ईब्‍रीपा 1:2 - ॱलोवा

² हीना दे थामे धी़क्‍याला, खोङबागी राङगी सेगी थोक्‍ने, होराङक्‍याला का ॱनाङ हो़तालाक। धेनी राङगी सेला ॱङोपो घीरीगी खाला ग्‍युज्‍यीन को़वालाक धेनी खोङगी थोक्‍नेराङ जीक्‍तेन खाम घीरी को़ जेपालाक।

ईब्‍रीपा 1:2 Iomraidhean Croise

मेथा 13:39

धेनी युक्‍पु ताप्‍कीन डागो धी़क लाक। लोदोक धुगीन धी़चो़गो थागी धी़चो़ लाक। धेनी ॱङागीनक्‍या नाम्‍खे भाङछेनक्‍या लाक।

मेथा 17:5

पेटोगी लाब ताङी-ताङी, खोङबाक्‍याला ॱरीङबा काउ च्‍यीकगी ढीम्‍बालाक। धेनी ॱरीङबा साङने सुङकेक च्‍यीकगी देरे सुवालाक, “दे नी ङी चेवे से हीन। दीमुला ङा ॱमीच्‍यीकी ङ्यामो घा हो़क। खोङला ङेन।”

मेथा 21:38

हीना होदे बोक्‍माला लेन्‍गीनक्‍याई भीजागोला थोरी देरे ॱनेवालाक, ‘दे नी ग्‍युज्‍यीनगो लाक। स्‍योक, खोला सेदी खी़ थोप्‍ताङगो होराङ ठोउ।’

मेथा 26:63

हीना येशुगी घीया ॱमासुवालाक। धेनी चो क्षो़पो़नगी खोङबाला ॱनेवालाक, “ङा को़न्‍क्षोक सो़न्‍पोला ॱना क्‍यारी ॱनाहीन, ख्‍यो़ को़न्‍क्षोकगी से मास्‍यीकागो हीने, हेक्‍याला स्‍यो़क?”

मेथा 28:18

धेनी येशु खुङक्‍याचारु फेप्‍ती सुवालाक, “ॱनाम्‍सा ॱङीगी वाङ घीरी ङाला ॱनाङ हो़तालाक।

मेथा 3:17

धेनी नाम्‍खाने सुङकेक च्‍यीकगी, “दे ङी चेवे से हीन। ङा खी़मुला ॱमीच्‍यीकी ङ्यामो घा हो़क।” सुरी सुवालाक।

मारकु 1:1

को़न्‍क्षोकगी से, येशु मास्‍यीकागी ताम्‍शाङ गो चुक्‍पा।

मारकु 12:6

“धा खोला भीजा ढीन्‍चेन च्‍यीक हो़तालाक। धेनी ‘खुङक्‍याई ङी भीजाला घुस्‍याप झ्‍यीगीलाक।’ साम्‍दी, खी़ भीजागो झावालाक।

मारकु 12:7

“हीना होदे श्‍यीङबाक्‍याई च्‍यीकगी च्‍यीकला ॱनेवालाक, ‘दे नी दाक्‍पोगी भीजा ढोङबा आङगीनगो लाक। स्‍योक, देला सेदु धेनी ग्‍युनोर घीरी होरी झ्‍युङगीलाक।’

योहान्‍ना 1:10

कागो जीक्‍तेनदु श्‍युक हो़तालाक धेनी जीक्‍तेन खोङबागी थोक्‍ने को़वालाक हीना जीक्‍तेनगी खोङबाला ङो ॱमास्‍येवालाक।

योहान्‍ना 1:14

धेनी कागो ली़ला ग्‍युर धेनी होराङमुला श्‍युक। खोङ नी, थुक्‍जे धाङ धेन्‍पागी खाङ हो़तालाक। खोङगी शीजे, याप को़न्‍क्षोकने हीन्‍गीन से च्‍यीक्‍पोगी शीजे, होरी ज्‍यावालाक।

