तोहचीतव पोल्‍लोङ 1:16 - माडिया गोंड पवित्र सास्त्रम

¹⁶ ओग़ तना तिनळ कयदे, एळुङ उकाङ पोस मतोग़. ओना तोडटग्डाहि रेंड बाजेङ वाय्व मनदनद, ओळतद तल्वर कसेग़ पेसिस मता. ओना मोकमि नेक निता पोळ्‍दलेह्‌का दींचिंदु.

तोहचीतव पोल्‍लोङ 1:16 Iomraidhean Croise

मत्याल 17:2

अस्के वेर ऊळनेके, ओना रूप मिळ्न्दता. ओना मोकमि पोळ्‍दलेह्‌का मांजिंदु, ओसो ओनाङ गेंदेङ वेह्‌चता लेह्‌का तिर्मिळ्स्किंदुङ.

बळयिर 26:13

अनेके नेक निच मता, अस्के पोग़ोटाहि पोळ्‍दता वेह्‌चतुह्‌काय एक्‍वा दींचतद वेह्‌च, नावा ओसो नावा तोळतोरा पोग़ोन, सर्ने वेह्‌च अरतदिन ऊळतन.

इपिसुसतोर 6:17

सीपय्कु तमा तलातुन राका कीयलाहि कचता टोपि मुचिह्‌तोर, अद्रमलेह्‌काने देवुळि मीक गेल्सिह कीयनद पोल्‍लोतुन बेस-नेह्‌ना पोस मन्ह्‌टु. (देयह्‌कना मुक्याल मीवा अडम वास्ता अस्के, सीपय्क तमाङ तल्वर्क पोयतपु,) देवुळता पोल्‍लोतुन मीट वळ्ह्‌काटु, अद पोल्‍लो देवुळता जीवा मीक ईतद तल्वर आंदु.

इब्रितोर 4:12

बाराह्‌क इतेके, देवुळ वेहतद पोल्‍लो जीवात मन्ह्‌ता. मावा लोप्पा कबळ कीस्ता. रेंड बाजेङ वाय्व मनदनद तल्वर कसेग़ बेद्रम बोकातुन, मुळ्गुंजतुन पग़्क पहतना लेह्‌का गडिह्‌ता; तान्काय एक्‍वा वीळिस, देवुळता पोल्‍लो मन्कलोरा जीवातुन, बुदतुन पग़्क पहतना लेह्‌का गडिह्‌ता. अद मन्कलोरा सीतातुन, विचरतुन पर्ह्‌किस ऊळिह्‌ता.

तोहचीतव पोल्‍लोङ 1:20

नावा तिनळ कयदे एळुङ उकानु ऊळतिन, ओसो बंगरताङ एळुङ चिमलि गुटान ऊळतिन. अविस्कनगा उंद पोल्‍लो मकतद मन्ह्‌ता. अद इद्रमि: एळुङ उकाङ इतेक एळुङ सहर्कना विस्वसिरा मुडुन ऊळसोर मनदनव देवतुल्कु आंदुङ. एळुङ चिमलि गुटाङ इतेके, एळुङ सहर्कना विस्वसिरा मुडाङ सीनाङ आंदुङ,” इनजोर इतोग़.

तोहचीतव पोल्‍लोङ 10:1

अद्रमलेह्‌काने पया पकाय लावता ओसो उंद देवतुलि, देवुळदीपताहि इळ्न रेगनदिन ऊळतन. अद मोयुलतुन गेंदेता लेह्‌कान उहचि मता. ताना तलापोग़ोन उंद देवुळविल मता. ताना मोकमि पोळ्‍दलेह्‌का दींचिंदु. ओसो तानाङ काल्क किसगुटाना लेह्‌कान मताङ.

तोहचीतव पोल्‍लोङ 12:1

अचोटेने पोग़ोटा बूमतगा बेरा सीना दिसता. अद इद्रम मता इतेके: उंद आंचाळ दिसता, अद आंचाळि पोळ्‍दतुन गेंदेता लेह्‌कान उहचि मता. ओसो नेलातुन विह्‌किस मता. अहे (महरानि केग़यना लेह्‌का,) तना तलातगा राजटोपि केग़्स मता. अद राजटोपतगा बारा उकाङ मताङ.

तोहचीतव पोल्‍लोङ 19:15

तना विरुदताङ जातिनोर सबेटोरिन कोटलाहि, ओना तोडटाहि ओळतद तल्वर कसेग़ पेसिस मंदु. ओग़ तना राजडुडि पोसि, ओरा पोग़ोन राजेम कीयनोग़. ओरिन बेरा डीसाता देवुळता ओङता बोंदातगा वाटिसीयनोग़; अगा ओरिन अंगुर जोमा पेग़तपु, ओग़ ओरिन तनाङ काल्कने विह्‌कनोग़.

तोहचीतव पोल्‍लोङ 19:21

कोडाता पोग़ोन उदिस मतोग़ु, रकसता तोळतोरिन, तना तोडटाहि पेसतद तल्वर कसेटे हव्कतोग़. पया सबे गंदाल पिटेङ ओराङ अविन, पोटाङ पंजनाह तिताङ.

तोहचीतव पोल्‍लोङ 2:1

अस्के नावा संगे वळ्ह्‌कतोग़ इतोग़, “इपिसुस सहरता विस्वसिरा मुडा देवतुलतुह्‌क इद्रम रासा: एळुङ उकान तना तिनळ कयदे पोसि, बंगरताङ एळुङ चिमलि गुटाना नडुम तिरियवाल, मीट विस्वसिरिन इनदलाह आतोग़:

तोहचीतव पोल्‍लोङ 2:12

“पिरगमुन सहरता विस्वसिरा मुडा देवतुलतुह्‌क इद्रम रासा: रेंड बाजेङ वाय्व मनदनद ओळतद तल्वर कसेग़ पोयतोग़ु, मीट विस्वसिरिन इनदलाह आतोग़:

तोहचीतव पोल्‍लोङ 2:16

अदिनेनाह्‌क इंजेके पापमता अग़दाहि जर मल्म्ह्‌टु. इलवेक नना चट्पिट मियगा वासि, नावा तोडटाहि पेसनद तल्वर कसेग़ते, अद्रम ताकवालोरिह्‌क सिक्सा ईकन.

तोहचीतव पोल्‍लोङ 3:1

“सरदिस सहरता विस्वसिरा मुडा देवतुलतुह्‌क इद्रम रासा: देवुळतग्डाङ एळुङ जीवानु बूममेंड लोहवाल, एळुङ उकान पोयतोग़ु, मीट विस्वसिरिन इनदलाह आतोग़: मीट बेद्रम ताकलाह आतिर इनजोर, नना पुतन. मीवा विस्वस जीवात मन्ह्‌ता इनजोर, लोकुर इन्ह्‌तोर; मति निटम ऊळतेके, अद डोललाह आता.