गलातितोर 6:8 - माडिया गोंड पवित्र सास्त्रम

⁸ इतेके बोर तमा मन्कना बुद वेहतपु, लाग्वाङ कबस्क वीतिह्‌तोर, ओरिह्‌क अदे मन्कना बुदतुह्‌कु, बूळेम आयनद सिक्साता पंटा दोर्कग़ा. बोर बार देवुळता जीवा वेहतपु बेसताङ कबस्क वीतिह्‌तोर, ओरिह्‌क देवुळता जीवाये ईतदु अमेसाता पिसमुळता पंटा दोर्कग़ा.

गलातितोर 6:8 Iomraidhean Croise

मत्याल 19:29

ओसो बोर नयेनाह्‌क तमा लोन-दुवरतुन, दादाल-तमोनु, एलाळ-बायिनु, तलोग़-तपेनु, पिलाङ-पेकोरिन, जागा-बूमतुन, कतम विळ्सिह्‌तोर, ओरिह्‌कु देवुळि लेकालेवा सम्सरम ईयग़ा, अचोने आयो मति ओसो अमेसाता पिसमुळ वने ईयग़ा.

मत्याल 25:46

“ओर इतेके अमेसाता सिक्सा आयलाह दायनुर, सेतेमतोरिह्‌क बारा अमेसा पिसलाह दोर्कग़ा,” इन्जि, येसु तनाङ कग़यवालोरिन इतोग़.

लूकाल 18:30

ओन्क इद कालमते लेकालेवा सम्सरम ओसो एळ्म-दळ्मतोर दोर्कनुर, अचोने आयो मति ओसो वायना कालमते अमेसाता पिसमुळ वने दोर्कग़ा,” इनजोर वेहतोग़.

योहन 4:14

मति नना ईयनद एतुन बोर उनडनुर, ओरिह्‌क पया मुर्तिय एग़ उनडा वसो आयग़ा. नना ईयनद एग़ मात्रम, ओरा लोप्पा अमेसा पिसलाह ईयनदु, ऊता एग़लेह्‌का पोङग़ा,” इनजोर इतोग़.

योहन 4:36

कोयवाल तना बूत दोर्किह कीस्तोग़, ओसो अमेसाता पिसमुळतेनाह्‌कु, लोकुरिन जमा कीस्तोग़. बाराह्‌क इतेके वीतवाल (इतेके देवुळता पोल्‍लो वेहवाल) ओसो कोयवाल (इतेके पोल्‍लोतुन नमवालोरिन जमा केवाल) वेर इर्वुर कलियिस गिर्दा कीयना इन्जि.

योहन 6:27

अवयनद तिंडटा पेग़्के अनमाट, मति अमेसाता पिसमुळ ईयनद, बेस्केन अववदु तिंडटुन पर्ह्‌काटु. इद्रमता तिंडि माने-मन्कना नडुम पुटटोनन, नना मीक ईकन. बाराह्‌क इतेके अदिन ईयनद अदिकर नावा देवुळबाबाल नाक ईतोग़,” इनजोर इतोग़.

रोम सहरतोर 13:14

मीटु मन्कना बुदताङ लालुस्किन मुर्तिय सीता केवाहु,किर्स्तु येसुसामिये मीक आव्रे कीयेग़.

रोम सहरतोर 6:13

मीवाङ मेंदुस्किन लाग्वाङ कबस्क कीयलाह, पापमता कयदे विळ्सिस एमाटु. मति पापमतुह्‌क डोलिसि, माट पूना जीवा दोर्किह कीतोम इनजोर पुन्जि, मीवाङ मेंदुस्किन सेतेमताङ कबस्क कीयलाहि, देवुळता कयदे ईम्ह्‌टु.

रोम सहरतोर 6:23

(अदिह्‌कु माट पापम कीसोरेन दाकल इन्जि इनमाटु.) बह इतेके, पापमता कमय इतेके, हामुरिये दोर्किह्‌ता. मति मावा किर्स्तु येसुसामि मयेनाह्‌क कीतद कबळतेनाह्‌कु, देवुळि माक तना संगे अमेसा पिसनद दर्मम ईस्ता.

रोम सहरतोर 8:11

बेद देवुळि येसुन हामुरतग्डाहि तेग़्किह कीता, अदे देवुळता जीवा, मीवा जीवातगा जागा आता. अदे जीवाता लावते, मीट डोलतापया वने, देवुळि येसु किर्स्तुन कीतप लेह्‌का, मीवाङ मेंदुस्किह्‌क वने उंद दिया जीवा ईयग़ा.

