Juan 1:14 - La'aqtaqa Ñim Lo'onatac 'Enauacna 2013

¹⁴ Qaq se'eso Na'aqtac qomi' hueta'agueta, 'eeta'am ca 'oonolec da shenaqta. Qataq qomi' sauanaqchigui da la'añaxac maye maiche lalamaxat som 'oonolec Llalec Ñim Lo'onatac 'Enauacna, cha'aye qomi' ỹachaxanalo 'enauac da lsoxoyec qataq da 'eesa lataxac.

Nuevo Testamento Toba Sur

¹⁴ Qaq se'eso l'enaxat l'aqtac ñi Dios, somayi nañigui da lataxac na yi'oqchigui shiÿaxaua. Nachi somayi qomi' hueta'agueta, qalaq ÿataqta nlaqchigui da lauotaxanaqtaic qataq dam 'eesa lataxac. Qaq qomi' sauanaqchigui da lli'oxoyic dam ñi'oxoyic mayi maichi lalamaxat lli'oxoyic som 'oonolec llalec ñim qadta'a Dios.

Nuevo Testamento Toba Sombrero Negro

¹⁴ Qama'le ñe'me jo'ne 'naqatac joca'li male di'yoq ca'li da'me jiyaĝaua, ñe'me jo'ne yataqachiñe choĝodenataĝanaĝaic nataq'aen yataqatelegue, male qo'mi uetauelo. Chane'eja jauanaĝa da'me 'lonaĝac jo'ne yachiyoĝo'tot ñe'me Let'a queda'me onolec jo'ne mach'e Lec'oĝot.

Juan 1:14 Iomraidhean Croise

Salmos 2:7

Qaq aỹem sa'axatec qome da lhuennataxac Ñim Nataxala', cha'aye Ñimaye aỹem 'enapega, 'eeta': «'Am, nache 'am ỹalec, aỹem 'am seco'oic na na'a'q.

Salmos 45:2

Da 'aryacỹaxac ỹataqta napacalec na laỹe ỹalleppi, qaq na 'ap qalaq chegaqaiguilo naua no'oñi na'aqtaqa, ỹoqo'oye Ñim Lo'onatac 'Enauacna nache 'eetai' da 'am huetalec naqa'en da lchoxonnataxanaxa.

Salmos 85:9

Cha'aye Ñimaye ỹataqta saqaỹapeque da nca'alaxatec na huo'o naq 'enec naqa'en Ñimaye, yaqto' da llo'oxoyec nache 'eetai' da hueta'a ne'ena qana'alhua.

Isaías 40:5

Qaq huaña nache Ñim Nataxala' ỹachaxan qome da llo'oxoyec, nache 'enauac qome na shiỹaxauapi da ỹauaachigui damaye. Cha'aye Ñim Nataxala' maiche la'aqtac damaye.

Isaías 53:2

Ñim Nataxala' maiche lhuennataxa co'ollaxa da ñim lamaxashec 'eeta'am da lañaxataxac aca nañiguishe da saxanaxa da da'añi maye naua lpa'aye taiguilo cam deqaqta 'alhua. Nache qaica ca lyac qataq ca llo'oxoyec, da lataxac qalaq saishet da qaiqopittaua'a,

Isaías 7:14

Qaq ỹoqo'oye Ñim Nataxala' Nacheñi ñim qami' ỹanema qome ca na'anec: Aca qa'añole hualaxai qome nache acamaye ỹale qome ca llalec, qaq que'eca llalec acamaye ỹanagui qome da le'enaxat Emanuel, maye naigui da: ‹Ñim Lo'onatac 'Enauacna qomi' hueta'agueta.›

Ezequiel 37:27

Qaq Aỹem sootangui qome namayepi, qaq nachaỹem qome da Aỹem Natamnaxala', qaq namayepi ỹalamaxatpi qome.

