Apocalipsis 1:4 - La'aqtaqa Ñim Lo'onatac 'Enauacna 2013

^4-5 Aỹem Juan, samaxa ana ỹere qataq sequiita'ape naua siete 'aleu' maye netaleguete na ỹa'amaqten so Jesús maye netaigui ye 'alhua Asia. Ñim Lo'onatac 'Enauacna, Ñim nache 'eetai' da huo'o, qataq Ñim do'onataxaatac nagui, qataq naỹa'acna. Aỹem ỹataqta huo'o da iyaxa da Ñim Lo'onatac 'Enauacna qataq So Jesucristo qataq soua siete na'añaxaco saqcha'alo maye nachattraua'a añi nso'onaxaqui Ñimaye, da qami' ỹauoteque qataq qami' ỹanema ca qarlagaxayiqui. Sa'amaqtenaq da So Jesucristo qomi' ỹauoteque qataq qomi' da'aqtaxanema da 'eesa na'aqtaguec Ñim Lo'onatac 'Enauacna. So Jesucristo nacheso so la'auaxanec da nca'aleeguesop da nleuaxa, qataq nacheso so ilotague' 'enauac nam nta'alpi maye ilotague' nam 'alhuapi. Qataq chegoqchigui da l-leuaxa So Jesucristo da Ñim Lo'onatac 'Enauacna ỹapalaxat na qarasouaxashetpi.

Nuevo Testamento Toba Sur

⁴ Aÿim Juan, samaxa ana ÿide naua siete 'ale'u mayi netalguete na 'amqajnataxanaxaicpi mayi netaigui yi 'alhua Asia. Qami' ÿaqaÿañicpi, ñishitaique da qami' qauacoñiiguet da nqouagaxanaqtaic qataq da nlagaxayic mayi chigoqo'ot ñi Dios, ñim nachi 'eetai' da huo'o, qataq ñim do'onataxaatac nagui, qataq naÿa'cna. Qataq nataq'en chigoqo'ot nam siete saq cha'api mayi datatau'a ca nso'onqa' ñimayi.

Nuevo Testamento Toba Sombrero Negro

⁴ Jayem Juan ami jep'iye'n nayi, da'me ami Dios lec'oqo'tepi jo'ne oñiya'ña di'me aleua jo'ne Asia. Auacoñiyeguet nayi da'me nichoĝodenataĝanaĝac nataq'aen da'me 'nemaĝac jo'ne chiyoqo'ot joñe'me jo'ne jalchi'ena 'uo, nataq'aen nach'e eta't da'me qo'mi ue'tajopa, choqoñaa'me siete nepaqa'li ja 'nalo'te jo'ne dajoteda'aguet da'me lejaliaqa' joñe'me,

Apocalipsis 1:4 Iomraidhean Croise

Salmos 90:2

Co'ollaq saxanaxa da huo'o ana qasoxonaxapi, qataq saxanaxa da yo'oq ana 'alhua qataq 'enauac na huetalec, chegoqchiguiña co'ollaq la'atchiguiñi 'enauacna, qataq ivitta'a ca pa'atec na'a'q, da nache 'amta da 'Am Atamnaxala'.

Éxodo 3:14

Nache Ñim Lo'onatac 'Enauacna 'enapego' so Moisés, 'eeta': «Aỹem maye nache 'eetai' da qami' soota'agueta.» Qaq 'era qome da 'ara'aqtac da qonapega ye Israel le'ecpi, qoneta': «Ñim nache 'eetai' da qomi' hueta'agueta, aỹem namaxalo qami'.»

Isaías 11:2

Qaq so Saqcha'a La'añaxac Ñim Nataxala' nache hueta'aguet qome camaye, nache ỹanem da laỹaanec, laỹaanataxanaxac, sanqalat, la'añaxac, lauattonaxanaxac, qataq ỹalaxaguet Ñim Nataxala'.

Isaías 41:4

¿Negue't co'ollaxa cam ỹo'ot de'era lataxac? qataq ¿negue't ca ỹo'ot da llecỹaxac nam shiỹaxauapi dam chegoqta'ague? Aỹem Nataxala', nachaỹemta da Aỹem Atamnaxala', Aỹem sa'auchiguiñi qataq sepa'atec.

Isaías 57:15

Cha'aye Ñim Qaỹoqotcheguemec, Ñim chochaq tatec da nca'altauec maye le'enaxat Qui'itta, 'eeta': «Aỹem maye soota'a ye ỹataqta qaỹoqotcheguemec qataq sa qaishetapec, qalaxaye nataqa'en soota'aguet ca qaica ca la'amaqchec qataq ca huo'o da laquicoxo, nache samem da la'añaxac qataq sa'añaqchet.

