Jeremías 4:1 - La'aqtaqa Ñim Lo'onatac 'Enauacna 20131 Ñim Nataxala' 'eeta' da la'aqtac: «Da 'auauotaique da 'añe'eguelaq 'am Israel, qaq iuen da nachaỹem da aỹem 'añe'eguelaxa. Da qoca'ai nam nqaigaxat 'anatamnaxala'pi qataq saishet da Ayem qoca'ai, Faic an caibideil |
Jeremías 4:1
38 Iomraidhean Croise
Qataq nlaxaañi so atamnaqa'pi maye na'ague da nala' lliguisheguem ye Jerusalén, qataq so pa'aỹa'ague da la'añaxa aso qasoxonaxa maye huaña ana Olivo, som no'oxoosheguem co'ollaxa so Salomón, maye nta'a ye Israel, da yaqto' lalamaxat lma' aso Astarté, asom ỹataqta nqaigaqte natamnaxalate so sidooniopi, qataq so Quemos, som ỹataqta nqaigaxat natamnaxala' so moabiitapi, qataq so Milcón, som ỹataqta nqaigaxat natamnaxala' so amoniitapi.
So nta'a Josías, nataqa'en ỹo'orauec som ilaviiguipi ca lỹa, qataq som 'iyaqnataxanaxaicpi, qataq ilaxachigui so natamnaxala'piolec so maiche ñalaqpi, qataq som laỹepi atamnaxala'pi, qataq 'enauac som ỹataqta qaiqaiga logoxoshetpi som qanatameetacotpi, maye huaña ye Judá qataq ye Jerusalén. Qaq 'era da 'eetec da yaqto' ipacchigui nam nqataxacpi, maye nanettalec aso nere maye ilalec co'ollaxa so ntaxaỹaxanaxanec Hilcías, asom huetaigui co'ollaxa aso atamnaxaqui maye lalamaqte Ñim Nataxala'.
Qaq so Asa, co'ollaq hua'axaỹa de'era la'aqtaxanaxac so na'aqtaxanaxanec Azarías, nache ỹa'añaxachigui ye lauel, nache nlaxaañi 'enauac so ne'enaqtac atamnaxala'pi, maye netalec 'enauac yi'iye 'alhua Judá, qataq ye Benjamín, qataq som huaqta'a't nỹecpi maye loxonec co'ollaxa, maye netalec aye qasoxonaxapi ye Efraín, qataq ỹaỹamaxaañi aso nca'atoxonaxalate maye lalamaqte Ñim Nataxala', maye netaña ye datatauga aso atamnaxaqui maye lalamaqte Ñim Nataxala'.
Qaq ime, nache so Josías nlaxaañi 'enauac so ne'enaqtacpi maye nqaigaxat maye hueta'a 'enauac ye na'alhua so Israel le'ecpi, nache 'enapega 'enauac som netalec ye 'alhua Israel, da ỹo'oxoren Ñim Nataxala' maye Natamnaxala'. Qaq co'ollaq ña nca'altauec so Josías, nache somayepi saishet da ca'ai Ñim Nataxala', Ñim Natamnaxala' som hua'au lta'alpi.
Qaq huaña nache Ñim Nataxala' aỹem ỹasateguet, 'eeta': «Da Aỹem 'añe'eguelaxa, nache qaltaq 'am saconeguet, nache ishet da Aỹem 'auo'onataxanot. Da 'avita'aguet nam saq 'en ntaxaỹaxacpi, nache ndotec da 'aua'axat nam ntaxaỹaxacpi maye no'on na naigui, qaq nache 'am qome da 'aua'axattac Aỹem. Qaq namayepi nachena nam iuen da 'am ỹe'eguelaxaguet qome, qaq saishet da nache 'am da 'avi'eguelaxaguet namayepi
Qaq nagui 'aua'aqtaxanem na shiỹaxauapi na Judá, qataq na lma' na Jerusalén, da aỹem Nataxala', shenapega namayepi, sheeta': ‹Mashe huo'o dam llapaqtegueñi da yaqto' qami' sataỹa'agueta, Aỹem mashe iuennataxa da qami' seuaxa'n. Ñaq qoquiỹa'ai qome som qauem nqa'aic, nache qano'onaxache da qarataxaqui qataq da qaro'onataxanaxaqui.›»
Ñim Nataxala', 'enapec: «Ca 'oonolec ỹale da nalate' aca lhua, qaq acamaye da mashe nalate' camaye, qaq huaroneguet ca lỹa ỹale, nache ca hua'auchiguiñi lhua, saishet da ỹe'eguelaxa acamaye. ¡Cha'aye damaye ỹo'ot da lta'araic nayeloxo cam hueta'a 'alhua! Qalaxaye 'am Israel, qalota na 'ancachetague' shiỹaxauapi, ¡qaq nagui qalaq 'auauotaique da aỹem 'añe'eguelaxa! Qaq 'era da ỹa'aqtac, Aỹem Nataxala'.