Mateo 1:16

José som lhua aso María maye late'e So Jesús Som Lca'aguishec Ñim Lo'onatac 'Enauacna.

Lucas 2:11

¡Ye Qarca'alaxaqui mashe ñiguiñi hueta'a ye Belén! ¡Nacheye ye Lca'aguishec Ñim Lo'onatac 'Enauacna qataq Nataxala'!

Lucas 2:7

ñiguiñi so la'auaxanec llalec. Qaq souaxat ye sa ỹanatra cam nỹec maye ishet da huera'a se'eso pe, nache soomaye huera'a so lma' na nlo shiguiỹacpi. Nache huaña yemaye co'ollaq ñiguiñi so llalec, nache aso María lpataxangui so lapo' hualoq laỹe. Ime, nache ỹachangui aso lquia'axaqui na shiguiỹacpi.

Lucas 9:32

Qaq so Pedro qataq soua lỹa't napaxaguenataqa mashe do'ochete'. Qalaxaye saqaỹaloq da nlorec, nache ila'alo So Jesús da huetaigui da llo'oxoyec, huaqta'ato so Moisés qataq so Elías.

Juan 1:1

Co'ollaq saxanaxa da qaỹo'ot 'enauacna, qaq nale'ena da huo'o So Na'aqtac. Qaq se'eso Na'aqtac hueta'aguet Ñim Lo'onatac 'Enauacna, qaq So Na'aqtac nacheñi Ñim Lo'onatac 'Enauacna.

Juan 11:40

Qalaxaye So Jesús 'enapeco': –¿Saisheto' da 'am sheetega quiye da huo'otaq 'aua'amaqten Aỹem, nache ishet da 'aulogui da la'añaxac Ñim Lo'onatac 'Enauacna?

Juan 14:6

Nache So Jesús 'enapega somaye, 'eeta': –Aỹem Nachaỹem nqa'aic, qataq Nachaỹem 'eesa lataxac, qataq Nachaỹem nca'alaxa. Qaica ca lỹa ñegueuo da qainoxoneua'a Ñim Ita'a, Nachaqaỹemta.

Juan 14:9

Nache So Jesús 'enapego' somaye, 'eeta': –Felipe, Aỹem mashe huo'oi soua vi'iye da qami' soota'agueta, ¿qalaq ñaq saxanoxo' da Aỹem 'auauatton? Cha'aye ca Aỹem ila'a, camaye nataqa'en ila'a Ñim Ita'a, qaq ¿ta'ainco' ye Aỹem 'auỹaxaatacot da qami' sachaxanalo Ñim Ita'a?

Juan 17:22

Qataq Aỹem sanema naamaye dam na'añaxac maye Aỹem 'aỹa'anem co'ollaxa, yaqto' naamaye nache queto'ot da na'atta'a't. Qaq ỹoqo'oye naamaye iue'n da nache 'eetai' da Aỹem na'attaua'alo, 'eeta'am da 'eetec da 'am ña'attaua'a. Yaqto' de'era lataxac da na'atta'a't naamaye ỹataqta nalochiguiñi, yaqto' nam shiỹaxauapi maye huetalec ana 'alhua ỹaỹaten da Aỹem 'aramaxashec qataq ỹataqta 'auauoteque naamaye 'eeta'am da 'eetec da Aỹem 'auauotec.

Juan 17:24

'Am Ita'a, naua Aỹem ca'attegueto naamaye Aỹem 'aỹa'anema, qaq ỹoqo'oye ñeshetaique da naamaye Aỹem hueta'agueta cam soota'a, yaqto' ỹauaachigui cam na'añaxac maye Aỹem 'aỹa'anem. Cha'aye nale'ena co'ollaxa da ỹataqta Aỹem 'auauotec co'ollaq saxanaqaca ana 'alhua.

