Jeremia 3:24 - KITABU KITAKATIFU

²⁴ Navuzwa lisigamira Baali nyasaye wizisoni, limali kokora kogotizi iviayo ni mitugu kandi navana vayaayi na vakana, nivindu viosi iviavaguuga viitu vanyola muliyinzira vudinyu kutura muzing'inga ziakale.

Jeremia 3:24 Iomraidhean Croise

Jeremia 11:13

Avandu vi Ivuyuda vaveeye na avanyasaye avanyingi kuli vaveeye na amadara amanene, agavaveeye nago, kandi avandu va Jerusalemi valomba uvwali uvunyingi kuli zinzira ziveeye mu madaala manene nu kuhaanira ku visiuviliru ku Baali, nyasaye wu kuvihiliriza?

Jeremia 22:21

Yahova yamoloma ku munyi ing'inga ya mwali ni mwagasizwa, navuzwa mwasuura kuhuliriza. Mwakora yaga mulimenya lienyu liosi, simwali munyala kutia Yahova mba.

Jeremia 44:7

“Kunangwa, Inzi Yahova Wuvunyali, Nyasaye wa avandu va Isiraeli, kalunu muteeva ndi, kigira ki mwekolelaa munyi aveene vindu vidamanu kuli yivi? Mwenya koleta lidiviza ku avasaza na avakali, avana vasoleri kandi avana avadoto, kunangwa mundu ku avandu vinyu avuli kutigala?

Jeremia 8:16

Avasigu viitu vadukikale mu lidaala linene lia Dani; kuhuliraa lihuuma lie zibarasi ziavo. Kivala choosi kedegeraa lwi zibarasi ziavo zifuumaa. Avasigu viitu vazi kudiviza kivala chietu kandi ni vindu viosi viveeye mu, lidaala lietu linene harara na avandu vamenyi mu.”

Jeremia 9:18

Avandu vavoola, “Vavooleri vakole vwangu vakwimbiri zinyimbu zielikuza, kuduuka lwizimoni zietu zizura maliga, kandi kuduuka lwi zimoni zietu ziituruka maliga. ”

Ezekieli 16:19

Ndaamuha viukulia: Uvusie vulahi ligali, maguta gumuzeituni, kandi uvwuki, navuzwa mwavihaana kuli visiuviliru konyoora liyaanzilira lie vifananyi.” Yaga nigo ga Yahova Wuvunyali avoora.

Ezekieli 16:20

“Maku mwavugula avayaayi navakaana vinyu avamwanzivulira nimuvahaana vave kuli visiuviliru vie chukulia ku ivifananyi. Uvulaya vwinyu sivwaduukana mba?

Ezekieli 16:61

Munyi mwaza mwizurizi kuli mumali kokora lwa mwaza mwiranyilwi avakaana vinyu vakulundu navakaana vinyu vakekeeke. Ndaaza mbakole na vave kuli avavozo ku munyi, kali niiva yili si liali lilagana liange ni munyi mba.

Ezekieli 16:63

Nasamihi uvwoni vwinyu vwosi vwa mumali kokora, navuzwa nimuvwizulizi kandi namuve muzizoni ligali kali sinamutivuli ku kindu mba.” Yahova Wuvunyali umali kovora.

Hosea 10:6

Kifananyi yiki kilagingwa nu kuhilwa mukivala cha Asiria keve kuli mutungu gwu vusuuru ku mwami munene. Avandu va Isiraeli valava mu zisoni kigira vasigamira kifananyi yiki.

Hosea 2:8

Si alamanyiriza ndi ni Inzi wamuha uvuswage, Iwaini, amaguta, ifeza kandi izahabu ya yatumikira mu lisigamira Baali mba.

Hosea 9:10

Yahova avoora, “Lwa ndaanyoora vandu va Isiraeli mulitanga, vaali kuli Mazabibu gamaa mwigendanyama. Lwa ndaalora avaguuga vinyu, galoleka kuli ndoli likuyu liukutanga liengu ku ing'inga yalio. Navuzwa lwa vaza ku kiguru cha Peori, vataanga kusigamira Baali, kandi nonoho vaaloreka kuva avukuvihiririza kuli avanyasaye vavayaanza.