AMOS 3:2 - KITTA' MATANGKASA'

² “Battu ri sikontu bansaya ri lino, ikaumi se're-se'rea bansa Kuassenga siagang Kuparhatikanga. Iaminjo saba'na nalompo dosanu, siagang ma'nassa laKuhukkung ngasengko.”

AMOS 3:2 Iomraidhean Croise

PA'JARIANG 10:32

Ia ngasemmi anjo sossoranna Nuh, massing-massing bansa, situru' massing garisi' sossoranna ke'nanga. Iaminne ke'nanga nakabattui sikontu bansa-bansaya ri anne linoa, baku' le'ba'na kajariang a'ba lompoa.

PA'JARIANG 18:19

Ia le'ba'mi Kupile sollanna naparentakang mae ri sikamma ana'-ana'na siagang turunganna untu' amminawang turu' ri Nakke kammayatompa nagaukang panggaukang bajika siagang adeleka. Punna nagaukangi ke'nanga anjo passalaka, sikontu janjingKu mae ri Abraham laKurupai ngasengi.”

PAMMUJI 147:19

Napabattui pasanNa mae ri umma'Na, katantuanNa siagang hukkunNa mae ri umma' nipileNa.

KALAPPASSANG 32:34

Kamma-kamma anne a'lampamako, nampa nuerang anjo ke'nanga mange ri tampa' le'baka Kupau mae ri kau. MalaekakKu lanrurungangko, mingka nia' se're wattu sallang na narapi' wattunna laKuhukkung ke'nanga lanri dosa-dosana ke'nanga.”

YESAYA 63:19

IKatte ampa'jari ikambe rapang tena le'bakaKi' makoasa mae ri kambe; rapang tena le'bakai ikambe a'jari ummatTa.

YEREMIA 1:15

LaKusuroi sikontu bansaya ri bageang wara' battu angkoasai Yerusalem. Sikamma tembo'-tembo' niaka ri tammulilina anne kotaya siagang sikamma pakke'bu' lompona kammayatompa sikontu kota-kotaya ri Yehuda lanaalle ngasengi ke'nanga.

YEREMIA 10:25

Pa'bettese'mi larroTa mae ri bansa-bansa tenaya naaniKi' siagang tenaya naero' anynyomba ri Katte. Nasaba' le'ba'mi napanraki taba sikali ummatTa siagang naancuru' pa'rasanganna ikambe.

YEREMIA 11:22

Lanri kammana anjo, Nakanamo Batara Kaminang Koasaya, “LaKuhukkungi ke'nanga! Sikamma tau rungkana ke'nanga lamatei lalang pa'bundukang, lamate cipuruki ana'-ana'na ke'nanga.

YEREMIA 13:21

Apa lanukana sallang punna sikamma tau nupare' aganga ambetako siagang angkoasaiko? Tantu lapa'risiki nusa'ring rapang baine eroka ammana'.

YEREMIA 14:10

Ri passala'na anjo bansaya Nakana Batara, “Tena Kusannang mae ri sikamma anjo tau nangaia lari a'lampa ambokoiA', siagang tenaya naero' allewai kalenna. Tena nalaKukaluppai kasalanna ke'nanga; laKuhukkungi ke'nanga lanri dosana ke'nanga.”

YEREMIA 9:25

Nakana Batara, “Lanarapiki sallang wattunna naKuhukkung tu Mesir, Yehuda, Edom, Amon, Moab, siagang pandudu'na parang lompoa ancukkuru' bodoai uu'na. Nisunna' ngasengi ke'nanga sangkamma tu Israel, mingka baji' nake'nanga kammayatompa bansa Israel nipasangkammai siagang sikamma tau tenaya nisunnaki, lanri tenana namannuruki ke'nanga ri parjanjiang nipangngebaranga lalang sunnaka anjo.”

YEHEZKIEL 5:9

Lanri sikontu panggaukannu tenaya Kungai, laKuhukkungi pandudu'nu sangkamma heba'na tenayapa nale'ba' Kugaukang siagang tenaya nalaKugaukang ribokoanganna.

YEHEZKIEL 9:6

Bunoi sikontu tu bura'nea siagang tubainea, tau toa tau rungka, tau toa siagang ana'-ana'. Mingka tea sikaliko apa-apai sikamma tau niaka pammateinna ri abanna. Appakkaramula mako anrinni, ri anne BallakKu.” Jari napakaramulaimi tugasa'na ke'nanga na nabuno sikamma pamimpinna Israel niaka sitabang ammenteng ri Balla'Na Batara.

DANIEL 9:12

TindakanTa sicoco' le'baki apa le'baka Kipa'janjiang mae ri kambe siagang mae ri pamarentana ikambe. Le'ba'mi Kihukkung kota Yerusalem la'bi sannakkangngang nakota maraenga ri anne linoa.

