Jeremia 7:20 - KITABU KITAKATIFU

²⁰ Kulwayago, inzi Mwami Munene Yahova, ndaviika vutima vwange vululu ku Litembeli yili. Ndaviika kandi ku avandu harara ni zinyama, kali ni misaala harara ni vitagwa viu mumilimi. Vutima vwange vulava kuli muliru gutanyala kusiminywa nu mundu.

Jeremia 7:20 Iomraidhean Croise

2 Avami 22:17

Vamali kondeka kandi vamali kuhaana visiuviliru ku vanyasaye vandi, nandio vamali kuvukiza uvutima vwange ku miyinzi ja vamali kokora. Uvutima vwange vwakiziywi ku Jerusalemi, navwo sivulasiminywa mba.

Isaya 10:17

Nyasaye, uvulavu vwa vandu va Isiraeli, alava kuli umuliru. Nyasaye Mutakatifu wa Isiraeli alagwa olomemo, ulusaamba vindu viosi kali amafwa kandi zindavati mu lidiku lilala.

Isaya 42:25

Kunangwa Yahova yakokola ni kuhulira uvulitu vwu vutima vwivwe kandi nikusalirizwa mu vulwani. Uvutima vwa Yahova vwasamba avandu va Isiraeli kuli muliru. Navuzwa sikwamanya kindu chekoleka mba; kandi sikwayiga kindu kali hakuzu mba.

Isaya 66:24

“Avandu vosi valazia nokohenza ku miviri jakuza jayavo avamala kwibaala ku inzi. Zing'ende zililia miviri jaavo na si zilakuza mba, kandi muliru guvasamba si gulasiminywa mba, kandi valava chu kuvihiliriza ku vandu vosi.”

Jeremia 11:16

Maziambiri ndaavalanga Muzeituni gwa amatu amavisi kandi ugwa makuyu amalahi, navuzwa kalunu, harara ni liatuluruka kuli lie inguba, ndahambiza umuliru mu amatu gagwo kandi ndavunanyia zisia ziagwo.

Jeremia 12:4

Kivala chietu kiluma nuvunyasi kuniara muvuli mulimi kuduuka ing'inga ki? Zinyama na manyonyi vikuza kigira uvudamanu vwa avandu viitu, avavoora, ‘Nyasaye sialola ichakokoola mba.’ ”

Jeremia 14:16

Avandu vavaporofeta ku amakuva yaga, valakitirwi mu inzira ndala nzere. Miviri jaavo jirakasiuvwi mu zinzira zie lidaala linene lia Jerusalemi, kandi sialakaveho nu mundu kali mulala ulakajiyaviri mba. Yaga goosi galakakoleke ku avandu vosi harara na avakali vaavo, avayaayi na avakaana vaavo. Ndakavakole valatungi uvudamanu vwavo aveene.”

Jeremia 17:27

Navuzwa kuduuka vatie nu kulinda. Lidiku lie Lisabato kuva Litakatifu, kandi sigavaduukira kuginga misigo nu kwingira mu virivwa via Jerusalemi ku lidiku lie Lisabato mba. Ni vakora ndio ndahambiza muliru nu kusamba virivwa vie lidaala linene, kandi gulasamba zinyumba ziu vwami ziosi zia Jerusalemi kandi si gunyala kusiminywa mba.”

Jeremia 17:4

Mulaleka kivala cha ndaamuha nu kukihaana ku avasigu vinyu. Ndamukora mu vatumikiri avasigu vinyu mukivala cha mutamanyi kindu kali hakuzu, kigira uvutima vwange voveeye kuli muliru, kandi guladuka nu kusamba mihiga ni mihiga.”

Jeremia 18:23

Navuzwa, Yahova, ivi umanya lilohiza liavo liosi liu mu vwivisu kunzita. Utasamiha uvudamanu vwavo anoho kusamiiha uvwoni vwavo mba. Uvaleke vave muliguutwa kandi uvahe amageri lwa ukikiri nu vutima.”

Jeremia 21:12

O, Ivisukulurwi via Daudi, yaga nigo aga Yahova avoora: Mukore vulungi vuli lidiku ohonyie oyo umali kunuurwa kutura mu zinguru ziavadambizi, gase vutima vwange vulaloleka kandi vulaaka kuli muliru kigira uvudamanu vwamumali kokora. Namusambwe nasialavaho na mulala ulisiminya mba.

