Likunula 3:10 - KITABU KITAKATIFU

¹⁰ Kigira walinda lilaga liange nuwikuzira ndakulinda mu ing'inga yo kogerizwa yiza ku lirova liosi kogeriza yavo avamenyaa mulio.

Likunula 3:10 Iomraidhean Croise

Isaya 24:17

Uvutihizi, ovogo nimitego vimulindiliraa, O, munyi avamenyaa ku lirova.

Danyeli 12:10

Avandu vanyingi valakitakase kandi valakekole kuva valungi kandi vasiyiku, navuzwa vandu vachamu valakakole vuchamu, kandi sialakaveho mundu muchamu ulakamanye mba. Navuzwa vandu vageri veng'ine nivo avalimanya.

Zekaria 13:9

Ndakagerizi kiduma chakavaga kilihononoka, kandi ndavatakase kuli ifeza isiyangwa mu kisambiru chu muliru. Ndavagerizi kuli izahabu isiyangwa mu kisambiru chu muliru. Maku valakasaale ku inzi, na inzi ndakavativuliri. Ndakavavoolere ndi vaveeye avandu vange, navo valakiyame ndi inzi mbeeye Nyasaye wavo.”

Matayo 24:14

Ekeheri ni kikiri kuduuka, Ivangeri yu Vwami vwa Nyasaye iliilwazwa mu lirova liosi eve ekelolero ku zihiiri ziosi, maku keheri kilakaduuki.

Matayo 26:41

Muhenze kandi musaale gase Setani alamugeriza. Umwoyo gwenyaa, navuzwa umuviri goveeye umudedekere.”

Matayo 6:13

Utakuhila mu magerizu mba, navuzwa ukutulizi mu kigira uvwami, ni zinguru ni vivio, mihiga ni mihiga’

Marko 14:9

Muvooleraa, hoosi mu lirova ahi Ivangeri ya Nyasaye ilakilwazwe, kekolwa chu mukali uyu akoli yiki kilakavolwe ku mwizulizaa.”

Luka 2:1

Mumadiku yago lilago liatura ku Kaisaria Agosto ndi avandu vosi vang'odwi amita mu kivala choosi chamiifa na Varumi.

Yohana 17:6

Mali kokora ivi, umanyekane ku avandu yavo ava wamba kutura ku avumukivala. Yava vaali avandu vovo, na ivi wamba vave avange; navo vagumiyi likuva liilio;

Varumi 1:8

Ndanga kusandiza Nyasaye wange kuvitira mu Yeso Kristo kigira munyi mwosi, avandu vanyingi mu lirova liosi vamali kuhulira amakuva gi lisuuvira lienyu.

1 Vakorintho 10:13

Magerizu ga mwanyoola gaveeye ga kazozo ku vandu. Navuzwa Nyasaye aveeye umusuuvirifu kulinda lisuuviriza lilie, naye sialamuleka mugerizwe kuvita zinguru zie liekuzira lienyu mba; ing'inga ya magerizu, alamuha vunyali vwu kwikuzira kugo, kandi inzira yukwilukira mu.

Vafeso 6:13

Kigira yaga, mwiviki viuma viosi via Nyasaye, muduuki kunyala kuhingira uvulwani vwu musigu mu madiku madamanu kandi nimumaliyi kulwaana kuduuka ku keheri, mulasingira vudinyu.

Yakobo 3:12

Avaamitu vange, umusaala gwu umukuyu sigunyala kwama mizeituni mba; anoho muzabibu sigunyala kwama amakuyu mba. Kandi kidaho kilulu sikinyala kusinuka amazi malahi mba.

1 Petro 4:12

Avalina avayaanze vange, mutagenya ku ligerizwa lilulu lia musaliranga kuvikwa mu muliru, kuli keveeye ikindu ekegeni chekoleka ku munyi mba.

2 Petro 2:9

Kulwayago, Mwami amanya kuli anyala kohonyia avandu valungi kutura mu ligerizwa liavo, nu kuhaana mageri ku vandu, vachamu kuduuka Lidiku lie Likalaga,

Likunula 1:9

Inzi Yohana, amwavo winyu kandi kuli umulondi wa Yeso, mbeeye umusangi harara ni munyi, muliekuzira ku uvusaliri vuduuka ku yavo vosi avaveeye mu vwami vwa Nyasaye. Inzi ndaavoherwa mu kisulu cha Patimo kigira ndilwaza likuva lia Nyasaye kandi agiligali ga Yeso yambulira.

