Apocalipsis 1:9 - La'aqtaqa Ñim Lo'onatac 'Enauacna 2013

⁹ Aỹem Juan, maye maiche aỹem qarỹai da sa'amaqtenaqtac So Cristo, cha'aye qami' qataq aỹem huo'o da qarpi'iỹaxac Somaye. Qaq souaxat da ỹataqta huo'o da ipi'iỹaxac Somaye, nache ñeuanaua'a da lo'onataxanaxac Ñim Lo'onatac 'Enauacna 'eeta'am 'enauac da qoñiita: Qataq nataqa'en huo'o da ñeqalanaxac da satata'aguet na lqalaic, sheeta'ama qami'. Qalaxaye nataqa'en huo'o da ỹa'añaxac maye aỹem ỹami' Ñim Lo'onatac 'Enauacna da yaqto' ñala'aguet ne'ena que'eenaxacpi. Qataq souaxat da sa'axattac da la'aqtac Ñimaye qataq da sa'axattac So Jesucristo, nache aỹem qaỹamaxauga ana ỹaqa'ata 'alhua maye le'enaxat Patmos.

Nuevo Testamento Toba Sur

⁹ Qaq aÿim Juan mayi maichi aÿim qadqaÿai qataq qami' shiita'ama da huo'o da ñique'ejnaxac qataq da sa'axattac da l'onataxanaxac da ilo'ogue 'enauacna ñi Dios qataq da huo'o da ñiualaunaxac mayi chigoqo'ot so Jesucristo. Qaq aÿim qaicoñittai', sootaña añi delec, l'enaxat da Patmos, souaxat da aÿim sa'axattac da l'aqtac ñi Dios mayi qomi' nda'alo so Jesucristo.

Nuevo Testamento Toba Sombrero Negro

⁹ Jayem Juan 'me mach'e jayem adaqayai, qama'le qo'mi nepi'iyaĝa'u da'me qademe'teguet joñe'me Jesús. Qo'che' 'uo da'me qadachoĝodec nayi, nataq'aen 'uo da'me qat'añaĝac da'me qaedi ñapogaĝadenaq, chayovida'a da'me yataqata jouaqataue da'me lejaliaĝa joñe'me Dios. Da'me jayem jonetalegue ca'li di'me comadaĝa jo'ne lenaĝat da'me Patmos, yajouaĝat da'me ja'aĝate'tape naa'me 'laqataĝanaĝaco joñe'me Dios, nach'enaua jo'ne dechoqotaĝatec joñe'me Jesús.

Apocalipsis 1:9 Iomraidhean Croise

Mateo 20:23

Nache So Jesús 'enapeco': –Aja', 'eesa qami' da qalota qome da qanque'eenaxaqui qoñiỹa'am Aỹem. Qalaxaye 'oonolec Ñim Ita'a maye ỹan ca la'aqtac da ỹanem da la'amaqchec cam taalec da ỹami'. Qaq de'era saishet da nache Aỹem da san ca ỹa'aqtac.

Marcos 10:39

Nache soomaye 'ena'apo': –Aja', seshetaq. Nache So Jesús 'enapeco': –Ỹataqta 'eesa qome da qami' lta'araic da qanque'eenaxaqui, qoñiỹa'am Aỹem.

Juan 16:33

Qaq Aỹem qami' sa'axatema 'enauac de'era, yaqto' huo'o da qarlagaxayiqui da Aỹem qana'ayeetaua'a. Qami' ana 'alhua maye qoviitalec huo'o da qanque'eenaxaqui. Qalaxaye qana'añaxache qome, cha'aye Aỹem mashe sogote da ỹoxonec nam 'onataxacpi maye huetalec ana 'alhua.

Hechos 1:15

Qaq se'esoua na'axa'te, nache so Pedro nachangui na laiñi so lqaỹañecpi maye ivi' ye ciento veinte shiỹaxauapi. Nache 'enapega, 'eeta':

Hechos 14:22

Nache soomaye ỹataqta huaqattrega na 'amqaanataxanaxaicpi maye netaleguete ne'enaua 'aleu', da yaqto' ỹataqta na'añaxatec da lpi'iỹaxac So Jesús. Qataq nataqa'en 'ena'apo' soomaye: Iuen da hua'auñi da huo'o da qanque'eenaxac da yaqto' senoxonaxaua'a da lo'onataxanaxac Ñim Lo'onatac 'Enauacna.

