रोम सहरतोर 6:11 - माडिया गोंड पवित्र सास्त्रम

¹¹ अद्रमे मीट वने किर्स्तु येसुना संगे जोळेम आताह्‌कु, पापमता विचरते ताकवा, डोलतप लेह्‌का आतिर, मति देवुळता विचर मतपु ताकसोर पिसिह्‌निर, इदिन मीट पुन्ह्‌टु.

रोम सहरतोर 6:11 Iomraidhean Croise

योहन 20:31

मति इव पोल्‍लोङ बाराह्‌क रासिस मन्ह्‌ताङ इतेके, देवुळ लोहतोग़ पिसिह केवाल राजाल येसुये आंदोग़, ओसो ओग़े देवुळता मग़ आंदोग़ इन्जि मीट नमना. इद्रम नमतेके, मीक येसुना संगे अमेसाता पिसमुळ दोर्कग़ा.

रोम सहरतोर 16:27

ताना बुदतगा बातय कमि इले, अद येसु किर्स्तुन मयगा लोहताह्‌कु, इदे देवुळतुन माट अमेसा-अमेसातुह्‌क जोहर कीकल. आमेन.

रोम सहरतोर 5:1

मावा विस्वसतेनाह्‌कु, देवुळि माक सेतेमतोर कीता इनजोरे, मावा किर्स्तु येसुसामिना मोकतेनाह्‌कु, माट देवुळता संगे गूनम आतल.

रोम सहरतोर 6:13

मीवाङ मेंदुस्किन लाग्वाङ कबस्क कीयलाह, पापमता कयदे विळ्सिस एमाटु. मति पापमतुह्‌क डोलिसि, माट पूना जीवा दोर्किह कीतोम इनजोर पुन्जि, मीवाङ मेंदुस्किन सेतेमताङ कबस्क कीयलाहि, देवुळता कयदे ईम्ह्‌टु.

रोम सहरतोर 6:2

मति नना वेहेनन, अद्रम मुर्तिय विचर कीयना आयो! माट सबेटोरल येसु किर्स्तुना संगे जोळेम आतल इनजोर तोहतलाह, ओना पेदिरते एतगा मुळ्न्दिस तेदतल. अस्केने माट ओना संगे डोलतप लेह्‌का आतल. अहे ओना संगे गुमयातगा मिसतप लेह्‌का आतल. इद पोल्‍लोतुन माग़्ङतिरा? ओसो देवुळबाबाल तना बेरा डीसाते, किर्स्तुन हामुरतग्डाहि जीवा अर्हतप लेह्‌का, माट वने इंजेके पूना पिसमुळते ताक पग़यह्‌नल. अदिनेनाह्‌क पापम कीयनदिना लोप्पा ऊळतेके, माट इंजेके डोलतप लेह्‌का मह्‌नल. इतेके पापम बेद्रम कीसोरेन मनदकल?

रोम सहरतोर 6:23

(अदिह्‌कु माट पापम कीसोरेन दाकल इन्जि इनमाटु.) बह इतेके, पापमता कमय इतेके, हामुरिये दोर्किह्‌ता. मति मावा किर्स्तु येसुसामि मयेनाह्‌क कीतद कबळतेनाह्‌कु, देवुळि माक तना संगे अमेसा पिसनद दर्मम ईस्ता.

रोम सहरतोर 7:4

अद्रमलेह्‌काने मावोरिर, (मुने माट यहुदिरल मोसानाङ अडोना संगे जोळ आस मतल). किर्स्तु डोलतस्के, माट वने ओना संगे डोलतप लेह्‌कान आसि, अडोना अदिकरताहि पेसतल.(रांडे आंचाळ दुस्रोन्क दाया पग़तप लेह्‌काने,) माट वने इंजेके किर्स्तुना संगे हामुरतग्डाहि जीवा अरतप आसि, ओना संगे जोळ आतल; जोळ आसि, ओनाय संगे देवुळता बेसता सेवा कीया पग़यह्‌नल.

रोम सहरतोर 7:6

मति इंजेके माट किर्स्तुना संगे डोलतप लेह्‌का आताह्‌कु, मावा पोग़ोन अडोना बातय अदिकर इले. अदिनेनाह्‌क इंजेक माट पाळ्ना रीतते, रासतव अडोना इसबते सेवा केवल. मति देवुळता जीवा वेहतपु, पूना रीतते कीय्ह्‌नल.

