योहन 15:16 - माडिया गोंड पवित्र सास्त्रम

¹⁶ मीट नाक आचविर, मति ननाने मीक आचतन, आचिसि मीट नयगा जोळेम आस मन्जि, बेसताङ पुळ्यवाङ कायाङ कटना इन्जि, मीक तासतन. अदिह्‌क मीट बेदाय गोटटुनु नावा पेदिर वेहच बाबान ताल्ह्‌कतेके, अदिन ओग़ मीक ईयनोग़.

योहन 15:16 Iomraidhean Croise

मत्याल 21:22

बेदिनाय मीट उन्क-मन्क आयवा, विस्वसते पार्तना कीस तान ताल्ह्‌कतेके, देवुळि मियेनाह्‌क अह कीयग़ाये,” इन्जि इतोग़.

मत्याल 7:7

“‘ताल्ह्‌कसोर मतेके ईकन, पर्ह्‌कसोर मतेके दोर्कग़ा, तेल्प कोह्‌कसोर मतेके तेग़यकन’ इन्जि, देवुळ मीक इन्ह्‌ता.

लूकाल 6:13

पंङवियतस्के कग़यवालोर सबेटोरिन तनगा केयतोग़. केयिसि ओरग्डाह बारा मन्कलोरिन आचतोग़, आचिसि ओरिन तनाङ बळयिर इनजोर पेदिर तासतोग़.

योहन 13:18

“नना मीट कतमतोरा लोप्पा वळ्ह्‌कोन. मति नना बोरिन आचतन, ओर बेद्रमतोर इन्जि नना पुतन. तेला मति नावा ऐंगे तिनवाल, नाके लाता वाटटोग़ इद्रम सास्त्रमते रासतद मन्ह्‌ता, अद करल आयनाय गावले.

योहन 15:19

मीटु दुनियातोरिर आस मतेके, दुनियातोर मीक मावोर इनजोरे, जीवा केवेर. मति नना मीक दुनियातोरग्डाहि आचिसि, एग़्‍पिह कीतन इन्जि, मीट दुनियातोरिर आयविर. अदिह्‌क दुनियातोर मीक कोंटे कीस्तोर.

योहन 15:5

नना तोंडालेह्‌काडोनन; मीट नावाङ कांदानिर आंदिर. बोर नयगा जोळेम आस मन्ह्‌तोर, नना ओरगा जोळेम आस मह्‌नन, अस्के अव कांदाङ वलियिसि पका आदिह्‌ताङ. बाराह्‌क इतेके नयग्डाहि एग़िस मतेके, मीक देवुळतेनाह्‌क बातय कीया वावो.

योहन 6:70

“सिमोन, मीट बारा मन्कलोरिन ननान आचतन, निटमे! तेला मति मियग्डाहि वग़ोग़, देयमता बुदतोग़ु मन्ह्‌तोग़,” इनजोर येसु ओरिन इतोग़.

बळयिर 1:24

ओराङ पेदिर्क वेहचि, येसुसामिन इद्रम ताल्ह्‌कतोर, “सामि! यहुदाल बेसतल अग़दुन विळ्सिसि, लाग्वद अग़दुन पोयतोग़, अह आसि डोलतोग़; डोलिसि तना दायना मतद सिक्साता जागातगा अतोग़. सबे मन्कलोरा पोटालोप्पाडाङ गोटिङ निमा पुतिने. अदिनेनाह्‌क ओना जागातगा इद सेवा कीयलाहि, नीवा बळयि आयलाहि, वेर इर्वुरग्डाहि निमा बोन आचतिन, तेन माक तोहचीम,” इनजोर ताल्ह्‌कतोर.

बळयिर 1:8

मति मियगा देवुळता जीवाता दळ्म अरतापया, मीक लाव दोर्कग़ा. अद लावते येरुसलेम सहरतगा, पूरा यहुदा पटटगा, सामरिया पटटगा, ओसो बूम मारेंगा एवनाह, नावा पोल्‍लोता साक्सितोरिर मनदकिर,” इन्जि वेहतोग़.

बळयिर 10:41

येसु दिसनेके सबेटोर लोकुरिह्‌क दिसोग़ मति, सिरप माके दिसतोग़. इतेके ओग़ जीवा अरतापया, ओना संगे कलियिस तितोम-उटोम. बाराह्‌क इतेके इद पोल्‍लोता साक्सि मनदलाहि, देवुळि मुनेन माक आचिस मता.

बळयिर 22:14

अस्के ओग़ नाक इद्रम इतोग़, ‘मावाङ तादोर-बाबोरा देवुळता विचर बाताल मन्ह्‌ता, अद नीक एर्का आयना, ताना सेतेमतोग़ मग़िन ऊळना, ओसो ओग़े मग़ना तोडटे वेहतनद पोल्‍लो नीक केंजलाह दोर्कना, इदिनेनाह्‌के देवुळ नीक आचता.