Romanos 8:17

Qaq nagui da mashe qomi' llalqa, nache nataqa'en qomi' taleguete 'enauac nam 'onaxaic maye iqataxaatapigui' Ñimaye da qomi' ỹanema. Qaq 'enauac ỹataqta ñeuanaqte' So Cristo, qaq da huo'otaq huo'o da qanque'eenaxac da shenaqta'am Somaye, nache nataqa'en ỹoqta 'eesa da ñeuanaqaua'a Somaye da llo'oxoyec maye ỹaconeguet qome.

Romanos 8:25

Qalaxaye da huo'o ca seuataqtaique da saxanaxa da selaqa'a, nache iuen da huo'o da qarhualaxavic da seuataqtaique.

2 Corintios 1:7

Qomi' huo'o da qanaquitaxac da qoñiita, cha'aye saỹaanaq da nagui da huo'o da qanque'eenaxaqui, nache nataqa'en Ñim Lo'onatac 'Enauacna qami' ỹa'añaqche't.

Filipenses 1:7

Qaq ỹataqta ỹaỹamaqchiguiñi da iuennataxac da 'enauac qami' seuennategalo, cha'aye ỹataqta qami' sauoteque, cha'aye qami' nataqa'en qanhuañiỹaua'a da no'onataxanaxac maye chegaqaigui da lsoxoyec Ñim Lo'onatac 'Enauacna maye aỹem ipataxalec. Qaq da aỹem qaicoñettai' huo'otaq aỹem qaỹataxaato'ot ca nmit ca nasouaxashetpi, qalaq qami' nache 'eetai' da aỹem qatauñiitac da yaqto' setaqlec da 'eesa lataxac dam no'on na'axaỹaxac.

Filipenses 4:14

Qalaxaye qami' ỹataqta ỹaỹamaqchiguiñi de'era qartaunaxanaxaqui, da aỹem qautauañi souaxat da huo'o da iuenaxanaxa.

2 Ts 3:5

Huo'o da qaryaxa da So Qarataxala' qami' itauneque da ỹataqta qauauochec na laỹepi shiỹaxauapi, 'eeta'am Ñim Lo'onatac 'Enauacna da ỹauotec 'enauac namayepi, qataq da qami' ỹanema da qara'añaxaqui da yaqto' ishet da qauataiỹa'aguet 'enauac da qanque'eenaxaqui, qoñiita'am So Cristo da nala'aguet co'ollaxa na nque'eenaxacpi.

2 Timoteo 1:8

Ỹoqo'oye saisheto' da 'ancoxolec da 'aua'axatec So Qarataxala' Jesús. Nataqa'en saisheto' da huo'o da 'arcoxo, souaxat da aỹem qaicoñettai', sasoilec Somaye. Nachaqrato' da 'anhuanaua'a de'era que'eenaxac souaxat da no'on na'axaỹaxac maye chegaqaigui da nca'alaxa, qaq Ñim Lo'onatac 'Enauacna 'am itaunec qome da 'ara'añaxac da yaqto' 'anala'aguet 'enauac ne'ena 'anque'eenaxacpi.

Hebreos 10:36

Ỹataqta qami' 'añaxaiqa qome saishet da huo'o ca chegoqchigui qanqa'eñi da qaỹa'axañiiuec da qarpi'iỹaxaqui da qoviitaigui da qanque'eenaxaqui, yaqto' qaupaquiitelec da qauo'oche dam 'eetapeguec Ñim Lo'onatac 'Enauacna qataq qauacoñiiguet dam qami' ỹachaxanapecoto Ñimaye.

