एफीसुपा 5:8 - ॱलोवा

⁸ घीझ्‍येरी ॱनाना काब च्‍यीकला खेक्‍या मी़नाक नाङ हो़तालाक हीना धान्‍दा, चोवोगी नाङ खेक्‍या हो़ नाङदु हो़तालाक। हो़गी टुवाक्‍या च्‍योक्‍रे मीछे क्‍यो़।

एफीसुपा 5:8 Iomraidhean Croise

मेथा 3:8

धीक्‍पा पारी सेम ग्‍युरवाला थी़न्‍गीन ढेबु के।

मेथा 4:16

मी़नाक्‍पाला धेता मीक्‍याई हो़ क्षे च्‍यीक थोदुक, धेनी छीवे ढीम्‍जाकगी युला धेगीन मीक्‍याला, हो़ च्‍यीक स्‍यारदुक।”

लुका 1:79

धेनी मी़नाक्‍पा धाङ स्‍यीवे ढीम्‍जाकला धेगीनक्‍याला थारवे हो़क थोप्‍कीलाक, धेनी होराङला श्‍यीदेगी लामला ठीक्‍कीलाक।”

लुका 16:8

धा दाक्‍पोगी़ होदे ॱङेरपा मेढाङाला राङगी क्षीला, देरे चाङग्‍यु झ्‍यीगीनगोला तो़टा तावालाक। घीझ्‍येरी ॱनाना दे जीक्‍तेनगी मीक्‍या राङगी च्‍योक्‍रेक्‍यामुला चाङग्‍यु झ्‍यीयेला, हो़गी टुक्‍याने खेवा हो़तालाक।

योहान्‍ना 1:9

मी घीरीला हो़ ॱनाङगीन, धेन्‍पे हो़गो जीक्‍तेनदु फेई हो़तालाक।

योहान्‍ना 12:35

येशुगी खुङक्‍याला सुवालाक, “हो़ दे खेक्‍याई मुला धी़ तुङ-तुङ च्‍यीक ॱनेगीलाक। मी़नाकगी वाङ होकदु ॱमीछी़येला, हो़ हो़ती घाङलाराङ थारा झ्‍यी। मी़नाकगी नाङला डोगीनगी़ घारु डोगीनगो ॱमेस्‍येलालाक।

योहान्‍ना 12:36

हो़ हो़ती घाङलाराङ, खेक्‍या हो़गी से धाङ सेमो झ्‍युङयेला हो़गोला धेपा झ्‍यी।” येशुगी दे सुङसारती खोङबा होदेने फेप्‍ती, खुङक्‍याने हीप्‍ती श्‍युक्‍पालाक।

योहान्‍ना 12:46

ङाला धेपा झ्‍यीगीनक्‍या मी़नाकगी नाङदु ॱमीली़येला, ङा हो़ झ्‍युरी जीक्‍तेनदु होवाहीन।

योहान्‍ना 8:12

येशुगी धाब्‍ले खुङक्‍याला सुवालाक, “ङा नी जीक्‍तेनगी हो़ हीन। ङी स्‍याबाला डागीनक्‍या मी़नाक नाङला मेडोगीलाक हीना छेगी हो़ थोप्‍कीलाक।”

जेपा 17:30

एम्‍मा-एम्‍मा मीक्‍याई को़न्‍क्षोकला ङो ॱमेस्‍येगीन धी़चो़गो, को़न्‍क्षोकगी या माझ्‍येवालाक हीना धान्‍दा खोङबागी मी घीरीला राङ-राङगी धीक्‍पाला ग्‍यो़पा झ्‍येरी, खोङबा स्‍योकला लोक ॱनेरी का ॱनावालाक।

जेपा 26:18

ङा ख्‍यो़ला खुङक्‍याई ॱमीक पेरी, खुङक्‍याला मी़नाक्‍पाने हो़क स्‍योकला ठीक्‍ती हुङये धाङ धी़कगी आङजाने को़न्‍क्षोक चारु ठीक्‍ती हुङयेला झाङाहीन। धेनी ङाला धेपा झ्‍येरी, खुङक्‍याला खोरी धीक्‍पागी घोङपा राक्‍कीलाक धेनी खुङक्‍यालाः को़न्‍क्षोकगी मीक्‍यामुला धेये राक्‍कीलाक।’

रोमापा 1:21

घीझ्‍येरी ॱनाना मी देक्‍याई को़न्‍क्षोकला ङोस्‍येरीयाः, खोङला पु घो़गीन कुरतीगो ॱमापुवालाक धेनी काटीन्‍क्षे गोवाः माश्‍यी़वालाक। हीना खुङक्‍याई साम्‍लो ताङदाङगो, क्षोमेगीन धाङ खुङक्‍याई ॱलेन्‍दा सेमगो मी़नाकगी खावालाक।

रोमापा 13:12

धा छेन जोक्‍टो दुक धेनी ङीनगो ॱलेप्‍सादुक। होझ्‍येरी मी़नाक्‍पागी लेगा भोरती, होराङ हो़गी गोठापक्‍या घो़न्‍घो।

रोमापा 2:19

धेनी क्षो़ठीमने ख्‍यो़ला स्‍येराप धाङ धेन्‍पा छाङगो थोप हो़गीनगी साम्‍लो झ्‍येरी, ख्‍यो़ राङला श्‍यारागी लाम्‍तो़न धाङ मी़नाकला हो़गीनक्‍याई हो़क धेनी ॱलेन्‍दागी ॱलोपो़न धाङ ॱनाटो ॱमाङ्येङ्याक्‍याई घेगेन हीन ॱनेरी, ख्‍यो़ तेन-तेन हो़ना,

