याकुब 3:17 - माडिया गोंड पवित्र सास्त्रम

¹⁷ मति देवुळतग्डा बुद मनवाल, देवुळतगान पूरा सीता तासिह्‌तोग़, दुस्रोरा संगे गूनमते मन्ह्‌तोग़, कुलुल बुदते ताकिह्‌तोग़, दुस्रोरा पोल्‍लो केंजिह्‌तोग़, जीवा लोपिह्‌तोग़, अमेसा बेसताङ कबस्क कीस्तोग़, उड्लोग़-बेरोग़ इद्रम इनोग़, ओसो सोङ केवाल आयोग़.

याकुब 3:17 Iomraidhean Croise

मत्याल 23:28

अहे मीट वने पलताहि लोकुरिह्‌क पका सेतेमतोरा लेह्‌का दिसिह्‌निर. मति मीवा पोटालोप्पा नाळेह कीयनद बुद, पापम बुदि निंदिस मन्ह्‌ता.

मत्याल 5:8

“बोरु तमाङ जीवाङ देवुळतगाने तासिह्‌तोर, ओर देवुळता देय्वातोर. बेस्काय उंद दिया ओरु देवुळतुन ऊळनुर.

मत्याल 5:9

“बोरु लोकुरा कोंटेतुन माय्‍पिह कीसि, गूनम कीयलाह ऊळिह्‌तोर, ओर देवुळता देय्वातोर. ओरिन देवुळि नावाङ मग़्क-मयास्कनिर इनदग़ा.

लूकाल 21:15

मीक बाताल वळ्ह्‌कना मन्ह्‌ता, ताना बुदि नना मीक ईकन. मीवा कोटुलतोर मीवा पोल्‍लोतुन केंजतस्के, पोल्‍लो मल्हता पग़वोर आयनुर. मीवा पोल्‍लोतुन जोल वने तोहता पग़वोर आयनुर.

लूकाल 6:36

बेद्रम मीवा देवुळबाबाल लोकुरिन दया कीस्तोग़, अद्रम मीट वने दया केवालोरिर आम्ह्‌टु.

योहन 1:14

देवुळता जीवात मनदनद पोल्‍लो, मावा लेह्‌का कय-कादोग़ आसि, मन्कना रूपते मावा बूमतगा वाता. ओग़ु देवुळता पूरा देय्वातुनु, पूरा सेतेमतुनु पोसि, मावा नडुम जागा आतोग़. ओग़ देवुळबाबाना वग़ोग़ मग़ आंदोग़; माट ओना डीसातुन ऊळतोम. (ओग़े येसु किर्स्तु आंदोग़.)

योहन 1:47

नतन्याल पया येसुनगा वातोग़, ओग़ वातदिन ऊळिसि येसु इतोग़, “वेग़ करल इस्रयेलतोग़, वेना पोटालोप्पा नाळेह कीयनद बुद इले.”

बळयिर 9:36

अद्रमे पया सारोन एरियाता यापा नाटेनगा, उंदि विस्वसि आंचाळ मता. ताना पेदिर तबिताल आंदु, तान दोरकास वने इंदुर. अद आंचाळि नाटेनगा आस्क-कोय्तोरिह्‌क अमेसा बेसताङ कबस्क कीसि ईंदु, लेवोरिह्‌क दर्मम कींदु.

रोम सहरतोर 12:9

दुस्रोर विस्वसिरिन जीवा कीय्ह्‌नोम इनजोर, मीट सोङ केमाटु, मति जीवाताहि जीवा कीम्ह्‌टु. लाग्वाङ पोल्‍लोनग्डाह जेक मन्ह्‌टु, नेह्‌नाङ पोल्‍लोन अमेसा पोस मन्ह्‌टु.

रोम सहरतोर 15:14

मावोरिर! मीट पका बेस गूमनतोरिर, ओसो देवुळता पोल्‍लोतुन बेस पुन्जि, ओर्विह्‌क-ओर्वोग़ बुदिङ-एदिङ बेस वेहता पग़यह्‌निर इनजोर, नाक पूरा विस्वस मन्ह्‌ता.

1 कुरिंततोर 12:8

अद बेद्रम बुद ईस्ता इनजोर वेहतह्‌नन: देवुळता जीवा ओर्विह्‌क बुदताङ पोल्‍लोङ वळ्ह्‌कनद बुदि ईस्ता, अदे जीवा दुस्रोन्क, पुनवव पोल्‍लोन पुन्ज वेहतनद बुदि ईस्ता.

