Dokʉ̈ Körɛ̂nte 12:18 - Mbëtï Ndjapä: TÄFO MADƗ̈

¹⁸ Praâbalë Ndjapä nyïkrə atchâme-tə̂ akrə balë balë ëtə̂ tə̂ akrə batə̂ rə̂ ndə̂ su yê nyîndə̂ nə̈.

Dokʉ̈ Körɛ̂nte 12:18 Iomraidhean Croise

Lûke 10:21

Posə̂nə̈ lâme, Kpɨ̂ki Yingö sɨ̂ Jezü la mômô, tche tô rə̂ päkëdə̂: «Bha mê, Gbölö Gbïɛ̈ ndə̂ tchêlafô la tchêbêche, më zä ayîabâ sə̈ mö, bëte mo vüsə̂ rə lâme tə̂ azü ndə̂ küma andjê wâ lanə̈ la a-earə̂ kə̂ wunsə̂ rə, ânyë kə̈ nyîsə̂ nə̈ sə̈ akpîɛ̂kpîɛ̂ azü. Tə̂ lëge nə̈, mo mbö tâ käko bëte momö kä ndə̂ ânyîndə̂ nə̈.

Lûke 12:32

«Nyë mböäbô wa mbô-ê, aɛ̈bro-ngbaga ndə̂ Ndjapä! Bëte äfü tə̂ Bha nyê ndə̂kə̂ za Gbölö gö-gbïɛ̈ sə̈ nyê.

Rômo 12:3

Ndjapä mbö tchôtchô su tə̂ mê. Bëte rə̂ kä ndə̂, më nyîndə̂ kə̂ to rə̂ sə̈ nyê balë balë gbɛ̂, äwäpä nyë wun-abô tə̂ nyê wûn batə̂ agbölö azü-î. Praâbalë nyë wüntə̂ nyê batə̂ ambämbä azü, gundə̂sə̂ rə ndə̂ Kpɨ̂ki Yingö za rə̂ sə̈ akrə balë balë.

Rômo 12:6

Ndjapä kʉ̈ arə ndə̂ Yingö ngbî ngbî sə̈ azə̈ lə̂ köbosə̂ tchôtchô su yê. Âdə ngâ akrə âwa la rə ndə̂ Yingö ndə̂kə̂ to pö batə̂ earə̂ ndə̂ma Ndjapä, äwäpä tche tö pö nə̈ gundə̂sə̂ kə̂ za su yê sə̈ Ndjapä.

Dokʉ̈ Körɛ̂nte 12:11

Praâbalë kütû Kpɨ̂ki Yingö balë lâme kä ndə̂ âmbo arə lâme gbɛ̂. Tche kʉ̈ arə ndə̂ Yingö sə̈ akrə balë balë batə̂ rə̂ ndə̂ su yê nyîndə̂ nə̈.

Dokʉ̈ Körɛ̂nte 12:17

Âdə ndundu tə̂ akrə gbɛ̂ âwatə̂ la, käko tche âdje pö atöko? Âdə ndundu tə̂ akrə gbɛ̂ âwatə̂ tü, käko tche âdje tchâfo rə atöko?

Dokʉ̈ Körɛ̂nte 12:19

Âdə atchâme-tə̂ akrə gbɛ̂ âwa kütû tə̂ ngâ tchâme-tə̂ balë, käko ndundu akrə nə̈ wä bhâ tchêbâ?

Dokʉ̈ Körɛ̂nte 12:24

Andə̂ adɨ̂ atchâme-tə̂ ndə̂ âfû, ngâ pö wâbo tâ-a. Praâbalë Ndjapä nyïkrətə̂ akrə, kə̈ zâ kə̂ lusə̂tə̂ tə̂ gbölösə̂nə̈ sə̈ atchâme-tə̂ ndə̂ azü luabô sə̂nə̈ lû-î.

Dokʉ̈ Körɛ̂nte 12:28

Ädə̈ käko ânyë azü ndə̂ Ndjapä kʉ̂ andjê lə̂ Egilîze tə̂ dokʉ̈ nə̈ də̈ abadjângele. Abïchuû nə̈ də̈ a-earə̂ ndə̂ma Ndjapä. Avötaâ azü nə̈ də̈ a-earə̂ kə̂ nyisə̂ rə, pânə̈ azü ndə̂ tche zâ gbôgbô sə̈ andjê ndə̂kə̂ mbo akpɨ̈ngbɨ̈ rə, pânə̈ azü ndə̂ tche zâ gbôgbô sə̈ andjê ndə̂kə̂ tcha a-earə̂ tə̂kömbô, azü ndə̂ tche zâ gbôgbô sə̈ andjê ndə̂kə̂ za könô sə̈ angâ andjê, azü ndə̂ tche zâ gbôgbô sə̈ andjê ndə̂kə̂ sə tə̂ küma angâ andjê, azü ndə̂ tche zâ gbôgbô sə̈ andjê ndə̂kə̂ to pö la ama gö ngbî ngbî ndə̂ andjë wûn-âbô sə̂nə̈ wûn-î.

Dokʉ̈ Körɛ̂nte 15:38

Pânə̈ Ndjapä zä ngâ tə̂ sə̈ ndjî rəgʉ nə̈ batə̂ rə̂ ndə̂ su yê nyîndə̂ nə̈. Ndjî rəgʉ balë balë wä la tə̂ ndə̂ âwâtə̂ andə̂ ye nə̈.

Dokʉ̈ Körɛ̂nte 3:5

Äpölôse də̈ tchabâ? Ânyë Pôlo də̂ tchabâ? Ârâ də̈ kütû a-earə̂ kua ndə̂ Ndjapä. Lə̂ köbosə̂ ârâ kä ndə̂ nyë zâ su nyê sə̈ Krîsiti. Akrə balë balë lə̂ gbâtə̂ ârâ mbö kua gundə̂sə̂ arə ndə̂ Gbölö Gbïɛ̈ zâ rə̂ sə̈ tchë.

Ëfêze 1:5

tche nyïkrə rə̂ dokʉ̈tchê ndə̂kə̂ pa azə̈ watə̂ abechë ndə̂ yê lə̂ köbosə̂ Jezü Krîsiti, tchôtchô kə̂ mbo rə ndə̂ yê ndə̂ tche nyîndə̂ kə̂ mbo rə̂ kä lâme.

Ëfêze 1:9

Tche mbö rə̂ pä azə̈ wunsə̂ rə ndə̂ tche nyîkrə rə̂, ndə̂ âwâ lə̂ küwû nə̈. Lə̂ tchôtchô kə̂ wun tchô ndə̂ yê, tche nyïkrə rə̂ alême dokʉ̈tchê ndə̂kə̂ mbo rə̂ lə̂ köbosə̂ Krîsiti.

Apökälîbïchi 4:11

«Gbölö gbïɛ̈, Ndjapä ndə̂ ârâ, mo kʉ̈sə̂ nə̈ pä azü voga mö, kə̂ lusə̂ zə̈, tə̂ pö ndə̂ gbôgbô ndə̂ zə̈. Bëte momö kä ndə̂ âmbô arə gbɛ̂. Arə nə̈ lâme wün tchîsûwu, bëte momö kä ndə̂ ânyîndə̂ nə̈.»