Lucas 2:4 - La'aqtaqa Ñim Lo'onatac 'Enauacna 2013

⁴ Qaq so José maye chegoxoguet na llalaqpi so David, somaye hueta'a ye nỹecpi le'enaxat Nazaret, nache somaye iuen da taỹa ye nỹecpi le'enaxat Belén da yaqto' nanereuo, cha'aye nacheye yem lañoqo' co'ollaxa so nta'a David.

Nuevo Testamento Toba Sur

⁴ Qaq ÿoqo'oyi so José chigoqchiguiña yi pueblo l'enaxat Nazaret, huaigui yi 'alhua Galilea, da nqo'ona yi pueblo l'enaxat Belén huaigui yim 'alhua l'enaxat Judea yim lañoqo' so David, cha'ayi so José maichi chigoxoguet so David.

Nuevo Testamento Toba Sombrero Negro

⁴ Qo'che' chiyaqayi da'me dojo', José chiyoqotoue di'me noicolec jo'ne Nazaret, mach'e 'naleua di'me Galilea, qama'le yec'ata di'me Belén, mach'e 'naleua di'me Judea, nach'edi niyi'ña joca'li di'me jaliaĝanec David, qa'a José mach'e chiyoĝoguet jodi'me.

Lucas 2:4 Iomraidhean Croise

Génesis 35:19

Qaq 'era da 'eetec aso Raquel co'ollaq ileu, qaq nache qailareña so loigue so nqa'aic maye taỹa'a ye Efrata, yem le'enaxat nagui da Belén.

Génesis 48:7

Cha'aye co'ollaq ye'eguelaq da sachegoqta'a ye Padán Aram, nache ileu aye 'arate'e Raquel huaña ye 'alhua Canaán, co'ollaq mashe ñayeeta'a ye Efrata. Qaq nache selayiña yemaye, sacheteua'a na laỹe so nqa'aic maye taỹa'a ye Efrata, yem nagui le'enaxat da Belén.»

Miqueas 5:2

Qaq 'am Belén, Efrata maye 'am saq 'amaqtaq da 'aualectaigui nam nhuo' le'ecpi na Judá, qalaq nache 'am chegoxoigui cam nataxala' qome na Israel, maye chegoxoguet so ỹataqta hua'auchiguiñi nhuo' le'ecpi.

Mateo 1:20

Qaq co'ollaq ñaq tatapigui lauel de'era so José, nache anac so lamaxashec Ñim Lo'onatac 'Enauacna, huaigui naqa'en so lo'ochaxa da nachaxana somaye. Nache 'enapega, 'eeta': –José, 'am maye 'auachegoxoguet so nta'a David, saishet qome da 'añi'i da 'apaca'aguet añi María da 'arhua. Cha'aye dam llalec maye huetaigui añimaye, chegoqchigui da la'añaxac So Saqcha'a Na'añaxac Qui'itta.

Mateo 2:23

Qaq co'ollaq mashe ivita yemaye, nache huera'a ye nỹecpiolec le'enaxat Nazaret. Qaq 'eetec de'era, da yaqto' ỹataqta ipacchiguilo naua la'aqtaxanaxaco so la'aqtaxanaxanecpi Ñim Lo'onatac 'Enauacna da 'eeta': «Ca Lca'aguishec Ñim Lo'onatac 'Enauacna da qaiỹaxana qalaq qaỹamata'ac Nazaret le'ec.»

Lucas 2:3

Nache 'enauac na shiỹaxauapi da taỹalo na ỹataqta hueta'a na lauo' le'ecpi, da yaqto' qoỹereua'a aso naneraxalate somayepi.

Lucas 2:5

Nnaictague' aso lhua María, qaq asomaye hualaxai.

Lucas 4:16

Ime, nache ỹe'eguelaxague da Nazaret yem ỹataqta lañaxataqa'. Qaq co'ollaq ivireuga so na'a'q mataxaqui, nache inoxoneua'a aso napaxaguenaxaqui na judiopi, cha'aye maiche lataxac Somaye. Qaq co'ollaq nachaañi da detaxaỹaxanataxan,

Juan 1:46

Nache so Natanael 'enapeco': –¿Peta'a isheto' da huo'o ca no'on da lataxac da chegoqchiguiña ye Nazaret? Nache so Felipe 'enapeco': –'Aỹala, ña 'ameenaxana Ñimaye.

