पिलिपितोर 2:1 - माडिया गोंड पवित्र सास्त्रम

^1-2 मीट इंजेके किर्स्तुना संगे जोळेम आताह्‌कु, मीक दीरा वास्ता. देवुळि मीक जीवा कीसि, मीवा जीवातुह्‌क सितुर ईयलाह आता. ओसो मीक तना जीवा ईसि, मियगा जागा आता. अह कीसि मीकु तना दया कीयनद, जीवा वाटनद बुदि ईता. इव सबे पोल्‍लोङ निटम आताह्‌कु, मीवाङ विचर्क अमेसा ओर्विह्‌क-ओर्वोना संगे कलियिस मनिङ. देवुळि मीक जीवा कीतपु, मीट वने ओर्विह्‌क-ओर्वोग़ जीवा कीम्ह्‌टु. मीट सबेटोरिर उंदिय एकाते मन्जि, देवुळता अग़दे ऐंगेन ताकाटु. अह ताकतिर इतेके, नावा गिर्दा पूरा आयग़ा.

पिलिपितोर 2:1 Iomraidhean Croise

लूकाल 2:25

ओरु पेकान मंदिरतगा ओतोर अस्के, सिमियोन पेदिरतोग़ ओर्वोग़ सेतेमतोग़ मन्कल येरुसलेमतगा मतोग़. ओग़ कर्तुळते देवुळतुन मोळ्कवाल मतोग़. देवुळ लोहवाल पिसिह केवाना कयदे, इस्रयेलतोरिन सुद्रे कीयनद दिया बेस्के एवयग़ा इनजोर, ओग़ अग़ ऊळसोर मंदोग़. ओसो देवुळता जीवा ओनगा अमेसा मंदु.

योहन 14:18

दायनस्के, नना मीक पोरावेकोरा लेह्‌का विळ्सोन आयकन, मति (देवुळता पवित्र जीवातामेटे), मियके मल्स वायकन.

योहन 14:27

नना मीवा जीवातुह्‌क सुकम ईसि तासिह्‌नन. बेद्रम इद दुनिया सुकम ईस्ता, अद्रम नना एवोन. मति बेद्रम नावा जीवाते सुकम आस्ता, अद्रमे मीवा वने जीवाते सुकम आयग़ा. अदिह्‌कु मीवा जीवा आल्सुळते मनमाकि, मति मीटु दीरा पोस मन्ह्‌टु.

योहन 17:13

“नना इंजेके नियके वाय्ह्‌नन, बाबा. मति वेरा जीवाते नावा गिर्दा पूरा निंदना इन्जि, नना इद बूमते मनेकेने, इव गोटिङ वेहतह्‌नन.

बळयिर 2:46

दिनम उंदिय एकाते मंदिरताङ मंडानगा कलियिंदुर. ओसो गिर्दाते, बेसतल बुदते, लोह्‌क-लोह्‌क जमा आसि, ऐंगेन जावा उंडुर, अहे (किर्स्तुना मोकता सीता कीसि) आरिङ तिंदुर.

बळयिर 4:32

सबेटोर विस्वसिर उंदिय एकाते मतोर. आपुना-आपुना मादुन बोरे नावा इनजोर इनोर आंदुर; मति सबेटोर मन्कलोर तमा सामनतुन, ओर्विना-ओर्वोग़ काळ्ङसोर पिसिंदुर.

रोम सहरतोर 5:5

मावा इद आसातुन, देवुळि बेस्केन देहो आयग़ा इनजोर, माट पुह्‌नल. बाराह्‌क इतेके, मावा जीवातगा निंदिस बल्क अरनाह, देवुळि तना जीवातुन वळता, वळसि अद माक बेचोन जीवा कीस्ता, इदिन तोहता.

रोम सहरतोर 8:26

अचोने आयो मति, माक तेळियवाह्‌कु, देवुळता जीवा माक तोळ मन्ह्‌ता. पार्तना कीयनस्के, देवुळतुन माट बाताल ताल्ह्‌कना, बेद्रम ताल्ह्‌कना इन्जि पुनवल. मावा तोडटाहि, माट देवुळतुन पोल्‍लोङ वळ्ह्‌क पुनवल, मति ताना जीवा मावा लोप्पाडाहि ऊल्गसोर केयिह्‌ता. केयिसि, मावा पार्तनातुन देवुळतगा बराबर एव्सिह कीसीस्ता.