HOSEA 2:13

LaKuhukkungi lanri napakei allo-alloa untu' attunu dupa mae ri Rewata Baal, kammayatompa namodei kalenna siagang belo-belo untu' angngondangi sikamma tanring-tanrinna, nampa nakaluppai taba sikaliMa'. INakke, Batara, anne akkana.”

HOSEA 5:3

Kuasseng ngasengi sikontuna batangkalennu ngaseng, he ikau tu Israel. Tena olona lania' akkulle nurahasiakang mae ri Nakke. Anynyombako ri barhalaya siagang tenamo namajarre' pa'mai'nu mae ri Nakke. Lanri kammana anjo, tena nasiratang taunnu anynyomba mae ri Nakke.”

HOSEA 8:13

Nangai ke'nanga assare koro'bang mae ri Nakke, siagang angkanrei anjo dageng koro'banga, mingka iNakke Batara, tena Kusannang mae ri anjo koro'bang-koro'banga. Kamma-kamma anne laKuu'rangi dosana ke'nanga siagang laKuhukkungi ke'nanga lanri anjo dosa-dosana; laKukiringi ammotere' ke'nanga mange ri Mesir!

HOSEA 9:9

Teai sipato' ja'dala'na panggaukannu sangkamma le'baka nagaukang taua ri Gibea. LaNau'rangi Allata'ala kasalannu, siagang Nahukkungko lanri dosanu.

AMOS 2:4

Nakana Batara, “Tu Yehuda a'mole-molei doraka, lanri kammana anjo ma'nassa laKuhukkungi ke'nanga. Nadakkai ke'nanga parenta-parentaKu siagang tanajampangiai ajarang-ajarangKu. Nipa'lingui ke'nanga ri rewata-rewata maraenga nasombaya boe-boena ke'nanga.

AMOS 3:3

Maka akkullei taua a'lampa sipa'rua punna tena nasipato la'bi riolo?

AMOS 6:1

Cilakako ikau ngaseng attallasa' nyamanga ri Sion, siagang amanga pakkasia'na ri Samaria – ikau ngaseng he pamimpinna tau jaia ri anne Israel porea, ikau ngaseng sarroa nibattui ri ra'yaka untu' nipappalakki pannulungang!

MIKHA 2:3

Lanri kammana anjo Nakana Batara, “Kurancanakangi bala lompoa mae ri kau ngaseng, sa'gennu takkullea ta'lappasa'. Ri anjo wattu sialaka tenamo nula'jappa tampo.

NAHUM 3:4

Anjo Niniwe pasundalaka nihukkungi. Teai sipato' angngonta'na kaga'ganna. Jaimi bansa le'ba' napitabai, siagang nanyonyo' naalle pa'mai'na.

LAMPA-LAMPANA 17:26

Battu ri se'rea tau Nanapa'jari sikontu bansaya, nampa Nasuro ke'nanga ampammantangi sikontu buttaya. Iatommi ampattantui battu ri uru-uruna angkana kemae sa'genna siagang kemaei akkulle ammantang rupataua.

ROMA 2:9

Sikamma tau nangaia a'gau' ja'dala', iami lapanra' siagang lasessa; uru-uruna tu Yahudia, nampa pole bansa-bansa maraenga.

1 KORINTUS 8:3

Mingka inai-nai attojeng-tojeng mangngamaseang mae ri Allata'ala, iami niasseng baji' ri Allata'ala.

PAOLE 10:15

Mingka teai sipato' lompona pangngamaseanNa Batara mae ri boe-boenu, sa'genna ikaumi Napile battu ri alla'na sikontua bansa, siagang sa'genna kamma-kamma anne ikauji umma'Na Napilea.

PAOLE 26:18

Anne alloa Natarimako Batara salaku umma' KalenNa, sangkamma Napa'janjianga mae ri kau, siagang Naparentakangi mae ri kau sollanna nuturuki sikamma hukkunNa.

PAOLE 32:9

Mingka anne jari-jarina Yakub Napilei Batara untu' KalenNa.

PAOLE 4:32

Salidikimi rewasa' le'ba' allaloa, bella ri tenanapa nanulassu', appakkaramula ri allo Napa'jarina Allata'ala rupataua ri linoa anne. Boyami ri sikontu linoa. Le'bakika kajariang apa kammaya anjo heba'na rioloangannaya? Le'bakika nia' tau allangngereki kajariang kammaya anjo?

PAOLE 7:6

Gaukangi anjo kammaya lanri ikau Karaeng Allata'alanu ampatangko. Battu ri sikontu bansaya ri anne linoa, ikaumi Napile Karaeng Allata'alanu untu' a'jari umma'Na kaminang Nangaia.

1 PETRUS 4:17

Narapi'mi wattunna laNaadeli Allata'ala linoa. Na Umma' KalenNa Allata'ala laniadeli la'bi riolo. Jari punna lappakkaramula angngadeli Allata'ala ri katte, antekammami kajarianna sikamma tau tenaya natappa' ri anjo Kabara' Baji' battua ri Allata'ala?