AYUB 1:20 - KITTA' MATANGKASA'

²⁰ Nampa ammentemmi Ayub na nakekke' pakeanna tanra susana. Nacukkuru'mi ulunna, nampa su'ju' na nakana,

AYUB 1:20 Iomraidhean Croise

PA'JARIANG 37:29

Ri wattunna ammotere' Ruben mange ri anjo bungunga nampa tanabuntulamo Yusuf anjoreng, nakekke'mi bajunna lanri si'nana nyawana.

PA'JARIANG 37:34

Nakekke'mi pakeanna Yakub lanri si'nana nyawana, nampa ammake pakeang kasusaang. Siapa are allonna nakarruki anjo anaka.

2 KARAENG-KARAENG 2:12

Naciniki Elisa anjo kammaya nampa akkio' angkana, “Elia, bapakku! Bapakku! Pajagana Israel malompoa! Tenami bapakku!” Jari lanynya'mi Elia battu ri paccini'na Elisa. Si'nami nyawana Elisa na nakekke' jubana a'jari rua.

2 PATTOTTORANG 7:3

Ri wattunna nacini' ra'ya' Israel anjo pepe' turunga battu rate ri langika siagang singara' kahaderanNa Batara ampantamakki Balla'Na Batara, su'ju' kabusu'mi ke'nanga naung ri daparaka, nampa anynyomba siagang ammuji ri Allata'ala, lanri baji'Na siagang mangngamaseangi satunggu-satungguna.

EZRA 9:3

Kulangngere'na anjo kammaya, sanna'mi lussa'na nyawaku, sa'genna kukekke' pakeangku nampa kubi'bu' uukku siagang janggokku nampa ammempo naung, ancuru' kusa'ring pa'maikku.

AYUB 1:19

Ti'ring battumi anging puttusuka battu ri parang lompoa nampa natuju anjo ballaka sa'genna rumbang nampa mate ngasemmo anatta. Inakke mami anne atanta ta'lappasa', sa'gengku akkulle battu a'laporo' mae ri katte.”

AYUB 2:12

Mingka nacini' battu bellana ija ke'nanga anjo Ayub, sike'de' mami ke'nanga natanarupaya anjo Ayub. Angngarru' lompomi ke'nanga siagang nakekkeki pakeanna kammayatompa appasimbummi limbu'bu' nai' ri allaka siagang nai' ri ulunna ke'nanga.

KALAPPASSANG 4:31

Jari tappa'mi ke'nanga; siagang nalangngere'namo ke'nanga angkanaya Naparhatikammi Batara bansa Israel kammayatompa Nacini'mi sikamma kasessanna ke'nanga, su'ju'mi ke'nanga anynyomba.

YEREMIA 7:29

Nakana Batara, “He pandudu' Yerusalem, susa mako! Polongi uu'nu nampa nupela'! Akkelongko kelong-kelong karru' irate ri coppo'-coppo' buluka, nasaba' iNakke, Batara larro siagang Kusorongboko ngasengko.

YO"EL 2:13

Teako pakeannu nukae-kae mingka atinnu.” Assaile mako mae ri Karaeng Allata'alanu. Sarro sa'baraKi siagang lompo panynyayang lammoro' pa'maiKi na mangngamaseang. Nangai appamopporang siagang taNangaiyai anghukkunga.

MATIUS 26:39

A'lampa bella-bellami Isa sike'de' mange ri dallekang, nampa su'ju' naung ri buttaya appala' doang angkana, “O, ManggeKu, ka'de' nia' kulleanna, pabellami anne passessaya ri Nakke. Mingka teaKi' naerokKu anjari, passangalinna erotTamo anjari.”

PAOLE 9:18

Nampa su'ju'ma' pole sikalipi ri dallekanNa Batara irate ri coppo'na monconga patampulo allo siagang patampulo bangngi, tamangnganre tangnginung. Nakugaukang anjo kammaya lanri doraka mako mae ri Batara nasaba' nugaukannamo apa ja'dalaka ri dallekanNa, sa'genna a'jari larro.

YOSUA 7:6

Sanna'mi si'nana pa'mai'na Yosua siagang sikamma pamimping umma'na Israel sa'genna nakekke'-kekke' pakeanna ke'nanga, siagang su'ju'mi ke'nanga sila'busu' allo ri dallekanna Patti ParjanjianNa Batara; nasareimi au ulunna ke'nanga salaku pammatei ri si'nana pa'mai'na ke'nanga.

1 PETRUS 5:6

Lanri kammana, pakatunai kalennu irawangang lino magassinNa Allata'ala. Sollanna Napakatinggiko sallang punna narapi' wattunna.