1 कुरिंततोर 12:13

अद इद्रमि: माट यहुदिर आयि, यहुदि आयवोर आयि, ओर्युलतोर आयि, ओर्युल आयवोर आयि, माट सबेटोराङ जीवानगा, देवुळ उंदिय जीवातुन वळता. विस्वसि मन्कल बेस्के येसुना पेदिरते एग़ मीस्तोग़, अस्केने देवुळता जीवा ओन दुस्रोर विस्वसिरा संगे जोळे कीस्ता. माट सबेटोरल किर्स्तुना मेंदुलताङ कय्क-काल्क आतपु, इद्रम कीस्ता.

1 कुरिंततोर 15:31

मावोर विस्वसिरिर! मावा किर्स्तु येसुसामि नावा मेटे, मियगा बेचोटा बेरा कबळ कीतोग़ इन्जि, नना पोग़यसोर मह्‌नन, इद करलता पोल्‍लो. ओसो नावा सेवातेनाह्‌क दिनमे हामुरता दोका नाक वास्ता, इद अचोने करलता पोल्‍लो.

1 कुरिंततोर 3:16

मीट विस्वसिरा मुडगा देवुळता जीवा जागा आस्ता इतेके, मीट देवुळता मंदिर आंदिर. इद पोल्‍लोतुन पुनविरा?

2 कुरिंततोर 13:14

मीक सबेटोरिह्‌क येसुसामि किर्स्तु देय्वा ईयेग़, देवुळि जीवा कीसोर मनि. ताना पवित्र जीवा मियगा कलियसोर मनि.

2 कुरिंततोर 2:14

देवुळतुह्‌क जोहर आयि! अद माट सेवकिरिन, तना गेल्समुळते किर्स्तुना संगे पोत्ला आयलाह, कलियिह कीता. ओसो बेद्रम अतर्नेयदा गब, बेके अतेकाय गम-गम एग़्स्किह्‌ता, अद्रम माट बेके अतेकाय, देवुळि मावा पोल्‍लोतुन केंजवालोर मन्कलोरगा किर्स्तुन पुनाह कीस्ता.

गलातितोर 4:6

माट देवुळताङ मग़्कनल आताह्‌कु, देवुळि तना मग़ना जीवातुन, मावा जीवातगा लोहता. अद जीवा अगा देवुळतुन “बाबा! बाबा!” इनजोर केयसोर मन्ह्‌ता.

गलातितोर 5:22

देवुळता जीवा बारा, मावा जीवातगा मोन्ह्‌टटेके, मयगा इद्रमता पंटा पुटिह्‌ता: माट दुस्रोरिन जीवा कीय्ह्‌नल, माट गिर्दाते मह्‌नल, सुकमते मह्‌नल, बेदाय पोल्‍लोतुह्‌क चट्‌ने ओङ आयवा मह्‌नल, दुस्रोरिन जीवा वाटिह्‌नल, माट चिव्टमलेवा मह्‌नल, माट पोल्‍लो विळ्सतपे कीय्ह्‌नल, कुलुल बुदते ताकिह्‌नल, कुदतुन आव्रे कीय्ह्‌नल. इद्रम ताकतेके, माक यहुदिराङ अडोङ अडम आयोङ.

इपिसुसतोर 4:4

सबेटोर विस्वसिरा मुल उंदिय मेंदुलि. अद मुडगा मनदनद देवुळता जीवा उंदिय आंदु. सबेटोर विस्वसिरिन देवुळ उंदिय आसाते पिसलाह केयता.

पिलिपितोर 1:8

येसु किर्स्तु मीक जीवा कीतपे, नना वने मीक जीवा कीय्ह्‌नन, देवुळिये इद पोल्‍लोता साक्सि मन्ह्‌ता. अदिह्‌क मीक ऊळलाह पका नावा जीवा पर्ह्‌किह्‌ता.

