Juan 12:16 - La'aqtaqa Ñim Lo'onatac 'Enauacna 2013

¹⁶ Qaq co'ollaq cheta'ague, nache soua lapaxaguenataqa saishet da ỹaỹate'n ca llec de'era. Qalaxaye co'ollaq qaỹata'ague de'era, co'ollaq mashe ime da ileu qataq da nca'alec So Jesús, nache cheta'ague da tachiguilo ye lauel da 'enauac nam qaỹo'otec So Jesús, mashe ỹa'axata'alo co'ollaxa naua nanettrañi la'aqtaqa Ñim Lo'onatac 'Enauacna.

Nuevo Testamento Toba Sur

¹⁶ Qaq co'ollaq chita'ague, nachi soua lapaxaguenataqa sa ishit da ÿaÿate'n ca llic de'eda. Qalaxayi co'ollaq qaÿata'ague de'eda, co'ollaq mashi ime da qoÿanagui da lli'oxoyic so Jesús, nachi qaiuennate 'enauac nam nanettañi mayi i'axat da llic somayi, da 'enauac ipacchigui.

Nuevo Testamento Toba Sombrero Negro

¹⁶ Gaa'me lapaĝaguenataqa ñe'me Jesús maliaĝa ja yayate'n naa'me naajo' jo'ne uo'oe, qalaĝaja ca'li eque' jaa'me noloqo'ote da'me ua'a male yem da'me qo'nonaĝachigui ñe'me Jesús qama'le yemta qouenate'talo da'me yemeda naa'me naajo' jo'ne uo'oe, nach'enaua joote 'yaĝatetedac naa'me nedii's jo'ne Dios 'laqatac lae't.

Juan 12:16 Iomraidhean Croise

Marcos 16:19

Qaq co'ollaq so Qarataxala' Jesús imat da na'aqtaxaategueto soua lapaxaguenataqa, nache Ñim Lo'onatac 'Enauacna ỹaueegue da piguem. Huaña, nache Somaye nso'oota'ague da aloic Ñim Lo'onatac 'Enauacna, yem huaña da qaica ca 'ena'am da llo'oxoyec.

Marcos 9:32

Qaq soua lapaxaguenataqa saishet da ỹaỹate'n de'era qaỹa'aqtaxaatapeguema, qalaxaye ñi'iỹaleguete da qaltaq denataxa'n.

Lucas 18:34

Qalaxaye soomaye saishet da ỹaỹaanegueta de'era, sa ỹaỹaten negue'to'ca cam qoỹeetega. Cha'aye dam qaỹa'axattac saishet da nqat cam naigui.

Lucas 24:25

Nache So Jesús 'enapeco': –¡Ỹataqta qaico' ca qauaỹaañiỹapec qami', qataq qaỹaloqta da qaua'amaqchiñi 'enauac nam la'aqtaxanaxacpi co'ollaxa som la'aqtaxanaxanecpi Ñim Lo'onatac 'Enauacna!

Lucas 24:45

Huaña, nache itaua'n soomaye da ỹaỹate'n naua naiguilo naua ñiyigui'she maye nanettralec ana nere maye huetalec na la'aqtacpi Ñim Lo'onatac 'Enauacna.

Lucas 9:45

Qalaxaye soua lapaxaguenataqa saishet da ỹaỹate'n de'era la'aqtac So Jesús, cha'aye saxanaxa da ivira ye laloqo' da yaqto' ỹaỹate'n. Nataqa'en huo'o da lcolanaqa' da ina't Somaye da chaq negue't ca naigui de'era la'aqtac.

Juan 12:23

Nache So Jesús 'enapegalo soomaye, 'eeta': –Nagui mashe ivita ye laloqo' da 'enauac qaỹaỹaten da negue't cam ỹoqta Shiỹaxaua Llalec.

Juan 14:26

Qalaxaye ca Saqcha'a Na'añaxac Qui'itta maye Ñim Ita'a qami' namaxalo nactaigui naqa'en da ỹe'enaxat da yaqto' qami' itaua'n qataq qami' ỹa'añaqche't, camaye qami' ỹapaxagueneque 'enauac na lataxaguesat qataq qami' iuennataxanaxaneque 'enauac na ỹa'aqtacpi maye qami' sa'aqtaxaateguema nagui.