बळयिर 9:15

इतस्के येसु इतोग़, “आयो, निमा ओनगा अन. बाराह्‌क इतेके, नावा पोल्‍लोतुन यहुदि आयवोर दुस्राङ जातिनोरगा, ओरा राजालोरगा, ओसो इस्रयेल लोकुरगा इतेके यहुदिरगा एव्सिह कीयलाहि, ओग़ नावा आचतोग़ सेवक आंदोग़.

रोम सहरतोर 1:13

यहुदि आयवोरिन बेसता कबुरतुन वेहचि, उय्तुरिन विस्वसते ततन. अद्रमे मियग्डोर उय्तुर मन्कलोरिन वने, विस्वसते ततकन इनजोर, मियगा ऊक-ऊके वायलाह ऊळिंदन, मावोरिर; मति इचानाह बेदाय अडम आसोर मता. इद पोल्‍लोतुन मीट पुनदना इनजोर, नना वेहतलाह आतन.

रोम सहरतोर 1:5

सबे जातिनोर ओना पोल्‍लोतुन विस्वस कीसि, ओनाङ केंजिर, अह कीसि ओना पेदिरतुन मान ईयिर इनजोर, देवुळि येसुना मेटे, नाक ओना बळयि आयलाहि देय्वा ईता. इव सबे पोल्‍लोङ मीट इतेके पुह्‌निरे.

रोम सहरतोर 15:4

इद्रमलेह्‌का देवुळता सास्त्रमतगा बाताङ बाताङ पोल्‍लोङ मुने रासतव मन्ह्‌ताङ, अव पोल्‍लोङ माक काग़्हतलाहि, रासतव मन्ह्‌ताङ. अविस्किन अर्वतेके माक दीरा दोर्किह्‌ता. अद्रमे माट तिपल्कने आरेम आयवा, देवुळता पोग़ोन आसा तास पग़यह्‌नल.

रोम सहरतोर 9:21

कुमाल तना विचर वातप अळ्का पंडेग़; उंदिय तोळ्यो गोमाताहि, रेंड तुक्ळेङ कीसि, उंदतुन बार बेस सोबाता अळ्का, उंदतुन बार केनकेनेता अळ्का इद्रम पंडलाह, ओन्क अदिकर मन्ह्‌ताया, इले?

1 कुरिंततोर 10:11

दुस्रोरिह्‌क तेळियिह कीयनेनाह्‌क, इव पोल्‍लोङ मावाङ तादोर-बाबोरिह्‌क आताङ. माट इंजेके बूमता आक्रिता वेलाते पिसलाह आतल. अदिह्‌क माक बुद काग़्हतलाहि, इव पोल्‍लोङ रासतव मन्ह्‌ताङ.

गलातितोर 1:15

पया बेद देवुळि तना देय्वाते नना पुटनामुनेन नाक आचता, आचिसि दुस्राङ-दुस्राङ देसेह्‌कनोरगा, ताना मग़ि येसु किर्स्तुना बेसता कबुर वेहतना इन्जि नाकु केयता, इदे देवुळि नाकु तना मग़िन पुन्पिह कीयलाह, विचर कीता इन्जि, मीट पुतिर. अस्के नना बोनगाने बुदिङ ताल्ह्‌कलाह अनोन;

इपिसुसतोर 2:10

निटमे देवुळिये माक किर्स्तु येसुना संगे जोळे कीसि, माक पूना पुटमुळ, पूना जीवा ईता. किर्स्तुना संगे जोळेम आसि, माट बेसताङ कबस्क कीसोर ताकना इनजोर, ताना विचर मता. अव कबस्किन अद मुनेन तयर कीता.

कुलुसितोर 1:23

मति मीट मेलियवालेवा, मेग़्किसि विस्वस कीसोर मनदना गावले, ओसो बेसतल कबुरतुन केंजताह्‌कु, मीवा जीवातगा पुटटद आसातुन, विळ्सवालेवा मनदना गावले. मीट केंजतद बेसतल कबुर पूरा बूमतगा पोकुर आयलाह आता. नाक वने, अदे सेवा कीयलाहि देवुळि निल्पिह कीता.