2 कुरिंततोर 10:1

पोलु मावा संगे मनदह्‌पा, उड्ला बुदते मन्ह्‌तोग़, मयग्डाहि जेक मनदह्‌पा बारा, पका कळक मन्ह्‌तोग़ इनजोर, नाक मन्कलोर इन्ह्‌तोर. इंजेके ननाय पोलुनन, गूनमते वळ्ह्‌कवाल, कुलुल बुदते मनवाल किर्स्तुना पेदिरते, मीक उंद पोल्‍लो वेहतह्‌नन,

2 कुरिंततोर 6:6

इद्रम मन्जाय मति, माट कसुरलेवा पिससोरे, देवुळता बुदतुन पुनजोरे, बेदे पोल्‍लोते मुयोग़ आयवा, दुस्रोरिन गूनम तोहचोरे, ओरिन जीवाताहि जीवा कीसोरे,देवुळता जीवा वेहतप ताकसोरे,

2 कुरिंततोर 7:11

देवुळतुह्‌क विचर वातप दुकम आस मतिर. अदिनेनाह्‌क मीक बेस-नेह्‌ना आता ऊळाट! इंजेके मीट सेतेम मन्कलोरिर इनजोर तोहतलाह आतिर, गल्ति कीतोन ऊळिस, ओङ आतिर. ओना सिक्साते कलियकोम इनजोर रेयतिर. इंजेके नाक ऊळलाहि, पकाय मीवा जीवा पर्ह्‌किह्‌ता. नावा संगे गूनम आयलाह, मीवा जीवा पर्ह्‌किह्‌ता. गल्ति कीतोन नेयम कीयलाह आतिर. ओसो मीट सबे पोल्‍लोने, मुर्तिय कसुरलेवोरिर इनजोर तोहतिर.

2 कुरिंततोर 9:10

देवुळि वीतवाल मन्कह्‌क विजा ईस्ता, ओसो ओन्क तिनदलाह, अनम पुटिह कीस्ता. अदे देवुळि मीवा वने मालसोमतुन बोल्गिह कीयग़ा, कीसि वेल्‍लाटोरिह्‌क मीवा दर्ममता पाय्दा दोर्कग़ा.

इपिसुसतोर 5:9

अह ताकतेके मीट बेसताङ केवालोरिर, कर्तुळते मनवालोरिर, सेतेमते पिसवालोरिर आयकिर.

पिलिपितोर 1:11

बेद्रम इतेके, येसु किर्स्तु मीक देवुळता मुनेह सेतेमतोर कीताह्‌कु, मीवा ताकमुळतुन ऊळिसि, वेल्‍लाटोर मन्कलोर तान बेरा डीसाता इन्जि, मान ईस जोहर कीयिर इनजोर, इह वने नना पार्तना कीयलाह आतन.

पिलिपितोर 4:8

मावोरिर! इद उंद पोल्‍लो पिसता, बेव पोल्‍लोङ बेस-नेह्‌ना, असलताङ मन्ह्‌ताङ, अवे पोल्‍लोने सीता कीसोर मन्ह्‌टु: इतेके बर्वस लायकताङ पोल्‍लोङ, मानेम आयना लेह्‌काडाङ पोल्‍लोङ, सेतेमताङ पोल्‍लोङ, पवित्र पोल्‍लोङ, गिर्दाताङ पोल्‍लोङ, बेस विचर वायनव पोल्‍लोङ, इविस्किने सीता कीसोर मन्ह्‌टु.

1 तिमोति 5:21

देवुळि, किर्स्तु येसु, ओसो देवुळ आचतव देवतुल्कु, वेरा मुनेह नना नीक वेहतलाह आतन: नना वेहतनव इव पोल्‍लोन पोस मन. मन्कलोरा मोकम ऊळिस, बेदे कबळ केमा. सबेटोरिन उंदिय विचरते ताकिह कीम.

2 तिमोति 2:24

सामिना सेवक मन्कल जग्ळम आयनद आयो, मति सबेटोर मन्कलोरा संगे कुलुल बुदते मनदना. दुस्रोरिन देवुळता पोल्‍लो काग़्हतलाह उसर मनदना, तिपलते दीरा पोस मनदना.

तीतुस 1:15

देवुळता मन्कलोरिह्‌क सबे तिनदलाह पोलिह्‌ता. मति पापमते करब आसि, किर्स्तुन विस्वस केवा मनवालोरिह्‌क, बाताले पोलो. ओराङ विचर्क करबे, अहे ओरा नेह्‌ना-लाग्वदिन पुनदनद बुद वने करबे!

तीतुस 3:2

बोनाङे कूदिङ अनमाकिर, जग्ळम केमाकिर, ओङ आयमाकिर, सबेटोरा संगे गूनमते मनिर इनजोर, ओरिह्‌क सीता कीसीम.

इब्रितोर 12:11

देवुळि माक सुद्रे कीयह्‌पा, माक इंजेके गिर्दा वास्ताया? वावो. माक दुकम आस्ता; मति तान मर्सतोरिह्‌क, पेग़्के पाय्दा दोर्किह्‌ता. आल्सुळलेवा पिसनाह आस्ता; सेतेमते पिसनाह आस्ता.

