1 पत्रु 3:16 - माडिया गोंड पवित्र सास्त्रम

¹⁶ मति ओरिह्‌क गूनमते, उड्ला पोल्‍लोते वेहाटु. मीवा कसुर तोहतलाह, बातय दोर्कवप मन्ह्‌टु. अस्के बोर मीकु अडम वळ्ह्‌किह्‌तोर, ओर इंका मीटु किर्स्तुना लोकुर आताह्‌कु असल ताकिह्‌निर, तेन ऊळिसि पया तमाय लजा आयनुर, (लजा आसि तमाङ तोडिन मुचनुर).

1 पत्रु 3:16 Iomraidhean Croise

मत्याल 5:11

“नावा पेदिर मीक अरताह्‌कु लोकुर बेस्के मीकु पास्कनुर, तिपल कीयनुर, अहे मीवा अडम मताङ-लेवाङ जोल कूदिङ वळ्ह्‌कनुर, अस्के मीट देवुळता देय्वातोरिर.

बळयिर 24:16

अदिह्‌क देवुळता मुनेह आयि, लोकुरा मुनेह आयि, अमेसा जीवाताहि कसुरलेवप मन्जि, ताकलाह ऊळिह्‌नन.

बळयिर 28:22

मति निमा बेद तुंगाते मह्‌निन, तान सबे देसेह्‌कना लोकुर विरुद कीस्तोर इनजोर, माट पुतोमे. अदिह्‌क निमा माक बाताल वेहतना मन्ह्‌ता, तान माट केंजकोम,” इनजोर इतोर.

रोम सहरतोर 9:1

(देवुळता गूनमताहि माक बेवे एग़िह कीया पग़वोङ इतेके,) नावा इस्रयेलतोर यहुदि जाततोर बाराह्‌क एग़तोर? ओरेनाह्‌कु नना पका आल्सुळते मह्‌नन, उंद दिया तपवा, नावा जीवा नोस्ता. येसुन विस्वस केवाह्‌कु, ओरिह्‌क दोर्कनद सिक्सा नाक दोर्कि! ओरा बद्लातुह्‌क, देवुळि नाके सरप ईसि, किर्स्तुनग्डाह एग़िह कीतेक तेला बेसे! मति ओर पिसिर इनजोर, ओरेनाह्‌क अचोन नना आलिह कीय्ह्‌नन. किर्स्तुना मुनेह किरिया, इद निटमे, नना जोल वळ्ह्‌कोन,देवुळता जीवा वने इद पोल्‍लोता साक्सि मन्ह्‌ता.

2 कुरिंततोर 1:12

दुनियाते माट बाताल बाताल कीतोम, देवुळ ईतद सेतेम बुदते, नाळेह केवद बुदते कीतोम इन्जि, मावा जीवा वेहतह्‌ता, कासा इतेके मीवा संगे ताकिह्‌पा. इदिना लोप्पा माट पोग़यिह्‌नोम. मति अमेसा माट देवुळता देय्वाते कीतोम, मन्कना बुदते आयो.

2 कुरिंततोर 4:2

मति इद्रम कीय्ह्‌नोम: मकिस मकिस लजा वानाह कीयनव कबस्कनगा सीता केवोम, सत्रल बुदते ताकोम, देवुळता पोल्‍लोतुन एत्लम मिळ्हच वेहोम, मति देवुळता मुनेह सेतेम पोल्‍लोतुन पङ्ने पोकुर कीय्ह्‌नोम. मावाङ केंजवालोर, ओर सेतेमतोर इनजोर, मावा पोल्‍लोतुन नमिर इन्जि, माट इद्रम ताकिह्‌नोम.

1 तिमोति 1:19

येसुनगा कीतद विस्वसतुन विळ्सवा, नेह्‌ना-लाग्वा पुन्जि ताकनद बुदतुन पोसि, निमा वेहचोर अन. इद्रमता बुदतुन विळ्सिसि, उय्तुर लोकुर तमा विस्वसतुन मुळ्हचीतुर.