Jeremia 42:18

“Yahova, Nyasaye wa avandu va Isiraeli avoora, ‘Kuli uvutima vwange uvululu vwali ku avandu va Jerusalemi, nindio uvutima vwange uvululu vulakave ku munyi niiva mulazia komenya mukivala cha Egebeti. Mulava avandu vu kutihizwa, vokonyegwa kandi vikilaamo. Simulakalole kivala yiki kandi mba.’ ”

Jeremia 44:6

Kulwayago ndaviika uvutima vwange uvululu ku madaala goosi gi Ivuyuda kandi kuzinzira ziosi zia Jerusalemi, kandi nimbambiza muliru kugo. Amadara yaga gaatigala hazwa vugira mundu komenya mugo, kuduuka na Kalunu.

Jeremia 6:11

Uvutima vuvwo kuvo vwaka kandi mu inzi, Yahova sinyala kuvuviika kandi mba.” Maku Yahova yambolera, “Manyia uvutima vwange ku avana muzinzira kandi kuviduma via vasoleri. Avasaza na vakali valahirwa ihale kandi avakulundu sivalahononoka mba.

Jeremia 6:12

Zinyumba ziavo kandi imilimi, navakari vaavo, vilahaanwa kuvandi. Nziza kuhaana amageri ku vandu vikivala yiki.

Jeremia 8:13

“Ndeenya kuviika avandu vange harara kuli umulimi avungiza ligesa lilie harara navuzwa vaveeye kuli mizabibu vugira amakuyu; kali amatu gene gamali kuniara. Kulwayago, mali kuvugilira avageni kuvugura kivala chavo.”

Lisyoma lya Jeremia 4:11

Yahova umali kololekiza vutima vwivwe uvululu. Uhambizi muliru mu Ziyoni ugwasaamba mise jie lidaala.

Ezekieli 22:22

Ndavasalulukizira mu Jerusalemi kuli izahabu isalulukira mumuliru. Maku valamanya ndi inzi, Yahova, mali kuvaha mageri mu vutima vwange.”

Ezekieli 7:12

Ing'inga yiza, lidiku liveeye ahimbi. Avakiranyi vatasangala anoho vatasioma mba, kigira vutima vwa Nyasaye vululu vulava ku vandu vosi.

Ezekieli 7:14

Kisiriva kikubaa ma vuli mundu yetegeka. Navuzwa siaveeye ho kali mulala uzizaa mu liihi, kigira vutima vwa Nyasaye vulava ku vuli mundu woosi keleng'ani.

Danyeli 9:11

Avandu va Isiraeli vosi vaavunaga malago googo kandi vasuura kuhulira aga wavoola. Wavika ku kunyi kilaamo cha ng'odwa mu malago ga Musa mutumikiri woovo kigira kwamala kokora uvwoni.

Kyavalevi 26:28

maku, mu vutima vwange, ndamugirung'ana kandi ndakora amageri ginyu kuva amadamanu ligali haali saba kuvita maziambiri.

Nahum 1:6

Lwaveeye nu vutima, nivwaha unyala kohononoka? Nivwaha unyala kwikuzira ku vutima vwivwe vululu? Aviikaa vutima vwivwe ku vandu kuli lomemo lwu muliru, kandi yatanyia zinyanda imbiri weve.

Zefania 1:2

Yahova yavoola “Nziza kudiviza vuli kindu choosi ku lirova.

Zefania 1:3

Ndakadivizi avandu harara ni zinyama, manyonyi goosi; kandi zisuzi ziosi. Ndakagwihizi vandu vachamu. Ndakadivizi avandu vosi mu kivala. Inzi Yahova mali kovora.

Zekaria 7:12

kandi vaakora mioyo jaavo kuva midinyu kuli lwanda. Ndaali nu vutima ligali kigira sivali vanyara kuhulira miigizu gandatuma kuvitira mu vaporofeti vaali ho kale mba.

Malaki 4:1

Yahova Wuvunyali avoora, “Lidiku lizaa lia vandu veloli kandi vadamanu valisambwa kuli vulimu vwumu. Ku lidiku yilio, valakadodoke kandi kindu si kilakatigale kuvo mba.

Matayo 3:12

Aveeye ne kesesero chiche mumukono gwigwe. Kandi alalaviza oloze lwilwe ligali, nuvuswage alateera mu kedeera, navuzwa umukuzi alagusaamba nu muliru gutasimikaa.”

Likunula 14:10

Ye umwene kandi alanwa iwaini yu vutima vwa Nyasaye imali kuzukwa mu kekombe vugira kuzuganywa nu uvutima vwa Nyasaye! Kandi alasalirizwa nu muliru gwi kibiriti imbiri wi zingelosi avatakatifu kandi imbiri wu Mwana wi Ligondi.