Miqueas 5:2

Qaq 'am Belén, Efrata maye 'am saq 'amaqtaq da 'aualectaigui nam nhuo' le'ecpi na Judá, qalaq nache 'am chegoxoigui cam nataxala' qome na Israel, maye chegoxoguet so ỹataqta hua'auchiguiñi nhuo' le'ecpi.

Zacarías 3:9

'Am Josué, ña 'aumeten nam coma' maye 'am sataxanot, namaye siete naua laỹel. Qaq nache Aỹem qome da sauo'o ca serelec namaye. Qaq ime qome nache huaigui ñaqa'en ca 'oonolec na'a'q da sapalaxat na lasouaxashetpi nam netalec ne'ena 'alhua.

Zacarías 4:10

«Cha'aye nam qaica ca ỹanapoigui som saq 'amaqtaq maye chegoqchiguiña de'era no'onataxanaxac, namayepi ntonapigui' qom ila'a so Zorobabel da imatta de'era no'onataxanaxac.» Qaq ime, nache so namaxashec piguem le'ec qaltaq, 'eeta': «Ñe'eñeua siete ncoỹaraxanaxaqui', nache la'aitel Ñim Nataxala', maye imeteetrac 'enauac ana 'alhua.»

Zacarías 6:5

Qaq so namaxashec aỹem ỹasateguet, 'eeta': «Ne'enaua nachenaua naua cuatro la'a'che, maye chegoqtrot Ñim Nataxala' maye lalamaqte 'enauac ana 'alhua.

Juan 1:1

Co'ollaq saxanaxa da qaỹo'ot 'enauacna, qaq nale'ena da huo'o So Na'aqtac. Qaq se'eso Na'aqtac hueta'aguet Ñim Lo'onatac 'Enauacna, qaq So Na'aqtac nacheñi Ñim Lo'onatac 'Enauacna.

Hechos 19:10

Qaq 'era da 'eetec, choche iviraxattraue'c soua dos vi'iye. Nache ỹataqta 'enauac na netaña ye 'alhua Asia, judiopi qataq nam saishet da judiopi, na'axaỹaxaatega da na'aqtaguec So Qarataxala' Jesús.

Hechos 2:9

Ye qomi' huo'o nam chegaqa'a ye 'alhua Partia, qataq ye Media, qataq ye Elam, qataq ye Mesopotamia, qataq ye Judea, qataq ye Capadocia, qataq ye Ponto, qataq ye 'alhua Asia,

Romanos 1:7

Ñim Lo'onatac 'Enauacna qami' lca'agui'she da yaqto' qauallicỹoigui na lalamaxatpi Ñimaye. Qaq aỹem seỹaxanot Ñim Lo'onatac 'Enauacna maye Qarta'a qataq So Qarataxala' Jesucristo da qami' ỹachaxanalo da lsoxoyec qataq qami' ỹanema da l-lagaxayec.

2 Corintios 1:2

Ñim Lo'onatac 'Enauacna maye Qarta'a qataq So Qarataxala' Jesucristo, Som aỹem lca'aua'a da ỹauo'o aỹem lamaxashec, Somaye qami' ỹaaleguete da lsoxoyec qataq da l-lagaxayec.

Hebreos 13:8

So Jesucristo saishet da naralaxat da lataxac: Somaye nache 'eetai'.

Santiago 1:17

Ñim Lo'onatac 'Enauacna nacheñi ñi qomi' ỹanema 'enauac na 'onaxaic qataq nalochiguiñi. Cha'aye Ñimaye nacheñi ñi maiche lo'onata 'enauac ana huaqaañipi maye neto'ot na piguem, qataq Ñimaye saishet da nqochen da lataxac.

Apocalipsis 1:1

Ñim Lo'onatac 'Enauacna ỹachaxana So Jesucristo, nam mashe nayeeta'a da yo'oq da yaqto' Somaye ỹaỹaanaxanaxanec na lo'onataxanaxanecpi. Qaq ỹoqo'oye So Jesucristo da'aqtaxanem so Juan maye lamaxashec, ỹachegoxotchigui so lamaxashec piguem le'ec Ñim Lo'onatac 'Enauacna; qaq so Juan, nache ỹiyiñi 'enauac de'era na'aqtaxanaxac maye ỹataqta 'eesa.

Apocalipsis 1:11

Qaq se'eso nvilỹaxac aỹem 'enapega, 'eeta': «'Auauo'o aca 'ere da 'iyiñi nam 'aulota'api, ime, qaq 'auamaxalo naua siete 'aleu' maye hueta'alo nam ỹa'amaqten So Jesús maye huetaigui ye 'alhua Asia, yem nỹecpi ye Éfeso, Esmirna, Pérgamo, Tiatira, Sardis, Filadelfia, qataq ye Laodicea.»