1 तिमोति 1:5

ओरिन बाराह्‌कु रोमिह कीयलाह वेहतन इतेके, अगा विस्वसिर जग्ळा-बोबा केवालेवा, गूनमते मनदना गावले. गूनमते मनदना इन्जि, बेसताङ विचर्कु, नेह्‌ना-लाग्वा पुन्जि ताकनद बुदि, ओसो देवुळतगा सेतेमता विस्वस मनदना गावले.

2 तिमोति 1:3

नना देवुळता मुनेह आयि, लोकुरा मुनेह आयि, अमेसा जीवाताहि कसुरलेवप मन्जि, देवुळतुन माळलाह ऊळिह्‌नन. मावाङ तादोर-बाबोर वने, अद्रमलेह्‌काने देवुळतुन माळतोर. ओसो नीक सीता कीयह्‌पा, देवुळतुन नना जोहर कीय्ह्‌नन. नग़्का पिळ्‍विळ पियल-पोळ्‍द पार्तना कीयह्‌पा, माग़्ङवालेवा नीक सीता कीय्ह्‌नन, तिमोति.

इब्रितोर 13:18

माट कसुरलेवप ताकिह्‌नोम इनजोर, मावा जीवा पुन्ह्‌ता. सबे पोल्‍लोने माट देवुळतुह्‌क ओप्पनाह कीयलाह ऊळिह्‌नोम. इदिनेनाह्‌क मयेनाह्‌क पार्तना कीसोर मन्ह्‌टु.

इब्रितोर 9:14

अह इतेके, किर्स्तुना नेतुर बेचोन वीळिस एडिह कीया पग़यह्‌ता! देवुळता अमेसा मनदनद जीवा, ओन तना जीवातुन देवुळतुह्‌क मुर्तिय डागिललेवद मोक ईयनाह कीता. मावा जीवातुन हामुरतके ओसीयनव लाग्वाङ कबस्कनाहि, ओना नेतुर एडिह कीस्ता. कीयनाह्‌कु, माट जीवात मनदनद देवुळतुन माळ पग़यह्‌नल.

1 पत्रु 2:12

देवुळतुन पुनवोरा नडुम मनदह्‌पा, मीटु कसुरलेवपु असल मन्ह्‌टु. ओर मीकु “वेर लाग्वोरे!” इन्जि कसुर तोहतेकाय, मीवा असलता ताकमुळतुन ऊळनुर. ऊळिसि पया पेग़्के ओर इंका देवुळता मोकम ऊळनद दियाते, देवुळतुनु मान ईयनुर.

1 पत्रु 2:15

देवुळता विचर बह मन्ह्‌ता, बुदलेवा मीवा अडम वळ्ह्‌कवालोर, मीवा असलता ताकमुळतुन ऊळिसि, मीवा पोग़ोन कसुर ओपलाह बातय दोर्कवाह्‌कु, केमेन आयना इन्जि.

1 पत्रु 2:19

बोग़ाय कसुर-काय्दालेवा तिपल अरतेके, ओग़ु देवुळ नाक ऊळिह्‌ता, तान सीता कीसि, अद तिपलतुन दीरा पोसि आपतेके, ओना पोग़ोन देवुळि गिर्दा आस्ता.

1 पत्रु 3:21

अद पोल्‍लोता लेह्‌काने, इंजेके (मीटु विस्वसिर आतिर अस्के,) येसुना पेदिरते एग़ मीताह्‌कु, बेद लावते देवुळि येसु किर्स्तुनु हामुरताहि जीवा अर्ह्‌ता, अदे लावते मीट पिसिह्‌निर. इद बेद्रमता इतेके, मेंदुदा माच एडग़ा इनजोरे, मीयनद आयो; मति नावा जीवा कसुरलेवप आयि इन्जि, पूरा जीवाताहि देवुळतुन ताल्ह्‌कनद आंदु.

1 पत्रु 4:4

इंजेक मीवा पाळ्ना गोततोर, इद्रमताङ लाग्वाङ कबस्कने, मीट ओरिह्‌क संग आयवाह्‌कु, बयल आस्तोर. अदिह्‌के ओरु बह इतेक अह वळ्ह्‌कना, कूदिङ दायना कीस्तोर.