1 कुरिंततोर 4:6 - माडिया गोंड पवित्र सास्त्रम

⁶ मावोर विस्वसिरिर! सास्त्रमते रासतव पोल्‍लोह्‌कु वीळिस दायनद आयो इनजोर इन्ह्‌तोर. इद पोल्‍लोता अर्तमतुन मीट कग़यना इन्जि, नना अपुलोसना ओसो नावा लोप्पाडाङ पोल्‍लोन पोग़ोन रासिस तोहतन. अव पोल्‍लोन बेस केंजतिर इतेके, माट सेवकिरग्डाहि ओर्विना लोप्पा बार पोग़यना, दुस्रोना बार कदर रेहतना, इद्रम मीट केविर आयकिर.

1 कुरिंततोर 4:6 Iomraidhean Croise

बळयिर 18:24

पया उंद दिया ओर्वोग़ मिसर देसेमता सिकंदरिया सहरते पुटटोग़ु, अपुलोस पेदिरतोग़ यहुदि मन्कल, इपिसुस सहरते वातोग़. ओग़ पका कग़यिस मतोग़, ओसो देवुळता सास्त्रमताङ पोल्‍लोन बेस पुन्ज मतोग़.

बळयिर 19:1

अद्रमे अपुलोस अकाया पटटा कुरिंत सहरतगा मनदह्‌पा, पोलु गलाति पटटाहि पेसिस वानेके, इपिसुस सहरते एवतोग़. एवतस्के अगा ओन्क उच्वुर विस्वसिर कलियतोर.

रोम सहरतोर 12:3

देवुळि नाक देय्वा ईस, तना बळयि इनजोर निल्पिह कीता. अद अदिकरते मियग्डाह ओर्विन-ओर्विन नना वेहतह्‌नन: नना विस्वसते बेरोनन इनजोर पोमाडेङ कीयनदायो, मति देवुळि नाक बेद्रमता बुदि ईता, अदिना इसबते नना बेद्रमतोग़ विस्वसिनन इन्जि, बेसतल बुदते विचर कीम्ह्‌टु.

1 कुरिंततोर 1:12

अद इद्रमि: मीवा मन्कलोरग्डाहि ओर्वोग़ इन्ह्‌तोग़ “नना पोलुनकेडोनन,” ओर्वोग़ इन्ह्‌तोग़ “नना अपुलोसनकेडोनन,” ओर्वोग़ इन्ह्‌तोग़ “नना पत्रुनकेडोनन,” ओर्वोग़ इन्ह्‌तोग़ “नना किर्स्तुनकेडोनन,” इद्रम इन्जि, मीट वळ्ह्‌कलाह आतिर!

1 कुरिंततोर 1:19

इदिना लोप्पा, देवुळि तना सास्त्रमते माक इद्रम वेहतह्‌ता: “बुदतोरोम इनजोर इनवालोर मन्कलोरा बुदतुन बूळे कीकन. तेल्वतोरोम इनजोर वेहवालोरा तेल्वतुन कबळतुह्‌क अरवाह कीकन” इनजोर रासतप लेह्‌कान आता.

1 कुरिंततोर 1:31

अदिनेनाह्‌क मुनेन देवुळता सास्त्रमतगा रासतप लेह्‌कान, बोग़ाय पोग़यना इतेके, सामि तनेनाह्‌क कीतदिन सीता कीस पोग़येग़.

1 कुरिंततोर 13:4

दुस्रोरिन निटम जीवा केवाल, ओराङ तपुल्किन आपसोर मन्ह्‌तोग़, दुस्रोरिन गूनम तोहतह्‌तोग़, दुस्रोरिन कुळ्सा केवोग़, ननाय बेरोनन इनजोर वळ्ह्‌कसोर तिरियोग़, पोमाडेङ केवोग़.

1 कुरिंततोर 3:19

बाराह्‌क इतेके दुनियातोर बेदिन बुदि इन्ह्‌तोर, तान देवुळि बुदलेवद इन्ह्‌ता. तेना लोप्पा देवुळता सास्त्रमतगा इद्रम रासतद मन्ह्‌ता: देवुळि, बुदतोर मन्कलोरिन तमा सत्रल बुदतेने एग़्कनाह कीस्ता, इनजोर रासतद मन्ह्‌ता.

