1 तिमोति 2:6 - माडिया गोंड पवित्र सास्त्रम

⁶ माट पापमते दोहतप मतल, मति वेग़ तना जीवाता कर्सा ईसि, माक विळ्सिह कीतोग़.(अदिनेनाह्‌क कतमतोर पापमताहि पिसना इन्जि, देवुळता विचर मन्ह्‌ता.) इद पोल्‍लो सबेटोर लोकुरिन पुन्पिह कीयनद कगो इंजेक एवता.

1 तिमोति 2:6 Iomraidhean Croise

मत्याल 20:28

माने-मन्कना नडुम पुटटोनन, नना वने दुस्रोरिन नावा सेवा कीया वेहतलाह, इद बूमते वावोन. मति दुस्रोरा सेवा कीयलाहि, ओसो वेल्‍लाटोरा पापमता दांड निहतलाह, नना नावा जीवा ईयलाह वातन.(अहलेह्‌का मीट वने दुस्रोरा सेवा कीम्ह्‌टु,)” इन्जि येसु इतोग़.

मार्कल 1:15

येसु इद्रम इंदोग़, “देवुळ वेहतद कगो एरे एवता; इंजेके देवुळि मन्कलोरगा राजेम कीयनद दिया एवयलाह आता. मीट पापमता अग़दाहि मल्सि, बेसता कबुरतुन विस्वस कीम्ह्‌टु,” इनजोर इंदोग़.

मार्कल 10:45

माने-मन्कना नडुम पुटटोनन, नना वने दुस्रोरिन नावा सेवा कीया वेहतलाह, इद बूमते वावोन. मति दुस्रोरा सेवा कीयलाहि, ओसो वेल्‍लाटोरा पापमता दांड निहतलाह, नना नावा जीवा ईयलाह वातन. अहलेह्‌का मीट वने दुस्रोरा सेवा कीम्ह्‌टु,” इन्जि येसु इतोग़.

योहन 6:51

देवुळदीपताह रेगतद जीवात मनदनद तिंडि ननान आंदन. बोर इद तिंडटुन तिनदनुर, ओर अमेसा जीवात मनदनुर. इद तिंडि नावा मेंदुल आंदु, इदिन नना दुनियातोरा पिसमुळतेनाह्‌कु ईकन,” इनजोर येसु इतोग़.

रोम सहरतोर 16:26

मति इंजेके अमेसा मनदनद देवुळि, तना कबुरतोरा सास्त्रमता मेटे, इद मकतद कबुरतुन, माक पुन्पिह कीयलाह आता. सबे जातिनोर मन्कलोर इद कबुरतुन विस्वस कीसि, देवुळताङ केंजिर इनजोर, तान पोकुर कीयलाह, देवुळि उकुम ईता.

रोम सहरतोर 5:6

मुने माट मावा पापमताहि मुर्तिय पिस पग़वल, मति देवुळ तासतद कगोते, माट पापि मन्कलोरेनाह्‌क, किर्स्तु तना जीवा ईतोग़.

2 कुरिंततोर 5:21

किर्स्तु पापमलेवा मतोग़. मतेक तेला माट ओना संगे जोळेम आसि, देवुळता मुनेह सेतेमतोर आयना इनजोर, देवुळि मावा पापमतुन ओना पोग़ोन वाटिसि, मावा बद्लाते ओन्क सिक्सा ईता.

गलातितोर 1:4

येसु किर्स्तु मावा पापमता सिक्सा एचि, हव्कनागुटातगा तना जीवा ईतोग़ इन्जि, मीट पुतिर. माट इद दुनियाताङ लाग्वाङ विचर्कनाहि, लाग्वाङ कबस्कनाहि पिह्‌ट अरयना इन्जि, मावा देवुळबाबाना विचर मता. अदिनेनाह्‌क येसुसामि तना जीवा ईतोग़.

गलातितोर 4:4

पया देवुळ वेहतद कगो एवतस्के, अदु तना मग़िन इद बूमते लोहता. ओग़ आंचाना पोटाताहि पुटटोग़,मोसानाङ अडोङ नोमवालोर यहुदि जाततोरगा पुट वातोग़.

इपिसुसतोर 1:17

नना इद्रम पार्तना कीय्ह्‌नन: मावा येसुसामि किर्स्तुना देवुळतुन, डीसातोग़ बाबान मीट पूरा पुनदना इन्जि, ओग़ मीक तना बुदि ईयेग़, तनाङ विचर्किन मीक पुन्पिह कीयेग़.

इपिसुसतोर 1:7

मावा पोग़ोन पका दया कीता, अदिनेनाह्‌क तना मग़ि नेतुर पोहच डोलताह्‌कु, मावा पापमतुन मापि कीसि, ओना मेटे माक पापमताहि विळ्सिह कीता.

इपिसुसतोर 3:5

अद पोल्‍लो इद्रम मन्ह्‌ता: यहुदि आयवोर बेसता कबुरतुन विस्वस कीतोर, कीताह्‌कु देवुळता बर्कत किर्स्तुन विस्वस कीतोर यहुदिरा संगे, ओरिह्‌क वने दोर्किह्‌ता. ओर ओसो यहुदि विस्वसिर, उंदिय मेंदुलतोर आतोर. अदिनेनाह्‌क किर्स्तु येसुनोरेनाह्‌क, देवुळि पोल्‍लो विळ्सिस मतविन, पूरा दोर्किह कीतोर. देवुळि तासिस मतद इद पोल्‍लोतुन, मुनेटा कालमतोर मन्कलोरिह्‌क तोहवा मता. मति इंजेके किर्स्तुनाङ पवित्र बळयिरिह्‌क, ओसो देवुळता कबुरतोरिह्‌क, तना जीवाता मेटे तोहचीता.