1 Pedro 5:1

Sauotaique da sami' da iqataxac na lataxala'pi na 'amqaanataxanaxaicpi. Cha'aye aỹem nataqa'en aỹem nataxala' shena'am namayepi qataq sauaachigui da 'eetec da nque'eenaguec So Cristo. Nataqa'en qom ñe'eguelaq So Cristo da ỹachaxan dam qaica ca 'ena'am llo'oxoyec, nache aỹem ñeuanaua'a da llo'oxoyec Somaye. Qaq da iqataxac 'eeta':

Apocalipsis 1:1

Ñim Lo'onatac 'Enauacna ỹachaxana So Jesucristo, nam mashe nayeeta'a da yo'oq da yaqto' Somaye ỹaỹaanaxanaxanec na lo'onataxanaxanecpi. Qaq ỹoqo'oye So Jesucristo da'aqtaxanem so Juan maye lamaxashec, ỹachegoxotchigui so lamaxashec piguem le'ec Ñim Lo'onatac 'Enauacna; qaq so Juan, nache ỹiyiñi 'enauac de'era na'aqtaxanaxac maye ỹataqta 'eesa.

Apocalipsis 1:4

Aỹem Juan, samaxa ana ỹere qataq sequiita'ape naua siete 'aleu' maye netaleguete na ỹa'amaqten so Jesús maye netaigui ye 'alhua Asia. Ñim Lo'onatac 'Enauacna, Ñim nache 'eetai' da huo'o, qataq Ñim do'onataxaatac nagui, qataq naỹa'acna. Aỹem ỹataqta huo'o da iyaxa da Ñim Lo'onatac 'Enauacna qataq So Jesucristo qataq soua siete na'añaxaco saqcha'alo maye nachattraua'a añi nso'onaxaqui Ñimaye, da qami' ỹauoteque qataq qami' ỹanema ca qarlagaxayiqui. Sa'amaqtenaq da So Jesucristo qomi' ỹauoteque qataq qomi' da'aqtaxanema da 'eesa na'aqtaguec Ñim Lo'onatac 'Enauacna. So Jesucristo nacheso so la'auaxanec da nca'aleeguesop da nleuaxa, qataq nacheso so ilotague' 'enauac nam nta'alpi maye ilotague' nam 'alhuapi. Qataq chegoqchigui da l-leuaxa So Jesucristo da Ñim Lo'onatac 'Enauacna ỹapalaxat na qarasouaxashetpi.

Apocalipsis 1:6

Nataqa'en So Cristo qomi' ỹanema da qaro'onataxanaxac da 'eeta'am da lo'onataxanaxac na nta'alpi maye ilotague' na 'alhuapi qataq qomi' ỹanaguilo da qomi' ltaxaỹaxanaxanaqa naqa'en na shiỹaxauapi da so'onataxanaqot Ñim Lo'onatac 'Enauacna maye Lta'a. Qaq ỹoqo'oye ¡'Enauac da qoñiita qavio'oxoyiñi So Jesucristo, cha'aye 'oonolec Somaye da hueto'ot 'enauac da na'añaxac ana 'alhua! Aja', nache 'eetec.

Apocalipsis 11:7

Qalaxaye que'ecaua dos ỹa'aqtaxanaxanaqa qome da ima't dam ỹa'axattrac dam 'eesa ỹa'aqtaxanaxac, nache so shiguiỹac leguemaxaic maye chegaqaña som laponqa' nam leuaxaicpi, iloquiaxa'n caamaye. Ime, qaq loxonqa, nache ỹalaua't.

Apocalipsis 12:11

Cha'aye da l-leuaxa Ñi Qagueta Llalec, qataq da na'aqtaguec Ñimaye, nachera da iqallem. So qarqaỹañicpi saishet co'ollaxa da ñe'etac, nachaqrata da ỹan da nachaalataxac da qaỹalauat.

Apocalipsis 12:17

Qaq ỹoqo'oye se'eso shiguiỹac leguemaxaic ỹataqta dalemataỹa asa'aso 'alo, nache jec da iloquiaxan na no'onañi llalaqpi asomaye, qaq damaye 'eeta', nam ỹataqta ỹalaxaguet nam lamaxasoxonaxacpi Ñim Lo'onatac 'Enauacna, qataq saq ỹaxanec da lpi'iỹaxac So Jesús.