रोम सहरतोर 8:18

किर्स्तुनेनाह्‌क विस्वसिरिह्‌क इंजेक तिपल वास्ताये. मति वायनद कालमते, देवुळि तना डीसा तोहचि, बेचोन माक मान ईयग़ा, ताना सीता कीतेके, मावा इंजेटा तिपल ओसोय अल्को मन्ह्‌ता इन्जि, नना पुह्‌नन.

इपिसुसतोर 2:7

किर्स्तु येसुन लोहचि, माक पका जीवा कीसि, माक वेहता वावप वेल्‍लाय दया कीता इनजोर, वायनद कालमते सबेटोरिन तोहतलाह, अद्रम कीता.

पिलिपितोर 1:11

बेद्रम इतेके, येसु किर्स्तु मीक देवुळता मुनेह सेतेमतोर कीताह्‌कु, मीवा ताकमुळतुन ऊळिसि, वेल्‍लाटोर मन्कलोर तान बेरा डीसाता इन्जि, मान ईस जोहर कीयिर इनजोर, इह वने नना पार्तना कीयलाह आतन.

पिलिपितोर 4:7

अस्के मीवा तिपलता नडुम वने, देवुळि तना सुकम मीक ईयग़ा, इद पोल्‍लो बोन्के तेळियो. अह कीसि मीवा जीवातुन, मीवा बुदतुन आल्सुळते अरवाह राका कीयग़ा. मीट किर्स्तु येसुना संगे जोळेम आताह्‌कु, देवुळ अद्रम कीयग़ा.

कुलुसितोर 2:20

तेन बोयमाटु, तान तिनमाटु, इदिन इटमाटु इनजोर मीट नोममाटु. तिनदनद मालु कबळतुह्‌क अरयह्‌ताये; मति तितापया, अद कबळतुह्‌क अरवो. अद्रमता मादा पोग़ोन, मन्कलोरे अडोङ पुटिह कीसि, दुस्रोरिन काग़्हतह्‌तोर. मीवा मन्कना बुदि किर्स्तुना संगे डोलताह्‌कु, इद दुनियाताङ अङ्ळमताङ अडोङ-उतुर्क मीक दोहच तास पग़वोङ. पया मीट दुनियातोरा लेह्‌का अद्रमताङ पोल्‍लोन केंजिसि बाराह्‌क पिसलाह आतिर?

कुलुसितोर 3:17

बाताल कीतेकाय, बाताल वळ्ह्‌कतेकाय, सबे येसुसामिना पेदिरतुन मान ईसि कीम्ह्‌टु. ओना मेटे माक देवुळबाबाना दया दोर्कता इन्जि, देवुळतुन जोहर कीसोर मन्ह्‌टु.

1 पत्रु 2:24

माटु मावा पापमताङ विचर्कनाहि पिह्‌ट अर्सि, सेतेमते ताकनेनाह्‌क, ओग़ु मावा पापमता सिक्सातुन तना मेंदुदा पोग़ोन एचि,हव्कनागुटातगा डोलतोग़. ओग़ु देबाङ तिन्ज नोमुर आताह्‌के, मीट मीवा जीवाते बेस आतिर.

1 पत्रु 2:5

ओना एरे वाताह्‌कु, मीट इंका जीवात मनदनव बंडानलेह्‌का आसि, देवुळि तना जीवातुह्‌क जागा कीयलाह, मीकु लोनलेह्‌का दोहतह्‌ता. मीटु इंजेके देवुळतुह्‌क इन्जि अलग आतिर; मीटु बूमयालोरा लेह्‌का मन्जि, येसु किर्स्तुनेनाहि देवुळबाबान गिर्दा कीयलाहि मोक ईतपु, आपुनाङ विचर्किन पोहचि, देवुळता विचर मतप ताकिह्‌निर.

1 पत्रु 4:11

बोन्क देवुळता पोल्‍लो वेहतलाह बुद दोर्कता, ओग़ु सेतेमते देवुळताङ पोल्‍लोनु कुद देवुळिये वेहतपु, अद्रम वेहतना. बोन्क साय्ता कीयलाह बुद दोर्कता, ओग़ु देवुळ ईतद लावते, दुस्रोरिह्‌क साय्ता कीयना. अस्के वेरु येसु किर्स्तुनाये लोकुर इन्जि, दुनियातोर देवुळबाबाह्‌कु मान ईयनुर. सबे मान, डीसा, राजेम अमेसा अमेसात्कु सिरप ओन्के आयि! अहे आयि!