योहान्‍ना 1:3

घीरी खोङगी थोक्‍ने झ्‍युवालाक धेनी झ्‍युजा घीरी, खोङगी थोक्‍ने माना माझ्‍युवालाक।

योहान्‍ना 13:3

येशुगी यापगी दो़न घीरी, खोङगी लाकला ॱनाङ हो़गीन धाङ को़न्‍क्षोकने होवा धाङ को़न्‍क्षोकगी डुङदु लोकग्‍यु हीन्‍गीनगो खेन्‍बालाक।

योहान्‍ना 13:32

को़न्‍क्षोक खी़ थोक्‍ने शीजेला ॱङो़न जेहो़ना, को़न्‍क्षोकगीयाः राङगी थोक्‍ने, खोला शीजेला ॱङो़न जेगीलाक धेनी लाम्‍साङ खोला शीजेला ॱङो़न जेगीलाक।

योहान्‍ना 15:15

धा देने ॱहाला ङा खेक्‍याला ॱयोक्‍पो ॱनामेन घीझ्‍येरी ॱनाना पो़न्‍पोगी घी झ्‍यीगीनगो ॱयोक्‍पोगी ॱमेस्‍येलालाक। हीना ङा खेक्‍याला छो़ढोक ॱनाहीन घीझ्‍येरी ॱनाना यापने ङी घी जाज्‍या घीरी ङी खेक्‍याला स्‍येहो़क।

योहान्‍ना 16:15

यापला हो़गीन घीरी ङाराङगी हीन होझ्‍येरी थुक्‍ङीगी, ङी हीन्‍गीनगो लेन्‍दी खेक्‍याला तो़न्‍दा जेगीलाक, ॱनेरी ङा स्‍येदाहीन।

योहान्‍ना 17:2

घीझ्‍येरी ॱनाना खेराङगी सेला ॱनाङना घीरीला, खोङगी थामेपे छेसोक ॱनाङयेला, खेराङगी सेला मी घीरीगी खाला वाङ ॱनाङ हो़तालाक।

योहान्‍ना 3:16

“घीझ्‍येरी ॱनाना को़न्‍क्षोकगी जीक्‍तेनगी मीक्‍याला देरे झाम्‍पा जेदी, खोङगी राङगी से च्‍यीक्‍पोगो ॱनावालाक। धेनी होझ्‍येरी खोङबाला धेपा झ्‍यीगीन सुवा, मेताला डोगीमालाक हीना थामेपे छेसोक थोप्‍कीलाक।

योहान्‍ना 3:25

धा चाङमा झ्‍यीगीन ॱरोगी कोरला योहान्‍नागी ङेनेक्‍याने, रीङगा धाङ याहुदापा च्‍यीकगी घुङला ढो़लीङ स्‍योरपालाक।

योहान्‍ना 5:26

घीझ्‍येरी ॱनाना याप राङला छे हो़गीन च्‍योक्‍रे, खोङबागी सेलाः छे ॱनाङयेगी वाङ जेपालाक।

योहान्‍ना 5:27

धेनी यापगी खोङला ठीम चेयेगी आङजा ॱनाङ हो़तालाक घीझ्‍येरी ॱनाना खोङबा मी-भु लाक।

योहान्‍ना 9:29

को़न्‍क्षोकगी मोशेला कामो़न सुङगीनगो हेक्‍याला स्‍येयेहो़क हीना दे मी दे घाने हुङगीनगो हेक्‍याला स्‍येयेमेक।”

जेपा 10:36

येशु मास्‍यीकागी थोक्‍ने, को़न्‍क्षोकमुला श्‍यीदे हो़गीन ताम्‍शाङ दे, को़न्‍क्षोकगी ईस्‍राएल्‍पाक्‍याला ॱनाङना का दे, खेराङक्‍याला क्षा हो़तालाक। धेनी येशु मास्‍यीका घीरीगी चोवो लाक।