Juan 18:37

Nache so Pilato 'enapego' Somaye, 'eeta': –¿Qache ỹoqta 'eesa da 'am nta'a? Nache So Jesús 'enapeco': –Aja', Aỹem nta'a, nachera dam qonapec. Aỹem sañiguiñi da ñanaỹa ana 'alhua, da yaqto' sa'axat cam 'eesa. Qaq 'enauac nam ỹalaxalec dam 'eesa, namayepi na'axaỹaxana dam ỹa'aqtaxanaxac.

Juan 2:11

Qaq de'era ỹo'ot So Jesús co'ollaq huaña ye nỹecpi ye Caná maye huaigui ye 'alhua Galilea. Damaye, nachera da hua'auchiguiñi nam ỹo'otpi na'anec maye sa qaỹauanapega co'ollaq ỹachaxan da llo'oxoyec. Nache soua lapaxaguenataqa ỹataqta ỹa'amaqte'n Somaye.

Juan 3:16

Cha'aye Ñim Lo'onatac 'Enauacna ỹataqta lta'araic da lauotaxanaqtaic na shiỹaxauapi ana 'alhua, nache ỹan na 'oonolec Llalec. Yaqto' 'enauac nam ỹa'amaqten namaye saishet da ileu, nachaqrata da huo'o da lca'alaxa maye chochaq tatec.

Juan 3:18

Ca ỹa'amaqten na Llalec Ñim Lo'onatac 'Enauacna, nache camaye saishet da huo'o ca nhuaxanaguec. Qalaxaye cam sa ỹa'amaqten Namaye, nache sogote da huetalec da huo'o da nhuaxanaguec qanqa'en, souaxat da saishet da ỹa'amaqten na 'oonolec Llalec Ñim Lo'onatac 'Enauacna.

Juan 6:51

Aỹem maye Nachaỹem nauole maye ñeca'altauec, qataq sachegoqo'ot na piguem. Ca chec ana'ana nauole, nache qaica ca loga't da nachaalataxac. Ana nauole maye san, nachera da ỹo'ocỹaxac. Qaq damaye san yaqto' nca'alec 'enauac na shiỹaxauapi.

Juan 8:32

Nache qami' ỹataqta qauauattoñiita da 'eesa lataxac, qaq de'era 'eesa lataxac, nachera da ỹataqta qami' huesochiyiñi naqa'en.

Hechos 13:33

Cha'aye qomi' maiche qomi' llalaqpi somayepi, qaq ỹoqo'oye Ñim Lo'onatac 'Enauacna ỹataqta ipacchigui dam 'enapec co'ollaxa da qaltaq nca'alaxatec So Jesús da Qarca'alaxaqui. Cha'aye nache nanettalec aso nere le'enaxat Salmos da la'aqtac, 'eeta': «'Am maye nache 'am Ỹalec; qaq nache chegoqchiguiña ne'ena na'a'q da Aỹem 'Arta'a.»

Romanos 8:3

Qaq Ñim Lo'onatac 'Enauacna ỹo'ot co'ollaxa dam saishet da ỹañoxot da ỹo'ot nam namaxasoxonaxacpi maye chegoqo'ot so Moisés, cha'aye qaica ca ilo'ogue da lqopitaxanaqtaic da ỹo'ot nam qauem. Nache Ñim Lo'onatac 'Enauacna namaxalec co'ollaxa ana 'alhua so lalamaxat Llalec, qaq Somaye ỹataqta 'ena'ama qomi' da qarqalviaxa, qataq da qañe'eguenataguec. Qaq Ñim Lo'onatac 'Enauacna namaxalec ana 'alhua Somaye da yaqto' qomi' ileualeguete souaxat na qaye'etaxaloxo. Qaq nache chegoqchigui Somaye da Ñim Lo'onatac 'Enauacna, nlaxaañi da la'añaxac da ñe'etaxaloxo.

