1 तिमोति 5:17 - माडिया गोंड पवित्र सास्त्रम

¹⁷ बोग़ाय विस्वसिरा मुक्याल, विस्वसिरा मुडुन बेस-नेह्‌ना ताकिह कीतोग़ इतेके, ओन्क बेस मान ईयना, ओसो बेस दान ईयना. कासा इतेके, देवुळता पोल्‍लोतुन वेहतना, काग़्हतना कीयनद कह्‌टेम केवालोरिह्‌क पका मान ईयना.

1 तिमोति 5:17 Iomraidhean Croise

मत्याल 24:25

ऊळाट, नना इतेके मीक मुनेन वेहतन, उसरते मन्ह्‌टु.

लूकाल 10:7

ओसो बेदाय नाग़ अतेक अचोन, लोह्‌क-लोह्‌क अनमाटु. बेदाय उंदिय लोतगा मन्जि, ओर बाताल ईस्तोर, आताल तिनजोर-उनजोर मन्ह्‌टु. मीट बोरगा देवुळता पोल्‍लो वेहतलाह दाय्ह्‌निर, ओर मीकु इव पूरा ईयनदे.

लूकाल 12:42

इतस्के येसुसामि इतोग़, “बेसता बुदतोग़ सेतेमते कबळ केवाल, इद्रम बोग़ मेटि मन्ह्‌तोग़, ओन लोता माल्काल ओर्युलतोरिह्‌क कगोत्क-कगो अडिया ईयलाहि आचिह्‌तोग़.

योहन 4:38

बेदिनेनाह्‌क मीट मुने कह्‌टेम केविर, अदिन कोयलाह नना मीक लोहतन. नना कह्‌टेम कीसि देवुळता पोल्‍लो वेहतह्‌नन, दुस्रोर वने मुने वेहच मतोर, मति मावा कह्‌टेमता पंटा कोयलाह मीट वने कलियतिर,” इन्जि येसु तनाङ कग़यवालोरिन वेहतोग़.

बळयिर 11:30

पया अद्रमे कोताङ अर्हचि, अव कोतानु बार्नबसना, सोलुना कयदे ईसि, येरुसलेम मतोर विस्वसिराङ पेदल्कनगा लोहतोर.

बळयिर 20:35

इद्रम एपुर पेसनाह कबळ कीसि, कबळ कीया पग़वोरिन साय्ता कीयनदु इनजोर, नना नावाङ सबे कबस्कने कीस तोहतन. अह कीनेके, येसुसामि कुदि वेहतद इद पोल्‍लोतुन सीता कीयनदु: ‘दुस्रोनग्डाहि एतनदिह्‌काय, ओन्क ईतेकेने एक्‍वा गिर्दा वास्ता,’” इनजोर पोलु इतोग़.

बळयिर 28:10

नाटेनोर माक पका कदर ईसि, इनम वने ईतोर. माट अद तोग़दगा मूंड नेलाङ मतोम. पया सिकंदरिया सहरताहि वास मतद ओडाते अग्डाहि पेसतोम. इर्ङमताङ दियाङ मारनाहि, अद ओडा माल्टा तोग़दगान रोमिस मता. (ताना मुनेहता तलातगा एमोह पेन्कना सीना मता.) पया माट अग्डाहि ओडाते पेसतस्के, अग़दे माक बाताल बाताल गावले आस्ताङ, अविस्किन नाटेनोर ओडातगा तचि वाटटोर.

रोम सहरतोर 12:8

दुस्रोरिह्‌क दीरा ईयनद बुद दोर्कतोरिर, अहे दीरा ईसोर मन्ह्‌टु. दुस्रोरिह्‌क दर्मम कीयनद बुद दोर्कतोरिर, चिव्टम आयवा दर्मम कीसोर मन्ह्‌टु. दुस्रोरा मुक्याल आस ताकिह कीयनद बुद दोर्कतोरिर, पूरा जीवाताहि ओरिन ताकिह कीसोर मन्ह्‌टु. दुस्रोरिन जीवा लोपिस तोळ ईयनद बुद दोर्कतोरिर, मीट गिर्दाते तोळ ईसोर मन्ह्‌टु.