पिलिपितोर 3:3

(ओर मन्कलोर डायना रिवज कीयनद पोल्‍लो वेहतलाह आतोर.) माट बारा येसुन विस्वस कीतोरले, निटम डायना रिवज कीतोरल आंदल, ओर आयोर. बाराह्‌क इतेके, माट देवुळता जीवा वेहतपु तान मोळ्किह्‌नल. ओसो किर्स्तु येसु माक पका बेरा गूनम तोहतोग़ इनजोर, गिर्दा आय्ह्‌नल. ओसो मावा मन्कना बुदतगा बर्वस तासवा, तान डायिस पोहतप लेह्‌का पिसिह्‌नल.

कुलुसितोर 3:12

देवुळि मीक आचता, आचिसि तना मन्कलोर इनजोर अलग कीता, अहे मीक जीवा कीता. अदिनेनाह्‌क पूना गेंदे उहतप लेह्‌का, (मीवा पूना पिसमुळतुन पोय्म्ह्‌टु; इतेके) दुस्रोरिन जीवा लोपाटु, दुस्रोरिन गूनम तोहाटु, उड्ला बुदते ताकाटु, कुलुल बुदते मन्ह्‌टु, बेदाय पोल्‍लोतुह्‌क चट्‌ने ओङ आयमाटु.

इब्रितोर 6:18

मावा मुनेह तासतद आसाता पोल्‍लोतुन पोसि, अद माक राका कीयि इनजोर, माट देवुळतगा वित वातल. तनगा वित वावालोरिह्‌क दीरा ईयना इन्जि, देवुळि पोल्‍लो वने विळ्सता, ओसो ओतता वने. देवुळि पोल्‍लो विळ्सनेक वने मुर्तिय जोल वळ्ह्‌क पग़वो, ओतनेक वने मुर्तिय जोल वळ्ह्‌क पग़वो. इव रेंड आस पोल्‍लोङ बद्लेम आयनव आयोङ.

1 पत्रु 1:2

देवुळ आचतोर लोकुरिह्‌कु रासिह्‌नन. मावा देवुळबाबाल मीक मुनेने आचिसि, तना पवित्र जीवाता मेटे, मीकु तना पवित्र लोकुर कीतोग़. बाराह्‌क इतेके, मीट येसु किर्स्तुना पोल्‍लो केंजिसि ताकना, ओसो हव्कनागुटातगा मियेनाह्‌क पोवतद ओना नेतुरते, मीवा पापम एडना इन्जिये, देवुळ मीकु आचता. देवुळताहि मीकु लेकालेवा सुकमि, देय्वा दोर्कसोर मनि!

1 योहन 3:24

ओसो बोग़ देवुळता उकुमतुन केंजिस ताकिह्‌तोग़, ओग़ ताना संगे जोळेम आस मन्ह्‌तोग़, अहे अद वने ओना जीवातगा जागा आस्ता. इद्रमलेह्‌का देवुळि मावा जीवातगा जागा आस्ता इनजोर, माक ईतद ताना पवित्र जीवाते, माट पुनदा पग़यह्‌नल.

1 योहन 4:12

बोग़े बेस्केन देवुळतुन ऊळोग़; मति माट ओर्विह्‌क-ओर्वोग़ जीवा कीतेकेने, देवुळि मावा जीवातगा जागा आस्ता. जागा आसि, मयगा मनदनद ताना गूनमि लोकुरिह्‌क पूरा दिसिह्‌ता; (अस्के देवुळतुन ऊळवेकाय, ओर तान पुनदा पग़यह्‌तोर.)

1 योहन 4:16

देवुळि माक जीवा कीता इनजोर इंजेके पुतल, ओसो इद पोल्‍लोता बर्वसते ताकिह्‌नल. देवुळि जीवा कीयनद आंदु. अदिनेनाह्‌क बोर जीवा कीसोर मन्ह्‌तोर, ओर ताना संगे जोळेम आस मन्ह्‌तोर. ओसो अद वने ओरगा जागा आस्ता.