१ कोरीन्‍थुपा 1:30

मास्‍यीका येशुगी नाङ खेक्‍या हो़गीन दे, को़न्‍क्षोकगी झ्‍येरी लाक। धेनी मास्‍यीका नी, होरी दो़नला को़न्‍क्षोकने होरी स्‍येराप धाङ होरी ढाङतेन धाङ होरी धाम्‍पा धाङ होरी थारलाम झ्‍युवालाक।

२ कोरीन्‍थुपा 3:18

धेनी होराङ दोङकेप स्‍युस्‍याक्‍याई चोवोगी शीजेला मेलोङ च्‍योक्‍रे तो़न्‍दालाक धेनी शीजे देले ल्‍हाक शीजे क्षेला, होराङक्‍या खोङबा च्‍योक्‍रे झ्‍युङयेला ग्‍युरती डोवालाक। शीजे दे नी, थुक्‍ङी हीन्‍गीन चोवोने हुङालाक।

२ कोरीन्‍थुपा 4:6

येशु मास्‍यीकागी श्‍यालला ज्‍यागीन को़न्‍क्षोकगी शीजेगो होरी स्‍येलास्‍योक ॱनेरी, “मी़नाक नाङ हो़ झ्‍युङास्‍योक” सुरी सुङगीन, होरी को़न्‍क्षोकगी हो़ दे, होरी सेम नाङदु स्‍यारतु जेपालाक।

२ कोरीन्‍थुपा 6:14

धेपा मीझ्‍यीगीनक्‍यामुला ॱङ्यास्‍यीङ ॱमाखुर। घीझ्‍येरी ॱनाना ढाङाक्‍याई मुला मेढाङाक्‍याई, ढेवा घी हो़तालाक से? याङना मी़नाकमुला हो़गी ढेवा घी हो़तालाक से?

गालातीयापा 5:25

धा होराङ धाम्‍पे थुक्‍ङी थोक्‍ने मीछे क्‍याना, धाम्‍पे थुक्‍ङीला थी़न्‍दी डो घो़गुलाक।

एफीसुपा 2:2

होदे घाङला खेक्‍या जीक्‍तेनगी लुक्‍सो़ ङेन्‍पाक्‍या ॱरुरी, बारनाङ खामगी नी़थुक्‍याला वाङ झ्‍यीगीनला चीरी, हुरे मीछे क्‍यालालाक। धेनी सेम्‍ङी देराङ धान्‍दा को़न्‍क्षोकगी काला मेङेन्‍गीन, मीक्‍याई खाला वाङ झ्‍यीदालाक।

एफीसुपा 4:18

धेनी खुङक्‍याई सेम ग्‍योङागी केनगी, खुङक्‍या नाङ हो़गीन तीमुकगी झ्‍येरी, खुङक्‍याई स्‍येयो़न मी़नाकगी तुम हो़तालाक धेनी को़न्‍क्षोकगी छेने खा ढा हो़तालाक।

एफीसुपा 5:2

धेनी मास्‍यीकागी होराङला झाम्‍पा जेदी, राङगी ॱरोक होरी क्षीला को़न्‍क्षोकगी डुङदु ढीस्‍यीमगी क्षो़पा धाङ ॱमारछो़ च्‍योक्‍रे झ्‍युरी, ॱलो़ ताङ जेगीन च्‍योक्‍रे, खेक्‍या झाम्‍पागी नाङने मीछे क्‍यो।

एफीसुपा 6:12

घीझ्‍येरी ॱनाना होरी ॱमाक्‍ठुक नी स्‍याठाकगी मीमुला मालाक हीना पो़न्‍रीकक्‍या धाङ वाङ झ्‍यीगीनक्‍या धेनी जीक्‍तेन देगी मी़नाकगी वाङ झ्‍यीगीनक्‍या, धाङ नाम्‍खाक्‍याला हो़गीन ङेन्‍पागी सेम्‍ङीगी ॱमाक्‍मीक्‍यामुला लाक।

कोलोसेपा 1:12

धेनी हो़गी ग्‍यासी नाङदु धाम्‍पे मीक्‍याई, नोरकाला थोप्‍ताङ थोप्‍येगी ढाडा जेगीन, यापला खेक्‍याई काटीन्‍क्षे श्‍यी़वास्‍योक ॱनेरी, हेक्‍या ॱमो़लाम ग्‍यावीहो़क।

कोलोसेपा 1:13

को़न्‍क्षोकगी होराङला मी़नाकगी वाङने थारपा जेदी, राङगी चेवे सेगी ग्‍यासी नाङदु होराङला ठीया जेपालाक।

तीतोस 3:3

थेङ च्‍यीकला होराङक्‍याः ॱलेन्‍पो धाङ खाला मेङेन्‍गीन धाङ गो खोरती धेता धाङ दो़पा धाङ दो़ङेन ॱनाछोकगी वाङदु स्‍योरस्‍या धाङ ॱमीच्‍यीकी ङेन्‍पा धाङ ठादोकगी, खाङखा हो़तालाक। मी घीरीगी होराङला दाङा झ्‍येवालाक धेनी होराङ नाङदु च्‍यीकगी च्‍यीकला दाङा झ्‍येवालाक।

१ योहान्‍ना 1:7

हीना खोङबा हो़क नाङला हो़गीन च्‍योक्‍रे होराङक्‍या हो़क नाङला ग्‍युक्‍ना, होराङक्‍या च्‍यीकगी च्‍यीक नाङदु थी़न्‍डील झ्‍युङालाक धेनी खोङबागी से येशुगी कुठाकगी होराङक्‍याला, धीक्‍पा घीरीने चाङमा जेदालाक।