जेपा 2:17

को़न्‍क्षोकगी सुङालाक, ‘थामागी ङीमाक्‍याला, ङा मी घीरीगी खाला ङी थुक्‍ङी तेरयेहीन, धेनी खेक्‍याई भीजा-भोमोक्‍याई ॱङो़न स्‍येगीलाक, ख्‍योक्‍तोङक्‍याई थोङनाङ थोङगीलाक, धेनी घेबो-घेमोक्‍याई ॱमीक्‍लाम ॱमीक्‍कीलाक।

रोमापा 1:4

येशु मास्‍यीका होरी चोवो नी, छीवाने ॱलार सो़न्‍पो श्‍याङा जेदी, धाम्‍पे थुक्‍ङीगी गोने नी़थुगी नाङ को़न्‍क्षोकगी से को़वालाक।

रोमापा 8:17

धेनी होराङ से धाङ सेमो हीन्‍ना, होराङ ग्‍युज्‍यीनगोवाः लाक। होराङ को़न्‍क्षोकगी ग्‍युज्‍यीन धाङ मास्‍यीकामुला ग्‍युज्‍यीनगी रोवा लाक। धेनी होराङ मास्‍यीकामुला दुक्‍पु ङ्याङना, खोङगी शीजेगोवाः मुला घो़ये राक्‍कीलाक।

१ कोरीन्‍थुपा 2:7

हीना साङवादु बेरी श्‍याकश्‍या को़न्‍क्षोकगी स्‍येराप दे हेक्‍या स्‍येदाहीन। स्‍येराप दे नी, जीक्‍तेन ॱमाको़ एन्‍लानेराङ, हीकी शीजेगी क्षीला को़न्‍क्षोकगी को़वालाक।

१ कोरीन्‍थुपा 8:6

हीना होरी क्षीदु याप को़न्‍क्षोक च्‍यीका हो़तालाक। खोङने राङ ॱङोपो घीरी झ्‍युवालाक धेनी खोङगी क्षीदुराङ होराङ छोवा क्‍यालालाक। धेनी चोवो च्‍यीक नी, येशु मास्‍यीका लाक धेनी खोङगी थोक्‍ने ॱङोपो घीरी झ्‍युवालाक धेनी खोङने होराङ छोवा क्‍यालालाक।

गालातीयापा 4:4

हीना धी़चो़ ताक्‍तागो होसारती, को़न्‍क्षोकगी राङगी से ताङा जेपालाक। धेनी क्षो़ठीमगी होकदु हो़गीन, होराङक्‍याला थारपा जेये धाङ होराङ खोङगी से धाङ सेमो झ्‍युङयेला, खोङबा भोमो च्‍यीकने क्षो़ठीमगी होकदु ठुङवालाक।

एफीसुपा 1:10

धेनी खोङबागी थुकोङगी धी़ तीक-तीकगो भावी घाङला, ॱनाम्‍सा ॱङीला हो़गीन घीरी च्‍यीकदु मास्‍यीकागी वाङला धी़ये लाक।

ईब्‍रीपा 1:5

को़न्‍क्षोकगी नाम्‍खे भाङछेनक्‍याने सुलाः देरे नामा सुङा माजे हो़तालाक, “ख्‍यो़ नी ङी भु लाक। धीरीङ ङा ख्‍यी़ याप झ्‍युङ हो़क।” धेनी याङ “ङा खी़ याप झ्‍युङयेहीन धेनी खो ङी भु झ्‍युङगीलाक।”

ईब्‍रीपा 1:8

हीना सेगी कोरला खोङबा देरे सुङालाक, “के को़न्‍क्षोक खेराङगी श्‍युक्‍ठी, धी़ तेन्‍दु ॱनेलालाक धेनी खेराङगी राङगी ग्‍यासी, ठीम ढाङपो गोने ठीम चेदालाक।

ईब्‍रीपा 11:3

धेपागी गोने जीक्‍तेन खाम घीरी, को़न्‍क्षोकगी कागी थोक्‍ने को़वालाक ॱनेरी, होराङ ॱहाघोरालाक। होझ्‍येरी ॱमीकगी थोङगीनगो, थोङ ॱमीथुक्‍कीनगी गोने को़वालाक।

