Jeremías 26:2 - La'aqtaqa Ñim Lo'onatac 'Enauacna 2013

² nache 'eeta': «'Anachaañi qome, qoua'a ye nqasoxoc añi atamnaxaqui nache 'aua'axat 'enauac nam 'am samaxalecpi da 'aua'aqtaxanem na shiỹaxauapi maye chegaqa'a nam huaqta'a't nỹecpi maye ỹotta'a't naua nañalo ye Judá, da naỹa añi atamnaxaqui da yo'oxonnataxan, nache qaica qome ca sa 'aua'axat.

Jeremías 26:2 Iomraidhean Croise

Jeremías 1:17

Qaq 'am, 'anaỹamaxat qome. Nache qojec da 'aua'aqtaxanem namayepi 'enauac nam 'am samaxalec. Qaq saishet da 'aye'etega qome namayepi, cha'aye da 'añi'i, nache so'ot da 'aviloxol qom 'auataỹa'aguet namayepi.

Jeremías 1:7

Qalaxaye Ñim Nataxala' aỹem 'enapega, 'eeta': «Saishet qome da qonapec da ñaq 'am nsoqolec. Cha'aye 'am 'aigue qome cam 'am samaxague, qataq 'aua'axat qome cam 'am samaxalec.

Jeremías 19:14

Qaq co'ollaq ime de'era, nache so Jeremías ca'ai ye Tófet, maye Ñim Nataxala' ỹamaxa co'ollaxa da ỹa'axat da le'enaxat Ñimaye, nache co'ollaq ivita so nqasoxoc aso atamnaxaqui, nache nachaañi da da'aqtaxanem 'enauac so nhuo' le'ecpi, 'eeta':

Jeremías 23:28

¡Ca na'aqtaxanaxanec da huo'o ca lchoxonaxac, qalaq iuen da ỹa'axatta da choche lchoxonaxac, qalaxaye da ỹaconegueta naua ỹa'aqtaqa qalaq iuen da ipagaqchiichiguilo da ỹa'axa't! Cha'aye, ca 'auaqpi saishet da qanaloqnet ca trigo.

Jeremías 25:2

Nache so na'aqtaxanaxanec Jeremías ỹa'axatem de'era na'aqtaxanaxac 'enauac so nhuo' le'ecpi ye Judá qataq som hueta'a ye Jerusalén nache, 'eeta':

Jeremías 28:5

Nache so na'aqtaxanaxanec Jeremías, ỹasateguet so na'aqtaxanaxanec Jananías, ỹauaachigui naqa'en so ntaxaỹaxanaxanecpi qataq 'enauac so nhuo' le'ecpi, maye hueta'a aso atamnaxaqui, 'eeta':

Jeremías 36:10

Nache so Baruc nqo'oneua'a so nqasoxoc lta'araic aso atamnaxaqui, nache ñichiguiña so Dalaxaic Lasom, qataq naloteuga so lo'onataxanaxaqui so Gemarías som llalec so Safán, nache so Baruc itaxaỹaxan aso nere maye huetalec na la'aqtacpi so Jeremías, hua'aqchigui naqa'en 'enauac so shiỹaxauapi.

Jeremías 42:4

Nache so Jeremías ỹasateguet somayepi, 'eeta': Aja', ỹaỹamaqchiguiñi. Aỹem ñachoxonnot Ñim Nataxala' maye Qanatamnaxala'ai da qami' ñachoxoreeleguete, so'ot dam qarquiquiaxaqui, qaq ime nache qami' saỹaanaxaneque qome 'enauac cam aỹem ỹa'axatem Ñimaye, qaica qome ca qami' soxottaisopa.

Jeremías 7:2

«Qonaña qome ye ñegueuo añi atamnaxaqui maye lalamaqte Ñim Nataxala', qaq nache huaña yemaye da 'aua'axat de'era na'aqtac, qoneta': 'Enauac qami' maye qoviita'a na Judá maye qananaiteua'a naxa ne'ena lasom da qavio'oxoyeñi Ñim Nataxala', ñaq qana'axaỹaxañiỹa dam la'aqtac

Jeremías 7:27

Qaq 'am Jeremías, 'aua'axat qome 'enauac de'era, na'aictaxa da saishet da 'am qaiqocha'a, qataq 'aua'alaqtalec namayepi na'aictaxa da 'am saỹasateguet.

Ezequiel 3:10

Qaq ime, nache qaltaq aỹem 'enapega, 'eeta': «'Ana'axaỹaxaachigui 'enauac nam 'am sa'axatem, ime nache 'aỹa'anaigui ye 'antoonaxac.

Ezequiel 33:7

Qaq 'am shiỹaxaua, Aỹem 'am sanagui co'ollaxa da 'am lauanaxanaxanec na nhuo' Israel le'ecpi. Qaq 'am iuen da 'auaconegueta naua ỹa'aqtaxanaxaco, ime nache 'aua'axa't naua ivitaqtaxanaxaco.