Juan 16:4

Qaq nagui qami' sa'axatema de'era, yaqto' qom ivita ca laloqo', nache qami' ishet da qauennache da mashe sogote da qami' sa'aqtaxaateguema de'era. Saishet da qami' sa'axatema de'era co'ollaq cheta'ague da so'onataxan, cha'aye Aỹem ñaq qami' soota'agueta.

Juan 17:5

Qaq nagui, 'am Ita'a, ñeshetaique da sootaua'a na 'araỹe, da Aỹem 'aỹa'anem da ỹo'oxoyec maye saatañi co'ollaq 'am sooto'ot co'ollaq saxanaqaca ana 'alhua.

Juan 2:22

Qaq ỹoqo'oye So Jesús co'ollaq mashe qaltaq nca'alec, nache soua lapaxaguenataqa tachigui lauel de'era la'aqtac Somaye. Huaña, nache ỹataqta ỹa'amaqte'n naua nanettralec ana nere maye huetalec na la'aqtacpi Ñim Lo'onatac 'Enauacna, qataq naua la'aqtaqa So Jesús.

Juan 7:39

Qaq de'era 'enapec So Jesús, damaye naigui da ca ỹa'amaqten Somaye, nache camaye ỹaconeguet So Saqcha'a La'añaxac Ñim Lo'onatac 'Enauacna. Cha'aye So Saqcha'a Na'añaxac Qui'itta saxanaxa co'ollaxa da anac, cha'aye So Jesús saxanaxa da ivita ca laloqo' da ileu qataq da nca'alec.

Hechos 2:33

Qaq ỹoqo'oye Ñim Lo'onatac 'Enauacna ỹacoosop da ỹaueegue da piguem, nache ỹana'ague da aloic. Huaña, nache Somaye ỹaconeguet So Saqcha'a Na'añaxac Qui'itta maye ỹachaxanapeguem co'ollaxa Ñim Lta'a da ỹanem Somaye. Ime, nache Somaye qomi' ỹanema se'eso Saqcha'a Na'añaxac Qui'itta maye nataqa'en qomi' ỹachaxanapecoto co'ollaxa. Qaq nachera de'era qauloitagui qataq qaua'aqaitega nagui.

Hechos 2:36

Ỹoqo'oye qami', Israel le'ecpi, iuen da ỹataqta qauaỹaañita de'era, da So Jesús maye qami' qauaxañiiuo co'ollaxa, nacheso so ỹanagui Ñim Lo'onatac 'Enauacna da Qarataxala' qataq Lca'aguishec Ñimaye.

Hechos 3:13

Qalaxaye Ñim Lo'onatac 'Enauacna maye ỹo'oxoreetrac co'ollaxa soua hua'au' qarta'al Abraham, qataq so Isaac, qataq so Jacob, Ñimaye nacheñi Ñim ỹanem da lta'araic la'amaqchec So Llalec Jesús, Som qami' qaỹa'añiiua'a co'ollaxa na lta'alpi na Roma le'ecpi. Nache so nta'a Pilato co'ollaq huotaique da ỹaxanec, qalaq qami' saishet da qauaỹamaxayiñi.

Hebreos 12:2

Qaq ỹataqta seloqchigui So Jesús, cha'aye nacheso so chegoqo'ot da qanaquitaxac, qataq nacheso som ỹo'ot da nquictasheguem da qarpi'iỹaxac. So Jesús ỹataqta na'añaxateguet da ne'enaguec co'ollaq qaiuaxaneguet so npe'enaxaqui, cha'aye ỹaỹaten da inoxonaqchetec da lta'araic nque'eenaxac, nache ỹaconeguet da lta'araic lamaicỹaxac. Qaq nagui Ñimaye mashe nso'ootañi, netaua'a na aloic añi nso'onaxaqui Ñim Lo'onatac 'Enauacna.

Hebreos 8:1

Qaq 'era da ỹoqta ỹactec da 'onaxaic, 'eeta': Qomi' huo'o Som Lataxala' na ntaxaỹaxanaxanecpi neta'ague da piguem, nso'ootañi, hueta'ague da aloic añi nso'onaxaqui Ñim Lo'onatac 'Enauacna.