Romanos 9:5

Namayepi chegoxoguet soua hua'au' qarta'al, qataq Som ỹale maye Lca'aguishec Ñim Lo'onatac 'Enauacna nataqa'en chegoxoguet soomaye. Somaye ilo'ogue 'enauacna, qataq nacheso so Lo'onatac 'Enauacna ¡Da ño'oxonnataguec Ñimaye ỹataqta chochaq tatec! Aja', nache 'eetec de'era.

1 Corintios 15:47

So hua'auchiguiñi shiỹaxaua, qaỹachegoxotaigui ana 'alhua. Qalaxaye so pa'atec shiỹaxaua, Somaye chegoqo'ot na piguem.

2 Corintios 12:9

Qalaxaye Ñimaye aỹem ỹasateguet, 'eeta': «Da iqouagaxanaqtaic mashe 'am hueto'ot, qaq saqca ca lỹa 'aueetac. Cha'aye da ỹa'añaxac yo'oq da nachattaigui ca shiỹaxaua qaica ca la'añaxac.» Qaq ỹoqo'oye ỹataqta samachiguiñi da saqca ca ỹa'añaxac yaqto' da la'añaxac So Cristo yo'oq da aỹem nachattaigui.

Gálatas 4:4

Qaq co'ollaq ivita so na'a'q maye laloqnec Ñim Lo'onatac 'Enauacna, nache namaq So Llalec da nañaxatoigui naqa'en aso 'alo, qataq quetelec na namaxasoxonaxacpi maye ỹo'ottac na judiopi.

Efesios 3:8

Cha'aye na'aictaxa da aỹem ỹataqta qaica ca ỹa'amaqchec da salectaigui na lalamaxatpi Ñim Lo'onatac 'Enauacna, qalaxaye Ñimaye aỹem ỹami' de'era ña'achecỹaxac da sa'axatem na saishet da judiopi da no'on na'axaỹaxac maye ỹa'axat nam chegoqo'ot lqouagaxanaqtaicpi So Cristo maye qaica ca ishet da naloqten.

Colosenses 1:19

Cha'aye Ñim Lo'onatac 'Enauacna nshetaique da So Cristo ỹataqta imatta't 'enauac da lataxac saqcha'a Ñimaye.

Colosenses 2:3

Cha'aye Somaye nacheso so imatta't 'enauac na ỹotta'a't naỹaaneguesat qataq na nauattonaxanaxacpi maye chochaq huañi.

Colosenses 2:9

So Cristo ỹataqta imauec da lataxac da 'eeta'am Ñim Lo'onatac 'Enauacna,

1 Timoteo 3:16

Qaq saishet da qaiqoleguet de'era 'eesa lataxac da qara'amqaanataxanaxac, cha'aye ỹataqta lta'araic da naigui llo'oxoyec: So Cristo nachaxan co'ollaxa, qalaxaye ỹacona da lataxac ca yo'oqchigui shiỹaxaua; qaq So Saqcha'a Na'añaxac ỹa'axat da saqca ca lasouaxashet Somaye, qaq ỹauaachigui Somaye 'enauac na chegaqasheguem lamaxashecpi Ñim Lo'onatac 'Enauacna. Qataq qaỹa'axatem 'enauac na ỹotta'a't shiỹaxauapi, qaq na shiỹaxauapi maye huetalec ana 'alhua ỹa'amaqten Somaye. Ime, qaq qaỹaueegue da piguem, nache Ñim Lo'onatac 'Enauacna ỹataqta nlaxatchigui da 'enec Somaye.

Hebreos 1:3

So Llalec qomi' ỹachaxanalo da la'añaxac qataq da la'amaqchec Ñim Lo'onatac 'Enauacna, cha'aye imatta't da lataxac Ñimaye, qataq do'ogoxona da lta'araic la'añaxac da nlletañi 'enauacna. Qataq chegoqchigui Somaye da Ñim Lo'onatac 'Enauacna ỹapalaxa't naua qarasouaxashe'ete, ime, nache taỹa cam neta'ague Ñimaye da yaqto' nso'ooñi, na'ague da aloic.