Qojec nagui 'aigue da sheu', nache 'aua'axatec qome de'era ỹa'aqtac, qoneta': ‹Ñim Nataxala', 'enapec: ¡Aỹem 'añe'eguelaxa 'am qauemai Israel! Cha'aye saishet qome da 'am saseyacnapec da 'am saconeguet, qataq saishet da nache queta da 'am senotega, cha'aye Aỹem choxonnataxanaxaic. Qaq 'era da ỹa'aqtac, Aỹem Nataxala'.
Ñim Nataxala', 'eeta' da la'aqtac: «Ñaq aỹem qañe'eguelaqaỹa qami' qauemaicpi ñalaqpi, cha'aye nachaỹem Qarataxala'ai. Ñim 'oonolec nam huaqta'a't nỹecpi maye ỹotta'a't naua nañalo, qalaq 'oonolec qome ñi sacootaua'a da qoñeeta, qataq ñi 'oonolec nam maiche nhuo' le'ecpi, qalaq dos qome ñeua sacootaua'alo, nache ñe'eguelaxata na Sión.
Qataq she'eguelaxattalec da qami' ñamaxalo so ỹamaxashecpi maye ỹa'aqtaxanaxanecpi, da yaqto' qami' 'enapegalo, 'eeta': Qaỹa'axañiiuec da qauem qarataxaqui qataq nam qauem maye qauo'ocheetacpi. Qataq saishet da qaca'acheetague' na ỹaqa'a atamnaxala'pi, qataq saishet da qavio'oxoyiñiitac, yaqto' nache queta da qoñeetalec na 'alhua maye qami' sanema co'ollaxa qataq so hua'au qarta'ailpi. Qalaxaye qami' saishet da Aỹem qauqocheetega, qataq saishet da Aỹem qaualaqaiguet.
Qami' shiỹaxauapi maye qoñiitaña na Judá qataq na Jerusalén, qauo'oche qome ca na'anaxat da qaro'ocỹaxaqui, qataq aỹem qauauattoñeeta da Aỹem Nataxala', qauachiỹaiguilo naua qarquiyaqtelli' da la'anaxat da aỹamaxataxac, cha'aye saiuena'a da souaxat cam qauem maye qauo'oche, nache da 'eroigui da inogoxonaxac, 'eeta'am ca norec qataq 'erangui damaye, nache qaica ca ishet da ỹalamat.
Qaq saishet qome, da qaue'enaxache da lataxac so hua'au qarta'ailpi, maye so hua'au na'aqtaxanaxanecpi da'aqtaxanem co'ollaxa da ỹa'aqtac, da yaqto' ỹaxanec da qauem lataxac, qataq nam qauem maye ỹo'ottacpi, qalaxaye somayepi saishet co'ollaxa da Aỹem na'axaỹaxana, qataq saishet da Aỹem ỹalaxaguet. Qaq 'era da ỹa'aqtac Aỹem Nataxala'.
«Qaq souaxat 'enauac de'era nache ỹataqta huo'o naq 'enec qome qanqa'eñi Ñim Nataxala', qataq qami' 'eesora, qataq ỹataqta qami' huesote' da qauo'onataxañiitacot Ñimaye. Nache qoquiỹa'ai qome 'enauac na atamnaxala'pi maye natameetacot co'ollaxa so hua'au qarta'ailpi, co'ollaq ñaq neta'atague da le'ego so tala Éufrates, qataq co'ollaq netaña ye Egipto, nache qavio'oxoreñi qome Ñim Nataxala'.
Ỹoqo'oye so Samuel 'enapego' 'enauac so Israel le'ecpi, 'eeta': «Da ỹoqta qaumachiỹo'ot da qarquiyaqteỹaxaqui Ñim Nataxala', nache qauasaqaiuec 'enauac nam atamnaxala'pi maye chegaqauec, qataq na lqui'ipi aso Astarté, nache qaumachiỹo'ot da qanachaalataxaqui Ñim Nataxala', qataq nachaqñita qome Ñimaye da qavio'oxoyiñiitac. Nache Ñimaye qami' nqateeguesopa qome da la'añaxac na filisteopi.»
Sanasan