1 कुरिंततोर 3:21

अदिनेनाह्‌क नना मुनेन वेहतप लेह्‌का, नना वेनक्‍केडोनन, नना ओनक्‍केडोनन इन्जि, मन्कलोरा लोप्पा बोग़े पोग़यनद आयो. देवुळि तनाङ सबेटोर सेवकिरिन मीवाय पाय्दातेनाह्‌क ईता.

1 कुरिंततोर 5:2

ओग़ मन्कल अद्रमता कबळ कीतोग़ इनजोर, मीट मुडोर मन्कलोरिर दुकम आसि, ओन मुडग्डाहि पेसिह कीयना मता. मति मीट कोनि पोग़यसोर तिरियलाह आतिर!

1 कुरिंततोर 5:6

मीट इतेके बेसतोर विस्वसिरोम इनजोर पोग़यलाह आतिर, इद ओप्पो. ओय्‍पिह कीतद इचुने पिंडटुन, कोपामेंड नाहतद पिंडटगा काल्ह्‌पतेके, पूरा कोपामेंड पिंडटुन अद ओय्‍पिह कीस्ता इनजोर पुतिर. अद्रमे मीवा मुडगा वग़ोग़ मन्कल पापम कीसोर मतेके, मुडोर सबेटोरिन पापमतगा ओस अर्हतह्‌तोग़.

1 कुरिंततोर 8:1

इंजेके पेन-बोमानेनाह्‌क वाटटव अविना लोप्पा ताल्ह्‌किस मतिर. इद पोल्‍लोता लोप्पा माट बेस-नेह्‌ना पुतोम इन्जि, उच्वुरिर इह्‌निर. अद निटमे मति, माट पका पुतोरोम इनवालोर, माट बेरोरोम इन्जि पोग़यसोर तिरियिह्‌तोर. जीवा केवालोर बारा, दुस्रोरा पाय्दातुन ऊळिह्‌तोर.

1 कुरिंततोर 9:23

बेसता कबुर मतपु नावा ताकमुळ आयि इनजोर, बेसता कबुरतासाटि सबे कीय्ह्‌नन.

2 कुरिंततोर 10:12

उच्वुर तम्क बेचोन बेरोरोम इनजोर, तमाय कबळतुन ऊळिस इन्ह्‌तोर. तमतमाय निच जोकिस ऊळिह्‌तोर, ओसो तम्क बेरोरोम इनजोर इन्ह्‌तोर. अद्रमतोर मन्कलोर तेल्वलेवोर आंदुर. माट कोनि ओरा मुडोरोम आयोम, ओरा संगे निच जोकिस ऊळवालोरोम आयोम. ओरे तेला बेरोर आयिर, माट अचोटोरोम आयोम!

2 कुरिंततोर 10:15

दुस्रोर कीतद कबळतुन, माटे कीतोम इनजोर पोग़यवालोरोम आयोम; मीवा विस्वस बेर्सनेक-बेर्सनेके, मीवा पटटगा मावा सेवा वने पका बेर्सग़ा इनजोर, इद्रम आसा मन्ह्‌ता. मति देवुळि बेचोन अंद ईयग़ा, अचोने कीकोम.

2 कुरिंततोर 10:7

मीवा मोकम मुनेह बेव पोल्‍लोङ दिसिह्‌ताङ, अविना लोप्पा बेस विचर कीम्ह्‌टु. नना किर्स्तुना मन्कनन इनजोर इनवाल मन्कल, तना किर्स्तुना मन्कल आतप लेह्‌कान, माट वने किर्स्तुनोरोम आंदोम, इदिन पुनेग़!

2 कुरिंततोर 11:4

अद बह इतेके, माट मीक येसुना पोल्‍लोतुन पोकुर कीतोम, मति पूनोर मन्कलोर वासि, माट वेहतदिन विळ्सिसि, ओना लोप्पा दुस्राङ पोल्‍लोन पोकुर कीयह्‌पा, बेस केंजतिर! मीट मुने देवुळता जीवातुन दोर्किह कीतिर, मति ओर दुस्रा जीवाता पोल्‍लोतुन वेहनेके, मीट अदे पोल्‍लोतुन नमतिर. माट मीक वेहतद बेसता कबुरतुन विळ्सिसि, ओर वेहतद दुस्रा कबुरतुन बेस केंजतिर! अदिनेनाह्‌क मीट लेसतिरा बहु इनजोर रेयतन.