Apocalipsis 1:17

Qaq can sela'a, nache souañi, ñalo'oto naua lchel Somaye, 'eeta'am da seleu. Qalaxaye Somaye ỹauota'a na lhuaq aloic da aỹem ỹashel-lec, nache aỹem 'enapega, 'eeta': Saishet da 'añi'i. Aỹem maye Nachaỹem la'auaxanec, qataq Aỹem maye Nachaỹem sepa'atec,

Apocalipsis 1:20

Aỹem 'am sa'aqtaxanem dam saqcha'a naiguilo soua siete huaqaañi, maye 'auauaachiguilo da huetaiguilo na ihuaq qataq dam saqcha'a naiguilo soua siete ncoỹaraxanaxaqui' maye chegaqaiguilo na oro. Soua siete huaqaañi, naiguilo naua lamaxa'she Ñim Lo'onatac 'Enauacna maye ilotagueto nam ỹa'amaqten So Jesús maye netaleguete naua siete 'aleu'. Qaq soua siete ncoỹaraxanaxaqui' naigui na 'amqaanataxanaxaicpi maye netaleguete naua siete 'aleu'.

Apocalipsis 1:8

Ñim Nataxala' maye qaica ca 'ena'am da la'añaxac, Ñim nache 'eetai' da huo'o qataq Ñim do'onataxaatac nagui qataq Ñim mashe nayeetai', 'eeta' da la'aqtac: [«Aỹem maye Nachaỹem la'atchiguiñi, qataq Nachaỹem pa'atec.»]

Apocalipsis 1:9

Aỹem Juan, maye maiche aỹem qarỹai da sa'amaqtenaqtac So Cristo, cha'aye qami' qataq aỹem huo'o da qarpi'iỹaxac Somaye. Qaq souaxat da ỹataqta huo'o da ipi'iỹaxac Somaye, nache ñeuanaua'a da lo'onataxanaxac Ñim Lo'onatac 'Enauacna 'eeta'am 'enauac da qoñiita: Qataq nataqa'en huo'o da ñeqalanaxac da satata'aguet na lqalaic, sheeta'ama qami'. Qalaxaye nataqa'en huo'o da ỹa'añaxac maye aỹem ỹami' Ñim Lo'onatac 'Enauacna da yaqto' ñala'aguet ne'ena que'eenaxacpi. Qataq souaxat da sa'axattac da la'aqtac Ñimaye qataq da sa'axattac So Jesucristo, nache aỹem qaỹamaxauga ana ỹaqa'ata 'alhua maye le'enaxat Patmos.

Apocalipsis 16:5

Ime, qaq sa'axaỹa som namaxashec piguem le'ec maye hueto'ot da na'añaxac da ilotague' na 'etaxat, 'eeta': «'Am maye 'Aro'onatac 'Enauacna, 'Am maye ỹataqta 'am qui'itta, qataq chochaq tatec da 'anca'altauec qataq ỹaỹamaqchiguiñi da huo'o ye 'arhuaxanaxanaxac.

Apocalipsis 2:12

«Nataqa'en 'auamaxa qome aca 'ere ñi namaxashec maye ilotague' nam ỹa'amaqten So Jesús maye netaña ye nỹecpi ye Pérgamo. Qoneta': ‹Aỹem maye sauota'a na ỹainec maye ỹataqta shetteguet qataq dos naua ala'api. Ñaq 'ana'axaỹaxana da 'am sa'axatem:

Apocalipsis 2:18

«Nataqa'en 'auauo'o aca 'ere, nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Tiatira. Qoneta': ‹¡Aỹem maye Aỹem Llalec Ñim Lo'onatac 'Enauacna! Naua ỹa'ai'te 'eeta'ama na le'eraxa na norec, qaq naua ichel qalaq qashelectrapiguiñi 'eeta'am da lqashelgaxa na lcat le'enaxat bronce da ime da nqatelaguec. Ñaq 'ana'axaỹaxana dam 'am sa'axatem:

Apocalipsis 2:8

«'Auamaxa qome aca 'ere ñi namaxashec maye ilotague' nam ỹa'amaqten So Jesús maye netaña ye nỹecpi ye Esmirna. Qoneta': ‹Aỹem maye Aỹem la'auaxanec qataq sepa'atec. ¡Aỹem seleu co'ollaxa, qalaxaye qaltaq she'eguelaxalec da ñeca'alec! Ñaq 'ana'axaỹaxana dam 'am sa'aqtaxanem:

Apocalipsis 22:16

«Aỹem samaq so ỹamaxashec piguem le'ec, da yaqto' da'aqtaxanem 'enauac de'era nam Aỹem ỹa'amaqteetac. Qaq Nachaỹem maye sachegoxoguet so nta'a David. Qataq nache Aỹem huaqaañi yo'oxoñi lashe maye ỹataqta 'eroigui da yo'oxoñitai'.»

