लूकाल 11:49 - माडिया गोंड पवित्र सास्त्रम

⁴⁹ “अदिनेनाह्‌क देवुळि तना बुदते इद्रम इता, ‘नना कबुरतोरिनु, ओसो बळयिरिन वने ओरगा लोहतकन. अस्के उय्तुरिन बार हव्कनुर, ओसो उय्तुरिन बार पका तिपल कीयनुर,’ इता.

लूकाल 11:49 Iomraidhean Croise

लूकाल 11:48

अह कीसि मीट वने मीवाङ तादोर-बाबोराङ कबस्किह्‌क तोळ आतिर. बाराह्‌क इतेके ओर बार कबुरतोरिन हव्कतोर, मीट बार ओराङ बंडाङ ओग़्सिह्‌निर.

लूकाल 24:47

अदिनेनाह्‌क पापमता मापि दोर्कना इतेके, पापमता अग़दाहि मलयना. इद कबुरतुन किर्स्तुना अदिकरते येरुसलेमतग्डाह सुरु कीसि, पूरा बूममेंड पोकुर केमुळ आयग़ा.

योहन 16:2

ओरु मीकु तमाङ पार्तनाताङ लोह्‌कनगा वाया एवोर आयनुर. इचोने आयो मति, मीक हव्कवालोर सबेटोरु मीक हव्किसि, माट देवुळतुने माळिह्‌नोम इनजोर इनदनुर, इद्रमता वेला वायना मन्ह्‌ता.

बळयिर 1:8

मति मियगा देवुळता जीवाता दळ्म अरतापया, मीक लाव दोर्कग़ा. अद लावते येरुसलेम सहरतगा, पूरा यहुदा पटटगा, सामरिया पटटगा, ओसो बूम मारेंगा एवनाह, नावा पोल्‍लोता साक्सितोरिर मनदकिर,” इन्जि वेहतोग़.

बळयिर 11:27

अवे दियाने देवुळता कबुरतोर उय्तुर, येरुसलेमताहि अंताकिया सहरते वातोर.

बळयिर 22:20

ओसो नीवा लोप्पा साक्सि ईतोग़ु, इस्तिपनिन लोकुर बंडाङ उकिस हव्किह्‌पा, नना वने ओरा तोळ आसि, ओन हव्कवालोराङ जगाना राका कीसोर मतन इनजोर, वेर यहुदिर बेस पुतोर,’ इतन.

बळयिर 7:57

इतस्के तग्वाङ केवालोर लोकुर, (वेग़ देवुळतुन पास्किह्‌तोग़ इनजोरे,) पकाय जोरते केयिसि तमाङ केव्किन मुचतोर, मुचिस उंदि विचरते वित वासि ओन पोयतोर.

बळयिर 8:3

अद तूकने सोलु बाताल कींदोग़ इतेके, विस्वसिरा मुडुन बूळे कीयलाहि, लोह्‌क-लोह्‌क ओळियिसि, विस्वस केवालोर आस्क-कोय्तोरिन पोसि, जेलतगा वाट वेहन्दोग़.

1 कुरिंततोर 1:24

मति देवुळि बोरिन-बोरिन केयता, ओर यहुदिर आयिर, यहुदि आयवोर आयिर, ओरिह्‌क देवुळता लावतुन, ताना बुदतुन तोहच एवाल किर्स्तुये.

1 कुरिंततोर 1:30

मति देवुळि मीक किर्स्तु येसुना संगे जोळे कीता. किर्स्तुना मेटे माट देवुळतुन पुनदनद बुदि दोर्किह कीतल. किर्स्तुना मेटे माक देवुळ सेतेमतोर कीता, पवित्र मन्कलोर कीता. किर्स्तुये माक पापमता सिक्साताहि विळ्सिह कीतोग़.

इपिसुसतोर 4:11

देवुळता मन्कलोरिन ताना सेवातेनाह्‌क ओप्पे कीयलाहि, किर्स्तुन विस्वस कीतोरा मुलु, विस्वसते बेस मेग़्किस मनदलाहि, अलग-अलग सेवातेनाह्‌कु, विस्वसिरिन निल्पिह कीतोग़. उच्वुरिन ओनाङ बळयिर आयलाह निल्पिह कीतोग़; उच्वुरिन देवुळता जीवाते वळ्ह्‌कवालोर आयलाह, उच्वुरिन बेसता कबुर पोकुर कीसोर तिरियलाह, उच्वुरिन विस्वसिरा मुडुन ऊळेवाळे कीसोर ओरिन काग़्हतलाह निल्पिह कीतोग़.

तोहचीतव पोल्‍लोङ 16:6

नीवाङ पवित्र मन्कलोरिन, ओसो नीवा कबुरतोरिन लाग्वोर मन्कलोर हव्कतोर, ओरा नेतुर पोहतोर. इंजेके निमा एतुन नेतुर मारियिह कीसि, ओर लाग्वोर मन्कलोरिन, नेतुरतुने उनडनाह कीतिन. ओर इद्रमताये सिक्सा दोर्कना लायक मन्ह्‌तोर,” इनजोर इता.

तोहचीतव पोल्‍लोङ 18:20

ए देवुळदीपतगा मनवालोरिर! देवुळता मन्कलोरिर! किर्स्तुनाङ बळयिरिर! देवुळता कबुरतोरिर! अद सहर मीक कोटुल पोस मताह्‌कु, मियेनाह्‌क देवुळि तान्क इंजेके सिक्सा ईता. अदिनेनाह्‌क गिर्दा आम्ह्‌टु!