इपिसुसतोर 5:2

किर्स्तु माक जीवा कीसि, मयेनाह्‌क डोलिस मन्जि, तना मेंदुलतुन गम-गम एग़्स्कतद, देवुळतुह्‌क विचर वायनद मोक ईतोग़. बेद्रम किर्स्तु माक जीवा कीतोग़, अद्रम मीट वने ओर्विह्‌क-ओर्वोग़ जीवा कीसोर मन्ह्‌टु.

2 तिसलुनितोर 1:10

येसुसामि ओसो मल्स वायनोग़ अस्के, पवित्र लोकुरगा तना डीसातुन तोहतनोग़. ओन विस्वस कीतोर सबेटोरु, ओन बामनाह ऊळनुर. माट ओना लोप्पा वेहतद साक्सितुन, मीट विस्वस कीतिर, अदिनेनाह्‌क मीट वने ओरगा कलियकिर.

1 तिमोति 6:15

ओग़ वायनद कगोते, देवुळि ओन दिसिह कीयग़ा. डीसाता देवुळि पूरा दुनियातुन ताकिह कीयनद अदे, राजालोरा राजाल अदे, सामिरा सामि अदे आंदु.

2 तिमोति 1:8

अदिनेनाह्‌क मावा सामिना साक्सि ईयलाह, निमा लजा आयमा. अद्रमलेह्‌काने ओना सेवा कीयनाह्‌क, नना जेलते मह्‌नन; इद पोल्‍लोतेनाह्‌क वने निमा लजा आयमा. मति देवुळि नीक ईतद लावते, बेसता कबुरतेनाह्‌क नावा संगे तिपल आम.

तीतुस 2:14

मुने माट देवुळता अडोतुन पास्कनव कबस्क कीसोर मतल. मति अव कबस्कनाहि, किर्स्तु माक विळ्सिह कीतोग़. अह कीसि, माक तना मन्कलोर कीयलाह, एडिह कीतोग़. कीसि माक बेसताङ कबस्कने गिर्दा आयवालोर कीयलाहि, किर्स्तु मावासाटि तनाय विचरते, तना जीवा ईतोग़.

इब्रितोर 9:12

मावोर बूमयालोर कीयना लेह्‌कान, एर्रे नेतुर, कोंदा पियोता नेतुर अग़्के ओळियोग़; मति (तना हव्कनागुटातगाडोलताह्‌कु,) तनाय नेतुर अग़्के, उंदिय मल्का, सबेट्क पवित्र गूडटगा ओळियतोग़. ओसो अद इसबते, माक कतम पापमताहि, अमेसातुह्‌क विळ्सिह कीतोग़.

1 पत्रु 2:24

माटु मावा पापमताङ विचर्कनाहि पिह्‌ट अर्सि, सेतेमते ताकनेनाह्‌क, ओग़ु मावा पापमता सिक्सातुन तना मेंदुदा पोग़ोन एचि,हव्कनागुटातगा डोलतोग़. ओग़ु देबाङ तिन्ज नोमुर आताह्‌के, मीट मीवा जीवाते बेस आतिर.

1 पत्रु 3:18

किर्स्तु इंका मावा पापमतेनाह्‌कु देबाङ अर्सि डोलतोग़, इद पोल्‍लोतुन माग़्ङमाटु. ओग़ सेतेमतोग़ मन्जाय, माकु देवुळतगा कलियिह कीयलाह, माट पाप्यह्‌लोरेनाह्‌कु हातोग़. ओना उंदिय मल्का डोलमुळ आता. लोकुर ओनु हव्कताह्‌कु, ओना मेंदुल डोलता. तेला मति जीवाते तेग़्किसि,

1 योहन 4:10

बेद्रम जीवा कीयना इनजोर, माट देवुळतुन जीवा कीसि तोहवल. मति देवुळिये इद पोल्‍लोतुन बेस-नेह्‌ना तोहता. बेद्रम इतेके, अद माक जीवा कीता, ओसो तना मग़ि मावा पापमता सिक्सातुन तना पोग़ोन एचि डोलेग़ इनजोर, ओन लोहच मता. इदे निटम जीवा कीयनद आंदु.

तोहचीतव पोल्‍लोङ 5:9

मोळ्किसि ओर इद्रम पूना पाटा वाग़तोर: “नीक मन्कलोर हव्किस मतोर, निमा नीवा नेतुर पोहच डोलतिन. अद नेतुरता कर्सा कीसि, सबे पुळ्गिनाहि, दुस्राङ-दुस्राङ पोल्‍लोङ वळ्ह्‌कवालोरग्डाहि, सबे देसेह्‌कनोरग्डाहि, सबे जातिनोरग्डाहि, मन्कलोरिन देवुळतेनाह्‌क अलग कीतिन. ओसो ओरिन मावा देवुळता राजेमतोर कीतिन, तानाङ बूमयालोर वने कीतिन, ओर पूरा बूमते राजेम कीयनुर. अदिह्‌क तोला सीटटुन एतलाहि, ओसो तानगा मेततद वटेतुन तेंडलाहि, निमान लायकतोनिन!” इनजोर पूना पाटा वाग़तोर.