कुलुसितोर 1:6

अद बेसता कबुरतुन, इपपरास इनवाल मियगा एव्सिह कीसीतोग़. ओग़ सामिना सेवाते मावा ऐंगेटोग़ ओसो बेस गोततोग़ आंदोग़, अहे बर्वसलायकतोग़ आंदोग़. (माट मीवा सहरतगा एवया पग़वोम,) मति मावा जागाते ओग़ मीक सेतेम बुदते किर्स्तुना कबुरतुन काग़्हचि, मीवा सेवा कीतोग़. देवुळता जीवा मियगा जागा आताह्‌कु, मीट ताना मन्कलोरिन जीवा कीय्ह्‌निर इनजोर, ओग़े माक वेहतोग़. मीट ओनग्डाहि बेसता कबुरतुन केंजतिर, ओसो देवुळता दयाता पोल्‍लो सेतेम मन्ह्‌ता इनजोर पुतिर. पुतस्के, अद कबुरता पोल्‍लो मीवा जीवातुन बद्ले कीयलाह आता. अद्रमलेह्‌काने अद कबुर बूममेंड आबुर आसि, वेल्‍लाटोर आस्क-कोय्तोरा जीवातुन बद्ले कीयलाह आता.

1 तिमोति 2:7

अदिनेनाह्‌क इद सेतेम पोल्‍लोतुनु, यहुदि आयवोर वने नमना इन्जि, निमा ओरेके अन्जि वेहवाल-काग़्हवाल, नावा बळयिनिन आयकिन, इह इनजोरे देवुळ नाक लोहता; नना जोल वळ्ह्‌कोन, सेतेमे वेहतह्‌नन.

2 तिमोति 1:11

इदे बेसता कबुरतुन पोकुर कीयलाह, काग़्हतलाह इनजोर, देवुळि नाक किर्स्तुना बळयि इनजोर निल्पिह कीता.

2 तिमोति 2:2

नना काग़्हतव पोल्‍लोन, वेल्‍लाटोर मन्कलोरा मुनेह निमा केंजतिन. अव पोल्‍लोन काळ्ङलाहि, दुस्रोरिन काग़्हतना लायकतोर सेतेमतोरिह्‌क वेहा.

तीतुस 1:5

करेते इनदनद तोग़-देसेमतगा पिसिस मतद कबळतुन बेस-नेह्‌ना ओर्कुल कीकिन, ओसो सबे नाह्‌कनगा विस्वसिरा मुडुन ताकिह कीयलाहि, मुक्यालोरिन निल्पिह कीकिन इनजोर वेहचि, नना नीक करेते देसेमतगा विळ्सिस वातन. इद्रम कीम इनजोर, मुनेन नीक उकुम ईतन.

इब्रितोर 11:4

विस्वस कीताह्‌कु, आदमना मग़ि हाबेल मुय्तोग़ वने, देवुळतुह्‌क मोक ईस मतोग़. तमदादाल काय्न मुय्तोग़ वने, देवुळतुह्‌क कोड वाटिस मतोग़. मति हाबेल मुय्तोग़ विस्वस कीताह्‌कु, तमदादाल ईतदिह्‌काय, बेस ओप्पनद मोक ईतोग़. ओना विस्वसतुन ऊळिसि, देवुळि ओन सेतेमतोनिन इता. ओग़ ईतद वने विचर वाता. ओग़ डोलतापया, नेंड वने ओना विस्वस माक काग़्हतह्‌ता.

याकुब 3:18

ओसो ओर्विह्‌क-ओर्विन गूनमते काल्ह्‌पवालोर मन्कलोरु, गूनमता विजा वीतिह्‌तोर, पया सेतेमताङ कबस्कना पंटा ओरिह्‌क दिसिह्‌ता.

1 पत्रु 3:15

मति येसु किर्स्तु मावा सामि इन्जि, मीवा जीवाते ओन मान ईसि मोळ्काटु. येसुनगा मीट आसा तासतिर, ताना लोप्पा “इद बह रा?” इन्जि बोराय ताल्ह्‌कतेके, मीटु (आलिह केवा,) ओरिह्‌क तेळियिह कीस वेहतलाह, अमेसा तयर मन्ह्‌टु.

1 पत्रु 3:2

बह इतेके, मीटु सेतेमते ताकनदिन, ओसो मुजोराये पोल्‍लोते तिरियनदिन ऊळिसि, देवुळतुन पुनदलाह गिर्दा आयनुर.

1 योहन 4:10

बेद्रम जीवा कीयना इनजोर, माट देवुळतुन जीवा कीसि तोहवल. मति देवुळिये इद पोल्‍लोतुन बेस-नेह्‌ना तोहता. बेद्रम इतेके, अद माक जीवा कीता, ओसो तना मग़ि मावा पापमता सिक्सातुन तना पोग़ोन एचि डोलेग़ इनजोर, ओन लोहच मता. इदे निटम जीवा कीयनद आंदु.

1 योहन 4:19

देवुळिये मुने माक जीवा कीता, अदिनेनाह्‌क माट जीवा कीय्ह्‌नल.