Ezequiel 40:4

Qaq se'eso shiỹaxaua, aỹem 'enapega, 'eeta': «Ñaq 'aulochigui qataq 'ana'axaỹaxaachigui 'enauac nam huotaique da 'am sachaxana, cha'aye Ñim Lo'onatac 'Enauacna 'am nauega ne'ena da yaqto' 'am sachaxana namayepi. Qaq qom ime, nache 'aua'aqtaxanem na nhuo' Israel le'ecpi 'enauac nam 'auauaachiguipi.»

Mateo 28:20

Qataq qauapaxaguiñic qome namayepi da ỹalaxalec 'enauac na ỹapaxaguenataxanaxacpi. Qaq Aỹem nache 'eetai' da qami' soota'agueta, choche ivitta'a ca loga't ana 'alhua.»

Lucas 19:47

Nache 'enauaque se'esoua na'axa'te So Jesús dapaxaguenataxaatac, huetaigui aso no'onaxanaxaqui late'erai. Qalaxaye nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq nam dapaxaguenataxaatapeguec na namaxasoxonaxacpi, qataq nam lataxala' na judiopi, namayepi ilotaique ca lataxac da ishet da ỹalauat So Jesús.

Juan 18:20

Nache So Jesús 'enapeco': –Aỹem ỹataqta ñachaxaata naxa 'enauac nam shiỹaxauapi da setaqtac, qataq saq ỹet da huaigui ana napaxaguenaxaquipi na judiopi da sapaxaguenataxaatac qataq añim no'onaxanaxaqui late'erai maye huaña naxa da lapona't 'enauac na judiopi. Qaq Aỹem saishet da huo'o ca ỹa'aqtac soxottañi.

Juan 8:2

Qaq so ña nte'etom so lỹa na'a'q, nache Somaye qaltaq ỹe'eguelaxaua'a aso no'onaxanaxaqui late'erai. Nache 'enauac na shiỹaxauapi nquigueua'a, nache Somaye nso'ooñi, nache ỹapaxaguen somayepi.

Hechos 20:20

Qalaxaye aỹem saishet da saxaañi da qami' sa'axattapeguema 'enauac nam ishet da qami' ỹo'oteque ca ỹaỹamaqchiguiñi, qataq da qami' sapaxagueeta'ape da huo'o na naponaxac qataq da huañalo naua qarma'achilli'.

Hechos 20:27

Cha'aye aỹem ỹataqta sa'axatta 'enauac nam 'eetapeguecpi Ñim Lo'onatac 'Enauacna, qaica ca soxottapiguiñi.

Hechos 5:25

Huaña, nache nque'elaxatta da nvireuo so ỹale, nache da'aqtaxanem somayepi, 'eeta': –Daua ỹale't maye qami' qaỹa'añiỹaiguilo añi ncoñetaxanaxaqui so lỹa na'a'q, daamaye qaltaq huetra'a ye naloteuga añi no'onaxanaxaqui late'erai, qana'axaỹaxaategalo, ỹapaxagueetrac na shiỹaxauapi.

Hechos 5:42

Nache 'enauaque naua na'axa'te da soomaye queto'oto da dapaxaguenataxaata'ape qataq ỹa'axattrac da So Jesús Lca'aguishec Ñim Lo'onatac 'Enauacna, huaña aso no'onaxanaxaqui late'erai, qataq naua nma'ate.

Deuteronómio 12:32

Qaq ỹoqo'oye qauloitelec qome 'enauac nam qami' samaxaleguete, saishet da huo'o ca qanqotchiñiiuec, huo'otaq da qanqacheeua'a.

Deuteronómio 12:5

qaq cha'aye cam nanataqa' maye lca'ateua'a qome Ñim Nataxala' da yaqto' huaña da qanauane' Ñimaye, da ỹalectaigui na maiche nhuo' le'ecpi. Qaq nacheca ca qanmichiỹaique da huaña da qatamñiỹot Ñimaye.

Deuteronómio 4:2

Qataq saishet qome da qanqotchiñiiuec, huo'otaq da huo'o ca qanqache ne'enaua na'aqtaqa maye qami' samaxaleguete, nacherata da qaualaqaigueta qome ne'enaua lamaxasoxonaxaco Ñim Nataxala' maye Qanatamnaxala'ai.

Josué 8:35

Qaq saishet da huo'otaq 'oonolec ca na'aqtac naua damaxasoxooleguete co'ollaxa so Moisés da sa itaxaỹaxa'n so Josué, da yaqto' hua'aqchigui naqa'en 'enauac so lapoota'a't Israel le'ecpi, qataq so ỹalectauo 'alpi, qataq so ñaqpiolec, qataq so chegaqauec shiỹaxauapi maye ỹalectaigui somayepi.

Apocalipsis 22:19

Qataq da huo'o ca nqat ca 'oonolec ne'ena la'aqtaxanaxacpi Ñim Lo'onatac 'Enauacna maye nanettalec ana'ana nere, nache Ñim Lo'onatac 'Enauacna saishet da ỹashenem da ỹacona ana ala ara qo'oipaq maye chegaqaigui da nca'alaxa, qataq saishet da ỹashenem da hueta'a ye nỹecpi maye ỹataqta qui'itta, ipacchigui da la'aqtaxanaxac ana'ana nere.