Apocalipsis 13:10

«Cam taalec da taua'a qanqa'en añi ncoñetaxanaxaqui, qalaq nachañi qaỹauegueua'a; qaq cam taalec da qaira'a ca ỹeelonec da qaỹalauat, qaq camaye qaỹauota'a ỹeelonec da qaỹalauat.» Qaq de'era naigui da na lalamaxatpi Ñim Lo'onatac 'Enauacna, iuen da ỹaỹaten da na'añaxateguet da nque'eenaxac, qataq queto'ot da lpi'iỹaxac Ñimaye.

Apocalipsis 14:12

Qaq ỹoqo'oye na lalamaxatpi Ñim Lo'onatac 'Enauacna, iuen da ỹaỹaten da lhueneguet qataq na'añaxateguet na lqalaiguesat qataq na nque'eenaxacpi. Nataqa'en iuen da ỹalaxaguet nam lamaxasoxonaxacpi Ñim Lo'onatac 'Enauacna qataq queto'ot da ỹa'amaqteetac So Jesús.

Apocalipsis 19:10

Nache aỹem sa'aroto naua illecte so namaxashec piguem le'ec da yaqto' sho'oxoren, qalaxaye somaye aỹem 'enapega, 'eeta': «¡Saishet da nache qonetec de'era! No'on da 'avio'oxoren qome Ñim Lo'onatac 'Enauacna, cha'aye aỹem nataqa'en so'onataxaatacot sheeta'am 'am, qataq 'enauac nam queto'ot da ỹa'amaqteetac da na'aqtaxanaxac maye chegoqo'ot So Jesús.» Cha'aye de'era la'aqtaxanaxac So Jesús, maye ỹapaxaguenec namayepi nachera da ỹa'añaqchet na shiỹaxauapi, yaqto' nache queto'ot da ỹa'axattac damaye.

Apocalipsis 20:4

Qaq can ime, nache sela'a aso so'onaxaquipi. Qaq asomayepi nso'ootangui som qaỹalauatpi co'ollaxa, souaxat da saishet da ỹaxanec da lpi'iỹaxac So Jesús, qataq da la'aqtaxanaxac Ñim Lo'onatac 'Enauacna. Somayepi nacheso so saishet da ỹo'oxoren so shiguiỹac leguemaxaic qataq som ne'enaqtac maye lqui'i somaye, qataq saishet da nasheneguet aso la'anaxanaqte da yaqto' qaỹa'an na latap, qataq na lhuaq. Qataq sela'a somayepi da qaltaq nca'alec, nache Ñim Lo'onatac 'Enauacna ỹami' da lo'onataxanaxaua Ñim Lca'aguishec Ñimaye, choche iviraxattraue'c caua mil vi'iye.

Apocalipsis 3:10

'Enauac na huetalec ana 'alhua ivireguet qome na lqalaiguesat qataq nque'eenaxacpi. Huaña qome, nache saỹaten ca Aỹem pi'iỹa'a qataq ca saishet da Aỹem pi'iỹa'a. Qaq 'am qalaxaye 'am ñepaxattalec, cha'aye Aỹem 'aualaxaguet co'ollaq 'am shenapega da saishet da 'axanec da 'arpi'iỹaxac Aỹem.

Apocalipsis 6:9

Qaq se'eso Qagueta Llalec can qaltaq ivita da nqat aso cinco soua na'anaxanaqtel, nache sela'a da som qaỹalauatpi co'ollaxa, souaxat da ỹa'axattac da la'aqtac Ñim Lo'onatac 'Enauacna, hueto'ot aso nca'atoxonaxalate.

Apocalipsis 7:14

Nache aỹem sasateguet somaye sheeta': –'Am ỹataxala', 'am maye 'auaỹaten. Nache somaye 'eeta': –«Qomye ne'ena, nachena nam saishet da ileu co'ollaq huaigui so lta'araic que'eenaxac ana 'alhua. Namayepi ỹataqta huo'o da lpi'iỹaxac Ñim Lo'onatac 'Enauacna. Qaq Ñimaye nache ỹapalaxat na lasouaxashetpi, chegoqchigui da l-leuaxa Ñi Qagueta Llalec.