रोम सहरतोर 15:27

मुने यहुदि आयवोरिह्‌क देवुळता पोल्‍लोता गर्ज मता, अस्के येरुसलेमता यहुदि जाततोर विस्वसिर, ओरगा देवुळता पोल्‍लोतुन एव्सिह कीसीतोर. मति इंजेके येरुसलेमतोर विस्वसिरिह्‌क तिंड-बंडटा गर्ज मन्ह्‌ता. मुने ओरग्डाहि माक देवुळता पोल्‍लो दोर्कता, इदिन सीता कीसि, इकेडोर यहुदि आयवोर विस्वसिर अद गर्जतुन निहतलाहि, पका गिर्दा आस्तोर.

रोम सहरतोर 16:12

तुरुपेनि ओसो तुरुपोसि, इव रेंड आस सामिना सेवा कीयनविस्किह्‌क, नना जय येसु इह्‌नन. परसिसिह्‌क वने नना जय येसु इह्‌नन, अद बेस गूनमता आंचाळि. पका एपुर पोहचि सामिना सेवा कीता.

1 कुरिंततोर 15:10

मति नना इंजेके बळयिनन मह्‌नन इतेके, देवुळता दयाते मह्‌नन! देवुळि नाक ईतद दया उगस अनो. किर्स्तुनाङ बळयिर दुस्रोरिह्‌काय एक्‍वा, नना एपुर पेसनाह कह्‌टेम कीतन. तेला मति निटम इतेके, नावाय लावते नना केवोन, देवुळि तना देय्वाते नयग्डाहि कह्‌टेम कीता.

1 कुरिंततोर 3:9

इंजेके पोलम माल्कानाये आंदु, बूततोरा आयो. अहे बेदाय लोन माल्काले जागा आयलाह दोहतद मन्ह्‌ता, बेल्दर्किह्‌क (लोन दोहवालोरिह्‌क) आयो. अद्रमलेह्‌काने मीट देवुळताये लोकुरिर आंदिर, तानेनाह्‌के पिसिह्‌निर. माट बारा सिरप देवुळता कबळ ऐंगेन केवालोरोम.

2 कुरिंततोर 6:1

माट देवुळता संगे कबळ कीय्ह्‌नोम, अदिनेनाह्‌क मीक अर्जि कीस वेहतह्‌नोम. मीट देवुळता दयातुन दोर्किह कीतिर, ताना लेह्‌कान पिसाट. तान सीता केवालेवा मनमाट.

गलातितोर 6:6

देवुळता पोल्‍लो केंजवालोर, तमा सबे बेसता मालसोमता कोडि, पोल्‍लो काग़्हवालोरिह्‌क ईयिर.

पिलिपितोर 2:16

मीट देवुळता पिसमुळ ईयनद पोल्‍लोतुन पोस विळ्समाटु. अद्रम मीट मतेके, नना मियगा पूरा दोगनाह, कह्‌टेम कीतद उगसिन अनो इनजोर, किर्स्तु वायनद दिया वेहता पग़यकन. वेर मावोर बेसतोर विस्वसिर इनजोर, मीवा लोप्पा इनदा पग़यकन.

पिलिपितोर 2:29

बेद सेवातुन जेकताहि मीट नयेनाह्‌क कीया पग़विर, अद सेवातुन ओग़ इगा वासि नयेनाह्‌क कीसीतोग़. अद सेवा कीनेके, ओना जीवा दोकाते अर्स मता, किर्स्तुना कबळतेनाह्‌क डोलसोर मतोग़. अदिनेनाह्‌क ओग़ मियगा वायनोग़ अस्के, सामिना सेवक इनजोर, ओन मीटु बेस गिर्दाते कलियाटु. ओना लेह्‌का सेवा केवालोरिह्‌क बेस कदर ईम्ह्‌टु.

पिलिपितोर 4:3

नावा सेतेमतोग़ तोळतोनिन! अव रेंड आसि आस्कु उंदिय एकाते मनदलाहि, अविस्किह्‌क तोळ आमु. बाराह्‌क इतेके किलेमेन्‍सना ओसो नावा ऐंगे कबळ केवालोरा संगे कलियिसि, अव रेंड आसि आस्कु, बेसता कबुरतुन पोकुर कीयलाहि कह्‌टेम कीताङ. ओर सबेटोराङ पेदिर्क, देवुळतगा मनदनद अमेसातुह्‌क पिसवालोरा पुस्तकतगा रासतव मन्ह्‌ताङ, इदिन सीता कीम्ह्‌टु.