इब्रितोर 12:14

दुस्रोर मन्कलोरा संगे कलियिस मनदलाह ऊळाट. देवुळतेनाह्‌क पवित्रते पिसलाह ऊळाट. अद्रम पिसवोग़ बोग़े देवुळता एरे दाया पग़वोग़.

याकुब 1:17

बाराह्‌क इतेके पोळ्‍दतुन, नेलातुन, उकानु पुटिह कीतोग़ देवुळबाबानग्डाह, सबे बेसताङ माचलेववु बर्कत्कु वास्ताङ. मति (पोळ्‍दता, नेलाता वेह्‌च बेद्रम एक्‍वा-तक्‍वा मिळ्न्दसोर दास्ता, अद्रमलेह्‌काडा मावा देवुळ आयो.) ताना गूनम बेस्केन मिळ्न्दो.

याकुब 1:5

मियग्डाह बोन्क बुदता कमि मन्ह्‌ता, ओग़ देवुळतुन ताल्ह्‌केग़, अस्के देवुळ ओन्क ईयग़ा. बाराह्‌क इतेके, तान ताल्ह्‌कवालोर कतमतोरिह्‌के, अद नारज केवा लेकालेवा ईस्ता.

याकुब 2:13

बह इतेके, बोग़ दुस्रोरा पोग़ोन दया केवोग़, देवुळ वने नेयम कीयनद दियाते, ओना पोग़ोन दया केवो आयग़ा. मति दया केवालोर मन्कलोर, नेयमतुह्‌क रेयोर आयनुर.

याकुब 2:4

इद्रम कीसि, लाग्वाङ विचर्कने मीवाय नडुम उड्लोर-बेरोर इनजोर, मोकम ऊळिस ताकवालोरिर आयविरा?

याकुब 3:15

इद्रमता बुदि देवुळतग्डाहि वावो, मति मन्कना बुदतग्डा, इद दुनियातग्डा, देयमदीपतग्डा आंदु.

याकुब 4:8

देवुळता एरे मीट वातेके, देवुळ वने मीवा एरे वायग़ा. एय पाप्यह्‌लोरिर! करब आतव कय्किन नोग़तप लेह्‌का, (लाग्वाङ कबस्क केवा, मीवा ताकमुळतुन बेस) कीम्ह्‌टु. मीट रेंड विचर्क केवा, मीवा पूरा जीवा देवुळतगान मनि.

1 पत्रु 1:22

येसुना सेतेमता कबुरतुन केंजिस ताकताह्‌कु, मीटु पापमताहि एडटिर. अदिह्‌कु मीटु ओर्विह्‌क-ओर्वोग़ सेतेमते जीवा कीया पग़यह्‌निर. अद्रमे इंजेके मीवा लेह्‌का विस्वसिर आतोरिन, मीटु पूरा जीवाताह जीवा कीम्ह्‌टु.

1 पत्रु 2:1

इंजेके मीटु देवुळि बेचोन बेस गूनमता मन्ह्‌ता इन्जि पुतिर. इतेके मीटु मीवाङ सबे लाग्वाङ कबस्किन विळ्सिसीम्ह्‌टु: सबे कुळ्सा, सबे सोङु, नाळेह कीयनद बुदि, ओसो जीवा कर्वतप आयनदु, कूदिङ दायनदु, इविन विळ्सिसीम्ह्‌टु. इंजेक पुटटोग़ कस्मुल बाला पेकाल बेद्रम पाल उनडलाह गिर्दा आस्तोग़, अद्रमे मीटु इंका मीवा जीवातुह्‌कु, पाललेह्‌का मनदनदु देवुळता पोल्‍लोतुन पुनदलाह, गिर्दा आम्ह्‌टु. इद्रमता पाल उनजोर मतिर इतेके, मीट देवुळतके दायनद वेला एवनाहि, विस्वसते बेर्ससोर मनदकिर.

1 पत्रु 2:18

मीट ओर्युलतोरिर, मीवाङ माल्कालोरा पोल्‍लोते वरेम आस मन्ह्‌टु; सिरप गूनमतोरगाने आयो, मति कळकते मनवालोर माल्कालोरगा वने, ओराङ पोल्‍लोङ केंजिस तिरियाटु.

1 योहन 3:18

अदिनेनाह्‌क पेकोरिर! माट सिरप तोडटा पोल्‍लो वळ्ह्‌किस जीवा कीयनद आयो. मति देवुळता सेतेम पोल्‍लोतुन नमिसि, दुस्रोरेनाह्‌क बेसताङ कबस्क कीयना गावले.

1 योहन 3:3

बोर ओना पोग़ोन निटम इद्रमता आसा तासिह्‌तोर, ओर सबेटोरु मावा किर्स्तु बेद्रम पवित्र मन्ह्‌तोग़, अद्रमे ओर वने पापम कीयनदिन विळ्सिसि, पवित्र आस्तोर.