AMOS 4:7 - KITTA' MATANGKASA'

⁷ INakke ampisangkai turung bosia ri wattu paralluna ri je'ne' lamung-lamunnu. INakke appaturung bosi mae ri kota se'rea siagang tena ri kota maraenga. Koko se'rea anggappai bosi, nampa koko maraenga kalotoroki.

AMOS 4:7 Iomraidhean Croise

KALAPPASSANG 10:22

Naangka'mi limanna nai' Musa, na nitongko'mo ri sassang makkappu' sikontu pa'rasangang Mesir tallungallo sallona.

KALAPPASSANG 10:23

Tena sikalimo nakkulle accini' apa-apa tu Mesir anjo wattua, sa'genna tenamo manna sitau a'lampa-lampa. Mingka ri balla'na tu Israel tuli singara'naja.

KALAPPASSANG 8:22

Mingka pantaranganna anjo, daera Gosyen tena nalanituju, lanri anjo pammantanganna ummakKu. Anjoreng tena nalania' katingalo, sollanna nuasseng ngaseng angkanaya iNakke, Batara, anggaukangi anjo kammaya.

KALAPPASSANG 9:26

Poro daera Gosyen bawang, iamintu tampa' pammantangnganna tu Israel, tena nitujui ri anjo bosi eska.

KALAPPASSANG 9:4

LaKupasisalai olo'-olo' piarana tu Israel siagang olo'-olo' piarana tu Mesir. Tena olo'-olo' piarana tu Israel manna sikayu lamate.

YESAYA 5:6

LaKubalang parekangi natimboi ruku'-ruku' liara'. Tena nalaKuparakai poko' anggoro'na, siagang tena nalaKusangkoi. Ba'lalo Kubalang parekangi nitongko' ri ruku' siagang rompo' akkatinting, ba'lalo Kupisangkai rammanga ampitu'guri bosi.”

YEREMIA 14:22

Rewata-rewatana bansa-bansaya takkulleai appaturung bosi ri lino. Manna langika takkulle todong ampaturungi bosia siagang koasa kalenna. IKatteji bawang panrannuanna ikambe. IKatte ampa'jari ngasengi anjo sikammaya.

YEREMIA 14:3

Sikamma palayanna tau kalumanynyanga nisuroi a'boya je'ne' ri kere-keremae; a'lampai ke'nanga mange ri sikamma bungunga mingka la'busu' ngasemmi je'neka. Tena bonena bongkia naeranga ke'nanga ammotere'. Lussa'mi natappu' minasa ke'nanga siri'-siriki ke'nanga na natongko' rupanna.

YEREMIA 14:4

Taturungai bosia siagang kalotoro' sikali buttaya; natongkoki rupanna pamarria lanri la'bana nyawana.

YEREMIA 3:3

Lanri kammana minjo natattahang je'neka battu ri langi', siagang tena battu-battuna bosia ri wattu baraka. Sanrapangko pasundala', siagang tena siri'nu.

YO"EL 2:23

He ra'ya' Sion, rannu mako! Ma'reja-rejako nu ma'rannu-rannu! Lanri sikontu kabajikang battua ri Karaeng Allata'alanu. Ri wattu timoroka Napaturungangko bosi siganna'na. Ri wattu baraka Napaturungi bosia, kammayatompa ri wattu a'rappona rappo-rappoanga kamma riolo.

ZAKHARIA 14:17

Punna nia' bansa taeroka a'lampa mange ri Yerusalem untu' anynyomba ri Karaeng, Batara Kaminang Koasaya, talanatujuai bosi pa'rasanganna.

YOHANES 4:35

Nukana ngaseng, ‘Patambulang mami nawattu pakkattoanga.’ Mingka Kukana ri kau: Cinikimi tana-tana didiamo asenna, sadiami lanikatto!

1 KORINTUS 4:7

Inaika ampa'jariko malompoangang na tau maraenga? Sai yangaseng-ngasenna sangnging apa-apa nutarimaji battu ri Allata'ala. Jari angngapa nanuero' ampattampo-tampoangi kalennu, sangkamma le'ba' angkana anjo apa-apa niaka ri kau teai apa-apa nutarima?

PAOLE 11:17

Punna nudakkai anjo parentaNa, lalarroi Batara mae ri kau. Tena Nalappaturung bosi; la'jari kalotoro' taba sikali buttanu sa'genna tenamo wassele'na lamung-lamunnu. Jari tasalloami numate ri butta coppong Napassareanga Batara mae ri kau.

YAKOBUS 5:17

Anjo Elia, tau biasa tonji kamma ikatte. Attojeng-tojengi appala' doang sollanna tena naturung bosia; apaji natena tojemmo naturung bosia tallun taung assitangnga sallona.

PAPPICINI' 11:6

Nia' kakoasanna ke'nanga untu' antongkoki langika sollanna tena naturung bosia ri wattu napa'la'banna ke'nanga biritta battua ri Allata'ala. Nia' todong kakoasanna ke'nanga mae ri sikontu timbuseng je'neka, untu' ampinrai je'neka a'jari cera'. Siagang nia' todong kakoasanna untu' antunrungi buttaya siagang a'rupa-rupa bala, kere-kere wattu punna ero' ke'nanga anggaukangi.