ईब्‍रीपा 2:3

धा होरी देरे थारपा क्षेला दो़नाङ ॱमेतेरना, होराङ घाङगी झ्‍येरी थारये? थारपा दे गोमागो चोवो राङगी सेटाक जेपालाक धेनी खोङने ङेन्‍गीनक्‍याई, होराङक्‍याला होदेगी धेन्‍पाङ झ्‍येवालाक।

ईब्‍रीपा 3:6

हीना मास्‍यीका नी, को़न्‍क्षोकगी नाङमी खाला से च्‍योक्‍रे ॱलोते छोक्‍पा हो़तालाक। धा होरी रेवाला होराङ ॱङीङक्षे झ्‍ये धेनी ॱलोते तेन्‍पो श्‍याक्‍ना, होराङ को़न्‍क्षोकगी नाङमी लाक।

ईब्‍रीपा 4:14

होझ्‍येरी नाम्‍खे श्‍यीङखामदु फेया जेगीन, को़न्‍क्षोकगी से येशु होरी चो क्षो़पो़न झ्‍युजा झ्‍येरी, होराङक्‍या राङगी खेलेन झ्‍येजा धेपागोला तेन्‍पोमा ॱरुङघो़।

ईब्‍रीपा 5:8

खोङबा से झ्‍येरीयाः, राङगी ङ्याङङ्या दुक्‍पुक्‍याई गोने काला ङेन्‍ये ज्‍याङा जेपालाक।

ईब्‍रीपा 7:28

घीझ्‍येरी ॱनाना क्षो़ठीमगी मी क्‍योवाक्‍याला चो क्षो़पो़न को़लालाक हीना धी़ तेनगी क्षीदु फी़न्‍सुम छोक्‍पा जेजा, को़न्‍क्षोकगी सेला क्षो़ठीमने श्‍युकला होवा उ ॱनागी कागी थोक्‍ने, खोङबाला चो क्षो़पो़न को़ जेपालाक।

ईब्‍रीपा 7:3

खोङगी आकी धाङ आमा धाङ रीग्‍यु धाङ केगीनगी धी़ याङना ढोङगीनगी धी़गी कोरला घीयाः मेतालाक। हीना खोङ नी, को़न्‍क्षोकगी से च्‍योक्‍रे, धी़ तेनगी क्षो़पो़न लाक।

ईब्‍रीपा 9:26

देरे मेन्‍ना जीक्‍तेन को़ने ॱहाला, खोङबागी याङ-याङ दुक्‍पो ङ्याङ घोये हो़तालाक। हीना खोङबा राङगी ॱमारछो़गी थोक्‍ने, धीक्‍पा घीरी सेयेगी क्षीला, थेङ च्‍यीक्‍लाराङ घीरीगी क्षीदु दे धी़गी थाला ॱङो़न जेपालाक।

१ पेटो 1:20

जीक्‍तेन ॱमाको़ एन्‍लाराङ मास्‍यीकाला दामा जेपालाक हीना खेक्‍याई क्षीदु थामे धी़ला खोङबा ॱङो़न्‍दा जेपालाक।

२ पेटो 3:3

गेक्षेस्‍योकगो खेक्‍याई दे ॱहाघोरा झ्‍यी, थामे ङीमाक्‍याला क्षाले ग्‍याप्‍कीनक्‍या, धेन्‍पागोला क्षाले ग्‍याप्‍ती राङगी दो़क्षाकगी स्‍याबाला डारी हुङगीलाक।

युदा 1:18

खुङक्‍याई खेक्‍याला ॱनेवालाक, “थामे ङीमाक्‍याला, राङगी क्षोमेगीन दो़छाकगी स्‍याम्‍ला डारी, चोवोला छाले ग्‍याप्‍कीनक्‍या हुङगीलाक।”