1 तिमोति 3:5

(तनाय लोतोरिन ओन्क तिर्हतलाह वायो इतेके, देवुळता मुडुन ओग़ बह तिर्हता पग़यनोग़?)

1 तिमोति 4:10

इद पोल्‍लोतेनाह्‌क माट एपुर पेसनाह कह्‌टेम कीतोम, ओसो लळेम आयलाह आतोम. जीवात मनदनद देवुळता पोग़ोन आसा तासतोम. अद सबेटोरिन पिसिह कीस्ता, कासा इतेके विस्वसिरिनु.

1 तिमोति 4:14

विस्वसिराङ मुक्यालोर नीवा पोग़ोन तमाङ कय्क तासतोर, अह कीसि देवुळि इतद पोल्‍लो वेहचि, नीक ताना कबळतेनाह्‌क निल्पिह कीतोर. अस्के देवुळता जीवाते नीक दोर्कतद बुदतुन माग़्ङमा.

1 तिमोति 4:16

निमा बह पिसिह्‌निन, बेव पोल्‍लोङ काग़्हतह्‌निन, इदिन सीतात तासा. अस्के नीकु ओसो नीवाङ केंजवालोरिन वने, पिसिह कीया पग़यकिन.

1 तिमोति 4:6

नना वेहतव इव पोल्‍लोङ विस्वसिरिन काग़्हा. निमा विस्वसताङ पोल्‍लोनु, ओसो इचानाह केंजसोर वातिन अव बेसताङ पोल्‍लोन कग़यिसि, विस्वसते बेर्सतिन. बेर्सताह्‌कु किर्स्तु येसुना बेसतोग़ सेवक आयकिन.

1 तिमोति 5:19

बोग़ाय विस्वसिरा मुक्याना पोग़ोन, कसुर ओपतेक अचोन, कमसेकम इर्वुर-मुवुर साक्सि एवालेवा, तान केंजमा.

1 तिमोति 5:3

गतलेवव रांडे आस्किह्‌क मान-दान ईम.

2 तिमोति 2:6

अद्रमे ओसो एपुर पेसनाह कास्तकारि केवाल मन्कह्‌के, मुनेता पंटा दोर्कना गावले.

2 तिमोति 4:2

बेसता कबुरतुन पोकुर कीम. मन्कलोरिह्‌क केंजलाह विचर वातेकाय, वावेकाय, वेहचोर मन. मुर्तिय ओङ आयवा, मन्कलोरिन सुद्रे कीसोर, लाग्वा कबळ कीतेक तेर्हचोर, दीरा ईसोर, देवुळता पोल्‍लोतुन बेस-नेह्‌ना काग़्हचीम.

इब्रितोर 13:17

मीवा मुडा मुक्यालोर, मीवाङ जीवाना राका कीस्तोर. तमा कीयनद इद कबळता लोप्पा, ओर देवुळतुह्‌क इसब ईयनुर. अदिनेनाह्‌क इद कबळतुन ओर नारजते आयो, मति गिर्दाते कीयनाह, ओरा पोल्‍लोते वरेम आस मन्ह्‌टु. ओर नारज आस कीतेके, मीक बाताले पाय्दा दोर्को आयग़ा.

इब्रितोर 13:24

मीवाङ मुक्यालोर सबेटोरिन, ओसो मियग्डोर देवुळता मन्कलोर सबेटोरिन, जय येसु इन्ह्‌टु. इतालिया पटटोर विस्वसिर, मीक जय येसु इनदलाह आतोर.

इब्रितोर 13:7

मीक देवुळता पोल्‍लोतुन वेहचि, अग़ तोहतोरिन सीता कीम्ह्‌टु. ओरा ताकमुळतुन विचर कीस ऊळाट; ओर देवुळता पोग़ोन आक्रि एवनाह विस्वस तासिस मतप लेह्‌कान, मीट वने विस्वस तासाट.