Daniel 4:2 - La'aqtaqa Ñim Lo'onatac 'Enauacna 2013

² Sauotaique da qauaỹachiñi dam lataxac maye saqaỹauanapega, maye aỹem ỹo'otec Ñim Lo'onatac 'Enauacna maye Nataỹaña 'Enauacna.

Daniel 4:2 Iomraidhean Croise

Da na'aqtaguec so Job 7:14

qalaxaye da ỹo'ochaxa huaigui 'anqa'en da icolanaxa, qataq chaqaiqa 'anqa'en naua ichoxonaxaco.

Salmos 51:14

Ñaq aỹem 'eltaxaneguet qome da salaataxan, 'Am maye 'Aro'onatac 'Enauacna, 'Am Ñatamnaxala' maye ica'alaxaqui, yaqto' da so'onaxaatac, nache sa'axattac da no'on da 'arataxac.

Salmos 65:9

'Am ỹataqta 'antela'a ana 'alhua, 'anamaxa na auot qataq ñaxatsheguem 'anqa'en na huetalec, qataq 'auauota'a na la'auaxac da ñaxat 'anqa'en na trigo, qaq 'era da qonetec da 'auqataxanai' na no'onaxa.

Salmos 66:16

Qauanaqui qome 'enauac da qoñiita, nam huo'o naq 'enec naqa'en Ñim Lo'onatac 'Enauacna, qana'axaỹaxañiichigui da qami' sa'axatema da aỹem ỹo'otec Ñimaye.

Salmos 71:18

'Am Ñatamnaxala', saishet qome da aỹem 'aualat, na'aictoxo' da mashe aỹem ỹa'axaiquiolec, qataq ỹapagaq na iqaic cha'aye sauotaique da shecto'ot da sa'aqtaxaateguem da lta'araic 'ara'añaxac ne'ena shiỹaxauapi, qataq ca ñaq natauo maye chegoxoguetpi namayepi.

Daniel 2:1

Qaq co'ollaq mashe dos vi'iye soua lo'onataxanaxaqui' da nta'a so Nabucodonosor, nache somaye huo'o so lchoxonaxacpi, qaq souaxat somayepi, nache se'eso nta'a ỹataqta huo'o da lachetataic, nache saishet da do'oche.

Daniel 3:26

Qaq co'ollaq ime da nasaxauec de'era so Nabucodonosor, nache nquigueua'a so lasom aso nqatelaxanaxaqui, nache na'axannec da lỹaxanaxac, 'eeta': ¡Sadrac, Mesac, Abednego, maye qami' lamaxa'she Ñim Lo'onatac 'Enauacna maye Nataỹaña 'Enauacna, ña qampa'aiuec qome nache qananaiuecna'a! Nache se'esoua tres, nnoxoorec chegoqtroigui so le'eraxa so norec,

Daniel 4:17

Qaq 'era da lapaxañi la'aqtac som qui'itta namaxashecpi maye nauanaxanaxanecpi, yaqto' 'enauac na shiỹaxauapi ỹaỹaten da Ñim Lo'onatac 'Enauacna maye Nataỹaña 'Enauacna, huo'o da la'añaxac da ilo'ogue 'enauac da lo'onataxanaxac na shiỹaxauapi, Ñimaye ỹanem da no'onataxanaxac cam taalec da ỹanem, qataq ỹo'ot da lataxala' na ỹotta'a't shiỹaxauapi cam qaica ca la'amaqchec da ỹalectaigui na shiỹaxauapi.

Daniel 4:24

Qaq 'era dam naigui da lapaxañi Ñim Lo'onatac 'Enauacna maye Nataỹaña 'Enauacna da 'am talec qome 'am nta'a.

Daniel 4:25

Qaq 'am nta'a, 'am qanqateeguesop qome na shiỹaxauapi, nache 'aualectaigui qome na shiguiỹacpi, nache qollectac qome ana huoue qoneta'am ca nauegaxanaxala'pi huaca, nache na 'aỹa ỹapapiaxat na 'aro'oc. Qaq 'era da qome da 'eetec da 'anachaalataxac que'ecaua siete vi'iye 'am nta'a, nache ivitta'a da 'auauatton da Ñim Lo'onatac 'Enauacna maye Nataỹaña 'Enauacna, huo'o da la'añaxac da ilo'ogue da lo'onataxanaxac na shiỹaxauapi ana 'alhua, qataq nacheñi ñim ỹanem da nta'a cam taalec da ỹanem.

Daniel 4:34

Qaq co'ollaq ipacchigui som qalapaxañi da ñeuaxanaguec, nache aỹem Nabucodonosor samato'ot na piguem, nache ñanomteguet da aỹem qanataren nache qaica so aỹoic, qaq huaña nache sanot da ña'achecỹaxac Ñim Lo'onatac 'Enauacna maye Nataỹaña 'Enauacna nache sho'oxoren Ñim nache 'eetai' da nca'altauec, sheeta': «Da 'ara'añaxac qalaq chochaq tatec qome, da 'aro'onataxanaxac qalaq qaica ca loga't.

Daniel 5:18

«Ñim Lo'onatac 'Enauacna maye nataỹaña 'enauacna, ỹanem co'ollaxa da la'amaqchec, llo'oxoyec qataq da 'enec, so nta'a Nabucodonosor, som 'arta'a.

Daniel 6:27

Ñimaye nacheñi ñi nca'alaxaqui qataq huesochiguiñi naqa'en ca shiỹaxaua, Ñim ỹo'ot na na'anecpi maye huo'o da llo'oxoyec, da huo'ot naqa'en na piguem qataq ana 'alhua. Ñimaye, nacheñi ñi nca'alaxateeguesop ñi Daniel, naua nna'ache na llonpi.»

Daniel 7:25

Qataq isheueetac qome Ñim Nataxala' maye Nataỹaña 'Enauacna, qataq nquigaxattañi qome nam nhuo' le'ecpi maye lalamaxat Ñimaye, qataq nmitaique qome ca lataxac da naralaxat na lqataxacpi Ñim Lo'onatac 'Enauacna, qataq nam lataxacpi da na'amqaanataxanaxac, nache na nhuo' le'ecpi maye lalamaxat Ñim Lo'onatac 'Enauacna, huetalec qome da la'añaxac camaye, choche ivittre'c caua tres vi'iye qataq ca laiñi ca lỹa vi'i.

Juan 4:48

Nache So Jesús 'enapega somaye, 'eeta': –Qami' saishettaxa da qaua'amqaanataxañi da huo'otaq saxanaxa da qauauañiichigui na na'anecpi qataq nam sa qaỹauanapigui.

Josué 7:19

Huaña, nache so Josué 'enapega so Acán, 'eeta': «'Am ỹalcolec, ñaq huo'o naq 'enec 'anqa'en qataq 'aỹa'anot da 'ayo'oxonnataxanaxac Ñim Nataxala' maye Natamnaxala' na Israel le'ecpi, nache aỹem 'aua'aqtaxanem de'era 'auo'ot. ¡Saishet da aỹem 'oxocheesop!»