Hebreos 1:5

Cha'aye Ñim Lo'onatac 'Enauacna sa ỹauano' da huo'otaq iỹaxana ca lamaxashec piguem le'ec da 'eeta': «'Am, nache 'am Ỹalec; qaq nache chegoqchiguiña ne'ena na'a'q da Aỹem 'Arta'a.» Qataq saishet da 'enapega ca 'oonolec nam lamaxashec piguem le'ecpi da 'eeta': «Aỹem sheeta'am da Aỹem Lta'a, qaq ñimaye qalaq 'eeta'am ca Ỹalec.»

Hebreos 10:5

Qaq ỹoqo'oye So Cristo, co'ollaq naỹa ana 'alhua, nache 'eetega Ñim Lo'onatac 'Enauacna, 'eeta': «'Am sa 'auỹaxanaique aca nachetaqtaxanaqte, maye qaỹavigaxatta da yaqto' nmeneguet da 'auapalaxat na nasouaxashetpi; ỹoqo'oye Aỹem 'aỹa'anem da no'ocỹaxac.

Hebreos 2:11

'Enauac nam ỹauotec qataq ỹalaxaguet Ñim Lo'onatac 'Enauacna, nache nachena nam llalaqpi, qataq lta'a Ñimaye. Qaq So Jesús ye nataqa'en Llalec Ñim Lo'onatac 'Enauacna, Somaye saishet da da'acteguelec namayepi da iỹaxana da ỹataqta lqaỹañecpi,

Hebreos 5:5

So Cristo, Somaye saishet da huo'otaq maiche nallegoxoola't da nacheso lataxala' na ntaxaỹaxanaxanecpi. Nachaqrata da Ñim Lo'onatac 'Enauacna maye lca'aguishec qataq ỹanem da la'amaqchec. Qataq nacheñi Ñimaye co'ollaxa da 'eeta' da la'aqtac: «'Am maye nache 'am Ỹalec; nache chegoqchiguiña ne'ena na'a'q da Aỹem 'Arta'a.»

1 Juan 4:14

Qomi' ỹataqta sauanaqchigui da Ñim Nta'a namaxalec ana 'alhua So Llalec, da yaqto' nca'alaxatec 'enauac nam huetalec anamaye, qaq damaye sa'axataqtac saishet da huo'o ca sho'oqtaique.

1 Juan 4:9

Ñim Lo'onatac 'Enauacna qomi' ỹachaxanalo da lauotaxanaqtaic co'ollaq namaxalec ana 'alhua So Jesucristo, som 'oonolec Llalec, yaqto' chegoqchigui Somaye da 'enauac da shenaqta huo'o da qarca'alaxa chochaq tatec.

2 Juan 1:7

Ana'ana 'alhua qalota na ỹatenachettac na shiỹaxauapi, 'eetega da So Jesucristo saishet da anaỹa ana 'alhua da 'eeta'am cam ỹoqta 'eesa shiỹaxaua, maye huo'oi naua lapa'ache qataq naua lpi'ineqa. Qaq 'era dam la'aqtaxanaxac som npa'aguenaxaua So Cristo, som tenataxanaxaic.

Apocalipsis 19:13

Qaq Somaye soua ỹaatrañi alogo ỹataqta huaguilo na ntago'q, qaq da le'enaxat Somaye, 'eeta': «La'aqtac Ñim Lo'onatac 'Enauacna.»

Apocalipsis 21:3

Nache sa'axaỹa so na'aqtac ỹataqta alam, chemqot ye hueta'a aso so'onaxaqui, 'eeta': «'Ena na hueta'a Ñim Lo'onatac 'Enauacna da hueta'aguet na lalamaxatpi. Ñimaye hueta'aguet namayepi, qaq namayepi nache ỹataqta lalamaxat Ñimaye. Qaq nacheñi Ñim Lo'onatac 'Enauacna maye 'oonolec da Lta'a namayepi.