रोम सहरतोर 8:13

मन्कना बुदते माट ताकतेक अचोन, अद अमेसाता हामुरतेकेन ओसीस्ता. मति देवुळता जीवाता तोळते, मावाङ मेंदुस्क विचर कीयनव कबस्किन विळ्सतेके, माट देवुळता संगे पिसकल.

रोम सहरतोर 8:6

मन्कना बुदि मीवाङ विचर्किन ताकिह कीतेके, मीक देवुळ ईयनद पिसमुळ दोर्को आयग़ा. मति देवुळता जीवा मीवाङ विचर्किन ताकिह कीतेक बार, मीट देवुळता संगे पिसकिर, ओसो सुकमते मनदकिर.

1 कुरिंततोर 15:42

डोलतोर ओसोवने जीवा अरयनद अद्रमे. इद मेंदुलि आक्रिते कळियग़ा, मति देवुळि तान ओसोवने जीवा अर्हतस्के, अद मेंदुल बेस्केन बूळेम आयो आयग़ा.

गलातितोर 6:7

ओसो मीट नाळेम आयमाटु. देवुळि मावाङ कबस्किन ऊळो, नेयम केवो इन्जि, देवुळतुन बोग़े नाळेह कीया पग़वोग़. इतेके मीट बेव वीतिह्‌निर, अविने कोयकिर.

1 तिमोति 1:16

मति अदिनेनाह्‌के येसुसामि नाक दया कीतोग़. नना पापि लोकुरग्डाह मुक्यानन मन्ज तेला, नावा पापमताहि नना मल्स वायलाह, येसु किर्स्तु वेल्‍लाजोमताह केपसोर मतोग़. पया नयिद्रमतोर पापि लोकुरिन इंका, येसुसामि मापि कीस्तोग़, तान ऊळिसि दुस्रोर वने ओन नमलाह आयनुर. नमिसि ओरिह्‌क ओना संगे अमेसाता पिसमुळ दोर्कसोर दायग़ा, इद्रम येसुसामिना विचर मता. अदिनेनाह्‌क नाक इंका ओग़ गूनम तोहतोग़.

तीतुस 3:7

इद्रमलेह्‌का देवुळि माक दया कीसि सेतेमतोर कीता, कीताह्‌कु माट इंजेके तानग्डाहि अमेसाता पिसमुळता तूस दोर्किह कीकल इनजोर, आसा कीयलाह आतल.

याकुब 3:18

ओसो ओर्विह्‌क-ओर्विन गूनमते काल्ह्‌पवालोर मन्कलोरु, गूनमता विजा वीतिह्‌तोर, पया सेतेमताङ कबस्कना पंटा ओरिह्‌क दिसिह्‌ता.

2 पत्रु 2:12

मति वेर जोल काग़्हवालोर इतेके, तमा पुनवव पोल्‍लोना लोप्पा पास्किह्‌तोर. वेर विचर कीया पुनवव, बुदलेवव जन्वर्कना लेह्‌काडोर आंदुर. इद्रमताङ जन्वर्क बेदे कबळतुह्‌क अरवाह्‌कु, अविन पोस हव्कनाय ओजिह्‌ता. अद्रमलेह्‌काने देवुळि वेरिन बूळे कीयग़ा.

2 पत्रु 2:19

मीट बेदे अडोता कय इळ्न इलविर इनजोर, पूना विस्वसिरिन पोल्‍लो विळ्सिह्‌तोर. पोल्‍लो विळ्सिसाय मति, वेर तमाय बूळे कीयनव लालुस्कना कय इळ्न मन्ह्‌तोर. बाराह्‌क इतेके, बोनाय बेद पोल्‍लो आव्रे कीस्ता, ओग़ ताना कय इळ्न मन्ह्‌तोग़े.

यहुदाल 1:21

मावा येसुसामि किर्स्तु माक तना दया तोहचि, अमेसाता पिसमुळ ईयनद दियातेनाह्‌क केपाटु; अद्रम केपसोर, देवुळता गूनमते निच मन्ह्‌टु.

तोहचीतव पोल्‍लोङ 22:11

बोर लाग्वाङ कीसोर ताकिह्‌तोर, ओर अहलेह्‌काने ताकिर; करब बुदतोर अहलेह्‌काने आसोर मनिर. ओसो बोर सेतेमतोर मन्ह्‌तोर, ओर अहलेह्‌काने मनिर; बोर पवित्रते मन्ह्‌तोर, ओर अहलेह्‌काने मनिर.