Apocalipsis 22:8

Qaq aỹem Juan sa'aqchigui qataq sauaachigui 'enauac ne'enapi. Qaq can ime da sa'aqchigui qataq sauaachigui, nache aỹem sa'aroto naua illecte so namaxashec piguem le'ec maye aỹem ỹachaxaatega 'enauac ne'ena da sauotaique da ñatamnot.

Apocalipsis 3:1

«'Auauo'o aca 'ere, nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Sardis. Qoneta': ‹Aỹem maye Aỹem hueto'oto soua siete saq cha'alo la'añaxaco Ñim Lo'onatac 'Enauacna qataq soua siete huaqaañi: Ñaq 'ana'axaỹaxana dam 'am sa'axatem: Aỹem saỹaten 'enauac nam 'auo'ottacpi, qataq saỹaten da 'ana'aqtaguec da qoỹeetega Aỹem 'aualaxaguet. Qalaxaye de'era saishet da 'en.

Apocalipsis 3:14

'Auauo'o nataqa'en aca 'ere, ime nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Laodicea. Qoneta': ¡Aỹem maye ỹe'enaxat da 'Eesa! Qaq ỹe'enaxat de'era, cha'aye sapaxaguenataxaateguec da 'eesa na'aqtaguec Ñim Lo'onatac 'Enauacna, qaq saishet da satenataxaatac. Qataq chegoqchigui Aỹem da Ñim Lo'onatacna ỹo'ot 'enauacna. Ñaq 'ana'axaỹaxana dam 'am sa'axatem:

Apocalipsis 3:7

Nataqa'en 'auauo'o aca 'ere, nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Filadelfia. Qoneta': «Aỹem maye ỹoqta 'eesa da Aỹem Llalec Ñim Lo'onatac 'Enauacna qataq selo'ogue da lo'onataxanaxac co'ollaxa so nta'a David. Da ivita da sauatoigui ca lasom, nache qaica ca ishet da ỹapogui, qaq da sapogui qalaq qaica ca ỹe'eguelaxalec da ỹauatoigui. Qaq nagui ñaq 'ana'axaỹaxana dam 'am sa'axatem:

Apocalipsis 4:5

Qaq asa'aso so'onaxaqui chegoqtapegueua'a na nqashelgaxa, qataq nllimiaxa, qataq datateguet asomaye soua siete ncoỹaraxanaxaqui' 'ettaiguilo, maye nachesoua soua siete saq cha'alo la'añaxaco Ñim Lo'onatac 'Enauacna.

Apocalipsis 4:8

Qaq ñi 'oonolec se'esoua cuatro shiguiỹa'c qalaq ivi' seis ana laua't ñi 'oonolec, qataq nlaxagui ana la'aitepi qataq saishet da ỹa'axaneguet da lo'onaxanaxa'c ye na'a'q qataq ye pe da 'eetra': «¡Ỹataqta qui'itta, ỹataqta qui'itta, ỹataqta qui'itta Ñim Nataxala', Ñim Lo'onatac 'Enauacna maye qaica ca ỹaqalanapec, maye nache 'eetai' da huo'o, Ñim nca'altauec qataq mashe nayeetai'!»

Apocalipsis 5:6

Ime, nache sela'a So Qagueta Llalec hueta'a ye saqaỹapeque aso so'onaxaqui. Qaq Somaye ỹataqta yo'oqta so lliguiñi so ỹeelonec co'ollaq qaipelecot na lqosot da qoỹaneuo da qaỹavigaxat. Qaq Somaye nachattañi, qaq soua shiguiỹa'c maye nca'altraue'c qataq soua veinticuatro nqueroxonqa coleesopa Somaye. Qaq somaye siete naua lcouel qataq siete naua la'ai'te. Qaq nachenaua naua siete saq cha'alo la'añaxaco Ñim Lo'onatac 'Enauacna maye qaỹamaxalec 'enauac ana 'alhua.

Apocalipsis 8:2

Ime, nache sauaachigui se'esoua siete namaxa'she piguem lashe' da qoỹami' ñi 'oonolec ana nasheere, qaq soomaye nachattrañi datataua'alo Ñim Lo'onatac 'Enauacna.