1 SAMUEL 27:1 - KITTA' MATANGKASA'

¹ Appikkiri'mi lalang ri atinna Daud angkana, “Manna pole antekamma, ri se'reang allo lanabuno tonja' Saul. Jari tena oloang maraeng ri nakke, pantaranganna laria mange ri pa'rasangang Filistin. Lanri kammana anjo talanaboyaiyama' Saul ri Israel, siagang laamang tommi kusa'ring.”

1 SAMUEL 27:1 Iomraidhean Croise

1 KARAENG-KARAENG 12:26

Appikkiri' kammaminne lalang ri atinna, “Punna tuli a'lampa ra'yaka mange ri Yerusalem untu' assare koro'bang ri Balla'Na Batara sangkamma nagaukanga ri kamma-kammaya anne, lammotereki sallang amminawang ri Rehabeam, karaeng Yehuda, nampa nabunoa'.”

1 KARAENG-KARAENG 12:28

Le'ba'na napikki'-pikkiri' anjo passalaka, appare'mi rua patung sapi bulaeng, nampa nakana mae ri ra'yaka, “Bansa Israel! Sallo mako tuli a'lampa mange ri Yerusalem untu' assambayang. Kamma-kamma anne, iaminne rewata-rewatanu, ia le'baka angngantarakko assulu' battu ri Mesir.”

1 KARAENG-KARAENG 19:3

A'jari malla'mi Elia, sa'genna lari sollanna tena nibunoi. A'lampai siagang palayanna mange ri Bersyeba ri Yehuda. Anjoreng naboli'mi anjo palayanna,

2 PATTOTTORANG 25:17

Assikongkoloki Amazia karaeng Yehuda siagang sikamma tumailalanna angngewai tu Israel. Akkiringi tunisuro mange ri Yoas karaeng Israel, ana'na Yoahas, cucunna Yehu, untu' ampa'ngarai a'bundu'.

PAMMUJI 116:11

Lalang kalinguangku nakukana, “Tena manna sitau akkulle nipatappa'.”

PAMMUJI 55:7

Uh, ebara' angkana akka'nyika' sangkamma jangang-jangang bodobangkeng, lanri'baka' mange a'boya tampa' sannang.

KALAPPASSANG 14:12

Nakana memang ikambe riolo angkanaya lakammai anne kajarianna! Nipauang memang jako angkanaya tea' mako ganggui ikambe; lappassang tommi ikambe a'jari ata ri Mesir. Bajikangngangi a'jari ataya anjoreng kala matea anrinni ri parang lompoa!”

PANGNGEBARANG 13:12

Punna tanigappaya apa niminasaya, ta'ronangi nyawaya; punna nigappa apa nikaerokia, sunggui pa'maika.

YESAYA 51:12

Nakana Batara, “INakkemi ansaleori ngasengko. Angngapa numalla' mae ri rupatau lamatea, mae ri rupatau nipelaka rapang ruku'?

PAMMILANGNGANG 14:3

Untu' apa naNaerangki' Batara mange anjoreng ri pa'rasanganga? Mateki' sallang lalang pa'bundukanga nampa nijakkala' sikamma bainenta siagang ana'-anatta. Sai bajikangngangi ammotereka mange ri Mesir!”

MATIUS 14:31

Linta'mi Isa anta'galaki limanna. Nampa Nakana, “O Petrus, anne ikau kurang tappakko. Apa saba'na nanubata-bata?”

MARKUS 4:40

Nampa Nakana Isa ri ana'-ana' gurunNa, “Angngapa numalla'? Angngapa natena nutappa' ri Nakke?”

2 KORINTUS 7:5

Ri wattunna battu ikambe mange ri butta Makedonia, tena sikali nakisawe ammari-mari poso. Battu iraya ilau'mi kasukkaranga antujuki'; pa'beseranna taua mae ri kambe, kammayatompa malla'-malla' tommaki' ilalang ri atinta.

1 SAMUEL 16:1

Siapa are wattu ribokoanganna, Nakanamo Batara mae ri Samuel, “Siapapi sallonu lasi'na pa'mai' passabakkang Saul? Sai ia tenamo naniakui salaku karaeng Israel? Kamma-kamma anne angngalleko minynya' zaitun, siagang a'lampako mange ri Betlehem, mange ri se'reang tau niarenga Isai, nasaba' kalase'renna ana'na Kupilei a'jari karaeng.”

1 SAMUEL 16:13

Angngallemi linta' Samuel minynya' zaitun nampa naminynyaki Daud ri dallekanna sikamma daenna ngaseng. Anjo wattua nikoasai memammi Daud ri RohNa Batara. Appakkaramula anjo alloa siagang situlusu'na nirurungammi ri RohNa Batara. Nampa ammotere'mo Samuel mange ri Rama.

1 SAMUEL 20:3

Appialimi Daud angkana, “Baji' naassenna manggenu angkanaya nungaia'. Jari tantu tena naero' ampauangko anjo passalaka sollanna tena nusi'na. Manna pole antekamma, lanri Batara attallasaka, sikontutojenna tallasakku sanrapangi bayao ta'dongkoka ri cappa' tanru'!”

1 SAMUEL 22:5

Ri se'reang allo nia'mo sitau na'bi niarenga Gad battu mae ri Daud na nakana, “Teako ammantangngi anrinni ri kali'bonga. A'lampako linta' mange ri Yehuda.” Jari a'lampami Daud, nampa antama' ri romang Keret.

1 SAMUEL 23:17

Nakana Yonatan ri ia, “Teako mallakki, tena nulatu'guru' antama' ri limanna manggeku. Baji' naassenna angkanaya ikau la'jari karaeng Israel, siagang inakke langgappa empoang rawangannu.”

1 SAMUEL 25:30

LaNagaukangi Batara sikontu kabajikang le'baka Napa'janjiang mae ri karaengku, siagang tasalloami naNaangkakki' a'jari karaeng ri Israel.

1 SAMUEL 26:19

O, karaeng, kipilangngeri sai sombanna anne atanta. Ebara' angkana Batara assuroi karaengku angngewai atanta, akkullei passare koro'banga ampanaungi pangngalarroinNa mae ri atanta. Mingka ebara' angkana rupatau ansuroi karaengku, tapporo nihukkung laloi ke'nanga ri Batara! Nasaba' lanri panggaukanna anjo ke'nanga nanibongkamo atanta battu ri buttaNa Batara, siagang tarpassa musti a'lampai mange ri pa'rasangang maraeng namusti anynyomba anjoreng atanta mae ri rewata-rewata tenaya niassengi.

1 SAMUEL 29:2

Majumi anjo limaya karaeng Filistin a'barrisi' siagang massing pasukanna ke'nanga, nia' tassibilangngang, nia' tassisa'bu tau jaina. Daud siagang ana' buana a'barrisiki ri boko siagang Karaeng Akhis.

1 SAMUEL 29:3

Sikamma panglimana tu Filistin naciniki ke'nanga nampa akkuta'nang angkana, “Untu' apa nania' anjo tu Ibrania anrinni?” Appialimi Akhis angkana, “Anne Daud, le'ba' pagawena Karaeng Saul battu ri Israel. Sallo-sallomi ammantang ri nakke. Baku' battuna mae ri nakke sa'genna kamma-kamma anne, tenale'bakapi kugappa a'gau' kasalang.”