Likunula 11:10

Avandu vamenya mu lirova, valayanzizwa nu kusangara ku likuza liavo kandi valahaanilana vihaanwa kigira avaporofeti vaviri yavo avaleeta uvusaliri ovonene ligali ku avandu vamenya ku lirova.

Likunula 13:10

Mundu wenyaa kugumirwa, alagumirwa. Mundu wenyaa kwitwa nikivavi kuduuka yitwi ni kivavi. Yili nililangwa liu kwikuzira kandi liu kusuuvira kolovega lwa vandu va Nyasaye.

Likunula 13:14

Chagaada avandu vosi avamenyaa mu lirova kuvitira ku vilolekizu viachavugilirwa kokora imbiri wi king'ang'a chu kutanga. Iking'ang'a yicho chavoolera avandu vakelombere ikifananyi kuhaana luyali ku king'ang'a chaali ni zimbala zie kivavi iziali zinyala kuchita navuzwa si chaakuza mba.

Likunula 13:8

Avandu vosi avamenyaa mu lirova valakisigamira, nivatali avamita gaavo gang'odwa mu kitabu chi livamwoyo chu Mwana wi Ligondi witwa; kutura lirova nilikikiri kolombwa.

Likunula 14:12

Yivu nivwo uvwikuziri vwa vandu va Nyasaye avagumira amalago geege ni lisuuvira lia Yeso,

Likunula 14:6

Ndaalora kandi engelosi yindi nibulukaa hagati hu uvwerefu, na yaali ni Ivangeri yi mihiga ni mihiga ya Nyasaye kwilwaazira vandu avamenyaa mu lirova ku vuli zihiiri, ni zinimi, kandi avandu va amagondo vosi.

Likunula 16:14

Kigira jiveeye roho ja mademoni, ijikolaa vilolekizu. Roho midamanu jivaga yigi jizizaa ku avami vosi vu mu lirova liosi, kuvavuganyia harara kigira uvulwani vwi Lidiku lie Likalaga lia Nyasaye Wuvunyali.

Likunula 17:2

Avami vi lirova liosi vaakora ovoheyi naye, kandi avandu vamenya mu lirova avahambiki kutura ku linwa iwaini yo ovoheyi vwivwe.”

Likunula 17:8

Iking'ang'a cha walola kila chaali mwoyo maziambiri, navuzwa sikeveeye mwoyo kalunu mba. Kandi keveeye ahimbi kutura mu gehena, navuzwa kiladuuka mu lidivizwa. Avandu vamenya ku lirova, ava amita gaavo gatang'odwa mu kitabu chi livamwoyo, lirova nilikikiri kolombwa, valagenya muno ulwa valora king'ang'a yicho chaali mwoyo lulala ulwimbiri na kalunu sikeveeye mwoyo mba. Navuzwa kilaloleka kandi.

Likunula 2:10

Utatia ivindu vienya kukugwira: Henza, ngovolera, Setani aveeye ahimbi kuviika valala ku munyi mu uvuhambe, muduuki kugerizwa; kandi mulava ni lidambizwa ku amadiku likomi. Ove umusuuvirifu ku inzi kuduuka kali ku likuza; nainzi ndakuha itaji yi livamwoyo.

Likunula 3:8

Manyi imiyinzi jijo. Henza, mali kuviika ikiliango ichalamu imbiri woovo, kandi sihaveeye ho nu unyala kukihaana mba. Manyi ndi oveeye ni zinguru zingekeke, na walonda likuva liange, kandi si wayambakana lieta liange mba.

Likunula 6:10

Navo vaalira nu kuhanzuka nu mwoyo umunene nivavoora, “O, Mwami wi zinguru, wu luyali, mutakatifu kandi wi ligali, kuduuka ing'inga ki, ivi ulalindagira uvuli kukalaga nu kuvaanza kisaalia chi liitwa lietu ku vandu avamenyaa mu lirova?”

Likunula 8:13

Lwa lwa ndahenza, ndaahulira indizu, iyaali nibulukaa igulu mwigulu mu uvwerefu, nevoola nu mwoyo umunene, “O, vayaayi! Vayaayi! Kilakave kivi lugano ki ikiliduuka ku yavo avamenyi mu lirova lwi visiliva vie zingelosi vavaga vatigaye vaduukana vakubi.”