2 कुरिंततोर 12:19

मयगा कसुर इले इन्जि, मीक तोहतलाह इचोन वेहतोम इनजोर, विचर कीय्ह्‌निरा? अद्रम आयो! माट इतेके देवुळता मुनेह, किर्स्तुना अदिकरते वळ्ह्‌कलाह आतोम. नावा गोततोरिर! माट बाताल कीय्ह्‌नोम, अद सबे मीवा विस्वस बेर्सना इनजोर, कीयलाह आतोम.

2 कुरिंततोर 12:20

बाराह्‌क इतेके, नना मियगा वातस्के, मीक विचर वावदिन नना कीयनाह आयो बहा; नाक विचर वावदिन मीट कीकिर बहा इनजोर रेयतन. इतेके जग्ळम, कुळ्सा, ओङु, कुदता पाय्दा ऊळना, कूदिङ, गुरागुरा वळ्ह्‌कसोर तिरियना, मोर्दोप, रोदा पोयतना, इव पोल्‍लोङ मियगा दिसनुङ बहे इनजोर रेयतन.

2 कुरिंततोर 12:6

नयगा पोग़यलाह वेल्‍लाङे पोल्‍लोङ मन्ह्‌ताङ; अविस्किन पोग़यतेके, नना बुदलेवोनन आयोन आवेनन; सेतेमतोनने आवेनन; मति नना पोग़योन. बाराह्‌क इतेके, नना कीयनव कबस्किन, ओसो वेहतनव पोल्‍लोन, मन्कलोर ऊळिह्‌तोर. अविस्किन ऊळिसि, नना बेद्रमतोनन इनजोर पुनिर, अदे बेसु. मति देवुळि नाक पका बेराङ-बेराङ पोल्‍लोन लेकाते तोहता इन्जि, मन्कलोर नाक मान ईयनद ओप्पो. अदिनेनाह्‌क अविस्कना लोप्पा, नना पका पोमाडेङ कीयनद आयो इनजोर, देवुळि नाक दुकम ईयनद उंद तिपल ईता.देयह्‌कना मुक्याल लोहतपु, इद तिपल नाक अमेसा सिक्सा कीसोरेन मन्ह्‌ता.

2 कुरिंततोर 4:15

इव सबे पोल्‍लोङ मियेनाह्‌के आयलाह आताङ; देवुळता दया वेल्‍लाटोरगा पोकुर आयि इनजोर, आयलाह आताङ. पोकुर आतेक अचोन, वेल्‍लाटोर मन्कलोर देवुळता डीसातेनाह्‌क तान जोहर कीयनुर, अदिनेनाह्‌क वेल्‍लाटोर मन्कलोर देवुळतुन मान ईसि मोळ्किह्‌तोर.

कुलुसितोर 2:18

मीक जोल काग़्हवालोर इद्रम वेहतह्‌तोर, “मावा लेह्‌का तिपलता नोमळ कीयना, पोग़ोटाङ देवतुल्किन मोळ्कना,” इन्ह्‌तोर. इद्रम वेहचि, मीट देवुळता राजेमता लायकतोरिर आयविर इनजोर, मीवा पोग़ोन कसुर ओपलाह एमाटु. अद्रमतोर मन्कलोर इद्रम-इद्रमताङ लेकाङ ऊळतोम इनजोरे, तमाय मन्कना बुदते उगसे पोग़यसोर तिरियिह्‌तोर.

2 तिमोति 2:10

अदिनेनाह्‌क देवुळि आचतोर लोकुरेनाह्‌क, सबे तिपल्किन आपसोर केमेन मह्‌नन. ओर किर्स्तु येसुन विस्वस कीताह्‌कु, देवुळि ओरिन पिसिह कीयि, ओसो ओर अमेसातुह्‌क मनदनद, ताना डीसाता वेह्‌चतगा मनिर इनजोर, इव तिपल्किन आपिह्‌नन.