na sipangnganreang siagang Yitro lalang kahaderanNa Allata'ala.

YESAYA 60:14

Ana'-ana'na tau anjallakkangiako battui su'ju', ia le'baka anghinako la'dundui, lanigallarakko ‘KotaNa Batara’, ‘Sion, Kota Allata'ala Matangkasa'na Israel’.

YEREMIA 14:11

Nakana Batara ri nakke, “Teako palakki ri Nakke untu' antulungi anjo tau sikammaya.

YEREMIA 15:1

Nakana Batara ri nakke, “Tena nalaKukamaseang anne bansaya, manna pole nania' Musa siagang Samuel anrinni untu' ammenteng ampappalakkangi ke'nanga pangngamaseangKu. Suroi anne bansaya a'lampa, tena Kuero' anciniki ke'nanga!

YEHEZKIEL 14:14

Manna pole nania' Nuh, Danel siagang Ayub ammantang anjoreng ri tampaka, anjo kabajikanna tau tallua poro nyawa kalenna tonji ke'nanga lasalama'. INakke, Batara Kaminang Tinggia anne akkana.

YEHEZKIEL 45:23

Lalang nigaukanna anjo passua'-suarranga, lalang tuju allo sallona, tunggala' allo musti assarei mae ri Batara tuju kayu sapi laki siagang tuju kayu gimbala' laki ia tenaya caca'na nampa natunu akkayu. Tunggala' allo musti assare tongi sikayu bembe laki untu' koro'bang pammopporang dosa.

PAMMILANGNGANG 23:1

Nakanamo Bileam mae ri Balak, “Ambangung mako ri anne tampaka tuju tampa' pakkoro'bangngang untu' inakke, siagang appasadia mako anrinni tuju kayu sapi laki siagang tuju kayu gimbala' laki.”

PAMMILANGNGANG 23:14

Jari nierammi Bileam ri Balak mange ri parang Zofim, ri coppo'na Moncong Pisga. Anjoreng appaenteng tommi tuju tampa' pakkoro'bangngang siagang assare tommi sikayu sapi laki siagang sikayu gimbala' laki irate ri anjo massing tampa' pakkoro'bangnganga.

PAMMILANGNGANG 23:29

Nakanamo Bileam mae ri Balak, “Appaentengko tuju tampa' pakkoro'bangngang ri anne tampaka siagang appasadiako anrinni tuju kayu sapi laki siagang tuju kayu gimbala' laki.”

MATIUS 3:17

Nampa nia' kalangngerang sa'ra battu rate ri langika angkana, “Iaminne AnakKu Kukamaseanga. Iami nakate'neang atingKu.”

EFESUS 1:6

Nipujimi Allata'ala lanri la'biri'na kabajikang pa'mai'Na, le'baka allumpa Napa'nyata mae ri katte ri tete Ana'Na Nakarimangngia.

2 TIMOTIUS 4:14

Aleksander, anjo tukang tambagaya sanna' ja'dala'na panggaukanna mae ri nakke. Mingka lanibalasaki ri Batara situru' anjo panggaukanna.

IBRANI 10:4

Nasaba' tena memang nakkulle anjo cera' sapia siagang cera' bembe lakia ampa'lanynyaki dosaya.

IBRANI 7:25

Lanri kammanami anjo nakkulle Isa sa'genna satunggu-tungguna ampasalamaki sikontu tau battua mae ri Allata'ala tete ri KalenNa; nasaba' attallasaki satunggu-tungguna sollanna akkulle Napappala'-palakkang sikamma anjo taua mae ri Allata'ala.

YAKOBUS 5:14

Punna nia' tau garring parallui nakio' pamimping-pamimping jama'aka. Siagang parallui anjo pamimping-pamimping jama'aka ampappala' doangangi siagang ansapui minynya' lalang arenNa Batara anjo tau garringa.

YAKOBUS 5:16

Lanri kammana, paralluko massing ammangakui kasalannu mae ri parannu tau, siagang sipappala' doangangko, sollannu nipammolle. Pappala' doangang situruka ero'Na Allata'ala, lompo sikali kakoasanna.

1 YOHANES 5:16

Punna nia' nucini' parannu tu Karisteng a'gau' dosa natenaja nangngerang kamateang, paralluko appala' doang ri Allata'ala; nalanisaremo katallassang anjo taua. Anne natabaya iamintu tau a'gau' dosaya, mingka tenaja nangngerang kamateang. Mingka nia' gau' dosa angngerang kamateang; tena nakukana musti appala' doangko mae ri Allata'ala lanri anjo passalaka.

1 YOHANES 5:6

Iaminjo Isa Almasi, antamaka ri anne linoa angngerang je'ne' lanapa'je'neka siagang cera' kamateanNa. Tena naje'ne' bawang Naerang battu, mingka je'ne' siagang cera'. Na KalenNa RohNa Allata'ala a'jari sa'bi angkanaya kammatojengi anjo; nasaba' iaminjo Roh kontutojenga.

PAPPICINI' 3:9

U'rangi anne: Anjo tau a'jaria umma'na Billisika, paballe-balle nakanaya kalenna tu Yahudi, na sikontutojenna teai, laKupakkulantuki assu'ju' ri dallekannu ngaseng. Nalanaasseng ke'nanga angkanaya Kukamaseang ngasengko.

1 SAMUEL 25:35

Le'baki anjo natarimami Daud anjo apa-apa naeranga Abigail, nampa nakana ri ia, “Ammotere' mako mange ri balla'nu siagang tea' mako bata-batai. Kuturukiang mako pappala'nu.”