Juan 7:42

Ye naua nanettaleguete ana la'aqtac lmalate Ñim Lo'onatac 'Enauacna, naamaye ỹa'axa't da que'eca Lca'aguishec Ñimaye, camaye chegoxoguet na llalaqpi so nta'a David, qataq lañoqo' ye Belén, yem nỹecpi maye lma' co'ollaxa so David.

Rut 1:19

Qaq huaña nache soomaye je'c, quetregue so nqa'aic nache choche ivittra'a ye Belén. Qaq co'ollaq mashe ivildeua'a ye Belén, nache so shiỹaxauapi ỹataqta huo'o da le'elaxa souaxat soomaye. Nache so 'alpi 'eeta': «¿Saishet peta'a da nachana ana Noemí ana'ana?»

Rut 2:4

Qaq huaqchigui co'ollaxa da se'eso na'a'q nvirec so Booz, chegaqaua'a ye Belén, nache somaye iquin so deqataxaatacpi, 'eeta': ¡Qami' hueta'agueta qome Ñim Nataxala'! Nache somayepi ỹasateguet somaye, 'eeta': ¡Da lchoxonnataxanaxa Ñim Nataxala', 'am huetalec qome!

Rut 4:11

Nache so nqueroxonecpi qataq 'enauac som ỹauaatauopi ỹasategueto' somaye, 'eeta': Aja', qomi' sauanaqchigui damaye. Qaq Ñim Nataxala' ỹanem asa'aso 'alo maye huenoxoneua'a qome ca 'arma' da 'eeta'am aso Raquel, qataq aso Lea, maye sachegoxosoxogueta qomi' Israel le'ecpi. Qaq 'am ỹataqta 'am ỹo'oxoraic qome na Efrata, qataq 'am 'amaqtaqaic na Belén.

Rut 4:17

Qaq so 'alpi maye lauoreuapi, co'ollaq ila'a asomaye nache, 'eeta': ¡Huo'o ye ñiguiñi llalec añi Noemí! Nache som 'alpi ỹo'ot da le'enaxat so nogotolec, nache ỹanagui Obed. Qaq somaye nacheso so lta'a so Yesé, som lapi' so David.

1 Samuel 16:1

Nache Ñim Nataxala' 'enapego' so Samuel, 'eeta': ¿Chaq laguio', qaq 'axaañi da 'araquicoxo souaxat so Saúl? Ye aỹem mashe sa saỹamaxaren somaye da queta da lta'a na Israel le'ecpi. Ña qoñisheguem qome, nache 'auỹoxogui aca huaca lcoue ca 'arcoraxanaxat aceite, nache qojec da 'anqo'ona ye lma' ñi Yesé, maye naña ye Belén, cha'aye mashe lleca'aguishec ñi 'oonolec soua llalqa da yaqto' lta'a na Israel le'ecpi.

1 Samuel 16:4

Nache so Samuel ỹo'ot dam ỹamaxalec Ñim Nataxala'. Qaq co'ollaq ivita ye Belén, nache so nqueroxonecpi maye lma' se'eso huaqta'a't nỹecpi ca'atta'aguet co'ollaxa somaye, qalaxaye ỹataqta huo'o da lcolanaxa, nache qainato', qoỹeeta': «¿Peta'a qaica cara dam 'arviraxac?»

1 Samuel 17:12

Qaq huo'o so ỹale maye lma' ye Belén le'enaxat Yesé, maye co'ollaq huaigui da lo'onataxanaxac da nta'a so Saúl, nache somaye nale'ena da mashe ỹe. Qaq se'eso ỹale, ocho soua llalqa, qaq so David nache nataqa'en llalec somaye.

1 Samuel 17:58

Nache so Saúl inattac somaye, 'eeta': 'Am nsoq, ¿negue't cam 'arta'a? Nache so David 'enapeco': Qomye aỹem llalec ñi Yesé, maye lma' ye Belén, ñim maiche 'aramaxashec.

1 Samuel 20:6

Qaq ñi 'arta'a qom aỹem denataxanaique, qaq 'aua'axatem qome da aỹem 'am sequiguiỹo'ot da ñeqo'ona ye ima' Belén, cha'aye 'enauac ye ihuo' le'ecpi ỹo'ot aca ỹavigaxat lachetaqtaxanaqte ye 'oonolec vi'i.