2 SAMUEL 21:3 - KITTA' MATANGKASA'

³ na nakuta'nang ke'nanga angkana, “Apa akkulle siratang kugaukang mae ri kau ngaseng? Erokka' ampakabajiki kasalang le'baka nigaukang mae ri kau ngaseng, sollanna nubarakkaki umma'Na Batara.”

2 SAMUEL 21:3 Iomraidhean Croise

2 SAMUEL 20:19

Anne kotana ikambe iamintu kota Abel lompoi, kala se'renna kota kaminang amanga siagang tamamminraya pa'mai'na ri butta Israel. Angngapa nakiero' angngancuruki? Erokki' ampanraki buttaNa Batara?”

KALAPPASSANG 32:30

Ammukona nakanamo Musa ri anjo bansaya, “Ikau doraka lompo ngaseng mako. Mingka kamma-kamma anne eroka' nai' poleang ri monconga untu' andallekang ri Batara; dasi-dasi na Napammopporanga' siagang Napammopporangi dosa-dosanu.”

KAIMANGNGANG 1:4

Nampa musti napadongkoki limanna irate ri tompo' ulunna anjo olo'-oloka, na Natarimamo Batara anjo passarena untu' nipammopporang dosana.

YUNUS 1:11

Lalang kammana anjo pila' lompomi bombanga, nampa akkuta'nammo sikamma ana' kappalaka ri ia angkana, “Apa musti nagaukang ikambe mae ri kau sollanna ammari anne anging lompoa?”

IBRANI 9:22

Kammami anjo pangngatorang agamana tu Yahudia, angkanaya yangaseng-ngasenna parallui nitangkasi siagang cera'; kammayatompa iapa nakkulle nipammopporang dosaya punna nia' cera' tassolong.

1 SAMUEL 2:25

Punna kasalang taua mae ri rupataua, akkullei nialleang ri Allata'ala. Mingka punna doraka taua mae ri Batara, inai akkulle antulungi?” Mingka tajampangiai ke'nanga anjo pappakainga'na Eli, manggena ke'nanga, nasaba' le'ba'mi Napattantu Batara untu' ambunoi ke'nanga.

1 SAMUEL 26:19

O, karaeng, kipilangngeri sai sombanna anne atanta. Ebara' angkana Batara assuroi karaengku angngewai atanta, akkullei passare koro'banga ampanaungi pangngalarroinNa mae ri atanta. Mingka ebara' angkana rupatau ansuroi karaengku, tapporo nihukkung laloi ke'nanga ri Batara! Nasaba' lanri panggaukanna anjo ke'nanga nanibongkamo atanta battu ri buttaNa Batara, siagang tarpassa musti a'lampai mange ri pa'rasangang maraeng namusti anynyomba anjoreng atanta mae ri rewata-rewata tenaya niassengi.